Salai Van Lian Thang: Laimi le Buu Tthennak

Laimi Khrihfabu tthennak kong

Buu thennak kong biaruah hawi:

Hi kong hi kan Miphun ah a tlung cuahmahmi harsatnak nganpi pakhat a si caah kan ceih zongah ceihphu a si. Chin miphun hi Lei Khuaza continent (4) ah kan phan cang. Kan phanhnak poah ah bu thencheunak hi harsatnak fakbik (crisis) a si zungzal. Kan ton lonak ram le hmun hrimhrim dawh sawh awk a um ti lo cu!

Zei huaha lo ah kan pa le pipi thinlung kan i hliamkhuai sual dih. Lam ton hmanhah kan i chon ti lo. Rian kan tuanti kho lo tikah dawtnak a zor i, Miphun zor chuknak rangbik ah a kan hruai luh. Thazaang derbik ah a kan chuahtertu a si ko. AIDS zawtnak hri bang a karh thluahmah i vawlei kan culpi dih. Doctrine kan ti theu nain cheukhat cu kan doctrine hmanh kan hrilhfiah kho lem lo. Doctrine ngei lem lo zongah kan i then thiam ko. ZBC zong Associations (28) bak a phan cang, ti a si. Hi ruangah bu thencheu timi hi Lairam kokek (natural) umtuning ruangah tiah kan puh ko ne lai maw? Kan puh a si ahcun hmailei Lairam Lairelnak Sangbik (Chin Legislative Assembly) zong hi pungsan maw kan kalpi ne hnga? Chin Forum tialmi Fift Draft Chinland Constitution zong nih a zulh tak cang mu!

Buu kan i thencheunak zoh tikah step by step in kan kal hi hmuh khawh a si. Minung thongkhat hrawng kan phanh ah buu (10) hrong a chuak. Thonghnih hrawng a phanh cun Peng le Tlang ah kan lut i tamtuk buu a chuak manh cang. Thongnga kan phanh ahcun a khua khua in kan chuak i, buu relcawk kan si ti lo. Cucu tulio Mizoram, Delhi, Malaysia, US, Australia ah kan hmuhmi te hi a si. Cheukhat cu chiatthat zohkhenhnak ah buu kan dirh i a tha, nain a poituk ton nak cu kan 'khua' le 'peng' level hronghrang ah kan i za khim i,  Lairam pumpi (national level) cu kanmah ta kan ruat ti lo. Cu ruangah Miphun tuan rian ah miphun dang nih tluk awk tha ti lo tiangin a kan lonh lengmang.

Salai Joel Ling nih Laimi upa a nih a nih timi minung (50) renglo I Tonnak (interview) a tuahmi cauk chungah Rev. Dr. Simon Pau Khan En chimmi nih ka lung a ka tongh ngaimi cu Khrihfabu kan tam chin lengmang nak a ruangbik hi 'kan tonmi harsatnak (problems) phisinnak ah kan hman' a ti. Mipi pumhkhomhnak lian MBC, ZBC hna ah General Secretary rian lengah miphun tampi i cawhnak MIT ah Principal hna a tuanbal caah a chimmi hi a pemh ngai rua, ka ti. Nain ka lung dii a riam thlu deuh lo. Zeidak ka chungah a tangmi a um ko. Kan thisa ah thencheunak thinlung hi kan pawi chih sual hnga maw ti hna hi ka ruat theu.

Thanchonak kan ram a um lo tikah pehtlaihnak (communication) a chia tuk mi hi thencheunak a ruangbik a si kho maw? ThanTlang um nih Paletwah cu chim hlah, Matupi hmanh kan chankhat ah hmu lo in kan nunnak a liam ko. Pehtlaihnak a har deuh caah a si. Cu pawl ruangah thencheunak a chuah theu hi a si kho maw? Lam tha seh law, zing bazar kalnak men long a hlatmi Hakha le Falam kong hna kan buai peng theu ko hi.  Hi ruangah Chin Miphun kan zapi huap Miphun pa (national father) auh ding setsai kan chuahter kho rih lo hi, a si hnga kho maw? Thanchonak a um tikah kan dam te kun hnga maw?

Kum 100 Khrihfa cu kan tling diam cang. Nain thencheunak cu kan kal tak kho hlei lo. Laimi biaknak lei kan pa deuh a simi hna Rev. Dr. Sang Awr nih ZBC President ka tuan chungah ka hmuhmi cu chunglei ngai in kan i dawt khawh lo mi hi a si, tiah Kawl Cozah le a ruahnak (policy) capar ah a tial. Rev. Dr. Hre Kio nih CBFA Civuipi ah Laimi buu hi lengluang kan chuahmi ka zoh tikah ka thin a phang deuh theu ko, a ti. Rev. Dr. Pau Khan En nih interveiw an tuahnak ah Lairam hi mahte uknak nawl hmu uh sih law kan buaibik cem dingmi cu rualremnak (unity) le peng le tlang tanhnak (localism) kong hi a si lai, a ti. Lairam hmailei kong ruahah Biaknak lei kan pa le pipi cheukhat an mitku a thaw kho lo, mangchia an manh theu ko in a lang. Ram riantuan taksa lei kan pa le zong a si ko lai.

Cu tlukin kan Chin miphun caah tihnung mi harsatnak nganpi a si ko ahcun zeitindah kan tei khawh ne hnga? Laimi kan pa le thithruainak tangah November 2010 ah GCCF dirh ding hna hi kan dam deuhnak a si kho lai maw? Tribal Recon Program (TRP)timi cu maw kan thok colh ko ne lai? Options dang a um kho ti maw? Buu le Buu, minung le minung i fonh hi a harbikmi kan tonmi cu a si bik rua lo. Thinlung i fonh hi a si.

Kei cu hi harsatnak nganpi chung chuahnak caah hnabeiseinak nganpi pakhat ka ngei. Cucu kan Chin mino thangthar hna thinlung ah a si. Miphunpi chuahnak caah the biggest challenge issue pakhat ah tuchun ni thokin khuaruah hram an thok cang ahcun kan miphun nih kan tei caan a phan te ko lai tiah ka zumh. Miphun hruaitu kan ti theo mi hna hi miphun zapi huapin a pumkhom khotu, rualremnak a tuahkhotu hna hi an rak si theu tawn ko rua. Cucu thangthar mino hna liang cungah tuanvo nganpi in ai hngat timi hi tuchun kan ceihmi nih a langhter khun ko rua tiah ka ruah.

Upatnak he,
Van Van

Source:
From: Salai Van Lian Thang <vansalaicinzah@yahoo.com>
Subject: Re: [Lai Forum] Laimi krifa bu tthennak kong
To: LAIFORUM@yahoogroups.com
Date: Sunday, September 5, 2010, 3:06 PM

Thazaang Pek Thei Loin Soisel Thangchiat Lawng A Theimi Careltu

Ka tlangkhenh hi a tha ruam lo nain careltu thenkhat zia a si. Kan Lai Media tete nih theitlei phunphun Kawlca le mirang ca kha Laica in rel kho dingin hehchat in a kan tial piak i Laimi kan van a tha. Ngandamnak lei ca phunphun Laica tein kan rel khawh peng cangmi hna le Thawngpang lei zong reng ngai in kan theih khawh cangmi hna hi thiltha tuk a si.

Media hme le Media ngan hna nih hehchat in theitlei tha taktak hna a kan tial piak i a kan thlah piak lio ah Asi lo deuhmi hna an van thlah sual hin cun Uico nih saa a zuan hnawh bang careltu hna nih soisel thangchiat colh an si. An catialmi a dang reltlak le theihtlak a kan tial piakmi hna ah lawmhnak chim le thazaang pek thei loin zeipipa a chuahpi lomi careltu hna nih soisel thangchiat lawng kan hman hi cu a poi ko.

A si lo deuhmi hna an thlah tial cun bantuk cu thlah tial lo ah a tha e, ti phun in nem tein ti ding khi Tangka kawl nan thiam e, catial awk nan theih lo cun tial loin dai tein um ko, cu e, kha e, bla..bla.. ti kan hmanmi hi i remh pah a hau.

Media pawl nih Online in Tangka an hmuhmi hi anmah pumpak caah maw an hman? zeitin an hman ti kan thei lo.  An khua misifak le kan ram miharsa hna bawmhnak thlitha tuk ah an rak hman khawh zong a fawi. Online in tangkaa an hmuhmi hi thiltha ah an rak hman ziar cun zei thei loin kan soisel thangchiatmi hna hi a tha lo taktak lai. Zeitin an hman ti kan theih lo caah tangka kawl nan thiam e, dai tein um ko u ti hna hi careltu hna nih i tinh pah a hau.

Media hna An catialmi theihphu hna ah thazaang(lawmhnak) kan pek tawn cun kan soisel mi hna hi chim awk a um lem lo nain thazaang zong pek bal loin soisel thangchiat lawng kan hman hi cu aa rem ruam lo. Laimi kan zia kan i tinh a hau.

Kan Media hna nih theitlei thatuk le thawngtha tuk hna a kan tial piak caan a tampi komi thazaang kan pe ruam hna lo. Lawmhnak langhter awk tlak ca tampi a kan thlah tial piak ko nain lawmhnak comment tu an um ruam lo. A si lo deuhmi te an van thlah cun soisel thangchiat colh an simi hi zaangfak an si pah. Lawmhnak le thazaang kan pek hna lo si cun soisel thangchiat zong hi hmang hlah u sih law a thatuk hnga.

Nai ah CCN nih Tawk Eksiksai kong anmah page te ah a thalh komi soitu an um len. Angaingai ti cun soiawk a um rum lo. Anmah page ah an thalhmi a si i anmah nawl a si ko. Salai LTT nih 18 tang zoh loding tiin Kawl Nu pawl lamnak amah page le FB teah a thalhmi ah a zai ziarmi an um pah. Group ah an thlah cun Chin len awk a si ko hnga nain Anmah page le FB ah an thlahmi a si caah zaihnawh awk a um lem lo. Anmah hmun teah an thlahmi cu anmah nawl a si ve ko. A ngaingai ti cun kum 18 tang zoh loding timi Kawlnu pawl lamnak kha Salai LTT Hlan in The Chin News nih a thalh cang i group pakhat ah a zamh chapmi kha soi awk tu a si deuh hnga. The Chin News nih a tha lomi hna zoh cio u ti cu a thalhtu The Chin News molh a si ko.

(Nai ah Kan Lai Nungak A Si Sual Hnga Maw? " ti tlangkhenh in ka thalhmi ah soiseltu nan um pah. Buiapi mi a si lem lo nain careltu nih nan rak i buaipi ai. Cubang in "Kan Lai Media Thenkhat Pawl Nih Salai LTT an tluk ruam lo" ti ka tialmi ah Tial Duhnak thei loin catialtu a ka timi le Salai LTT a thangchiatmi zong um len a si. Laimi kan zia ka theih fian deuh ngai.)

A dang theitlei tialmi hna ah lawmhnak a chimmi le thazaang petu um ruam lo, a si deuh lomi te van thlahnak ah hechat in  soisel colh hman hi cu lung a tha ruam lo. Laimi kan zia tinh ngaingai kan hau.

Iang Ngei Chinram careltu hna nih theih awk cu Iang Ngei Chinram hi Media a si lo tihi a si.

BAPTIST CHURCH NIH A HUAT BIK MI- By: AungThang

Baptist church kalning ah cun zumhnak kong ah nangmah nih Baibal nai fiang ning poh khan na zumh khawh, na chim na rel khawh. Baptist chungah hrintthan khawh a si lo tiah tampi nih an ti. Ahmaan lo. Hrintthan khawh a si. Na duh ah cun a laam zong na laam kho. Baptist Church nih a duh lo bik mi cu:

1. Baptist Khrihfabu soisel. Eg. Mithi Church ti te hna, Liberal Church ti te hna, Thiang Thlarau rianttuannak a pom lomi Church ti te hna etc.

2. Mah zumhning in hoidang Baptist pastor te nih an zumh ve lo ruangah soisel i mah a thiam bik i i ruah

3. Phungchim khawhnak caah Baptist chung i um riangmang i heh! tiah pastor dang pawl doh le soisel

4. Chin Christian College hna khawchia siangin a si ti piak

5. Nizan nai a hrintthar mi i kum tampi pastor a ttuan cang mi zong zeirellonak ninghngal ngai in langhter

6. Bapstist Church members tukfawrh i ruahnak tthalo rawnh tehna, cun mah Khrihfabu i i soilem te hna hi a tlangpi an si.

Baptist Church ah hin thil phunphun ruangah rianttuantu (pastor) sinak in dinh termi an tam ngai cang. Asinain member sinak (membership) in tthawlmi cu a har ngai. Zuri an tthawl hna lo. Zu zuar an tthawl hna lo. Lakfa ngeimi an tthawl hna lo. Lainawng mi an tthawl hna lo. Mifir an tthawl hna lo. Zawtnak tthalo ngeimi an tthawl hna lo. Remhsiam khawhtu an i zuam hna.

Asinain acung lei point 6 ka van ttialmi pawl a tuahmi cu membership zong in an tthawl ko hna. Eg. Hakha Zion Baptist Church nih kan Laimi Evangelist minthang pakhat cu  amah Baptist ah a um riangmang i heh! tiah dong loin a phomh peng hna caah Church membership bakin chuak ko tiah excommunicate an rak tuah. Cutecu Baptist nih mi membership in a phuahmi ka theihmi a si.

Pathian Riantuannak Hi Khuaruahhar A Si Ko.

Siizung in Musalim biaknak a biami pakhat pa cu a rak ra i nan Biak Inn(CEC) ah hin va kal law thla rak in campiak hna seh law na dam lai tiah vancung in an kan fial a ti i, thla ka campiak uh tiah CEC Khrihfabu cu thlacamnak a kan hal. Thla kan cam piak khawh in ka dam cang a ti i a chuak i a kal.
( Hi Thil khuahruahar hi Denmar, Laimi Khrihfa bu Pakhat CEC ah a si)

Pathian hi Musalim, Hindu, Budah le Vawlei cungmi vialte kan damnak asi. Mi zeimi phun ca paoh ah damnak Pathian a si.

Gredit: Chin Emanuel Church Page.

Pathian Party Le Ramkhel Party- By: Hrambik Lian

1. Ramkhel party poah nih mi vialte kan party ah um dih hna seh, ti an duh dih!

Pathian zong nih amah party chung ah mi vialte um dih hna seh, ti a duh ve!

2. Ramlhel party member tling sinak caah register tuah a hau.

Pathian party member tling sinak caah hrin-tthan a herh ve!

3. Ramkhel party kip nih mi vialte an party ah um dih hna seh, ti an duh nain an saduhthah a tling kho lo!

Pathian party chungah mi vialte luhter dih hi Pathian nih a duh nain a saduhthah a tling kho ve lo!

4. Ramkhel party kip nih dohmi le zuamcawhmi an ngeih zungzal!

Paathian party zong nih doyu le zuamcawhtu Satan a ngei ve!

5. Zei ramkhel party chung hmanh ah aa tel lomi le zuamcawhnak zong ah vote zuam lomi minung kan tampi.

Pathian ca zong ah tthat-hnemnak ngei lomi le Satan ca zong ah hman awk ttha huaha lomi minung kan tampi ve!

6. Ramkhel party hmuitinh cu uktu thimnak ah teinak hmuh i term khat chung ram-uknak tlaih a si.

Pathian party hmuitinh cu mi vialte sual sal in luater i zungzal nunnak pek a si! Cucu min dang in, "Vanramkhel party" ti zong in auh khawh a si. "Khel" timi "zulh-dawi, buaipi" tinak a si. Cucaah "ramkhel" vialte lak ah a sang bikmi cu "vanramkhel or vanlei thil khel" hi a si.. Satan party member, Vawlei minung vialte vanlei party/ pathian party ah luhpi hi politic ngan bik cu a si!!!

Cucaah Pathian party (Vanramkhel party) nih a buaipi mi cu term khat ca lawng siloin Zungzal Thihnak le Zungzal Nunnak kong a si. Cu party dotu (opposition party) cu Satan nih chairman a ttuannak party hrin-tthan lo vialte fawnh hi an si! Satan hrauimi Opposition party member poah cu Zungzal hell an tla lai.

Nang zei party ah dah na um?

A BUAI MI BAPTIST KHRIHFABU THAWHKEHNAK. By- Aung Thang

Kan Laimi hi Baptist kan tam bik caah Baptist thawhkehnak theih pah cu a hau. Kei cu Baptist hi ka uar ngai. Baptist ai thawknak tuanbia belte hi a buai deuh I cucu vun ttial ka duh. Baptist thawhkehnak kong he pomning phunli a um. Asinain azei pomning hi dah ahmaan bik ti hi a hohmanh nih a hngal kho lo.

1. Separatist View: Church of England a duh lotu John Smyth nih England ram ah Baptist Church hi dirh a rak duh nain, thah ding a si caah a zam I Netherlands ah 1609 ah an rak dirh mi  a si ti mi zumhnak a si. Hi John Smyth hi amah le amah tipil ai pe
mi a si. Cuhnu ah amah le amah zong ordain ai pemi a si.

2. Anabaptist Influence View: Zumtu cheukhat hna nih Anabaptist cawnpiak ning kha an rak duh tuk caah Anabaptist nawl cawng in Khrihfabu an rak dir ve I cucu Baptsit hi kan si ti mi zumhning a si.

3. Perpetuity View: Baptist Khrihfabu hi reformation in ai thawkmi a si lo. Roman Catholic in a chuak mi kan si lo an ti.  Jesuh hi Baptist a si an ti. Jesuh a zultu zong hi Baptist an si dih an ti.

4. Successive View: Tipil petu Johan chan khan Baptist cu kan rak I thawk cang I, chan khat hnu chan khat kan zumhning le kan I hruai ning kan pehzulh lengmang I atu Baptist hi kan si an ti.

Baptist tambik nih an zumhmi cu pakhatnak hi a si.

Baptist Khrihfabu Zumhnak- By: Aung Thang

BAPTIST KHRIHFABU ZUMHNAK- By Aung Thang

Baptist hi Khrihfabu dang he ai lawh lo nak cu zumhmi tleihtleng (doctrinal statement) an ngeih lo mi hi a si. Vawlei cung Baptist pumpi nih an kalpi ning cu:

1. Soul freedom: Pathian zumh le zumh lo cu pupak nawl cio a si ko ti duhnak a si. Pumpak cio nih duhthimnak nawl kan ngei cio ti a si. I hnek len ding a si lo ti duhnak a si.

2. Church freedom: Baptist khrihfabu hi kan mah tein kan I hruai lai. Lenglei mi/bu nih hna rak kan nawh lo ding ti a si.

3. Bible freedom: Baibal ca hi nai fian ning poh in na zumh khawh ko ti a si. Biana ah, na duh ah cun Adam sual kan I hrawm na ti khawh, na duh lo ah cun kan I hrawm lo na ti khawh. Na duh ah cun hrintthan na pawm khawh, na duh lo ahcun na pom lo khawh. Na duh ah cun na laam kho, na duh lo ah cun na laam lo kho. Nangmah nawl a si ti mi hi Baptist zumhning cu a si. Cucaah pastor tampi cu an zumhning ai dang cio nain buai lo te in hmunkhat ah rian a ttuan tti tthiamtthiam. Mah duh ning poh le mah i fian ning poh in chim cio a si. CUCAAH BAPTIST NIH HRINTTHAN AN POM LO, LAAM AN POM LO TI CU LIH A SI. CUN, BAPTIST NIH CUTIN KHATIN BAIBAL KAN ZUMH TI ZONG HI LIH TTHIAMTTHIAM A SI.

4. Religious freedom: Kan biaknak le cozah cu tthen hrimhrim ding a si tinak a si. Kan biaknak hi cozah nih an kan control ding a si lo ti nak a si.

Cucaah Baptist zumhnak cu freedom phun li hi a si ko.

Rel chapding:
A Buaimi Baptist Khrihfabu Thawnhkenhnak- By: Aung Thang

Kan Lai Nungak Te Asi Sual Hnga Maw?

2017. 03. 29 ah Shwedagon Pagoda, Yangon Zanlei Ninem caan nazi 5-6 kar hrawngah Buddhist pawl Hawihlei hmaifong deuh in kan Lai nungak bantuk te nih Lai hni bantuk ( Lai hni) fenh in Pathian nung lo a biak lio hmanthlak hmuh a si.

Kan Laithil hi Khrihfa biaknak a simi Laimi hna kan thilthuam a si caah kan Lai Thilthuam in pathian dang hmai ah a kunmi le biami hna hmuh ah hin lung a nuam ruam lo i Laimi ah ruah an si tawn. Kan Laithil thuam kan sunsak tuk i pumhnak le Pathian thangthatnak ah kan hman tawnmi Biaknak dang nih an pathian biaknak ah an van hman vemi van hmuh hin cun lung a nuam hrim lo.

Khi nu khi Laimi si hlah seh ti duh a um ngai. Laimi a si tak le si tak lo cu theih a si lo. Kan Lai Thilthuam hi Biaknak dang a biami hna pek i zuarh lengmang hna hi ruah awk a van um pah.

Youtube Zoh Tikah Tuah A Herh Tukmi

Youtube ah hla le Video hna kan zoh tikah tuah a hau ngaimi pakhat cu Like tuah hi a si. Youtube i hla Like tuah cu Thazaang pek khi a si ko. Tahchuhnak ah Emily Ngun Hlei Sung hla sakmi hna kan zoh tikah Like kan tuahmi kha hla a phuahtu le satu thazaang kan pek a si i Hla a edit tu zong thazaang kan pek a si. Cun Kanmah Laimi le Laimi kan hla bia lei zongah thazaang kan chuah le thangzaang kan i pek a si fawn.

Thenkhat cu Youtube i Lai hla hna kan zoh lengmang ko nain Like(thazaang pek) tuah hi kan thei bak lo. FB i hna like tuah cu kan thei ngai le kan cak ngai ko nain Youtube i Kan Hla hna Like tuah cu kan thei bak lo.  FB i Like tuahnak in Youtube i kan hla hna Like tuah hi a tha deuhmi cu a si. Youtube hla, Video zoh tikah Like tuah hi a rak hau tuk caah Ramdang mi nih cun an Video an chiahmi ah Zaangfah tein Like kan tuah piak u tiin ca an tial chih theu tawn.

Chinmi nih Youtube ah Hla kan chiahmi hna hi Cuanh tikah a zohtu kan tam taktak ko nain Like a tuahtu bel hi kan tlawm tuk palia. Hla a zohtu le like a tuahtu tuak tikah aa rem(kaih) bak lo. Thazaang a petu kan tlawm tuk i Lungrawk a si ko. Laimi le Laimi hi mah le mah thazaang i pek zong kan thei lo tuk ruangah kan thancho a harnak hi a si ti ning law ka palh tuk lai lo.

Minung cu thazaang pek hi kan rak herh ciomi a si. Zeilei paoh ah hin Thazaang petu tam deuh paoh a si cun zuam chin duhnak lung a umter. Kanmah Laimi le Laimi a lamkip in thazaang i pe hna u sihlaw Youtube hla kan zoh tik zongah Like(thazaang pek) thei cang hna u sih law thazaang pek hi philh hna hlah u sih.
..............

Mi tam deuh nih an hmuh rel khawhnak hnga Share.....

Note: Like ti cu ka duh, a tha ti a si ko nain thazaang pek tiin ka hman kha ca reltu nih nan theihthiam ko lai dah. Lawmhnak he...

by- Bawihrin Sang Khengmual(Mara)

Zaktang A Nakmi Le A Caakmi Hna 100% In Ngoter Ning

Na zaktang a nak maw? Na zaktang a nak ruangah liangbah Angki le Angki bantawi hna hruk ngam loin na um sual maw? Na phuhrung maw? Na zaktang a nak ruangah Mipi lak ah kut hlir ngam loin na um sual maw? Mah ca hi van rel law an bawmtu a si lai. Zaktang a nakmi hna thianternak caah a tha tukmi an si.

1. Lemon
Lemonon in na zak kha na hnur lai. Minute 5 hnu ah Kuan (ဂြမ္​း) in na hnawh lai. Ti in na tawl lai lo.

2. Aalu(အာလူ)
Aalu kha pen tein na ah lai i na Zak kha Minute 10 hrawng na hnur lai. Na hnur khawh in na roter lai i ti lum in na tawl lai.

3.Baking Soda
Eimi Baking Soda le Ti kha na cawh lai. Mah kha na Zaktang a nak nak zawn ah na thuh lai. Minute 10-15 na chiah lai i mah khawh cun a kik tuk lomi ti in na tawl lai.

4. Zil(သခြာသီး)
Zil kha pen tein na ah lai i Na zak kha minute 10 hrawng na hnur piak lai. Na hnur khawh a ro hun in ti in na tawl lai.

A cunglei i langhtermi hna hin na duhmi pakhat khat kha na tuah lengmang lai. Zarhkhat na tuah cun na Zak tang a ngo deuh ko lai. Thlakhat leng na tuah peng cu na Zak a nakmi kha a ngo viar ko lai.

"Pathian" (Min) Ti Catial Tikah Ralring Taktak A Herh

Kan Biak Khuazing, 'Pathian' ti tial tikah " pathian " tiin le "PT, pt" tiin a si lo ning pi in a tialmi an tam ngai caah ka sia a rem lo ngai i 10/5/2015 zongah ka rak tial bal cang nain tu ah ka van tial than.

Mi tam deuh cu ca kan tial tikah a tawinak in catial kan hmang hna. Asinain Kan biakmi " Pathian " ti tiang hi cu kan hman ding a si lo. A dang cafang cu tial awl le a tawinak in zeiti kan hman zongah a va poi lem lo nain Pathian kha " Pt (or) pt " ti hna in kan tial hi cu a luan deuh ko. Mah bantuk " Pt " (or) " pt " ti tial hi a dik lo ngaimi le kan hman lo ding hrim a si pin ah suallam zong a ngei lomi a si.

Cun Thenkhat nih Pathian ti kha "pathian" or "Pa thian" or "pa thian" tiin a tialmi hna um a si. Hi bantuk tial zong hi a dik lomi a si thiam. " Pathian " ti hi nih tial awl dingin " Pt " (or) " pt " or "pathian" tiin an tial theu tikah van zai ta ko u sih..

Kan biakmi Khuazing " Pathian " timi ca hi kan tial tikah ningcang tein kan tial ding hi a biapi ngai.

Kan biakmi Pathian timi ca hi tial tikah theih a herh tukmi cu a hmai cafang a ngan " P " a si zungzal ding a si. Kan biakmi " Pathian"  ti ca kan tial tikah a hmai cafang kha a hme " p " hman lo ding hrim a si. "Pt (or) pt (or) pathian" tiin tial kan hmanmi hna hi i remh hrim a hau.

pathian ✖ A plah
Pathian ✔ A dik (ahmaan)

Kan Biakmi Khuazing ti kan tial tikah:

• Hman loding hna: 
-Pt, pt, pathian, Pa thian, pa thian, bawipa, Bawi pa, jesuh, Je Suh etc..✖ ✖ ✖

• Hmanding hna: 
-Pathian, PATHIAN, Bawipa, BAWIPA, Jesuh, JESUH etc... ✔ ✔ ✔

Pathian timi hi a hmai cafang a hme pathian " p " hmannak cu a um ve. Mah cu Pathian taktak a si lomi hna ah hman a si. Tahchuhnak ah:
Ammon mi pathian, Molek
Sidon mi pathian, Ashtoreth
Baal pathian, Buddish pathian, tbk...
Mah hna ah hin Khrihfa hna nih pathian ti cafang kha " P'athian " tiin a hmai cafang a ngan " P " kan hman cun kan palh cikcek lai. Pathian taktak an si lo caah, kan biakmi Khuazing an si lo caah Mah bantuk hna ah hin cun " pathian " tiin a hmai cafang a hme " p " hmanding a si lai. Kan biakmi Pathian lawnglawng ah " Pathian " tiin a hmai cafang a ngan  " P " tiin hman ding a si.

Ka tialmi hna nan fiang lo si cun Baibal Deuteronomy le Siangpahrang Cauk hna kha rel uh law tha tein rak zoh uh law nan fian ko lai. Lawmhnak he..(A fiang ko na ti cun Share)

'Chin Miphun Ni' Ah Zeiholh Dah Kan Hman Awk Asi.

Chin Miphun Ni ah zeiholh dah kan hman awk a si ti cu a hmunhma zoh in aa rem bikmi Holh kha kan hman awk a si ko. CMN ah Laiholh theng lawng hman awk a tha lo. Aruang cu Halkha Thantlang, Falam dah lo cu Laiholh a hngal lomi deuh Lawngte an si. Chinmi nih tlangholh kan ngei kho rih lo ruangah kan Chinram ah Laiholh a theimi nakin a thei lomi an tam deuh.

Kan Chin Miphun Ni ah Kawlholh lawng back zong hman ding a si lo. Halkha Thangtlang hna ah cun Laiholh hman awk hrim a si. Kawl holh hman ve ding a si cun Laiholh in chim i Laiholh a thei lomi hna caah Kawlholh in chim zulh. Falam ah cun Falam holh hman i Falam holh a thei lomi hna caah Kawlholh in leh.

Malaysia cun Kawl holh lawng hman loin Laiholh zong hman ve ding a si. Laiholh in chim i Kawlholh in leh. Kawlholh in chim i Laiholh in leh lo ding.

Kan Chin Miphun Ni ah Kawlholh kha Laiholh in leh, Kawlholh kha Falam holh in leh, Mirang holh kha Laiholh in leh ti bantuk cu hman lo ah tha. Kan Chin Miphun Ni cu Kawl pawl le Miphun dang he aa pehtlainak a um lo caah kanmah Holh a hmai ah chiah in hman awk a si.

US lei ahcun Kawl holh hi sau kan hmang kho ti lai lo. Mum 10 hnu cun Kawlholh chiah ta i Laiholh le Mirang holh in hman a si te lai. Kawlholh cu chim lo kanmah Laiholh hmanh ngakchia hna an thiam huaha ti lo caah Laiholh telh loin Mirang holh lawng hna in CMN hman a si te kho.

Kawlram a simi Yongon, Mandalay hna cun Laiholh telh loin Kawlholh lawng zong hei hmang ko usih law Chinram cun kanmah holh te kan hman khawh cun a thabik ko hnga.

-Satu Khaimiechhô

Facebook Hmannak In Thahnemnak Kan Hmuhmi Hna

Tuan deuh ah FB hi Baibal rel le Thlacam hna Don khantu a si maw ti ka rak tial. Atu ah FB in thatnak kan hmuhmi hna tlawmpal ka van tial lai.

1. Lai Catial Leiah Kan Thangcho
Mi tampi FB kan hman hlan cun kanmah tein ca zong kan tial bal hna lo i Lai catial cafangfonh ning hna zei kan thei lo. Asinain FB kan van hmannak in Caholh lei ca an tialmi hna kan hmuh relnak in Lai Catial cafang le cafangfonh lei hna ah theih hngalhnak le thiamnak tampi kan i chap. Laica lawng chim lo Mirang ca zong kan thiamnak zong a si.

2. Thawngpang Kan Theih Khawh Deuh
Mi tampi FB kan hman hlan ahcun Ramleng thawng cu chim lo kanmah ram chung thawngpang hmanh kan thei kho lo nain FB kan van hman hnu cun thawngpang thei ngaitu le chan tiluan a dawi kho vemi dirhhmun ah kan van um. Mah hi FB hman a tha hnem ngainak cu a si an ti.

3. Hawithing Hna He Kan I Pehtlai Kho
Mi tampi FB kan hman hlan cun kan hawithing hna he kan i peh tlai kho lo. Khoi kaa ah a um ti zong kan thei lo. Asinain FB kan van hman hnuin kan i pehtlai kho than hna i kan i nuam ngai hna. Mah hi FB hman a tha hnemtuk nak cu a si an ti.

4. Biaknak Lei Ah
Kan Chin Pastor te lawng si loin Kawl pastor minthang hna sermon tialmi hna kan rel kho i thazaang tamtuk kan la. Vawlei cung Pastor minthang hna Live thlahmi hna fawi tein kan zoh kho i kan thlarau ca ah thahnem tuk a si. FB kan hmannak thawngin Biaknak lei ah thatnak tampi kan hmu.

5. Phaisa Kawlnak Ah
FB hmannak in Chinmi Media Rel tlak le rel tlak lo media hna nih phaisa kawlnak ah van hman thiam a si i hlawknak tampi an hmu hna. Aphun phun ca le thawng a kan leh piak i anmah phaisa hmuhnak ca he kanmah ca he thahnem tuk a van si.

6. DL Kawlnak Ah
Thenkhat Dl a ngei lomi hna nih FB in Dl an kawl i an hmuh. Dl kawlnak ah FB hi thahnemtuk a van si. Fb in aa duhmi hna atu cu Aa thi-um cangmi hna an um len. Mah hi FB hmannak a tha hnemnak cu a si ve ko.

FB kan hmannak thawngin Ramkhel lei le Biaknak lei le ngandamnak lei zongah, Thawngpang lei le Nationalims lei hna ah theihkauhnak tampi kan i chap hna. Biaknak lei min ngei Pastor hna le Ramkhel lei Min ngei hna he kan i Fri...mi hna hi a rak sunglawi ziar. FB kan hmannak thawngin a lamkip in thahnenlmnak tampi kan hmu hna. Sermi thil vialte hi Lamkaltu an si dih ko tiin hla phuahtu nih a phuah bang FB hi lam kaltu thatuk a si ko.

FB kan hmannak thawngin tha hnemnak tampi kan hmuh lioah thenkhat FB hman ka ngol lai a timi hna an rak um ve. FB hman hi kan ngol cun thahnemnak kan hmuh dingmi lam kanmah tein kan phih hrawh a si ko hnga. Asinain FB hmannak ah that lonak tampi cu a rak um ve ko. Sehtan nih FB ah a lamkip in rian a rak tuan ve i thurhnawm hmanthlak le video rel cawk lo an um. Thinglung hrawktu tamtuk a um i FB sal le Media Sal hna ah caan khawh a fawi te. Thahnemnak tampi kan hmuhnak hei si hmanh sehlaw a hmanzia kan thiam lo cun kan rawhralnak tu ah an cang ko lai. Cu caah FB hman hi thaim ngaingai a rak hau i FB hman kong zongah thlacam ngai hna hi a hau ko.

Nupi Le Nih Pasal Le Chungkhar Uk Hruai Hi...

Annih chungkhar cu an Pa nih uk hruai loin an Nu nih a uk hruai tuk e, a nupi nih a pasal a uk hruai tuk e ti an chim hi theih lengmang a si. Pa bik nih chungkhar uk hruai loin Nu bik nih chungkhar a uk hruaimi Chungkhar hi a tam pah.

Ka theihmi Chungkhar ah Pa bik nih uk hruai loin Nu bik nih a uk hruai tawnnak a ruang cu Pa nih Nu a duh tuk ruang le a uar tuk ruangah a si bik. Pasal nih ka Nupi nih a ka duh uar lo sual lai i a ka zam tak sual lai ti ruang zongah a si men lai. Australia  ahcun Nu pawl covo (right) a tam deuh ruangah a si an ti bang. Hi bantuk hna ruangah Nupi le kuttang ah Pasal le an i chia tawn.

Pasal hi hawi tluk lo a thluak bul pahmi hna si cun Nupi nih van uk hruai hi thiltha a si ko nain Pasal fim ngai le thil ti kho ngai ve komi Nupi nih a van uk hruai hi cu chim awk a um pah. Nubik nih a uk hruaimi chungkhar cu mi nih zohchuk pah ziar a si ko.

Chungkhar ah Nupi i a uk hruaiter tuk nak nih a chuahpi mi ka hmuhton theihmi cu nupi nih pasal zei rel lonak le zohchuknak hna, hmailei chungkhar khuasaknak ah Pasal lei chungkhar zoh duh lo le bawmh duh loin mah Nupi lei chungkhar lawng zohnak hna a chuahter.

Chungkhar ah Nupi nih Pasal uk hruai tuk ding a si lo bang Pasal nih nupi uar tuk ruangah zeizong te Nupi kuttang ah i chiah ding a si hnga lo. Nupi le hi Hramhram in Pasal lu cungah chuan a hmangmi zong an um ngai hna. 1 KORIN 11:3 ah pa cu nu lu a si tiin kan hmuh. Nu cu pa lu a si tiin kan hmu lo. Pasal lu cungah hramhram in i chuan hi Nupi le nih i tinh a hau. Pasal nawlngaih ding tu hi Baibal nih a kan cawnpiak deuh. KOLOSE 3:18 Nupi hna, nan vale nawl kha ngai hna u, cucu Khrihfa nan si bantukin nan tuah awk a si.

Mahti tikah Pasal le hna zong Chungkhar ah Pabik ka si, ka nawlngai u tiin Nupi le fale hna kha mah lei lawng nih a uk in uk i nawl pek lengmang hna hi a tha lo ngaimi a si. I tinh a hau ve. Pabik nih a uk in uk i nawlpekmi chungkhar ahcun i bia elnak holh tamnak le buainak hna a chuak theo tawn. A Dammi chungkhar a si tawn lo.

Baibal ning in ka tial cun Pual cakuat ah Nu cu Pa nak niam deuh ah a chiah lengmang. 1 KORIN 11:8‭-‬9 zeicahtiah pa cu, nu chungin ser a si lo, nu tu kha pa chungin sermi cu a si.  Cun pa cu, nu caah ser a si fawn lo, nu tu kha pa ca i sermi cu a si.

Mahti ka tial tikah Pasal nih Nupi uk hrui ding ti si loin Nupi nih Pasal uk tuk lo ding ti duhnak a si. Nupi le Pasal cu nuva an si cang bang i pakhat nih uk tuk loin pakhat le pakhat aa ruang tein i thit hruai cun a tha bik ko hnga.

Nuva aa thi ruang tein aa hruaimi chungkhar cu a ngan a dammi chungkhar an si.

Uico Seh Na Ton Ding A Si Cang Ahcun Mah Hna Hi Rak Tuah Chun...

1. Uico Nih an ngiar (seh timh bantuk in zoh) ahcun tli hlah. Na zammi cu Sa ka dawi lai i ka seh lai ti Uico lung thawhter bantuk a si.

2. Tih Bantuk In Um Hlah
Uico kha na tihmi na theihter cun Uico a zumhnak a thawnter ruanagh Uico hmai ah tih bantuk in um hlah. Uico va thih-phaih bantuk zong in um hlah. Dai tein umding a si lai

3. Na Pawngah A Rak in Naih Cun na kut hna cip law ding tein thinkung bantukin na dir lai. Uico he na mit na tonter lai lo.

4. Uico nih Seh an timh ti lo a si cun na umnak in Reng piin naa thial lai lo. Duhsah tein naa kal lai i naa thial lai.

5.Kaa Danglei Ah Kal dingin tuah
Uico kha kal rih loin an Ngiar rih a si cun Thil pakhat khat naa kenmi in Kaa danglei a kalnak caah a seh dingin na sawh piak lai.

6.Mah Hnu zong a kal rih lo cun Aw Thang Taktak in na hro lai i na zuam cawh lai.

7. Uico nih a van in zuan hnawh cun reng taktak in na ke hna in nangmah nih na chuih hmasa lai.

8.Na Pum Kha Hmang
Uico cu seh lei lawng a thiammi an si i Boxing an thiam lo.😃 Mah ruangab na pum le na kup hna in vawlei ah na nam chih(ဖိ) lai.

9. I Ralring Ding
Na hmai le na tang le na hngawng hna kha naa ralring lai. Hi bantuk hmun hna hi Uico nih a seh an i olh.

Kawlca In Relnak Link:
Gredit: Duwun,

Mit Tha A T,hat I Mit-benh Hlawt Ning

A pakhatnak bikah na thawh kaa in na hmai naa phiah(tawl) colh lai lo. Na ke a pahnih kha na khup in ti hrai 3 veve in na toih hmasa bik lai. Mah hi tuahnak a ruang cu takpum ah a linmi hna kha ke ah dawh piak khi a si.

Van i t,hangh tikah hin tak pum cungah a linmi hna an um i an i thek dih. Hi bantuk ah a hlan bantuk in na hmai naa phiah ahcun takpum dihlak i a linmi hna kha a kikmi hmai ah an rak tli i an i fun. Mah ruangah pum dihlak i a linmi hna nih Mit kha an rak pumh hnawnhnak a si.

Theih tak na duh ahcun Thlalang i bih law na mit zoh law na mit a sen kha na hmuh lai. Bantuk a linmi hna nih mit an pumh hnawnh tawn ruangah Mit tha a der i hmaiphiat khawh in mit a sen i Mit a mawt nak cu a si. Mah ruangah takpum i a linmi hna mit ah an i pumh i an kal nakhnga lo a tanglei ah an kalnak hnga Ke kha Ti in toihnak cu a si.

Kup in ti toih khawh tik zongah hmai i phiah cawlh ding a si lo. Zaktang i a linmi hna an kalnak hnga kut kha a cungah hlir i tangah thlak than tiin a tlawm bik voi 20 tuah piak ding a si lai.

Cun mah dih in lu kha a hnu leiah aa tuah khawh chungin tuah ding a si lai. Cu bantuk thiam in lu kha hmai leiah aa khun khawh chungin khun ding a si lai. Cun lu kha keh le orh ah tiin voi kul mer than ding a si lai.

Mah Exsiksak pathum tuah dih cang cun takpum i a linmi hna ke lei in an chuak cangmi kha a dih cang. Na theih duh cun na ke ti dor khat hmanh um ti loin an ro cang kha na hmuh lai

Mah hna khawh in Hmai kha tha tein Chapiat in i phiah ding a si. Haa bel i hnawh(taih တုိက္​) rih loding a si lai. Na kaa kha na cip lai. Na hmai naa phiah khawh i na bnai hnawhnak in na hmai naa hnawt lai. Tlawmpal hnu ah na haa naa taih lai. A si khawh ahcun zinglei ah ca tam deuh rel i zaan ah cun ca tlawmpal lawng rel ah a tha.

Hi bantuk hna in hin Mit a maw i mit tha a dermi hna a thatter. Mit tha a t,ha ciami hna hmanh a cung i langhter ning hna in tuah cun Mit-benh aa benhmi dirhhmun ah phak khawh a si lai lo. (Ka ca leh nan fian lo sual ah Kawlca in fel khawhnak Link ka a tangah ka van in chiah piak chih hna)

Kawlca In Relnak Link

Myanmar Express
အရွင္ဇ၀န (ေမတၱာရွင္ – ေရႊျပည္သာ )

Vapual Pa Nih Vapual Nu A Hlam

Vapual pa lawng a tlawnlen caan a sau,

Thin hnemtu dingah Vapual nu a herh
Vapual pa thin hnemtu ah cun
Awtaw(Kawl) nu cu a si kho deuh lo
Langak(Minak) nu zong a si kho lo
Varang(Mirang) nu zong a si kho deuh lo
Vapual Pa caah cun Vapual nu lawng hi a si kho hnga.

Vapual nu aw, Nang cu Vapual nu na si. Awtaw pa le Langak pa le Varang pa he cun nan si kho hnga lo. A rem zong nan i rem lo e. Vapual pa lawng he nan si ko hnga i nan i rem bik hnga.

Vapual Pa nih Vapual nu khoiah na um tiin an hlam hringhran ko, an hngahnak caan zong a sua ai cang. Vapual Nu aw, Vapual pa nih ka sin ah rak zuang cang ko law tiin aw nem tein an auh...

Vapual Pa kei nih Vapual Nu ka hlam..😌😌

Salai Ceu Bik Thawng: CNDP Hrilhfiahnak Tlawmpal-------- Caankarlak Thimnak Kongkau ah

Biahmaithi
Tutan thimnak ah USDP le NLD nihcun an kan kah ngai__ an cathlah he an bia he. Nain kan let hna lo. Aruang cu USDP party hna cu a rauh hlan ah NUP hnu a zul te ding si ko i ceih awk ah kan ruat lo. Cun NLD zong cu kan chim voihra; democracy caah cun bochanmi an si (federal kong belte ahcun bochan awk an tha lo). Cucaah kan ral an si ballo. Kawlrawn vote in teinak a hmu kho an si ko caah an kan herh lo (kan duh hna bia sawh si). Cucaah “NLD cu rawn ah tling sehlaw tlangcung ah Miphun Party tling ve usih; cutin varit le vaking kan awh ttih lai i lu luhnih kan tlunh lai” kan ti pengmi si.

Cucaah mizei party hmanh soisel hau ah kan ruat lo. Asinain NLD le USDP nih CNDP kong an chim/tialmi cheukhat cu anmah lila nih an ifian lo bia maw si hnga, a palhmi tete a um len caah fianternak (fact checking) pa 3 tein ka hun tuah duh ko__ soiselnak/dohdalnak tel lo tein.

#1nak__Union Peace Conference (21st Century Panglong) kongkau ah-----

NLD catialmi pakhat ah “21st Century Panglong ah Chin State ai-awh in kalpi dingmi bia vialte cu zahan nai i Thantlang khua ah kan tuahmi Chin National Dialogue i biafunmi(biachahmi) kha va chim ding a si. CNDP nih chap dingmi bia a um hlei ti lo” a ti. Pakhatnak a palhmi cu tutan CND kha ‘Chin State ai-awh’ si loin Chin miphun dihlak aiawh a si. Pahnihnak a palhmi cu 21st Century Conference ahkhin Chin National Dialogue i kan biafunmi (55 a um) lawng chim si lai lo. Framework for Political Dialogue ningin ceih dingmi ‘Tlangtar -5’ a um i cu vialte cu ceih dih a si lai. Kannih Laimi cu ceih caan kan neihmi a tlawm tuk caah Politics timi tlangtar chungin ‘8 Basic Principles’ lawng kan ceih bia a si. Bu kip nih anmah le an buu in an ceihmi adang vialte (CND i ceihmi lawng si loin) kha ceihpiak cio le a herh ahcun doh, a herh ahcun dirpi ding a si lai. Cun, 21st Century Panglong cu thla 6 voikhat lengmang tuah a si lai caah kan chim cang bang tutan i biafun 55 kan thlaakmi lawng si loin adang tampi ceih ding a um rih. Cucu aziah an lungfian khawh hnga lo aw ka ti!

Cun USDP nih “21st Century Panglong kai dingmi minung 700 cu an ithim dih cang, CNDP cu thimnak an tlin zongah an kai ti lai lo” tiah ca an tial. Minung 700 timi khi Framework ningin a namber lawng khiah(fix) mi a si. A minung mincazin (by names) in thim le khiah cia khawh a si lo. NLD nih “Laitlang ai-awh tu ah Pi Ni Sui Lian an thim” tiah an tial ve. Laitlang timi State ai-awh in 21st Century Panglong kai ding kuzale quota a um lo. NLD le Hluttaw ai-awh cu a si men hnga.

Cun a poi bikmi NLD cathanh palhnak, “21st Century Panglong Conference hnatlaknak vialte hi a donghnak ahcun Pyitaungsuh Hluttaw ah chuahpi i hnatlaknak lak ding thiamthiam a si. Cucu Peace & NCA dal 5nak caang 20(f) Pyitaungsuh Hluattaw ah chuahpi in hnatlaknak lak ding (ျပည္ေထာင္စု လႊတ္ေတာ္သို႔ တင္သြင္း၍ အတည္ျပဳခ်က္ ရယူျခင္း) tiah fiang tein ai tial caah NLD party kut ah a um” an ti.

Hriamtlai kan pa le (NCCT/SD) pawl NCA an rak ceih lioah hi zawn hi an thin a rak phaang tuk i ralkap he faak ngai in an rak i nawrmi a rak si. Cucaah hi bia hi ralkap kaa in a chuak te sual lai ti an phan tukmi zong a si nain atu cu NLD kaa in a chuak ai. Hitin ka hun fianter lai. NCA rak suai lio tein hriamtlai kan pa le pawl nih hi 21st Century Panglong Conference i biakhiahnak hi Pyitaungsu Accords timi Rampumpi Sachoh timi minthutnak in dih seh ti an duh. Asinain ralkap le Thein Sein USPD cozah nih 2008 Phunghrampi tang i Pytaungsuh Hluttaw (atu i NLD nih an i bochan tukmi) ah luhpi rih i Hluttaw hnatlaknak (သေဘာတူညီခ်က္) um seh ti an duh__ Hriamtlai pawl um lonak Hluttaw duh paoh in tlaih an duh cu awh. Cucu Hriamtlai(EAO) pawl nih azei ti hmanh in an duh ve lo. Cucaah Pytaungsuh Hluttaw ah “အတည္ျပဳခ်က္” lak ding timi biafang in itthumhtthialnak (compromise) an tuahnak a si. “အတည္ျပဳခ်က္” timi cu Mirang holh in ratification ti a si i kannih Tlangcungmi kan lungfianning ahcun ‘fehternak/ nemhngehnak tuah’ kha a si. Asullam cu HLuttaw nih a duh paoh in ceih tthan in zuh/chap nak nawl a ngei ti lo. Fehternak va tuah sawhsawh lawng a si lai. Cucu ‘Hnatlaknak’ timi (သေဘာတူညီခ်က္)’’ biafang in an lungfian/ruah sual caah a “NLD kut ah a um” an tinak a hi a si rua.

Hriamtlai kan pa pawl vialte le, ralkap le cozah le party pawl le mifimthiam vialte 700 leng nih an ceih i an hnatlak hnu ah NLD kut ah hei chanh tthan i NLD nih hruaimi Pyitaungsuh Hluttaw nih duhning paoh in hei ceih tthan ding timi cu a si te si lomi si.

Hi thil hi ‘extra-parliament process’ timi Hluttaw lengin kalpimi a si. A umtuning cu hi Pyitaungsuh Hluttaw timi 2008 Phunghrampi lam in kan duhmi federal/democracy kan kalpi kho lo ti kan fian caah a si. Ralkap si loin NLD sin in hi bia kan theih cu ka lung tha lo.

CNDP cu 21st Panglong Conference kongkau ah party dang kan va thlaa hna lo. Kan chim pengmi cu “Zabu-21-Pinlung Civui ahhin tlangcung miphun party 17 leng an kai kho. Kannih Chin miphun party bel kan bau. Miphun caah, CNF dirkamhtu dingah kai ve kan duh ko. Hi MP hmunkhat te nan kan pek ve ahcun kan party in pa 3 in 5 karlak kan kai kho ve lai hi” ti te hi a si ko. Cucu 100% a dikmi zong si fawn. NLD le USDP in Thantlang kan kuzale a simi Dr. Hmuh Thang le Pi Ni Sui Lian an kai ve lai an ti zongah “a tha tuk” tiah kan lawmhpi ko hna. Asinain aziahdah kannih kan kai ve ding cu annih nih an duh hnga lo? An kan doh hnga?

#2nak __ NLD nih USDP ro a comi pakhat ---

USDP party cu cozah an rak si lioah ‘nan kan vote lo ahcun nan caar lai” tiah cozah bawmhnak phaisa (ဖြံ႔ၿဖိဳးေရးရံပံုေငြ) itlaih in khuakip ah campaign an rak tuah. Aw! Ralkap upa pawl dirhmi party pei si fam cu kan hei ti ko. Asinain atu democracy NLD zong khuate an vak i cuti thiamthiam. “Kan Pi nih 2016 – 2007 kar cu sizungzi caan a si. Nain 2018 hnu cun party ikhuhvorh caan a si ve cang a ti. Cucaah a kan dawtu khua paoh dawt deuh nan si lai” tiah an aupi. A poi taktak si. Democracy party ai ti vemi nih ram cozah phaisa (development project) bak siorawl ah hmang in campaign tuah cu a mak ko. Cutluk in maw kan ramkhel hi a niam ko rih hnga. CNF kan pu Zing Cung nih nizannai Laitlang a tlun ah ‘kan dothlennak a dih rih lo hi awh!’ tiah ba kheih in a kan kheih khah!

Kan khel cuahmahmi system (federal mahte khuakhannak le democracy tling) ngah hlan ah a hmin chom in buh cung kan rak hui lai i kan rak bar lai timi ruahnak hi kan dothlennak lamkhamtu a si te lai hi awh!  “CNDP cu suan um loin sur an chep; tivapi ah an ipeh lo caah ngafuan a kai kho lai lo” ti hna in an kan ti (2015 liote in an bia si). Atu caan hi a ei le baar kong ceih caan si maw? Bawm donh nan-ngan-zi khel caan si maw! Nihinni ah kan miphun le kan ram sersiamnak system kong ceih caan si lo maw?

#3nak __ CNDP cu Laitlang hmanh a huap lo:  tiah NLD Thantlang Vice- Chairman nih cathanh a chuah. A poi ngai. CNDP cu Laitlang peng (9) le pengtthen (3) ah Penghuap Committee le signboard he fek tein kan dir. Cu hleiah Sagaing, Magwe le Rakhine ramthen i peng (8) ah penghuap committee kan ngei. Chin party vialte lakah a ngan bik zong kan si. Cun Laitlang NLD le USPD nih a ruah awk hmanh an hngalh  lo dingmi Laitlang leng um Chin miphun kan unau pawl Sungtu, Laitu, Laisaw, Mro(Khami), Asho, Rawngtu, Otpu, Thadou, Vaiphei(Suantak) pawl tiangin committee kan serpiak hna i kan suat-hlam hna dakaw. ---000---

Upatnak he,
Salai Ceu Bik Thawng
(Secretary – CNDP)

Nu Hna Caah Thinphan Awk Ar Thla

Ar Zuatnak ah thenkhat cu Ar a tit-sa a karh deuh dingin Tit-sa karh sii le Sii phunphun an chunh hna. A tam u cu bantuk sii hna an chunh tikah a thla ah an chunh ti a si.

Hi bantuk Sii chunhmi Ar Thla hna ei tam cun Nau inn ah 'Tit hlum' le 'Thi hlum' hna a van um kho. A hnubik ah cun Nau Inn Cancer tiang a chuak kho ti a si.

Mah ruangah a si khawh ahcun zuatmi Ar(​ေမြးျမဴ​ေရးၾကက္​) hna hi hrial uh law kan duh tiin မႏုႆ ရဲ႕ စာမ်က္ႏွာေလးမ်ား nih a mi pawl (မႏုႆ ရဲ႕ ပရိတ္သတ္) a forh hna.

Ref: မႏုႆ ရဲ႕ စာမ်က္ႏွာေလးမ်ား,mmexpress

A Thi A Chuak Tukmi A Zoh Ngam Ti Lo Caah A Sungh A Tuar (Khan)

Boxing MMA Cu theih cio bang teitu si dingin i thuat cio a si. An in tuar khawh ti lo lawngah a sungh an khan tawn hna. Asi nain hi hna cu an i phun dang ngai. An i thuat kaa cun aa tluk tuk ding an lo nain an van i thua i tlawmpal ah a thi tam tuk a chuah colh. 

A thi a chuakmi pa cu tlawnpal ah a tha a ek colh i Pakhat deuh pa nih cun ruah lo piin a sungh a pek. Video ah fiang tein zoh khawh a si. Upat a tlak tukmi lungput a si tiin Online ah a van thang ngai.

USA A Phanka Mi Hna Caah Theih-awk

US a phanka mi caah theih awk sawhsawh:

1. Midang hlawh (lah-khah) le kum hal lo ding.

2. Mi naute duh poh in tonghtham le hnamh hman lo ding.

3. Mi inn ah telephone auh hmasa loin kal lo ding.

4. Khuh tik le hathiu (sneezing) tikah banpuam cungah maw, napkin in maw kaa huh ding.

5. Minak pawl theih hngan ah 'nikaru' ti bia chim hrimhrim lo ding. Sal an can lio min asi caah an huat tuk.

6. Theih lomi minung nih innka an kingh tikah on lo ding.

7. Duh poh in mi hmai ah irh lo ding. Cil zong cha'k lo ding.

8. Mi hmai ah pa le pa, nu le nu i kuh lo ding. Baan zong i tlaih lo ding. Hi bantuk a tuahmi cu nu le nu, pa le pa duh a hmangmi (gay & lesbian)ah ruah an si.

9. Mi he i chawnhbiak tikah kut-dong laibawi(middle finger) hman lo ding. Thinhan tik i nehsawh langhternak ca lawngah hmanmi asi.

10. Mi he i chawnh tikah lungtho te le panhlau tein um ding. An mitfalai kha dengteo in zoh ding.

11. Mirang asi mi poh ttih phun in um lo ding.

12. A herhnak zawn ah 911 auh zenh lo ding.

13. Caan upat i zuam zungzal ding.

14. Appointment ngeih tikah a caan tlin hlan deuh ah pha'k khawh i zuam ding.

15. Thianhlimnak biapi ah ruah ding. E'k inn, coka ti bantuk thiang tein chiah peng ding.

16. E'k inn luh dih tikah chaphiat hmang in kut i ttawl peng ding.

17. Nungak dai hman lo ding. Mitsir voikhat zoh kha a za ah ruah ding.

18. Mihrut le pumtlamtling lo nehsawh lo ding. Hmuh tik zongah zoh peng lo ding.

19. Ngakchia le nupi vuak hman lo ding. An theih ahcun thong chungah luh colh asi ko.

20. Kum 13 ri in a tanglei hngakchia anmah lawng kal ta'k lo ding.

21. Ka rim thutter lo ding. Haa sibawi sinah kum 1 voihnih thianh ding.

22. A rim a nammi rawl le meh chuncaw ah i ronh lo ding.

23. Kum 18 tanglei asi mi nih zu le kuak cawk lo ding.

24. Zurit bu in mawttaw mongh lo ding. DUI i mih khawh asi. DUI cu criminal case asi. Criminal case a ngei balmi cu Green Card le Citizen sawk tikah hnawl piak khawh asi.

25. Rianttuannak le pumhkhawmhnak hmun ah sahdah, khaini le kuva tongh lo ding.

26. Inn chungah kuak zuk lo ding. Cozah upadi asi. Na inn asi zongah nangmah nawl asi lo.

26. Mirang he i chawnh tikah theih lomi kha a thei bantuk in um lo ding. Theihmi lawng kha 'Yes' ti ding. Theih lomi cu 'No' ti ding.

27. Rili setpho (beach) kal tik le Ti lionak(swimming pool) kal tik ah pa nih tawhrolhchungnawh he lawng um lo ding. Khup tiang a pha'nmi i hruk ding.

28. Social security number, Bank account number le Medicaid number ti bantuk pawl mi theihter lo ding.

29. Refugee le Asylum status in a ummi nih mi he sik lo khawh chung i zuam ding. Nan i sik sual zongah an tak tongh hrimhrim lo ding. Thinhan buin an tak na tongh ahcun buainak nganpi na tong kho. Na status chuh i kuat khawh na si.

30. 'Thank you' ti le 'Please' ti biafang hi a tam khawh chungin hman i zuam ding.

( US um na si cun >>>Share)

Siaherhnak he,
Van T. Cung
Maryland

From: Vanthawng Cung <vtcung@yahoo. com>
To: Laiforum@yahoogroup s.com
Sent: Tue, March 2, 2010 7:15:37 PM
Subject: [Lai Forum] US pha'nka mi caah theih awk sawhsawh!

Facebook Ah Baibal Ca A Post Tawnmi Hna Hi Rak Kan Soisel Hlah Uh

Facebook ah Baibal ca a rak thlah tawnmi le a rak thlah lengmang mi hna hi, Mah nih i nunpi tak tung loin le piangthar lem loin hei thlah len hi ningzak a si tiin a soitu le Zei a si bal lai lo e, bla.. bla a timi nan um len. A ngaingai ti cun soisel thangchiat len hna ding a si lem lo. Atu tiang FB ah Pathian bia le Baibal a rak thlahmi hna a soisel tu hna nan um peng rih hi khuaruahhar a si pah ko.

FB ah Bible catial hna hi a sualmi le a tha lomi bangin nan hmuh. A tha lei in hmu loin a chia leiin nan hmuh i nan soisel hi cu a poi ko. Asualnak le a that lonak a um hraw lo. Mah lungum hna le thazaang lakmi hna, mah FB friends siaherhmi hna le mah duhmi hna kha thlahmi an si ko. Mah nih thlah loin a thlahtu hna soi len hi soi awk a um deuhmi le ningzak deuhding cu nan si ko hna ti ning law ka palh lai lo. FB ah Baibal a post tawntu hna nan soisel i bla...bla...nan ti lennak cha cun Dai tein um ko u law nan caah a tha deuh hnga..

Tahchunnak ah Mah Baibal hi FB ah kan post. Isaiah 41:10 Na thin phang hlah — na sinah ka um ko, Keimah cu na Pathian ka si — zeihmanh ṭih hlah. Kan ṭhawnter lai i kan bawmh lai; kan huhphenh lai i kan khamh lai.  Hi Baibal hi a thei lo le a rel bal lomi hna nih an rel cun Thazaang an laa tuk bang a dang Baibal an rel bal lomi hna zong FB ah kan postnak thawng in an rak rel thazaang an laa. Cu caah FB ah Baibal kan thlahmi hna hi Baibal a rak rel/thei bal lomi hna nih an rak rel i thazaang a lami an um tuk ko ti hi a kan soitu hna nih nan theih a hau.

FB ah Baibal a thlah tawnmi a ka soitu hna: FB ah Baibal kan thlahnak thawng in a nun aa remhmi le a nun aa thleng pahmi hna an rak um ti hi rak thei u law kan duh. Asi cun Baibal a thlah tawnmi a kan soitu hna, nannih teh FB ah Baibal nan thlah lonak in a nun nan thlen termi an um maw? ( FB ah Baibal a post tawnmi hna na kan soisel tuk i a herh ahcun FB ah Baibal thlahnak thawng in a nun aa tleng pahmi an um kong ka rak tial than lai.)

Mahnih Baibal cauk voikhat hmanh chuah loin voikhat hnih a chuah cangmi hna na relmi naa nunpi lo hei ti i hei soi ngam hna hi nanmah tu voikhat hmanh chuah loin tiin soi awk a um deuhmi cu nan si. Laimi nih Mahnih thil tha tuah kho lem loin thil tha a tuah khotu hna soisel thangchiat kan hmanmi kan zia thalo, lungthin thurhnawm hi kan hlonh hrim a herh...

FB ah Baibal a post tawntu hna, micheu nih an in soi len zongah nan zei poi hlah u, zeiti an in soisel zongah ngol loin rak thlah ko u tiin keimah catialtu nih forh le thazaang pek kan duh ko hna.

Rak share ve u...

By- Bawihrin Sang Khengmual(Mara)

"Nang Lo Cun Vanram Hmanh Ah Khin A Chambau Ko Hnga" Ti Kong Hla Phuahtu Nih Fianhnak A Tialmi

Nai Ah Chokhlei Post(min tak Le Hmantlak takin Langngam lo)Nih Vanram Hluan kong  'Vanram' ahcun chambau ti hi a um ti lo tiin (Hika Ah Rel: a rak tial i a buaimi nan um len. Hla phuahtu nih fianhnak a rak tuah colh ve. A tialmi aa tlakning in van thlah chin a si. 

Fianhnak:
Hi hla chung ah hmanmi vanram cu (heaven) ti khi si loin (paradise) khi a sawh duhmi a si. Paradise ah cun nuamhnak le lawmhnak a tling nain a chambau lo ti khawh a si lo. Adam lawng a um lio ah, Adam caah a chambaumi cu Eve a si. Cu ruang ah Eve zong cu Pathian nih a rak ser.

A pahnihnak ah vanram cu a chambau kho lo na ti nain, Ave le Adam umnak hmun in sualnak a chuak. Sualnak a chuah khawhnak hmun cu a chambau lo na ti kho hnga maw? Chim duhmi cu (perspective) dang dang in thil hi zoh khawh a si. Hi ruang ah hin " nang locun vanram hman khi a chambau ko (hnga)," tiah ka ttial. "A chambau ko (lai)," ka ti lo.

Vawlei cung ah khrihfa lawng kan um lo. Muslim, budish tbk biak tampi an um i viewpoint aa dang dih. An zumhnak a hman lo kan ti bantuk in, a kan ti ve. Cu caah, kan mah zumhnak lawng fek tthup in i tlai awk a si lo.

Note: "Vanram Hluan" hla a hohmanh zoh hnek kan si lo. 

A tangah "Vanram Hluan" hla zoh khawh a si.

Pastor Sang Nawl: Zeiruangdah Thlacampiak Tikah An Tluk?

Baibal cang: Bawipa inn kha, minmei in a khah caah tlangbawi hna cu rianṭuan awkah khan dir awk an si nain minmei ruangah cun an dir kho lo; zeicahtiah Pathian inn cu Bawipa sunparnak kha a khat.(2Chanrelnak 5:14)

Kan um kalnak ah mi tampi nih biahalnak an tuahmi cu zeiruangdah thlacampiak tikah ṭhenkhat an tluk tawn tiah an ti?.  Zeitindah nan ruahning a si ve kan ti hna tikah an sual ruangah a timi an um, thlarau ṭhalo an ngeih ruangah a timi an um i a phunphun in an ruahnak an chim cio.  Thiang Thlarau rianṭuannak hi  minung mit cun theihthiam khawh a har tuk. Tahchunnak an chim tawnmi mitcaw pa paruk nih vui an tong i an ruahnak an chim cio bantukin chim le zumh a fawi te. Thlarau lei kar kan hlannak ah mah bantuk hna zong hi theih herhmi tete an si caah tlampal in keimah hmuhning ka van langhter.

Jesuh Khrih cu nizan le nihin le zungzal in amah ning a si ko (Heb 13:8) tiah a ti bantukin, Thiang Thlarau cu aa theng bal lomi a si. Asinain minung sinah a riantuanning le a phuanning tu cu a phunphun in a si ko. Ṭhenkhat sin i a phuan tikah an sualpalhnak i hmuh i an ṭap, cheukhat lunglawmhnak in an khat i an ni peng ti bantukin rak hmu tonning a dang cio. Cu bantuk ṭhiamṭhiam in  thlacampiak tik hna ah a tlumi hna an rak um.

An Tluknak Ruang;
Babal kan zoh tikah Jesuh nih siseh, lamkaltu pawl hna le Paul  zong nih siseh, altar call an tuah i, thla an campiak hna i an hnu leiah an tlu i an rak tlaih hna ti kan hmu lo. Sihmanhselaw Bawipa inn ah Pahtian sunparnak a phuan tikah tlangbawi tehna rianṭuan an si ko nain dir kho loin an tluknak  (2Chan 5:14) hna le Jesuh cu tlaih awk ah a kawlmi hna kha Jesuh nih keimah ka si a van ti bakin an hnulei ah an i tawn i an tlu (Johan18:6) ti hna kan hmuh. Cun Paul kha Damska khua pawngah Jesuh he an i ton tikah vawlei ah a tlu (Lam 9:4) ti hna kan hmuh.  Cu bantukin  thla kan cam tik i Pathian suanparnak le Thiang Thlarau ṭhawnnak kan cungah a rak i phuan tikah kan tluk ve tawnnak cu a si.

Zeibantuk Mi Dah An Tlu?
Thiang Thlarau ṭhawnnak a phuan tikah mi zei paoh an tlu tawn ko. Cu chungah cun thlarau ṭhalo a ngeimi si hna seh, a piangthar cangmi si hna seh, Pathian dawtnak a thei rih lomi zong si hna seh an tlu ko hna.  A tam deuh a tlumi hna  cu thinlung dihlakin a pumpemi hna le nun a kekkuai deuhmi hna  an si. Cun mi cheukhat cu a thinlung a  khawng taktakmi a  tluk kho lomi zong an rak um ve i. a piangthar ngai ko nain a tlu ve lomi zong an rak um ve thiamthiam ko. 

An Tluk Tikah Zeitindah An Um?
Ṭhenkhat cu Thiang Thlarau ṭhawnnak an cung a vun tlun bakin, electric bantukin a laih hna, ṭhenkhat cu an tha a dih tibantukin a phunphun in an um i an dir khawh lo caah an tluknak a si. An tluk tikah mi tampi cu Thiang Thlarau  nih an sualnak kha a hmuh ter hna, ṭhenkhat cu hmailei kong vision hna a hmuhter hna,  ṭhenkhat cu an zawtnak hna  a damter hna i, ṭhenkhat cu an chungin thlarau ṭhalo hna nih a chuak tak hna. Sihmanhselaw ṭhenkhat pawl cu zeihmanh zong um lo le hmu loin, an tlu i an tho ṭhanmi zong an um ve ṭhiamthiam.

Cucaah Thiang Thlarau rian ṭuannak hi minung nih theih khawh le fian khawh a har tuk. Atu thlacampiak tikah tluknak he pehtlaiin keimah nih ka tonmi le ka hmuhmi pinah tampi a um ko rih lai. Paul nih Thiang Thlarau kha a ngeihchiater hlah u!(Efesa 4:30). Thlarau tu khan khat deuh u (Efesa 5:18) a  ti bangin Thiang Thlarau ngeihchiater lo le Thiang Thlarau in khat deuh tu kha i zuam cio in, thlacam cio ko hna usih.  Bawipa nih nan diklak theihfian khawhnak in pe hram ko hna seh. Amen.

Bornholm Crusade Thlacampiaknak le Thiang Thlarau  rianṭuannak;

Note: Hi ca hi May25 2014 ah a rak thlahmi a thar in van zamh thanmi a si. Pastor Sang Nawl hi Denmark Chin Emanuel Church CEC ah Pastor a tuan liomi a si i thawngtha chim ah khual a tlawng lengmangmi a si. Pathian Nih hmang chin lengmang ko seh.

Rak Share Cio U...

Pumh Komhnak(Biakinn) Ah Baibal Cauk Kan I Ken Lo Cun... (Khoiah Kan I Ken Ti Lai?)..

Biakinn ah le Zarhpi ni Pumh komhnak hna ah Baibal cauk hi kan i put lo ahcun kan i putnak ding a um tuk lem ti lo. Micheu nih Baibal cauk put a hau lo, kan phone ah a um ko kan ti nain Pumh lio ah phone van zoh lengmang cu `anih cu pumhnak ah a phone lawng a zoh lengmang´ tiin ruahnak tha loin a rak kan ruah tawnmi hna an um caah Baibal Cauk in i put i Baibal cauk kau zoh hi a tha bik ko. Baibal cauk kawl kan thiam deuhnak zong a si fawn.

Pumh kan kal lai ah kan Phone kan philh sual si cun inn ah ka va kir zau i ka va lak than zau bantukin Baibal cauk i ken philh si cun va la than zau ve u sih law i ken philh hlah u sih. Pumh komhnak lei ah Baibal Cauk i put hi zoh a dawh tuk lawng si loin Zumtu Khrihfa kan sinak a langhnak pakhat zong a si. Micheu khat nih zoh dawh le a feltuk, a piangthar tuk kan ti hna seh tiin aa ken kan ti ko hna hmanhseh law a poi lo....:-) . I put lengmang hna u sih law Kau lengmang ko hna u sih.

SALM 119:105 
Na bia cu ka ke caah meiinn a si, 
ka lam ah ceunak a si.

Hebru 4:12 
Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih. 

Media Thenkhat Pawl Nih Salai Lungthli Tum An Tluk Ruam Lo Ti Kongah Tial Duhnak...

Kha kong i Tlangkhenh le Salai Lungthli tum an tluk lonak, amah kong tialmi hna kha tial duhnak hna si loin Mi lung lak dingin tialmi an si. Ka catialmi ah Media Dihlak ti loin Media thenkhat ka ti zong kha carel tu hna nih nan theih thiam a hau.

Ca ka tialmi ah ka tial duhnak thei lem loin Salai Lungthli Tum a rak mawhchiat lenmi hna nan um pah. Cun kan Media hna thazaang pek loin soisel thangchiat cu a tha lo a timi zong nan um hna. Tutan kan Media hna zoh tikah kan Laimi zat he tuak cun an tam tuk lawmman hna. Burbulak bang an tam a timi hna zong an um. Hi ti ning Media aa timi hna an kal ko cun Hmailei ah Lai Cauk chuah a tlawm chin lengmang lai tiin ruah damh a si.

Cu lakah Lai catial cafangfonh thiam huaha loin thawng tial a van i thawhmi zong cu um a si. Cafangfonh thiam lo kong ka tial theumi a poi maw tiah a poi caah ka rak tial lengmang. (Cafangfonh kong cu a hnuah ka rak thlah than te lai.) Cafangfonh palh ngai in tialmi thawng kha group 4,5 ah an van thlah hin cun cafangfonh na thiam lo he, Group pakhat ah thlah law a zaa ko va ti zong a phu. Mah ahcun an min tak le hmanthlak takin a lang ngam lo Media aa timi tete zong an rak um pah.

Media thenkhat hna Group kip ah an thlahzamhmi hna kha (Salai LTT bantukin)  Group Pakhat te ah thlah cun a zaa ko ti kha tial duhnak bik pakhat a si. Media thenkhat lawng si lo, an dihlak tiawk in thawngpang theih herh tuk dah lo cu Salai LTT bantukin Group pakhat te ah an thlah cun a hei zaa ko.

Salai LTT Lai cafangfonh kong zongah a rak soiselmi hna nan um pah. Lai catial cafangfonh a thiam pah lo kong hna theih cun soi len awk a um lo. Cafangfonh a thaim ti ka tialmi kongah a nih a chuak menmi hna um a si nain Media thenkhat hna cu cafangfonh leiah a tei diam hna.

Kan Media an tam ngai cang ko i Lai Catial Cafangfonh a thiam lem lomi Media hna cu thazaang pek awk le dirhkamh awk an tha lo. Caholh man an niamter men nain Ruahnak cu cheuh ve ding an si ko. Catialtu nih Lai Media pawl ah tanhmi zong ka ngei ve lo nain Lai catial Cafangfonh a thiammi hna cu tanh lo awk le dirhkamh lo awk an tha lo.

Kan Media Thenkhat Pawl Nih Salai Lungthli Tum An Tluk Ruam lo, An I Zohchun Awk A Si.

Salai Lungthli Tum hi Media pawl le kan mifim kan timi hna nih an soisel pah lengmang. Amah nih a ti hmasa caan cu a um ve nain a caan ahcun Amah tein a um komi an rak soisel lengmang ve. News a lehmi ဝီရသူ(မစုိးရိမ္​) ti a tial kong hna a rak soi i aa ceih lenmi hna an um pah. Mifim nih mi a nihsawh lo i a soisel bal lem lo ti a si bang a rak nihsawh tu le a soitu hna hi mifim, Bochan mi le upatmi hruaitu hna hei si ko hna hmanhsehlaw a ngaingai ti cun mifim tak cu an si ve ruam lai lo. Thil sining kan theih ve caan cun Lungthli Tum a tanh lotu hna zong a rak soisel tu pawl cungah a caan ah cun kan thin a rak hung pah ve tawn. Tuan deuh ahcun Amah tluk Thawngzamh a rengmi hna an rak um lo tikah kan thawngzamhtu Thazaang pek loin soisel tanglamh cu a tha ruam lo cu mu.

Ka biatlang ah ka kal cang lai. Media thenkhat nih an thluk lonak hna cu News a tial tikah:...

1. Milung lak dingin tlang khenh a thiam.
2. Thenkhat hna nakin Lai Catial
    cafangfonh zong a thiam deuh i a catial
    rel an tlak deuh.
3. A news tialmi Soure a lakmi chim awk
    um lo a si tawn.
4. Media thenkhat hna bang Group kip ah
    thlah zamh a hmang lo.
5. Mi thlah ciami thlah a hmang lem lo.

Lai Media aa timi thenkhat hna cu mipi zawn zong ruat loin thawngpang zei huaha lo hna Group kip ah thlah hnawh an hmang. Group 1,2,3 hna ah thlah cun a zaa diam komi Group 4,5,6 hna ah a kan thlah hnawh tikah Mipi nih FB kan zohmi zong anmah ca lawngte in aa tlar thup tawn i a kan simh ngaingai. Group tlangtar le Ca thlahmi zong aa rem tawn lomi a tam. Mah ruangah Group hna in voi tampi kan chuak lengmang. Nain a kan luh(add) than peng ve. Group hi block khawh si seh law kan block mi group a tam lengluang cang lai.

Kan Media thenkhat cu Media pakhat nih a thlah ciami zong hechat in thlah hnawh a hmangmi an rak ve hoi ai. Henry Van Thio, Khupbil kongah Salai Ceubik Thawng nih a hmuhning a tialmi zong Media 3,4 nih group pakhat ah a rak kan thlah hnawh cio. Group Anddmine pakhat nih Link loin tuan bik ah a thlah cang komi Media tete nih An van kan thalh cio ve cu lungmit a si ko. A dang tawngpang zong cu thiam. Thawng pakhat hi an van thlah cio hin cun a caan ah tahlak nihchuak hna a si. Mipi a kan siaherh ruangah maw a si hnga? a si loah an Phaisa lutnak dingah ti ruah ah lungrawk a si.

Thenkhat Media hna Politice lei zong thei huaha loin le Lai Cafangfonh hna zong thiam huaha loin cafangfonh palh ngaiin a rak thlah lenmi hna zong rak um len a si hoi. Bantuk hna hi Caholh dawtu hna caah cun lungrawk tahchuak an si pah.

Kan Laimi Group hna zoh tikah Group pakhat ah an thlahmi group dang pakhat zongah an rak thlah thiam ve. Thawng pakhat kha Group dang zongah a rak um ve thiam ko i kan Laimi Group hna hi aa dannak zong an um lem hna lo. Mipi Menber tamnak Group ah biatak in i funtom hna u sih law a thatuk ding khi a hei si ko.

Kawl Media le Vawlei cung media hna zoh tikah Group hi an hmang lem hna lo. Anmah Page te tu biatak in an hman hna. Kannih Laimi Media hna zong Page cu ngeih cio a si ko. Page a like tu an tam cun group hi hmang tuk lem loin thawngpang theih a herh tuk lomi cu kanmah page te le ka FB Timeline te tuah thlah i group ah thlah loin um ko hna u sih law a tha tuk ko hnga. Cu loin Group kip ah Zei huapa lo thawng hna an thlah len hi cu Phaisa (duh tuk) an kawl tuk ti a fiang ko. Salai Lungthil Tum hi Tutan cu a rak thlah lengmang nak CDNews Group zongah a rak thlah ti lo. A ruang ka hal. Ka FB flowing an tam ngai cang ko i thlah herh ah ka ruah ti lo a ti.

Media Thenkhat hna nih Salai Lunthli Tum kha rak i zohchun u law a tha ko hnga ti hi mipi nih kan duh i nanmah ca zongah kan in duh piak hna.

Soisel Tanglamh A Tongmi A Pumrual Cu Mi Ar Koin A Tuahtu Body Art In Aa Thleng

A caan caan ahcun minung hna hi van tha lo le minl nih nihsawh ding dertawmnak hna kan rak ngei. Asinain hi bantuk dirhhmun kan um zongah lung dong hin loin ral tha tein pah chih ding a si ko ti kha hi nu i a sining he kan van langhter duh.

Kum 21 a simi Ast Toto an timi nu cu kum 12 a si lio tein a har ngaimi tak vun zawknak a tha lo ngaimi(​အ​ေရးျပား​ေရာဂါ) a tuar ti a si. Mahti cun a zawtnak cu a hnu ah duhsah in a rangmi hna tampi an chuak. Mahti dirhhmun ruangah Ash Toto cu a thirual a hawikom hna sinah a tlawnglen ngam ti lo i bawngbi tawi hna zong hruk ngam ti loin a um ti a si. Asinain nikhat ah Ast Tito cu a hmutu hna ar ko in a tuahtu ding pakhat tuah dingin bia aa khiah.

Ast Toto cu Art Body tiin an timi tak pum cungah an suaimi thiamnak pakhat in a zawtnak a takpum cu aa dawh taktak mi in aa tamh lawlaw ti a si. A zawtnak ruangah a simi a kulh tete ahcun vawlei pum puluk ( ​ေျမပုံ) bantuk in a suai i a zawtnak in mi lunglak dingin a tuah khawh. Hi bantuk tuar a harmi pakhat cu tha thawngding thil in a tuah khawhmi Ast Toto i a lungthin hi upat lo awk a tha lo ti a si. Instagram ah radiantbambi tiin Hika ah a hmanthlak hna zoh chap khawh a si.

Gredit, Ref: MomoLay

Ngakchia Hna Sii Dinh Tikah Ralring Taktak A Herh

Hngakchia pakhat te cu Sii A Din duh Lo Ruangah A hnar an Phih Buin An Dinter Chin ruangah a thaw nih a phih i a thi ti a si. 

Ngakchia Sii Dinhter tik zongah ralrin ngai a rak hau. A video in ka rak thlah chih. A tangah zoh khawh a si. Zoh ah ngaih a chia tuk hringhran...

Video ah Ngakchia a nu zong lung zuar taktak in a tap chih.

Ngakchia Sii dinh tikah i ralring cio hna u sih. Rak Share Ve...

Gredit: Marip Naw Htoi

Facebook A Hmangmi A Puitling Cangmi Hna Nih Cun...

1. Profile pic...le Cover photo hna atu le tu thlen loin an van um thiam.

2. Ca an leh duh lomi hna cu a zoh lawng zoh i zei thei lo tein dai tein an van um thiam.

3. Kan duh lomi le a tha lomi post hna a um cun comment len i bia i al len kha tuah ti loin a thei lo bangin kan van lanhtak thiam.

4. Si lo le si lo hna post a hmangmi cu dai tein Unfriend kan van tuah thiam.

5. A herh tuk lem lo ahcun Faceboom zoh loin um kan van i zuam thiam.

6. Kan i rem lomi hna kha Mention i i sik len ti loin Block tuin kan van tuah cang.

7. Kan duh uarmi minthang hna hmanthlak tangah Add me tiin comment len ti loin dai tein an FB See First tuah kan van thiam.

8. Friends a tammi duh ti loin biatak in kan i kommi hna lawng chiah i kan theih lomi hna cu Unfriend tuah kan van thiam.

9. A caan caan ah cun kan duh herhmi hna kha Only me in share i save post tein i chiah hna kan van thiam.

10. Page deu le hi page hi like law share heiti i Awngbali kan tuah, Iphone kan in pek lai ti bantuk hna kha dai tein kan van lanhtak thiam. A caan ah sik caak hna kan van thiam

11. Thawngpang a dik lomi hna tlawmpal kan relnak in kan van theih i Media deu hna kan van theih deuh i Lih Media hna Block tuah kan van thiam.

12. Facebook hi nuamhnak in si loin cawnnak kan hmuhnak hnga le thawngpang dikmi hna kan theihnak ah, cun hawikom tha karh ding le rian hna ca tu ah kan hman cang.