(ChinMifir kong Chin mipi theihin tawngzamh a herh lo ti ka hmuhning a tanglei bangin ka rak tial.)
Mifir an um paoh ah mifir kong thawng cu khuazakip um Chinmi theih dingin Online ah kan zamh len hna. Jesuh nih Mifir kong thawng va chim u law va zamh u, Khuazakip theih in va aupi u tiin a kan fial dara. Thawngtha tu va chim u tiin pei a kan fial. A kan fialmi Thawngtha hmanh chim lo le aupi loin mifir kong thawng cu kan chim kan aupi len hi cu a si deuh lai lo.
Chinmi chungin mifir thawngpang hi cu khuazakip ummi hna theih dingin Online ah thawngzamh hi a herh lem lomi a si. Halkha mifir kong cu Halkha ummi mipi nih an theih cun a zaa ko. Malay le Ramthumnak um Chinmi kip nih kan theih a herh lem lo. Cu bantukin US Chin mifir thawng zong Malay le Chinram ummi nih theih a herh lem lo. US um Chinmi nih kan theih cun a zaa ko.
Mifir kong thawng an zamhmi a poi lo, a tha ko, hmailei mipi ralrinnak ah tiin a timi tampi cu kan um ve hna. Mifir thawngzamhmi ralrinnak caah tiin kan timi nakin a tha deuhmi cu ralrinnak catial le fir a thatlonak le thih a nunnak ca hna tial i thlacam hna hi a si hnga. Cun mifir sinah va kal i a thalei in thazang kan pek ding le a chialei in thangchiat loin a thalei in thangchiat i a fir ti lo dingin kan chimhhrin deuh awktu a si hnga. Baibal caangkhat in van rel ta hna u sih. 2 Korin 2:7 Atu cu nannih nih nan ngaihthiam awk le thazang nan pek awk a si, a ngaih a chiat tuk ahcun a lung a dong sual lai. Mifir nih a fir man cu palek nih tuanvo an lak ko cang i fuk in an tuk ko cang, dan an tat cang i an hrem ko cang, thong an thlak ko cang caah kanmah aa pehtlai(san) lomi nih hehchat in thangchia soisel tanglamh a herh ti lem hnga lo. Mifir soisel thangchiat a hmang tukmi hna caah Jesuh nih JOHAN 8:7 a chimmi “Nan lak i sualnak a tuah bal lomi nih chep hmasa bik seh,” ti le Rom 2:1...zeicahtiah midang kha sual na phawt hna tikah, an tuahmi kha na tuah ve ko ṭung caah, nangmah lila sual naa phawt a si ko. "
Mifir kong Khuazakip theih in thawngzamhmi nih a chuahpi bikmi cu ralrinnak a si lo. Mifir thangchiatnak lawngte tiawk in a chuahpi tawn. Mifir a kum tling rih lomi hna a si cun lung dongin mahle mah i thah duhnak tiang hna a chuahpi khawh. Chungkhar ca zongah in tuar khawh lo tiangin soisel thangchiatnak hna a chuahter tawn. Mah lawng si loin pengtlang le Khua min chiatnak tiang hna a chuahter tawn.
Chinmi cu innpa changthlak, sang le khuami tiangin aa thei hngal dihmi kan si caah Chin Media hna zong media phung e, media rian e tiin au khuang sawh loin Chinmi khuasak ning le Chin Khrihfa biaknak le zumhnak hna zoh in thangchiatnak le soiselnak a chuahpi tu Mifir thawng zamh hi cu i sum pah ko u. Halkha mifir kong kha Halkha mipi theihin ca in hei chuah u law khuazakip um Chinmi theih dingin Online ah cun rak zamh duh hlah u.
Media pawl nih Mifir kong thawng zamh i nan phaisa kawlnak ah hman nan duh tuk cun Halkha, Thantlang mifir thawng, Thingthei fir thawng, Ti le Mei fir thawng, satial fir thawng le sui ngun tangka fir thawng, anhringso fir thawng hna nan zamh cawk lai lo. Nan zamh thlu cawk ding a si lo caah zei thil fir thawng hmanh hi rak zamh loin um ko u law a tha ko hnga.
Indianapolis i Chin mifir kong cu kanmah Indinapolis ummi lawng nih thei ko u sih law Halkha i mifir thawng cu Halkha ummi lawng nih rak theih ve ko u. Mifir kong Thawngchia cu a hohmanh nih theih kan duh lo bang theih a herh tuk lomi a si cun rak zamh ti hin hlah u. Mifir thawng nan zamhnak cha cun mifir caah thla tu rak cam piak ko u law nan caah a tha deuh hnga.
Mahtin ka tial tikah mifir thazang pek hna nan ka lawhter ko lai nain mifir thazang ka pek a si lo cu Pathian le keimah theih a si ko. Hi ca ka tialmi hi mifir i a chungkhat cingla rualchan hna ah nan ka ruah men lai nain Online ah mifir thawng a leng balmi hna he chungkhat sinak pakhat hmanh a ngeimi ka si lo. Khrihfa biaknak in mifir ca le an chungkhat hna caah ka ruah tikah kannih Chinmi Khrihfa hna nih cun Mifir kong khuazakip theihin thawngzamh hi cu a tha deuh lai lo tiin ka ruah caah hi ca hi ka van tialnak a si.
.........................................
Rev. Hoi Cung Tum nih a chimmi
"Kan Inn Tangka Firtu Theih Kan Duh Lo" timi relchap khawh a si.
Rev. Hoi Cung Tum: Kan Inn Tangkaa A Firtu Theih Kan Duh Lo, Aruang....
"Kan inn mifir nih an bauh i phaisa tlawmpal an laak.
Palik Bawi nih, a firtu theih na duh maw? kan hlathlai piak lai a ka ti.
Palik Bawi nih, a firtu theih na duh maw? kan hlathlai piak lai a ka ti.
Asinain a firtu ka theih ah cun, A firtu kha ka lungchung le ka mit ah a thiang loin ka hmuh zungzal sual lai i, ka fale zong nih an hmuh tikah a thur in an hmuh sual lai ti ka phang i, a firtu theih ka duh lo i, Palik zong ka hlathlai ter lo" a ti.
Rev. Hoi Cung Tum le a chungkhar hmuhning le ruahmi hi a va thianhlim ning. Mi tampi nih kanmah kan i pehtlai lomi le kan i thlak a herh lomi zongah theih ve le i thlak ve kan hei duh ning. Mah Rev. Hoi Cung Tum a bia te hi nifatin ka nunnak ah ka lungchung in ka philh kho lo bikmi a si.
Mi nih thil an tuah sualmi le mi santlaih lonak kan va hmuh le kan theih tik ah, kan lungchung le kan mit in midang kha kanmah nakin niam deuh le zeirel lonak lungthin he mi kan zoh hna hi kanmah caah a rak thiang ve hrimhrim lo i a rak t'ha hrimhrim lo hi ta ka ti.