Nifatin kan nunnak ah Pathian Nawlngai in a duh ning tein nun can tha in kan nun ko si cun rawlulh thlacam hau loin thlacam men in kan halmi thlauchuah vanluhnak hna cu a kan pek ko lai. Amen.
Rawlulh in thi dengin Pathian sinah thlacam lennak in a tha deuhmi cu nifatin kan nunnak ah Pathian nawlngai in amah duhning tein nun hi a si. Pathian nih a duh deuhmi zong a si. Pathian nih Baibal in rawlulh thlacamnak in amah nawlngaih ding tu hi a kan forhfial deuh kan ti khawh.
Pathian nawlngaih cu Thlarau, Thinglung Taksa damnak le thluachuah hmuhnak hram a si ko. Amen.
Pathian Nawlngaih Cu Zeidah A Si?
Pathian nawlngaih cu zeidah a si tiah cun a thur thawnmi thil thalo hna tuah hrial, zukhmawm rithai sii hna hrial, Baibal ah Pathian nih tuah hlah u a timi a duh lomi thil thalo Sualnak phunkhip hna tuah lo hna hi Pathian nawlhngaih cu a si ko. Pathian nawlhngaih cu Pathian dawt zong a si.
Ahohman sualnak tuah loin um khawh le nawlbia zulh viar khawh a si lo nain Pathian nih a duh lomi le tuah hlah u a kan timi thil thalo sualnak hna hi kan si khawh chungin hrial i Pathian nawlngaih kan i zuam ding cu a rak hau hrimhrim ve.
Deutronomi Biahmaithi ah Moses nih Israel mi hna kha Pathian a nawl zul zungzal ding le a cungah zumhawktlak in um u tiah a ti hna. Cun Israelmi hna Dong loin Thluachuahnak an hmuh nakhnga an Pathian cu an dawt awk le a nawl an ngaih awk a si ti zong tial chih a si. Israel mi lawng si loin Jetial mi Zumtu Khrihfa a simi kip nih Pathian nawl cu kan ngaih awk a si.
Jesuh zong nih vailam cung tihnak tiangin nawl a ngaih. Filipi 2:8 Mi toiah aa dor i nawlngaihnak lam kha thih tiangin a zulh— vailam cung thihnak kha.
Cun minung nawl nakin Pathian nawlngaih deuh ding kha Peter le lamkaltu dang hna nih “Minung nakin Pathian nawl kan ngaih deuh awk a si LAMKALTU 5:29 tiin a kan cawnpiak chap. Sual Siangpahrang cu Siangpahrang a si hnu in Mi zapi tih ruangah Bawipa nawlbia a ngai lo i Pathian nih Siangpahrang sinak in a hlawt colh. 1 Samuel 15 . Minung tih ruangah Pathian nawl ngai loin um lo ding a si ti zong kha fak ngaiin forhfial kan si.
Pathian Nawlngaih a kan forhnak le Nawlngaih ti aa telnak Baibal caang hna a tanglei ah ka rak tial chih hna. Lungsau in rak rel u law Thazaang zong nan hmuh ko lai. A rak reltu cungah kaalawm ngai. Bawipa nih Sunparnak co ko seh. Amen.
JEIM 4:7
Cucaah Pathian nawl kha ngai ko u. Khuachia kha doh u law an zam tak ko hna lai.
1 PETER 1:14
Pathian nawl kha ngai u, nan rak hruh lio i nan rak ngeihmi duhnak nih khan nan ziaza cu in uk ti hna hlah seh.
EFESA 2:5
A nawl kan ngaih lo ruang i thlarau lei in kan thih ko lioah khan Khrih sinah cun a kan nunter. Khamh nan sinak cu Pathian vel thawngin a si.
KOLOSE 3:6
Cu bantuk thil hna ruangah cun Pathian nawl a ngai lomi cungah Pathian thinhunnak kha a phan lai.
1 Samuel 15:22
Cun Samuel nih a thawh i, "BAWIPA nih hin BAWIPA aw zulhnak i lawmhnak ngan a ngeih tluk hin maw, Khang thawinak le rai thawinak ah hin lawmhnak a ngeih ve? Zohhmanh, nawlngaih hi raithawinak nakin a tha deuh i Amah bia ngaih hi tuukawng hna thau nakin a tha deuh.
GENESIS 22:12
Vancungmi nih cun, “Ngakchiapa kha fahnak zeihmanh pe hlah, a cungah zeihmanh zong tuah fawn hlah. Fapa pakhat lawngte na ngeihmi hmanh pek sian loin na ka um lo caah Pathian nawl ngaih cu na duh ngaingai ti kha ka hngalh,” tiah a ti.
ROM 6:16
Bawi pakhatkhat sinah na nawl kan ngaih lai, tiin nan i pek ahcun nannih cu cu bawi a nawl nan zulhmi sal cu nan si, cu bantukin sualnak cu a nawl nan zulh ahcun, sualnak sal cu nan si i sualnak nih a chuahpimi cu thihnak a si; cun cu bantuk thiamthiam cun Pathian cu a nawl nan zulh ahcun, cu nawlngaihnak nih a chuahpimi cu Pathian he i remnak kha a si.
Bawi Khengmual