Laiholh holh u law Lai rak si uh tiah hohmanh nih an in fial hna lo. Kawlholh nan holh tikah Kawl va si uh tinak zong a si fawn lo. Mizoram ah nan va kal ahcun a hmunhma nih peekin Mizoholh nan holh ve kha a phung si ko. Laiholh nan holh hrim lai timi phung zong a um lo. Kawlholh hman ding tiah zatlaang hman dingah an khiah ko. Cucaah cun, Kawlholh hman ruangah miphun kan dawt deuh kho lai nan ti si ahcun lih a si. Nain, atu lio thilsining ah Camp Voctoria umnak hmun cu Lai umnak ram chungah a si pinah Laipawl holh hmang loin CNF a dir kho lai lo.
Laipawl um lo le Laiholh hmang lonak ah dothlennak kan tuah lai nan ti ahcun ca tuah reng uh. Sau a rau lai lo. Laipawl nih le Laiholh hmang loin dothlennak ah thazaang an chuah duh lai lo. Mah cu thilsiningte a si caah pheh hau lo, inautat zong hau lo. Laiholh e Mizoholh e Kawlholh e cu holh e ti loin hman awk tthami kha hman, cawn awk tthami kha na cawn ve na thiam ve ahcun mi nih an in hman deuh lai i mi sinah upatnak le conglawmhnak zong na co lai, mipi zong nih an in dawt lai.
Laiholh nan holh duh lo zongah Laipawl hrangah a poi tuk lai ka zum lo. Halkha khualipi cu Laimi nih dirhmi khua a si caah zeimawzat tal cu Laiholh a karh ko lai. Laiholh nan rem lo si cun Lai umnak hmun ah va kal hlah uh. Laiholh nan rem lo ahcun khualipi khi hmun dang ah tthial hau lai. Hmun dang nan tthial zong zei hlei si fawn lai lo. Khualipi nan tthialnak poah ah Laipawl an itthial lai lo. Halkha khualipi si zongah si lo zongah Halkha khuapi tthanchoter khawhnak dingah thazaang an ngei cia.
Nanmah le kanmah bantukin pengtlang huatnak thinlung an nei lem lo. Laipawl cu an khua ah Kawl holh nih cil ding zong an duh lem lo. Peng dang le holh dang huatnak lungput hi kan thlau cang a hau. Hmailei caan sau deuh phanh tikah zatlaang holh pakhat paoh cu kan nei telai. Laiholh an duh lo si le vod loin nan um ko lai, Mizo maw Tedim holh maw pakhat khat nan vod a hau te ko lai. Chin holh a si paoh ahcun a za ko. Chin holh pakhat a chuah khawhnak dingah dawnkhantu nan si lo ding a biapi ngai.