Ka news feed ah a hun kai tuk i, zei asi ti ka vun zoh. Galaxy Star ah kan farnu Laldinthari nih dirhmun sang a phak thawng asi.
Ka vote colh. Kan miphun hmai a hngalter, kan ilawm!
Tuzing cu "Chinmi" sin siloin "Mizo" sin lawng lawmhbia a chim e, tiah soisel aw a khat. Biafak zong a um pah.
A ca cu ka rel. Min kong asi, khua ka ruat i ka ngaih a chia.
Pathian nih miphun pakhat ah a kan ser i, ram a kan pek; caholh a kan pek; Khrihfa miphun ah a kan ser i thlua a kan chuah!
Nain, min pakhat kan ngei kho lo. Chin-Mizo-Kuki an kan ti. Caholh pakhat kan hmang kho lo. Phun 40-50 kan ngei. Ram pakhat ah kan um kho lo. India, Bangladesh le Myanmar ah kan itthek!
Unau rual ikomhnak puai kan tuah, min bunh awk kan hmu ti lo––"Chinlung Festival" kan ti.
"Chinlung" cu khoika set a um zong kan thei lo; lungkua asi a tina, pupa hla cuang a hei si ko.
Mirang an kai i kan min an kan hal, Lai nih Lai, Lusei nih Lusei, Zomi nih Zomi, Khumi nih Khumi kan iti dih. "Chin" aa ti kan um lo.
Nain, an hlat cikcek i "Chin hi nan min asi" tiah an kan bunhpiak. Kan unau a cheu nih "kan kokek min asi lo, miphun dang pekchom min asi", tiah an pom lo. An mawh ve lo!
Official cun ''Indian'' ansi nain Hindi holhcun “Bharat” ansi, Urdu holhcun “Hindustan” ansi. Miphun pakhat kha holh dangin min phunphun a ngei.
Chin nih “Vai”, Kawl nih “Kalar”, Mirang nih “Indian” an ti. Vai = Kalar = Indian cu miphun dang ansi lo; aa khat ko.
Official cun ''Japan'' an si, anmah nih ''Japan'' an in ti lo, ''Nippon'' an iti. Japan = Nippon cu aa khat. Pom veve awk asi ko.
Hi bantuk in Mizoram ah "Mizo or Zofa" an kan ti, Burma kan um cun "Chin" kan si ko; Manipur cun "Kuki" kan si ko. Miphun pakhat kha min phunphun kan va ngei i asi.
"Chinland" ti tikah kan thinlung nih Mizoram tiang a huap. "Lairam" ti tikah Thantlang, Falam le Matupi peng lawng asi lo; "Chinram" kha Laiholh in auhnak min asi. Zomi nih "Zogam" le Mizo nih "Zoram" an ti ve tikah an kan huapter dih ve.
Chakma cu Indigenous (ram leilungfa) asi le silo an buai. Indigenous cu "Zo-ethnic people" tiah upadi ah an hrihfiah. Chakma a huap ti lo. Lai, Mara, Zomi, Lusei, Hmar tbk. cu a huap dih. "Zo" kha an nih an kan auhnak min asi.
Mizo nih "Zofa asiloah Zofate asiloah Zohnathlak" an ti tikah "Chin hrinfa vialte" kha an holh in an kan auhnak min asi.
Laldinthari nih "khawvel hmun hranghrana Zofa ten" ati tikah "vawleicung hmun kakip i Chinmi dihlak asiloah Laimi dihlak" ati duhnak kha asi.
"Ka rin phak bakin Mizorama cheng ka Mizopui ten" a tinak cu "kaa ruah lengin Mizoram um ka Mizo phun zong nih" a tinak a si. A beisei a rak si lem lo nain Kawlram leng i Mizoram um tiang nih an tanpi kha a hlei in a chap a va si.
Zabu 20 tiang "Zo le Lai" a ne a um rih. Tucu a tlau cang. Zabu 21 cun kanmah le holh in min kan ngei i kan min cio an si ko, ti ipompi chan asi cang. Faktuk in min dirpi cio i, kanmah le mah i el chan asi ti lo. Hihi kan tei cun thil nganpi kan tuah khawh te ko lai.
Gredit: Salai Van Lian Thang