Nawlnak: Baibal Caang hi ttha tein rel dingin kan nawl ko...
Nawl Ngeihnak le Nawlpeknak
Jesuh Khrih nih a thawhtthan hnu in Van i a kai lai teah, "Vancung le vawleicung i a um mi nawl ngeihnak vialte cu pek ka si cang. Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna law,..." (Mt. 28:18, 19; Mar. 16:15, 16).
Jesuh nih nih van a kai hlan teah, "Jerusalem hi chuahtak hlah u, ka Pa nih a rak in kamhmi hna laksawng ka rak in chimhmi hna tu kha hngak ko u. Johan nih cun ti in tipilnak a pek hna, sihmanhsehlaw kan hmailei ni tlawmpal chungah hin Thiang Thlarau chungah hnim nan si lai." (Lam. 1:4,5).
"Asinain Thiang Thlarau nan cung i a tlun tikah cun, tthawnnak in nan khat lai i Jerusalem khua le Judea ram vialte le Samaria ram ah le vawlei cung khuazakip ah ka tehte nan si lai," tiah a ti hna. (Lam. 1:8).
Jesuh cu thihnak tei in a thawhtthan hnuah nawl ngeihnak vialte pek a si cang. Nawl ngeihnak sang bik in nawl a pek hna bantukin Lamkaltu hna nih Jerusalem in Pa nih a pek ding mi hna laksawng Thiang Thlarau chung i hnimnak cu an hngah. Pentikos ni ah Thiang Thlarau cu a rung ttum i Thiang Thlarau cu an co i Thiang Thlarau chungah hnimnak zong an co. (Lam. 2:1-4). Cu tikah midang nih, "Zu an ri," an ti hna caah Peter nih zu an rit si loin Jesuh kha Mesiah a sinak le Pa orhlei kam ah a tthutnak le Pa sinin a hmuhmi Thiang Thlarau zumtu hna sinah a run thlahmi a sinak kha a fianter. (Lam. 2:31 - 41). Peter bia a theimi Israel mi hna nih khan, "U le nau hna zeidah kan tuah kun lai," an ti.
Jesuh nih a nawl ngeihnakin a thlah i Thiang Thlarau in a khat mi Lamkaltu Peter nih cun a thawh hna i, "Nan dihlak in, pakhat hmanh bau loin nan sualnak khan i mer u, nan sualnak kha ngaihthiam nan sinak hnga nan sualnak khan i mer u law Jesuh Khrih min in tipilnak ing tuah u; cun Pathian laksawng Thiang Thlarau kha nan hmuh lai," tiah a ti hna. (Lam. 2:38).
Jesuh Khrih Nawl Peknak le Nawl Pek Mi Peter Chim Mi Bia
1. Jesuh nih, "Pa le Fapa le Thiang Thlarau min in tipil va pe hna u,"
2. Peter nih, "Ngaihthiam nan sinak hnga nan sualnak khan i mer u law Jesuh Khrih min in tipilnak ing tuah u;..." a ti hna.
Fianternak: Jesuh nih Lamkaltu hna sinah a chim mi (nawl pekmi) cu tipil petu Lamkaltu hna nih an zulh ding mi asi i Peter nih Israel mipi hna sinah a chim mi (nawl pek mi) cu sualnak i ngaihchih in tipil a ing ding mi zumtu hna caah a si.
🔈CUCAAH JESUH NAWLPEK ZULH IN TIPIL A PETU NIH CUN PA LE FAPA LE THIANG THLARAU MIN IN PEK DING A SI I PETER CHIM MI A DIRPI MI NIH CUN MIPI KHA SUALNAK I NGAIHCHIH IN JESUH KHRIH MIN IN TIPIL ING DINGIN KAN CAWNPIAK HNA AWK A SI.
Cawnpiaknak Hmaan Lo Cu,
Baibal Leng in cawnpiaktu hna nih, "Jesuh chim mi kha Thiang Thlarau in a khatmi Peter nih Thiang Thlarau fimnak in a hngalh caah Jesuh Khrih min in tipil a pek hna," an ti. Cucaah Jesuh min in tipil petu hna lawng khi Thiang Thlarua in a khat i Thlarau lei ah a fim mi le midang tucu Thiang Thlarau co lo le a pemh lomi ah an chiah dih hna. Hi bantukin mi a cawnpiak i a hlengtu hna nih an comi thlarau cu, "Kha thingthei nan ei ahcun amah (Pathian) bantukin hngalhnak nan ngei ve lai," tiin Evi a hlengtu Rul thlarau he khan an hman mi biafang an i lo ngai ngai.
Jesuh Khrih Chim Ningin A Cawnpiak Lomi Le An Lei I A Ttang Mi Vialte Cu,
"Khrih cawnpiaknak chungah um peng loin kar hlei a lammi nih cun Pathian kha an ngei lo. Cawnpiaknak chungah khan a um peng mi nih cun Pa he Fapa he an ngeih hna. Ahohmanh nan sin i an rat tikah hi cawnpiaknak hi an rak i ratpi lo ahcun, tluninn rak onh hna hlah u; "Na cungah daihnak um ko seh," ti zongah rak ti hna hlah u. Zeicatiah cu bantukin a cungah daihnak um seh ti a duhpiaktu kha a thil tthalo tuahmi ah khan aa tel vemi ah a cang. (2 Johan 9-11).
📣🔈 Jesuh dawtmi Johan nih, "Pa he Fapa he an ngeih hna," a ti i Fapa Jesuh lawng zumh le ngeih ahcun a za a ti lo caah,...
Jesuh Khrih cu Pa Pathian le Minung karlak ah remnak a tuahtu a si. (1 Tim. 2:3-5).
Jesuh ramcar chungah a kalpitu kha Thiang Thlarau a si. (Luka 4:1; Mt. 3:16,17).
By-Benjamin Khamh Bawi