Melchizadek thawhkehnak kong le a chungkhat sahlawh rualchan kong hi Baibal chungah hmuh awk a um lo. Baibal hrimhrim zong nih ahohmanh nih hngalh asi lo, a ti.
Asinain, Baibal thiamsang tampi hna nih zohfelnak an tuah lengmang tikah ruahnak a phun phun an chuah. Cu ka relmi hnih khat chungin tlawmpal te von langhter ve ka duh.
Melchizadek hi Salem siangpahrang asi, tiah Baibal nih fiang tein a tial. Cucu, Jerusalem khua kha a sawh duhmi asi ko, tiah an zumh. A sullam cu, "Daihnak khua" kan ti khawh (ka palh sual hnga maw?) Cun a min sullam (Melchizadek) hrimhrim hi, "Dinnak le daihnak siangpahrang" tinak asi (King of Righteousness and King of Peace) {Heb7:2}. Cu he aa khatmi cu Salm 110:4 ah kan hmuh khawh rih. Cucu, Hebru tialtu nih 5:6,10 ah aa tleng than. Cun, Melchizadek cu Cung Nung Bik Pathian tlangbawi asi fawn (Gen 14).
Dinnak le Daihnak Siangpahrang?
Ahodah Pathian hmai ah a dingmi a um? A tlingmi minung a um khawh lai? Mathai 19:17, “Jesuh nih…. athami cu pakhat lawng pei a um ko cu.” Asiahcun Melchizadek hi dinnak le daihnak siangpahrang asi tikah minung sawhsawh asi lo a fiang cang. Minung sawhsawh asi ahcun Aaron tlangbawi he an sining (rank) aa khat hnga. Aaron hnu zulh le sining tlangbawi asi ahcun a tling ve hnga lo. Isaiah 9:6 “……Daihnak Bawi” ti asi lai. Ahodah daihnak Bawi cu asi? A fiangmi cu hi pa (Melchizadek) hi dinnak le daihnak siangpahrang asi tikah a tlingmi tlangbawi asi.
Cun, minung hi Nawlbia zulhnak lawnglawng in mitling/miding asi khawh. {a zulh khawh lo caah Jesuh a thihnak asi}. Zeicahtiah, Nawlbia cu Pathian sining (standard) asi i a dingmi an si (Psalm 119: 172). Cu, Nawlbia vialte zong cu Pathian nih a kan pekmi an si (James 4:12). Asinain, minung nih kan zul kho maw? Zul kho hlah. Jesuh dah ti lo cu, nu paw chungin a chuak mi paohpaoh nih Nawlbia a zul kho kan um lo (Rom 3:10, 17, 23). Jesuh cu Sabbath Bawi asi (Mark 2:28). Melchizadek tlangbawi zong hi ‘Dinnak Siangpahrang’ asi caah Nawlbia dihlak a zulh khawh, tinak asi.
Cun, kan von rel lengmang tikah, ‘nu le pa le chuahkehnak’ zong tial asi lo. Asiahcun, an thawhkehnak tuanbia an thlau asi hnga maw? An thlau asi ahcun tlangbawi asi kho lai lo (Ezra 2:62). Asinain, Melchizadek cu thawhkehnak tuanbia ngei loin Cung Nung Bik Pathian tlangbawi asi caah minung sawhsawh asi lo, ti a fiang fawn. Cucaah, Heb 7:3 nih ‘…..zungzal in tlangbawi asi ko,’ a ti. Cucaahcun, hi pa hi vanmi bantuk le minung bantukin serchommi asi lo, amah tein a ummi, zungzal a hmunmi pa asi, ti a fiang (Isai 9:6).
Cheuhra Cheukhat
Baibal ah aa tial dih cang bantukin Levi a chuah hlan piin a pu Abraham nih Melchizadek cu cheuhra cheukhat a rak pek cang. Cucaah, Aaron sining in tlangbawi asi mi Levi miphun nakin Melchizadek tlangbawi phun cu a lianngan deuh ti a lang.
Pa Pathian Asiloah Thiang Thlarua Asi Kho Maw?
Melchizadek hi Pa Pathian hna asi hnga maw? Asiloah Thiang Thlarua hna teh? Si kho hlah. Zeicahtiah Cung Nung Bik Pathian tlangbawi asi caah. Pa Pathian cu Cung Nung Bik Pathian tlangbawi asi kho lo. Cun, ‘ahohmanh nih Pathian an hmu bal lo’ (Johan 1:18; 5:37). Thiang Thlarau zong hmuh khawh asi ve lo. Asinain, Melchizadek cu Abraham nih a hmuh khawh. Cucaahcun, Melchizadek cu Pa Pathian zong asi lo, Thiang Thlarua zong asi lo.
Levi tlangbawi hna cu Aaron min hnu zulh in Aaronic priesthood tiah auh an si bantukin Jesuh Khrih tlangbawi zong Melchizadek sining zulh in min pek asi ve. Asiahcun, Hebru catialtu nih a tialning ahcun Melchizadek zong hi ‘a hlan, a tu le a ra dingmi caan vialte—zungzal’ in tlangbawi asi lai, a ti. Jesuh zong cu Melchizadek tlangbawi sining in zungzal a hmunmi tlangbawi ngan asi ve (Heb 5:10).
Asiahcun, Zungzal a hmunmi tlangbawi ngan pahnih maw kan ngeih? Ngei hlah! Pakhat lawng kan ngei ko. Tlangbawi Ngan pahnih ngeih phung asi lo. Asiahcun, zeitin? Melchizadek le Jesuh Khrih hi aa khatmi minung pakhat an si, ti a fiang. Zeiruangah dah Jesuh Khrih cu kan tlanngbawi ngan cu asi. Aaronic priesthood (tlangbawi ngan) nih cun sual raithawinak a tuah lengmang ko nain caan sau a nguh lo. Zeicahtiah, minung cun nawlbia a zul kho fom lo cu teh. Asinain, Jesuh nih cun misual vialte caah amah thi thengte iput in raithawinak a tuah hnu ah thihnak nih a tei lo i a tho than. Cucaah, Melchizadek tlangbawi sining vialte kha a tlamtlinh dih i zungzal khamhnak a kan serpiak (Heb 5: 9).
#Phone catial cu duhning in tial a har ngai caah aa nawnnok ngaingai. A reltu nan dihlak cungah kaa lawm. Bawipa nih thlauchuah in pe hna seh. Amen!!
Henry Nawlbik Thang Hlawnceu