Tutan FB hmangmi hna nih Unfriends le Block tuah kan van hmang chin lengmang hna. Unfriend ti cu kan theih cio bang Mirang ca a si i a sullam cu "Hawikom si nakin hlawt, I Hawikomh kan duh ti lo" ti duhnak khi a si ko.
FB ahcun kan rem pah lomi hna le an umtu ziaza hna kan rem lo pah lomi hna kha Unfriend le Block kan i tuah tawn hna. Cun FB fri.. tamtuk ruang zongah Unfriend tuah a si i hawithar cohlannak ca zongah hawithing Unfriend ... tuah a si. Ruang ngei lo cun Unfriend le Block tuah a si tawn lo.
Kan FB Hawikom(friend) pakhatkhat nih FB in Unfriend si lo Block a kan tuahmi kan theih cun kan lung a tha tawn lo ngai.
Kei Unfriend tuah ka simi lakah Pastor Thawngling Mualhlun nih Unfriend a ka tuahmi kha ka lung a thalo bik. Kan rak i friiend lioah a sermon tialmi hna ka rak rel lengmang i thazaang ka rak ngah ngaingai. Caan zeimaw zat a kal hnu in Pator Thawngling ca thlahmi ka hmu kho tawn ti lo i ka van hlam. A rak ka Unfriend diam cangmi ka van theih i Ka lung a nuam lo colh. Add than zong a ngah ti lo. Zei ruangah Unfriend a ka tuah hna ti cu ka hngal lo nain a FB hawikom a tam tuk ruangah, hawithar cohlan a duh ruangah hawithing Unfriend a ka tuah hi a si ko lai tiah ka ruah.
FB te hna in Unfriend tuah le Block tuah hi a rak fak ngai ve ruangah Pakhat pa cu a Innpa a simi Nu nih Unfriend a rak tuah ruangah a lung fah tuk ah an Inn zuat Chizawh maw si dek, a rak thah ti a si. Naite zongah Boxing thongh thiam Mayweather cu hlasakthiam minthang a simi a hawikom Justin Birber nih Instagram in Unfriend a tuah ruangah a lung a fak tuk ti a si.
Hi ca ka tial duhnak bikah kan lut cang lai.
Minung nih Unfriend le Unfollow le Block tuahmi a poi ah kan chiah i kan lung a that lo chinchin a si ahcun Pathian Unfriend, Unfollow le Block tuahmi si chinchin cun zei tluk in dah a poi hnga..
Minung le Pathian cu kan i dang tuk. Pathian cu kanmah minung bantuk a si lo kan hmuhning zong a hmuhning he aa khat lo.
Amah Pathian nih cun minung hi amah lei nih zeitik hmanhah Unfriend, Unfollow le Block a kan tuah hmasa bal lai lo. Kanmah minung lei tu nih Pathian kha Unfriend, Unfollow si lo Block kan tuah le tuah lo lawng a si. Kanmah minung nih Pathian kan friend(hawikomh) chung paoh cu Pathian nih a kan hawikomh(friend) peng ko lai. A kan unfriend le Block bal lai lo.
FB in Hawithar kan cohlan duh tikah kan FB friends a khat cang si cun hawithing kha Unfriends or Block tuah hmasa hnu lawngin FB friend ship tak si khawh a si nain Pathian nih cun Fa thar a cohlan duh tikah fa thing kha a hlaw hlei lo.. Fathing kha hlawt hau loin Fa thar kha a kan cohlan lengmang. Amen.
FB a hmangmi thenkhat cu ahopaoh kha va hawikomh khawh, Friend ship ah va ser khawh a si lo I Friends(hawikom) si ding zong a duh lomi kan um. A sinain Pathian cu a duhmi paoh nih Hawikom ah ser khawh a si i "Follow Me" tiah a kan ti dih. Ka khamhtu le ka Bawipa ka Pathian ah ka cohlan hna seh, hung ka zum hna seh law hung ka bia hna seh ti hi a duhmi a si. Amen.
Nai A voi thumnak CBCUSA Conferences an tuahmi an motto zong kha "Follow Me" ti a si. A tha ngaingai. "Follow me" ti cu "keimah ah i peh u" ti duhnak a si.
Follow me ti a si caah Baibal ning tein ka tial cun Minung nih Jesuh kan va Follow hmasa a hau ko. Aruang cu" Keimah ah hin i peh u law kei zong nanmah he kaa peh ve lai." tiah Baibal Johan 15:4 ah kan hmuh.
Jesuh ah i peh (follow) a herh tuk hringhran. Jesuh ah kan i peh rih lo si cun a rannak in i peh zokzok u sih..
Jesuh he i pehtlaih lo le i hawikomh lo tih a nunzia hna kha a tang Baibal ah rel khawh a si.
Keimah ah hin i peh u law kei zong nanmah he kaa peh ve lai. Mitsur nge nih amahte in thei a tlai khawh lo i a ruang ah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo. Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo. Ka chungah a um lomi cu mitsur nge car bantukin lengah hlonh an si ko. Cu bantuk nge cu an pumh hna i mei ah an paih hna i cuka ah cun an kang dih. Ka chung i nan um i ka bia kha nan chungah a hmunh ahcun, nan duhmi paoh kha nan ka hal lai i nan hmuh ko lai. Nannih nih thei tampi nan tlai thawngin ka Pa sunparnak kha nan langhter i cuticun ka zultu i nan i canning cu a si. Amen
JOHAN 15:4-8
- Bawipa Sunparnak Caah....