Rul Versus Satan (Part- 1)- Arthur Ft

Biahalnak: Rul hi satan asi maw (Genesis 3:1)?

Bialehnak: Rul hi satan asi hrimhrim lo. Atanglei ah fianternak ka pek ning rak rel piak.

1. Rul hi sermi saram menmen le ramlak saram an si (Gen. 1:24-25).
2. Rul hi sermi saram hna lakah a zer bik (Gen. 3:1) ruangah, Satan nih a zer bik mi rul hmangin Adam caah hawile bawmtu ah ser piak mi minu Eve kha arak hlen nak cu asi (Gen. 2: 18). Study Bible pakhat nih a ttial ning ahcun, nu cu pa nakin a derthawm deuh (being the weaker one), cun a pasal huhphenhnak a herh mi asi ati (needing the protection of her husband). Cu ruangah, satan nih rul hmangin hlen a rak i tinhmi cu nu kha arak si ati (she was the object if his attack). 
3. Rul hi satan asi tiah Bible ah kan hmu lo. (a) Ni sawm li le zaan sawm li rawl loin Jesuh arak um lio ahkhan, Jesuh arak tukforh tu kha satan asi khah. Rul tiah Bible nih a ttial lo, khawchia (the devil) tiah Bible ah na rel lai (Matthai 4:1-11). (b) “Jesuh cu a hun i mer i Peter cu, Satan, ka sinah um hlah,” tiah arak ti ahkhan, Peter kha satan asi tinak asi lo. Peter kha rul asi tinak zong a rak si ve lo (Matthai 16:22-23). Khrih zuultu hna an tuanbia na rel ahcun, Peter cu a Bawipa Khrih Jesuh a rak hlawtu asinain, a rak hlawtmi a Bawipa Khrih Jesuh caah abittaling in vailam ah thah arak sinak kha fiangtein na hngalh lai. Cuhe aalo in, Genesis 3:1 na rel tikah, rul kha satan tiin naa leh (interpret) asi ahcun, satan sining le rul sining na thleidanh khawh rih lo bia tu khi asi ko hnga?
4. Rul cungah Pathian chiatserhnak a tlungmi le satan nih intuar te ding chiatserhnak hna cu an rak i dang ngaignai. “…hi chiatserhnak hi nangmah lawng nih na in lai. atu thawkin hin na paw in na lawn cang lai i na eimi rawl cu leidip a si lai… (Gen 3: 14-15),” Bible ah tlingtein rel piak chap te. Pathian nih rul hi chiat a rak serh ning in nihin tiangah rul nih cu chiatserhnak cu a in peng rih.
5. Rul hi pa10 leng kai ka thah ve cang. Rul na that bal ve maw cu ka hngal lo? Rul hi an min kan hngal cawk lai ka zum lo. Rul aphun arak tam ning hi a mak. Khuaruahhar asi mi pakhat cu, ka rak thah bal mi rul pa10 lengkai hi funghreu in ka thilak in ka tuk hna hlan ah siseh, lungtum in an lu maan lak ka rial hna hlan ah siseh voikhat te taktak hmanh khi an ka tukforh bal lo. Rul nih hlen bal mi na theih mi minung an um bal maw?

Rul hi satan asi lo. khawchia zong asi lo. Thlarau (spirit) zong asi lo. Vanmi (Archangel or fallen Angel) zong an si lo. Rul cu saram menmen an si i, sermi saram lakah a zer bik an si (Genesis 3:1). Azer bik mi saram, rul ahkhan satan cu aa hrolh (possess) i a derthawm deuh mi nu kha a rak hlen biatu asi deuh (Study Bible pakhat nih attial mi chungin, ‘possess’ timi le ‘being the weaker one’ timi biafang ka rak hman ve nak asi.) 

Rul versus Satan tiah ka rak ttial mi ahhin, rul hi satan asi lonak kha tam deuh in ka rak ttial. Satan versus Rul tiin Part II ah ka rak ttial nolh tthan te lai. Cutik tuah, Satan hi rul asi lonak fianter nak ka pek te ve lai.

Gredit: Arthur Ft

Adam le Eve Nih Thingthei An Ei Hlan ah Sualnak An Rak Tuah Maw? Arthur Ft

Rev. Aung Myint Thang nih “ADAM LE EVE NIH THINGTHEI AN EI HLAN AH AN SUALNAK HNA” timi a rak ttial mi cu, Salai Noble Van nih “The Chin News” ah a rak post. Cattialtu nih attial mi na rel hmasat hnuah, ka rak ttialchin ve mihi a hramthok in a donghtiang na rak rel lai nak hnga upatnak he nawl kan duh.
http://www.thechinnews.com/adam-le-eve-nih-thingthei-ei-hlan-ah-sualnak-hna/

Pathian bia (Bible) kan rel le thawngttha kan chim ah, biafang kan hman ning (Choice of words), Bible biafang kan char/leh ning (The way we interpret the Bible) hna kan i ralrin lo ahcun, kan palhnak remhcawk an si te lai lo hih, cucaah, Pastor le Bible sianginn kai liomi hna nih ahleikhunin ralrin tein Pathian bia rel le ttial/chim hna usih.

Rev. Aung Myint Thang nih biapi ngaiin chim a timh mi pa6 hna cu, ‘a’ in ‘f’ ah fiang tein arak ttial. Attial mi le a ttial ning, Bible biafang aa char ning le aa lehning nihkhin a careltu nan lung an vaivuanh ngaingai hna lai.

Bialehnak kaa awt lai.

“Lihchim, Biapawrh le Sualnak” timi Rev. Aung Myint Thang chimmi, zohttinak kan ngei hna lai. Genesis 2 & 3 kha kau cia tein rak chia ko.

“Pathian nih a tongh zong nan tong lai lo” tiah a kan ti, tiah Eve nih lih a chim tiin Rev. Aung Myint Thang nih a ttial. “Bia a pawrh. Lihchim le biapawrh cu sual asilo na ti kho maw? Thingthei an ei hlan ah a chim mi bia asi khah,” tiah a ttial tthan rih. Adik bak na ti lai maw?

Eve nih “Pathian nih a tongh zong nan tong lai lo (Gen. 3:3),” tiah a rak chim ahkhan, Pathian nih Adam sinah a rak chim ning in a chim lo i, biafang a bet mi le a zuh mi aum ticu kan i fiang tuk cio ko in ka thei (Gen. 2:16-17). Genesis 2:16,17 le Genesis 3:2,3 hi na rel tthan ahcun, Eve nih Pathian bia azuh mi le a chap mi fiangte’n na tthen khawh lai. Asiah, Rev. Aung Myint Thang chim bia bangin, lihchim le biapawrh cu sual asilo na ti kho maw? ati mi kha van ruat tthan ta hmanh? “Thingthei an ei hlan ah lihchim an hmang cang. An sual cang,” tiah fianghlang tein a ttial mi na rel ve kha mu?

Pathian nih tuah ding le tuah lo ding, zulh ding le hrial ding, afawinak incun, “nawlbia” cu Pathian nih Israel mihna sin ah a rak pek hna. Asinain cu “nawlbia” cu Adam le Eve sin ah rak pek ansi nak Bible ah arel bal mi nan um lai ka zum lo. Rev. Aung Myint Thang zong nih a rel bal lai ka zum lo. Phundang deuh in ka vun chim lai, “nawlbia” cu Biakam Hlun le Biakam Thar ah relcawk lole zulh cawk loin na rel lai, nain, Eden duum chungah Adam le Eve caah rak pek mi le zulh awk asi mi cu, Genensis 2:16, 17 ah, “Mipa cu a thawh i, “Dum chung i a ummi thingkung vialte hi an thei na ei dih ko hna lai, 17nak sihmanhsehlaw a ttha le a tthalo hngalhnak pe khotu thingkung a tlai hi cu na ei lai lo. Na ei ahcun, na ei ni hrimhrim ah na thi lai,” a ti.” ati nak lawnglawng kha arak si. Adam le Eve Eden duum chung an rak tlonlen lioah chan ahkhan, Moses hmangin rak pek mi nawlbia pawl nihkhan, a rak uk hna in arak ttemttawn bal hna lo. Exodus ah nawlbia kong he pehtlaiin tampi chim ding aum. Nawlbia 613 kha van ruat tthan hmanh? Nawlbia 10 kha tah? Eden duum in Adam le Eve tthawl an rak si hlan ah pakhat tal zulh ding na hmu bal ve maw? Pathian nih lihchim hlah, biapawrh hlah, mithil fir hlah etc,… timi pakhat tetal aa tel maw? Moses chan le Exodus in a hung aum chom/pekchom nawlbia i lak riangmang in Eden duum chungah chiah i, Eve sual va phawt cu, Pathian nih hlah maw nawlbia pek aa palh sual? tiawk in.

Genesis 3 nih chim aa timh mi zeidah asi? Afawinak incun, minung nih Pathian bia an rak hlawt, satan hlen bia an rak zumh le tlukhram aa thok nak hna ti cu afiang ko lo maw? Lucifer nih alungchung in zeibia a rak chim kha (Isaiah 14:12-15)? Adam le Eve nih Pathian lawh an rak duh khah, satan hlennak an zumh deuh ruangah (Genesis 3:4,5). Pathian lawh duhnak thinlung nih arak tei hna i, ei hlah na ei ni ah na thi lai ti hmanh cu an Eve nih a rak ei i, Adam a rak pek kha? Cuhnu ahpei Pahtian aw an rak theih kha? Eve nih, “A tongh zong nan tawng lai lo” tiah a rak chim ahkhan sual le sual lo ah Pathian nih zeibia hman arak chim rih ttung lo? Rul le Eve bia ruahnak zong a rak donghcah rih ttung lo? Eve nih Pathian bia daipathlang in a rak chim ruangah rul (satan) nih caanttha arak i lak diam titukhin kan chim ahcun, a dik deuh hnga? Genesis 3:1-24 tiang khi na rel peh ahcun, Pathian nih, Eve! Zeiruangah dah lihchim le biapawrh na hman? Sual asi ti na thei lo maw? Lihchim le biapawrh na hman ruangah, nan sual cang, tiah bia arak ceih hna hrimhrim lo khah. Eve nih lih arak chim, bia a pawrh, cucu sual asi timi hi, cawnpiaktu dirhmun in kan hman loah a ttha. Pathian nih Adam le Eve nih thingthei an rak ei hnu ah pei, rul cu dan a rak tat i chiatserhnak a tlunter kha (Genesis 3:14-15).

Rev. Aung Myint Thang hi apalh maw adik? timi nakin, biahmaitthi ah ka chimg cang bangkhan, biafang hmandan tete cu hi aa palh deuh ko rua, tituin ka hmuh. Hikonghe pehtlaiin, Cauk le Bible cang tampi cherhchan in chim le ttial ding a tam pi ko, nain, atu ka ttialmi vial ahhin, afiang ngai ko rua tiah ka ruah. Aherh sile, ka rak ttial peh tthan te lai.

Note: Mitampi nih Rul, Adam le Eve cu, an pa3 ningin Pathian nih dan atat hna, chiat aserh hna tiin a ruat mi nan rak um kho. Pathian nih Rul cu dantat i chiatserhnak acungah a tlun ter (Genesis 3:14-15), asinain, Adam le Eve kha chiat a rak serh hna lo. An intuar danding tu Pathian nih arak chim, phundang incun, an cungah harnak atlunter ti khaw asi. Dan atat ti zongin chim khawh asi ko. Chiatserhnak biafang a rak hmang lo, chiat a serh hna lo.

Gredit: Arthur Ft

Salai Van Lian Thang: Kan tlolh; Nain Kan Sung Lo!!

Tlangsang ngaingaimi ah a kalpi i vawleicung ram vialte le an sunparnak vialte kha a hmuhsak.

“Na khuk naa bil i na ka biak ahcun hi vialte hi kan pek dih lai,”  tiah ati.

Nain,  khukbil le biak cu chim lo; "Satan, kal cang!" tiah a tthawl.

"Ramkomh in Zeitikhmanh Kan Chuak Lai lo" tiah bia nan ikam ahcun tlukruannak covo; mahtein khuakhan tawlrelnak nawl le ramkulh phunghram suainak nawl vialte hi kan in pek hna lai, an ti.

Tlangcungmi kan pa le nih, "kan i kam kho lai lo" tiah an leh hna. Cucaah kan in pek hna lai an timi vialte cu an lak tthan dih.

Micheu nih a poi ko, an hun ti. Poi hlah!!!!

Satan hmai khuk i bil i vawleicung ram vialte conak cha cun co lo kha a ttha deuh.

Khuk kan i bil thawngin techin fapar chantiang a kan hrengtu le a kan temtu ding thil khi...

Ngaingai ahcun: vawleicung ram vialte le sunparnak ngeitu taktak cu Satan asi lo. A ngeitu tu kha ka bia law kan pek lai, a ti cuh!

A taza lo tuk!

Taktak cun: Ramkomh Kawlram Bupi a ngeitu taktak cu Tatmadaw le cozah an si lo.

Hi ramkomhpi a dirhtu le a ngeitu taktak cu kanmah tu kan si. Ningcang lo tukin sir an kan hnawn bia. Cucu dawh bia ikam uhlaw tlukruannak covo kan in pek hna lai, an ti cuh!

A taza lo tuk!

Self-determination cu pipu chan in kan ngeihcia kanmah ta asi. Ningcang lo tukin an kan chuh bia. Cucu dawh kan hmai kun uhlaw kan in pek hna lai, an ti cuh!

A taza lo tuk!

Chinram cu Chinmi kanram le kan vawlei asi. Ningcang lo tukin an kan uk bia. Cucu dawh kan hmai kun uhlaw nan ram uknak phunghram suainak nawl cu kan in pek hna lai, an ti cuh!

A taza lo tuk!

Satan nih Zisuh a hmai khukbil a fial bantuk kha a hun lo deng.

Taktak cun: Kawl kuttang ah techinfapar chantiang nan um peng cang lai, kan hna a tla, tiah min thu uh, ti tluk khi asi.

Ningcang loin ralkap nih an suaimi 2008 Phunghram i cang 10nk zon hi kan hna a tla tiah minthu uh, an hun tinak khi asi.

Biafang hrim hi a "fak": namchihnak; tlaihkhihnak; temtawnnak; renghnak; khapnak; phihnak; namnehnak le zeirelonak aa tel.

Cucaah kan pa le nih, "min kan thu kho lo" tiah fek tein le ralttha tein nan almi hna cu a dikmi dirhmun asi.

Tutan kan tlolh; nain kan sung lo!!  A taza lomi thil cu sau a nung bal lo!

Kanmah kan ta cia cu kanmah kan ta thotho an si tthan dih te lai.

Gredit: Salai Van Lian Thang

C. Ronaldo le Messi Tanh Tuknak Nih Laimi Lakah Satan Bangin Rian a tuan

Naite ah Messi Tax pek lo ruangah thong a tla lai timi kongah bia tha loin Laimi kanmah le kanmah kan i ti len cang. Tlawmpal ah Ronaldo Tax pek lo kong an van tial than i catialtu tak a si lomi ca a thlahtu men, kan Lai hritlai zong kan thuat len hna. Cun News a tialtu zong, Salai Lungthli Tum telh in biafak in kan thuat len fawn. "Messi- Ronaldo- Jesuh" ti tlangkhenh  in keimah tialmi kong zongah Uico pa ti tiang ka tong. 😃 Ronaldo le Messi tanh tuk ruangah Laikhat chuak a simi zong kan i vollpamh chih hna. Cu caah Ronaldo le Messi tanh tuk nak ah Satan aa hrolh ti khawh a si ko hnga.. Hi catialmi kong zongah a ka ti lenmi nan um rih kho men....

Anmah pahnih tanh tuk ruangah Vawlei cuangah aa vuaimi zong an um. Laimi lak zongah Anmah tanh tuk ruangah Pakhat le pakhat bia fakfak in kan i ti. Zeiruang ah si loin anmah tanh tuk ruangah a si ko.

Zeipaoh a zatawk te a um ti a si bang CR 7 le Messi tanh zongah hin a zaa tawk a um ko. CR 7 le Messi tanh tuk ruangah Laimi kanmah le kanmah bia fakfak in nan i ti len hi cu cianh nan um ngai. Tahlak nihchuak zong nan si.

Anmah pahnih ruangah Laimi kanmah le kanmah hi tlukin i kan i volhpamh len hi cu mifim um tu ning a si kan ti kho hnga lo. Khrihfa nunning he aa remmi zong a si lai lo. Pathian nih a huatmi tu a si lai.....

Catialtu Hmuhning
Bawihrin Sang Khengmual

Kan Media Pawl Sin Biacah. Pathian Fanu

Atu cu kannih Laimi te zong nih kan umnak hmun khuate thingtang ramtang tiang zong in Internet line kan hmang kho i vawleipi thawngpang thawngpang zong kan theih kho i kan rel kho dih ve ngot cang.

Cucaah kan miphun chungin thawngpang a kan leh piakmi zong nan tam ngai cang i lawm a um taktak, a bikin kawl le mirang a thiam lomi pawl kan ca koah a ttha khun, cucaah a tang lei ahhin bia pathum(3) te cah kan duh ko hna.

Cucu zeidah a si ti-ah cun,

1.Tuchan ah cun mizei miphun ram kip caah thawngzamhtu(media) timi hi an biapi dih ko, cu hna lak hmanh ahcun kannih Lai miphun thawngzamhtu ko hi nan biapi khun rua ka ti. Aruang cu Laimi nih kan Lai ca hi a tungtlangpi kan ngei rih lo caah nannih kan Laica ttialtu tete nih hin kan holh kan ca hi nan tthatter i nan chiatter kho, Lai ca tthanchonak ding cu Lai cain ca a ttialmi vialte nan dihlak cungah a um. Cucaah Laica in ca nan ttial tikah cafang aw le cafang tung fonh(spellings) pawl nan i palh lo dingin kan cah duh hna.

2.Laimi cu miphun dang thawngzamhtu(media) hna bantukin mah nih mithmuh kuttonghmi thawng a zamh kho ding le a ttial kho ding kan um rih lo caah miphun dang nih a ttialmi kawl le mirang tibantuk a leh chawmmi kan si tikah ruat ta ding tampi a um, cucu zeidah a si? Pathian a zumh lomi le siasal a biami hna nih an duh salamin hurduh cuainak le pumsa diriamnak caah tiah mikip sinah an photzamhmi khi kannih Laimi kan i lak riangmang i hehceh tiah kan leh i Laimi Khrihfa hna sinah kan photzamh chin leng mang ve.

Unau annih cu zumlotu an si kha na hngalh lo maw? Annih cu ruahchannak a ngei lomi an si kha na hngalh lo maw? An tuahmi cu kan tuah ve lai maw? An chimhmi kip cu kan chimh ve ko lai maw? A tampi chim len ding a um, asinain ka chimh ti lai lo. Cucaah unau thawngzamhtu vialte hna, hurduhcuainak asimi video le ca ttial hi cu Laimi lakah rak hmang ti lo ding in kan cah duh ko. Laimi thlarau nun hrawktu a tamtuk cang.

3.A cunglei ah kan chimh cia bang khin, zeihmanh thiamnak a ngei lomi tete zong nih nanmah thawngin vawleipi thawngpang kan rel khawh ve hi lawm a um tuk hringhran, Bawipa nih nan rethei tha batnak vialte cu in hmuhpiak dih ko hna seh, amah belte zeimaw khuacaan ah cun mipi caah tthahnemnak zeihmanh a ngei lomi video le ca hi a tamtuk tawn, a tlangpi nan tarmi le a chungbia aa lawh tilomi zong a tamtuk, tangka hmuhnak rumro in(media) a ttuanmi nan lo.

Cucaah nan ca kan rel, kan in hmehpiak hna tikah tangka nan hmuh bang in kan ca a reltu mipi hi ihlawkpi ve hna seh timi he kan ttuanpiak hram u timi zong kan cah cih duh fawn hna. Nan ca ttialmi kan rel i nan(links) tete kan hmeh tikah a thlawn(free) in kan hmeh ve lo, kan tangka a dih ve timi cu kannih mipi nak hmanh in nan theih deuh lai cu; cucaah kan miphun lakah zawnruahnak le thilttha tuah duhnak lungput he ttangla cio ko hna u sih.

Nan miphun hawi
Nan u nan nau a simi
Pathian Fanu

Messi- Ronaldo- Jesuh

Messi le Ronaldo kan tanh bantukin Jesuh hi tanh ve u si law.....

Messi le Ronaldo fand kan si bantukin
Jesuh Fand si ve u si law.....

Messi le Ronaldo kan thangthat hna bantukin
Jesuh hi Thangthat ve u sih law.....

Messi le Ronaldo kan uar bantukin  Jesuh hi uar ve u sih law....

Messi le Ronaldo ruangah thih kan ngamh bantukin Jesuh ruangah thih ngamh ve ko u sih law....

Messi le Ronaldo hi kan lung takin hehchat kan tanh, tha kan pek i kan thangthat. Messi le Ronaldo kan thangthat len nain a pel te hman a rak kan thei hngal lo i san a tlai lo.

Mah nak cun Messi le Ronaldo a sertu le a kan thei hngal dihtu Jesuh tu hi kan lung takin hehchat tanh u sih law thangthat u sih law a tha deuh tuk i San a tlai deuh tuk lai..

Bawihrin Sang Khengmual

Rul Hi Sehtan Si Sehlaw Jesuh Hi Kan Caah A Thih A hau hnga lo. Rev. Aung Thang.

Biahalnak: Rul hi Satan a si maw?
                    Rul hi Satan a si ti Baibal ah a                          um maw?


Aung Thang:
Sihlah ee, Sehtan nih rul a rak hman tinak a si ko.

Rul hi Sehtan si sehlaw Sehtan nih cun a kan hrawh khawh ttung lai lo.

Zisuh zong kan caah a thih a hau hnga lo.

Rul nih cun hell ram ah a kan hruai khawh lai maw?


Biahalnak: Rul hi Satan a si ti a pommi hna hi zeitin kan leh hna ah a tha bik lai?

Aung Thang:
Rul cu rul a si. Sehtan cu Sehtan a si. nangmah Sehtan nih an hman bantuk in Sehtan nih Rul a rak hman ve tiah va let hna..

Rul Hi Satan A Si Lo. Hrambik Lian

Biahalnak: Rul hi Satan a si maw? Baibal
                   ning le na pomning? Laimi nih
                   Rul hi Satan a si tiin a pommi an                     um. Gen 3:1-11 ah Rul hi Satan a si                    hrim ko tiin a pommi hna hi
                   zeitin kan leh hna lai?

Hrambik Lian: -
Adam le Eve sin ah Satan kha rul hmang in a rak i langhtu khi a si.. Gen. 3:1 ah "Rul cu zei zong vialte nak in a fim a zer bik..." tiah aa thok.

Rul zernak kha Satan nih Adam le Eve hlennak caah a rak hman biatu khi a si ko. Amah rul khi Satan a si siloin Sual hramthok tuanbia ah Satan nih hlengtu ah a rak hmanmi a si biatu khi a si..

Pathian nih Eliazah rawl petu ah, lang-ak a rak hman. Asi ahcun, Pathian nih voikhat a hman ruang ah lang-ak poh Pathian thlarau an si ti awk a tha ve hnga maw?

Pathian nih lang-ak a hman tik ah, riantuantu taktak cu lang-ak siloin amah Pathian a si ti kan hngalh ko... Satan nih rul a hman tik zong ah rian tuan taktaktu cu rul siloin amah Satan a si ko ti cu hohmanh chimh hau loin kan hngalh awk a si ko.

Rev. Aung Thang Nih Rul Hi Sehtan Si Sehlaw Jesuh Hi Kan Caah A Thih A hau hnga lo tiah a chimmi Relnak.

http://iangngeichinram.blogspot.com/2017/05/rul-hi-sehtan-si-sehlaw-jesuh-hi-kan.html?m=1

Malaysia Ummi Caah Wifi Free A Um.

Kawl Phungthluk ah “Theitu nih lak, thei lo tunih lonhtak” ti mi bantuk khi a si. Chinmi tampi a kan molhtertu zong a si I, Tampi a kan tthathnem ter tu zong a si I, Thawngtha tampi zong a kan theihter I Thawngtha le Bible rel kho lo ding in a kan hlat ter tu zong a si mi Internet le Wifi cu hngakchia in Ter tiang nih Zawng Banhla duh in kan duh dih cio mi a si caah phaisa tampi a kan dih ter lengmang tu a thli te in kan phaisa a kan firbik cem hna a si tawn.

Malaysia ah Wifi Free a um ti hi mitampi nih cun kan theih lo. Cun a cheukhat hmun le hma hna ah cun Mah Wifi line hi a tthat lo caah hman a ngah lo nak zong a um. A cheukhat hmunhma ah cun Youtube zong tha te in zohkhawh nak a si. Cu Wifi a min cu (Riger1) ti a si. na phone ah a langh colh lai lo caah nangmah te in khumh a haumi a si caah a tang lei ka lang ter mi bantuk in khum a thiam lo mi hna  caah ka rak langh ter lai. a fawi te a si ko.

Setting chung ah na lut lai I Wifi kha na awn lai I a tang bantuk in a rak lang lai I “ Add network” timi kha hmet.

Mah kaa zawn ah hin Samsung le phone dang ah cun “Add network” timi khi na phone orhleikam a cung bik te ah “more” timi kha a um lai mah kha hmet law “Add network” timi kha thim law a tang lei bantuk in a rak chuak lai.

Mah ah khan “Network name” timi ah khan “Riger1” timi kha ttial law  “ok” a si lo le “connect” timi kha hmet law line a tlaihnak hmun a si ah cun line a rak kai te ko lai. cu ti cun na phaisa tampi na save lai, a mah bel te cu thilthalo zohnak ah hman lo in Bawipa sunparnak caah kan thilri vial te hi hman thiam hna uhsi, cu cu zumtu tiah auhmi hna nun cu a si.

Ritdawn Nu

Riger 1 a ngah lo cun Riger 2 le Riger 3 in tuah khawh a si. Nan hawile nih an theih ve nakhnga Share

Jesuh Vancung Kai Ni - Ascension Day Sermon. By- Pastor Sang Nawl

Kan Bawipa Jesuh cu thihnak in a thawhthan i ni (40) hnu ah vancung ah a kai than. Cu Bawipa Jesuh  vancung a si ni caan cu 'Jesuh Vancung Kai Ni' - 'Ascension Day' a si i, tukum cu May-25 ni khi a si lai.  Cucaah Europe ram ṭhenkhat hna ahcun zungkhar ni public holiday  ah an hman. Hlan lio ah Europe ram cu Pathian a rak duhmi le ṭhanghnak Revival a rak tlungmi ram an si caah mah bantuk biaknak ni hna hi an rak sunhsak ngaingai. Thlacam ni hna an rak ngei i, zung le rian khar dihin thla an rak cam tawn. Asinain atu ahcun zapi cu  mah bantuk ni sunglawi caan ahcun thlacam ti lo le Pathian thangthatnak tuah ti loin , vawlei nuamnak le zu din caan tu ah an hman cang hna.

Jesuh nih zultu hna cu thihnak a in lainak ding le a thawhṭhannak ding kong a rak chim chung hna. Cu bantukin vancung a kai lainak ding zong tihin  a chim hna. Jesuh nih zultu hna cu   ’Khuaruahhar lungrethei in um hlah u. Pathian kha zum u, keimah zong kha ka zum ve u. Ka Pa inn chungah khaan tampi a um ko i cuka i nan caah hmun va timh awkah ka rak kal lai.  Cun ka va kal lai i nan ca i ka va timh dih hnuah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai’’ (Johan 14:1-3) tiah a ti hna. Hebrumi hna an tuanbia phun ah nupi an ṭhit hlan ahhin inn le lo, zeizong vialte an timh lamh dih hnu ah nupi an ṭhit ti a si. Cu bantukin Jesuh zong zumtu hna cu ṭhit ve ding kan si caah, zeizong vialte kha timhtuah dingin ka Pa sinah ka va kal lai i nan umnak ding ka va timtuah lai  a tinak a si.

Thomas nih cun a thawh i, “Bawipa, khuazei i na kal lai kha kan hngalh ṭung lo, zeitindah cuka phaknak lam cu kan hngalh khawh lai?” tiah a ti. Cu tikah  Jesuh nih, “Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo (Johan 14:5-6) tiah a ti. Filip zong nih  “Bawipa, na Pa cu kan hmuhsak law cu vial cu kan herhmi a si ko,” tiah a ti ve i, Jesuh nihcun, “Nan sinah saupi ka um ko cang, asinain na ka hngal rih lo maw?  Keimah a ka hmutu paoh nih cun ka Pa kha an hmuh ve ko, cucaah zeicahdah na Pa cu kan hmuhsak, na ka ti? (Johan 14:8-9 tiah a ti.

Jesuh cu thihnak in a thawhṭhan hnu ah zultu hna sinah voi tampi aa langh ṭhan. Jesuh nih a cah takmi hna cu vawlei cung khua khuazakip ah va kal u law miphun vialte kha ka thawngṭha hi va chim hna u ti hi a si. Thluachuahnak a pek hna i,  cuticun Oliv Tlang khan an sinin aa ṭhen i vangcungah a kai. Cun minmei nih a hun phenh i an hmu kho ti lo. (Mark 16:15, Luka 24:50, Lam 1:8).

Zultu hna nih Jesuh a liam riahmah kha an cuanh ko lioah cun, puan rang aih in minung pahnih an pawngah cun chikkhatte ah khin an rung dir i, “Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir ṭhan lai,” (lam 1:10-11) tiah an ti hna. Amen.

Hawidawt hna Jesuh nih a chim bantukin  pakhat hnu pakhat  a tling thluamah cang i, atu a tangmi cu vawlei cungah a rat ṭannak ding lawng a si cang.  Jesuh Khrih cu vancungmi he an rak ra lai i, nichuahlei in nitlak tiang aa lekmi  nimtlau bantukin a ra lai. ni cu ruah lo piin a si lai i, mifir an rat bantuk in a si lai. Cu ni le caan hna cu ahnohmanh nih an hngal lo. Cucaah fimkhur te le timhcia tein rak  um i rak hngak ding kha cathiang nih a kan cawnpiak lengmangmi a si. (Matthai 16:27, 24:27, 24:36).  Kan Bawipa Jesuh cu rualo piin a rak rat lai caah  timhcia tein rak hngak ve cang hna usih.  

Sang Nawl
Gospel Revival Ministries
Email: gospelrevival2012@yahoo.com
Phone : 0045 42424116

Rul Hi Satan A Si Tak Maw? Laimi Nih Rul Hi Kan Thah Viar I A Ci Kan Hmih Viar Awk A Si Ko Maw?

A hramthok tein Adam le Evi a rak hlengtu cu Satan a simi Rul a si. Satan nih Rul pum hmang in a hlen hna.

Mah ruangah Laimi tam u nih cun Rul hi Satan hmuh in kan hmuh i Satan a si a timi kan um hna. Mah ruangah Rul hi thah viar ding a si. A ci-hmih zongah a poi lo a timi zong tampi kan um. Baibal zongah Rul cu Pathian chiatserhmi a si..... Minih na lu kha rial an in zuam lai i nang nih an kedil kha zuk naa zuam ve lai,” tiin aa tial. Genesis, 3.15 .

Rul Hi Satan A Si Tak Maw?


Mi pakhat nih "Rul hi Satan a silo a titu cu Baibal ca a zum lotu an si lai" a ti ka theih cu ka lau pah. Rul hi Satan a si tiin kan hmuh awk a si lo. A ruang- Baibal ah rul cu satan a si tiin aa tialnak a um lo. Rul hi Saram dang hna bang Saram phunkhat an si ve. Saram dang bantukin Anmah tein Pathian nih rawl a pekmi an kawl i an ei. Anmah um tein an um ve. Minung he kan i hmuhton hmanh ah harnak a kan pe ngam tawn lo. An zaam.

Rul phun khat hnih cu Thihnak tiang Siivai an ngei nain Lairam ah Rul cuknak in a thimi Kum khat ah Minung pakhat hmanh kan um lo. Fikfa sehnak in a zaw i a thimi tu kan tam deuh. Mah ruangah rul doh len le tih len nakin Fikfa tu doh i tih deuh ding a si. Baibal ah Pathian nih Rul thah le doh a kan fial lo. Satan doh ding tu a kan fial deuh. Cun Baibal chan lio bangin Tuchan ah Rul pum chungah Satan a lut timi thawng kan thei bal lo.

Rul hi kan ral si tak hna seh law kan hlanpi in Pathian nih a thimmi Israel mi nih an rak thah viar hnga i Rul hi thah viar i a ci rak hmit viar ding si seh law a hramthok tein Israel mi Hor tlang ah an phunzai lio ah cukter dingin Pathian nih a hmanding Rul hi a rak bau hnga. Cun hi Vawlei ah Saram phun an tling hnga lo. (Namber 21:3-9)

Baibal Ah Rul A Thalei In Hmannak

Rul hi Satan a si lo hmanh ah Satan hman rua a si kan ti theu. Satan hman rua a si bang Pathian hman rua zong a si ve ko. Baibal chungah Rul hi Pathian nih a thil tuahmi tlamtlinter ding zongah a hman tawn. Baibal ah Rul hi a chialei hmannak a um len bantukin a thalei in hmannak a um len ve.

Moses thiangthunh kha Rul ah aa cang khomi a siter. Cun Isrealmi an phun zai lio ah Pathian nih rul a hman i a cukter hna. Cun Dar Rul an zohmi paoh a nunter than hna. (NAMBAR 21:8‭-‬9)

Mi fapa Jesuh zong hi Rul timi Dar Rul he tahchun a si.  Moses nih dar rul kha thetse ram lakah a tar bantuk khan Mi Fapa zong hi tar a si ve lai. JOHAN 3:14

Laimi Nih Kan ram Um Rul Kan Thah Awk A Si Maw?

Rul hi Laimi kan caah a thatnak pakhat hmanh kan thei lo. Kanmah nawl in duh paoh in kan thah zongah a poimi thil a si lo kan ti. That hlah u ti a si zongah kan thah thiam ko lai. Keimah zong Thantlang ka um lio ah Rul ka rak thah tawn. Rul thah ah ka rak tang ngai. Atu zong Lairam ah um ning law Rul ka hmuhmi cu ka thah rih theu lai.

Rul A Thahnemnak

Rul hi vawlei cung thiamsang hna nih cun Sii ai hna ah an hman khawh. A saa zong, an carter i ei awk an an zuar. A phaw zong a thahnem ngai. A danga thahnemnak zong a um len rih lai. Cun Rul hi Kan pawcawmnak facang kan cinmi a kan zohkhenh piaktu an si ve. Kawlram khua pakhat ah Rul an hmuhmi paoh an tlaih i an rak thah viar ti a si. An leikuang ah facang an cinmi hna Zuu nih a van ei ciamman cu harnak tha lo te an tong. Mah hnu cun Rul an rak thahmi kha an i chir tuk ti a si. (Kan hnu kum thawngpang). Kan theih cio bang Ramdang le ram thangcho ahcun Rul hi thah len loin a zuat in an zuat hna.

Ram Thangcho Ah Duh Paohin Rul Thah Khawh A Si Maw?

Rul hi Lairam ah cun kanmah nawl, duh paoh in thah khawh a si nain Kawlram le Ranleng ah Rul raang kan hmuh sual i kan thah cun anmah he i sikvuak nak le buainak hna a chuak ko. Thong tiang a kan thlak khawh. Cun Ram thangcho zong ah rul duh paoh in na thah cun thong na tla kho i Dantat zong na si kho. India le Kala tam u nih Rul pakhat khat hi Pathian biakin an biak i Kawlmi thenkhat hna zong nih an biak ve. Mah ruangah Rul an humhak ngai.

Kawl Pawl Nih Rul An pomning A Langhter

Sermi thil vialte hna hi lamkaltu an si dih ko tiin hla phuahtu nih a phuahmi hi thil pakhat khat kan ruah tikah kan ruah chih peng cun a tha ngai. Rul zong hi Pathian sermi an si ve. Pathian nih a sermi cu minung nih a tha lo, kan duh lo kan ti zongah san a tlai lo.

Vanthar le vawlei thar zongah rul hi an um lai ti kha a tang Baibal ah fiang tein hmuh khawh a si.
 Cenghngia le tuufa cu an tlong ti lai i chiandeih nih caw bantukin capawl an ei lai. Rul cu Tih an nung ti lai lo i a rawl ah leidip a si lai. Ka tlang thiang Zion Tlang cungah cun i hliamkhuainak le i hrawhnak zeihmanh a um ti lai lo,” a ti.
ISAIAH 65:25

Pathian Fa Taktak, A Hrinthar Cangmi Nih Rul Tih awk a si lo.

Moses zong nih rul a tih lo. A mei in a tlaih men ko. Cun Pual zong thihnak tiang a ngeimi rul sivai ah ruahmi Rul nih a kut ah a cuk i aa thlai, tih loin a thin sawh men. Zeitin hmanhin a um lo. (Lamkaltu 28:3-6)
Rul kan tih hmanh ah a a hleithluat tukin tih lo ah a tha. Thenkhat cu rul kan tih tuk i a thi ciami hna tih tha loin kan tih, kan tih hmanh ah thah ngam lo tiangin cun tih awk a si lo.  .... zeicahtiah Tihnak cu dantatnak he aa pehtlaimi a si.1 JOHAN 4:18 

Note: Catialtu Hmuhning
Bawihrin Sang Khengmual

Vailam Nih a kan khamh kho lo, Jesuh nih tu nih a kan Khamh khawh. Rev. Tial Lian Thang

Vailam VS JESUH

Vailam cu:

-Kan nunnak a si lo

-Kan khamhnak a si lo

-A thiangmi/ kan thiannak a si lo.

Jesuh cu:

-Kan nunnak a si

-Kan khamhnak a si

-A thiangmi /kan thiannaak a si.

Vailam hi Jesuh loin sullam a ngeih lo. A zei caah ti ahcun Vailam hi misual caah ser a si. Sual biaceihnak a si i misual (a sual tak takmi) pawl thahnaak sawhsawh lawng a si. 

Vailam nih a kan khamh kho lo, Jesuh nih tu nih a kan khamh khawh.

By- Pastor Tial Lian Thang

ZISUH MIN IN HNAM KA THLAWLNAK KONG LE VIDEO. Rev. Aung Myint Thang

Aluan cia mi kum thum ah khan asi cang. Kan in ah a kan um pi mi kum 15 nu te cu hnam a chungah a lut lengmang. A taksa hi hmun tampi in a duk. Achung i hnam a um lio ah ka hal i, hnam nih cun keimah nih ka sehnak asi a ti. Cu hlan ahcun hnam hi ka zum bal lo. Keimah nih ka tinmi asi....

Video Zohnak Link: Hmet

Video Zohnak

https://m.facebook.com4694&id=100009318567990

Hnam Cu Baibal In ka hrocer, Hnam kong ka hal dih. VIDEO he- Rev. Aung Myint Thang

Hnam cu Baibal in ka hrocer i hnam kong ka hal dih. Hnam cu sur in khuh ahcun an hnam kha a chuak kho ti lo i zeipoh hal khawh an si. Zapi theih ding ah ai dawhcah lo ka ti i ka thlah lo mi zong tampi a um rih.

Aung Myint Thang

 Video Zohnak Link: Hmet

Video Zohnak

HNAM BAIBAL KA REL TER NAK KONG. VIDEO He- Rev. Aung Myint Thang

Rian ka ttuan lio asi i a linh tuk caah angki lo in rian ka ttuan lio ah an ka auh caah angki kai eih manh lo. Hnam kha Baibal ka rel ter lio asi.

Aung Myint Thang

Video Zohnak Link: Hmet

Video Zohnak

Baibal Siangin A Lak(Free) In Yangon Ah Kai Khawh A Si.

BIBLE SIANG INN KAI A DUH MI
HNA CA AH THAWNG TTHA
+++++++++++++++++
Bible sianginn kai hnu in PATHIAN rian thiang ttuan a duh taktak mi hna ca bak ah Yangon ram tthen Hmawbi peng Wanetchaung khua ah phonh mi ICTS ( International Calvary Theological Seminary) Bible siang inn ah tuition fees le a dang school fees pawl le ei man mess fees ca ah pia khat hmanh peek hau lo bak in a lak bak in kai khawh a si.
A tang lei contact number ah a rannaak in chonh in kai khawh colh a si-

Contact numbers hna-
   President-  095095748;
   Principal -   092450649;
   Academic deen-09791432245;
   Registered- 09773160456;
   Deen of student-09449850229;
   Office-         09263183711;

HNAM Kan Timi Hna Hi Vanram ah An Kai Lai Maw?

Laimi Nih HNAM Kan Timi Hna Hi Vanram ah An Kai Lai Maw?

(Hnam le Hnam Ngei timi hi kan fian ngaingai a hau)

Pathian nih hman ngei cu nunter a duh hna lo. Mah a duh lomi hnam, Laimi nih hman kan timi hna cu zungzal in an nung lai. Laimi nih hnam kan timi hna hi vanram ah an kai lai. A ruang cu Hnam taktak an si lo, hnam ngei an si lo i Hnam ti awk tlak an si lo ruangah a si.

Baibal ah Hnam timi a um tak maw?

A um tuk ko. Pathian nih hnam ngei cu a duh lo i an um ruangah ahohmanh hnam ngei nan um lai lo tiah a kan cawnpiak. DEUTERONOMI 18:11

Hnam ngeimi hna cu nunter zong a sianh hna lo i Baibal ah "Hnam ngeimi nu cu nan nunter hna lai lo, tiin EXODUS 22:18 a thimmi Israel mi kha a fial hna. Mah ruangah Samual chan ahcun hnam ngei cu ram chung in an dawi dih hna.  1 Samuel 28:3

Baibal ah hnam a um kong le Pathian nih Hnam ngeimi a duh lonak le nunter a duh lonak cu a cung Baibal ah fiang tein hmuh khawh a si.

Hnam timi hi kanmah Laimi lawng si loin miphun dang zong nih an mah le holh in an ngeih cio hna. Kawl nih 'စုန္း' an ti i, Malay le Indonesia nih 'Rasuh' an ti ve. Mirang zong nih 'witch' tiah an ti. Hnam hi rak um hlah seh law cu miphun dang hna zong nih anmah holh cio in an ngei lem hnga lo.

Laimi Lakah Hnam ngei an um maw?

An um ve ko nain 100 ah 1,2 lawng hi hnam ngei taktak an si hnga. Tuchan ah cun Laimi ah hin Hnam ngei a um hmanh an um lai ka zum lo.  Hnam timi le Hnam ngei timi hi i fian a hau ngai. Cun Hnam ngei timi hi Nu ca lawngah hman a si tawn. Hnam ngeimi pa hi um loin hnam ngeimi nu lawng hi rak um dawh a si. Kawl pawl zong nih စုန္​းထီး timi an ngei lo. စုန္​းမ ti lawng an ngeih.

Laimi nih Hnam kan Pomning le Zumhning

Mi pakhat cu a pa hnam a si cun a fa le a tefa zong an dihlak in hnam ciruang ah kan chiah viar hna. Bantuk pom ning nih mi thleidannak fak tukin a chuahpi. Mi thleidan cu sual a si. Pathian nih a duh lo caah bantuk pomning hi Kan hlawt le kan kal tak a hau.

Baibal ah hnam timi le tuchan Laimi lak ah hnam kan timi hi aa lo maw?

Baibal ah hnam timi, hnam ngei taktak le tulio Laimi lak ah hnam kan timi hi aa lo lo. aa dang tuk. Rawl deu le Rawl tak bantukin aa dang.

Hnam kan timi hei si hna hmanh sehlaw Hnam Ngei cu an si lo. Hnam ngei an si lo cun Hnam tiawk zong an tlak lo i Hnam an si lo tinak a si ko. Tuchan Laimi lakah hnam kan timi hna cu zeite an si lo. Hnam ngei a si lomi le Hnam a si lomi kanmah bantuk men an si ve ko. Kan i dannak a um lo i Tih awk zong an um lo.

Cu caah anih cu hnam ngei a si tiin kan thleidan awk a si ti lo. Hnam ciruang a si tiin Kan zohchuk awk le kan hrial awk a si ti lo. Nupi caah thit zong hnu kan chit awk a si ti lo i pasal caah vat ding zong tih ding a si ti lo. Pathian aa bochan mi hna cu uar an um tuk. Uar lo awk le duh lo awk an tha lo..

By- Bawihrin Sang Khengmual

=================================
Hi catialmi kongah Chinmi Daily FB group ah Comment a pemi hna-

Nawl Hre: Kan nunnak a ho nih dah a uk timi cungah biakhiah awk tha ko hnga. Hnam nih a ukmi nunnak si ahcun an kalnak ding lam cu a fiang ko. Asinain Khrih nih a ukmi nunnak a ngeimi asi ahcun van ram ah a kal ko lai. Khrih biatak tein aa tlaihmi hna nun ahcun hnam cu a um kho ti hnga maw? Pathian zong an thei tuk, an mah zong nih hnam ngei si an duh bak ve lo ko bu in an nu le an pa hnam ngei an si caah an ngei ve tiah kan puh peng mi hna khi cu, Pathian hmuh ning si loin mibuu nih kan hmuhning hna tu a si deuh rau. Kan mibuu chung i hi bantuk ruahnak kan rak ngeih tawnmi pawl hmanh hi fakpi kan do a hau cangmi asi.


Chinboy Malsawm: Hnam kong ah an chim ciomi ka theihnak ah Hnam nihcun mi caah chiatnak lawng te a tuah. Hnam ngeih cu a ttha hrim lo. Bible chung i hnam kong kan zoh tik zg ah Pathian nih hnam cu a fih bak in a fih. Hnam cu setan le khuachia he aa pehtlaimi asi cu el awk ttha loin a fiang ko.

Cucaahcun hnam a ngeimi minung cu khamhnak a hmu rih lomi asi. A chung ah Thiangthlarau um loin, a chung ah hnam tu a um caah Khamhnak a hmu rih lomi asi cu a fiang tuk ko. Zumtu a simi tak nihcun Hnam an ngei lai lo. Hnam ngeimi minung zong kha a thinlung tak tein khamhnak a hmuh ahcun a hnam ngeihmi kha a tlau hrimhrim lai.
Hnam ngeimi cu Khrihfa an si hmanh ah zumtu tak an si lo caah Vanram an phan kho lo.

Hnam ngeimi nih vanram an kai lai ti ahcun Bible cawnpiaknak he aa kalh cang. Hnam ngeimi cu Pathian fa/Zumtu tak an si lo, Khuachia fa bantuk an si. Cucaahcun Hnam ngeimi minung nih Vanram an kainak lam a um lo.

KL Lai Hrin Dawt: Hi kong hi ka ruat tawn ve.kei zumhning vun,hnam ngei mi ca zongah.Van kainak lam a um ve.A hmasa bik ah.Khrih leiah thinlung dih umnak biatak in an i pekchanh ahcun a hnam ngeihnak kha a tlau kho lai ii Khrih hawikom an si t'han lai.cucu" (2Korin 5:17)(1Johan 1:9) a fiang ngaingai, cu Silo in sual duhnak le t'hat lonak thinlung a phung men biaknak sawh2 incun  an cacun. Hell kha a siko.

Tuchan Fale Nunning Le Phone

Tuchan cu Laimi zong Phone kan ngei kho cio cang hna. Upa pawl nih phone kan thawng theu bantukin Fale zong tawngh an van i thawk ve.

Upa pawl nih Phone kan banh bantukin kan Fale hna zong nih Phone an van banh ve. Upa pawl FB nih a van kan lem bantukin Ngakchia Kum 3-14 karlak pawl zong Game celh le Youtube zoh nih a van lem ve hna.

Upa pawl nih rawl ei pah in Phone kan tawngh bantukin fale zong nih Rawlei pah hna in Video pi an zoh lo hmanh ah Phone in Youtube cu an zoh peng ve. Upa hna kan hawile he kan i len kai tik le kan i ton tikah Phone lawng kan zoh theu bantukin ngakchia pawl zong an hawile, an kupthirual hna he an i ton tikah lente hna i celh lem loin Phone, Youtube lawng an zoh theu ve cang.

Ramleng Um Fale thenkhat cu Wifi aa peh lomi phone cu an tawng duh ti lo. Pakhat hna Nuva nih cun "Wifi Line hi ngei hlah usih law kan fale nih a kan nawm lai" an ti phanh. Fale An tah tik zongah Awka thlum in ngamh loin Phone tu pek colh a hmangmi kan tampi.

Nule pa hna Phone nih a kan lem cang cun Fale zong phone tawngh lo awk a tha ve lo. Upa pawl le Phone kan i then khawh ti lo bangin Fale zong phone he an i then kho ve ti lo.

Kan fa le hna hi a herh lonak ah Phone, computer le video hna hi zohter ding an si lo. Hihi kan fale caah a hman an thiam lo ahcun tihnung tukmi a si i an rawknak thil pakhat a si. Kum 15 tang Ngakchia hna cu a herh lo cun punpak Phone zong tleihter lo ding an si.

Zeitin Dah Fale Phone Zoh Kan Sumter Hna Lai?

Research an tuahmi pakhat ahcun ngakchia nih nikhat ah nazi pahnih cung computer maw, Ipad maw, TV maw an zoh ahcun an mit le an thluak hrimrhim hi tampi a rawk kho ti a si. Cucaah kan fale kha nikhat ah nazi 2, 3 tiin mah zat lawng nan zoh lai tiah a caan khiahpiak ding a si. Cuti si loin hna an hnawk men, an um har , zaangfak an si tiin an mah duh paoh in kan zoh ter hna a si ahcun kan fa le an mit zong tampi a rawk ter i sianginn kai an cut hlanah mitbenh an hau lai.

 Ka Phone zoh tuknak nih a chuahpi mi cu mit a langhlat mawt(​အ​ေဝးမႈန္​) hi a chuahpi. Ngakchia lawng siloin nu le pa hmanh phone, computer le video tbk nih tampi a kan hrawh cang.

Fale video, youtube hna zoh lo dingin Nule pa nih lente hna celhpi lengmang ding a si. Inn chungah um sawh loin Nule pa nih a phunphun in an tluak test lengmang ding a si.

Ngakchia Tete Nih Tar Pawl zong An Lan

Tuchan ram leng um Kum 50 cung Tar cheukhat hna nih phone hman hna an thiam huaha lo lio ah kum thum li cung ngakchia tete hna hmanh nih phone hman, hmanthlak, video zoh, Youtube video zoh hna an thiam ngawt viar. An thiammi cu nule pa nih i uang ngai bantukin an um. Fale hna an kum thirual he zoh cun hi bantuk hin cun i uang awk cu a si lem rih lo.

Keimah hi phone ka zoh tuk ka ti. Asinain ngakchia tam u hi keimah nakin phone le video, youtube hna a zoh deuhmi an rak si.

Theihding: Ti hnawhchanmi ahohmanh an um lo.

By- Bawihrin Sang Khengmual

HRINGTU NULE NI Sermon. By- Sailo Pa

Phungthlukbia 31:29 "Nupi tha tampi an um, sihmanhsehlaw nangmah nih na lonh dih hna"

"Hringtu Nu le Ni" kan phan than cang. Phungthlukbia ah kan hman bantuk in, "Nu tha tampi an um nain na/ka nu nih a lonh dih hna". Atu kan sining cio kan phak khawh hi kan nu le thawng in a si. An kan pawi chung vialte an thla a no, an khiing a rit, an tha a ba, an re a thei, an mang a chia, an thla a lau. Cu vialte harnak cu an tuar na-in pum chung i naute a cawl tikah pawitu anu cu a rak ilawm tuk ve.

Thisen tampi chuak in kan nu le pum chungin kan hong chuah lio ah nu le cu nganfah celh lo ah an tap, an ai, an hram, an kui, an thlahripi nih a paih hna. Nganfak sau i naute chuah khawhlo ruangah an tha a dong, thihnak tlangah an dir. Khuate lei hna ah cun nau cung in nu he naute hen thih a tam ngai. A umning a hman lo ruang ah maw, lu a chuah khawh lo maw, sen a pek lo ca-ah maw, a senning thiamlo ruang ah maw, tha a dongh tikah maw, ruak in a chuakmi an um tawn. Cu thihnak horkuang pi cu pah in hrin mi kan si.

Kan hong chuah bak i kan ttah thawng an theih mi khi nu le ca-ah a thlum bikmi zaihla rem dawh asi. Nu le nih hal hmasa bikmi bia cu "Nu maw a si pa?". Cu hnu ah "A kutke a tlam a tling maw?". Thisen le hnawm an van thenh dih in nu le paw cungah an hun kan bawhter. Hringtu nu le mithmai ah lomhnak in a khat. A mitthli hmanh hnawt thlu lo-in panhsirsiar te-in hmai a hun hoi. A van kan hmuh hmasa cem lio hi, minung vialte lak ah aa dawh bik in a kan hmuh. Pa kan si ah "Pate"; nu kan si ah "Nute"; "Ka dawtte"; "Nai dawh tuk" a hun kan ti. Lawmhnak, lunghmuihnak, damnak, dawtnak, mithmai a hung tlang.

Cuca-ah cun pei mifim nih, "Nu le cu laksawng zei tluk man sung na pek hmanh ah, amah nih a kan pekmi laksawng nunnak (life) hi cu a tluk kho bal lai lo" an ti fam cu.
A phei cungah pom in hnukte an kan dinh lio ah khin, "Vawleicung ah fa dawh bik, fa ttha bik, duhnung bik, ..." ah a kan hmuh. A lung chung in "Hi ka fa te hi thiamnak sangpi cawng seh, Pathian duhning te-in tthang seh, nu le pa lawmh tertu, miphun nih hman awk tlak, siseh tiah saduh a kan thahpiak. Kan lu te a kut lum in a kan muai i Pa-te, Nu-te nai dawh tuk,… tiah bia a kan ruah, kan biang te ah an kan hnamh.

Eidin thaw mi poah amah ei siang lo-in a kan hoih. kan tlukrilh sual caan ah a cilsa te-in a kan domh. A ttang ah a kan pom i lumsa te-in a kan tuah. Kan ttah caan ah kan mitthli a kan hnawhpiak. Kan zawt sual caan ah amah tu nih chawn a kan duh. Nu le keng cu fa le ca-ah rizai ttha bik a rak si, an kan puak pah in rian tampi an ttuan rih. A tangka man in tuak si sehlaw a tamtuk hnga. Pawi man, hrin man, hnuk dinh man, zun le ek fim man, kholh man, zohkhenh man, cawm man, eidin man, thilpuan man, ca a kan cawnter man, nun a kan chimh man, fim a kan cawnpiak man, chim cawk asi lo. Bawi Jesuh vailam cung ai thlai lio ah khan anu Mary ca-ah cun "Pa-te, ka sian lo te, ka thin thlum te, zei le zei ko hme na in le na tuar ..." ti a si ko rih. Kan upat hnu pi tiang zong ah kan nu le ca-ah cun "Pa-te le Nu-te" kan si peng ko.
Pupa bia le hla cuang ah, "Sunghno ka nu, ruunhlum ka pa" ti asi. Nu le hi sunghno an ti hna.

Sung = Vawlei thil vialte lakah a SUNG bik mi, a ttha bikmi.
Hno = Tiva kam a kho mi thingkung, a hnah a uai bal lo i a hningHNO zungzal mi, thei ttha tampi a tlai i par dawh tampi a chuah kho mi. Hringtu nu le cu an sung in an hno taktak ko.
Tuanphung bia ah, mihrutpa Tenglam (Chura) nih Kawlrawn khi thingtan in a den lengmang ca-ah a rawn dih mi asi, an ti. Fing le tlang a hrawh dih sual lai, va ko u, tiah mi an thlah hna. An kawh len ah a ma duh hlei lo. "Na inn a kang, hong tlung" an ti ah "Inn cu ka sak tthan te ko lai" a ti hna. "Na nupi a thi" an ti zongah "Nupi cu ka tthit tthan te ko lai" a ti hna. "Na fa a thi an ti hmanh ah, "Fa cu ka ngeih tthan te ko lai" a ti. Zei ti awk hngalh lo hnu ah "Na nu a thi" an ti. Khua a ruat i, "Ka nu cu a ka hringtu a si, nu dang ka ngei ti lo," a ti i a tlung an ti. Saram le mihrut hmanh nih nu le dawtnak an theih. Mifim le zumtu chinchin nih cun theih tuk ding a si.

Kawl miphun hi nu le pa a upat ngaingai mi an si. Nu le pa hmai ah an khuk an i bil i upatnak an pek tawn hna. Nu le pa nih thluachuah an halpiak ve tawn hna. Cuticun mitthli tla thluahmah in an i tthen tawn. Nu le a nung rih mi hna, mi vanttha nan si. Nan nu le hi daw cikcek hna u. Fawn in chawn hna ulaw, "Ka nu na ka dawtnak hi a ngan tuk, kan cham cawk lai lo, na cungah kai lawm tuk, nangmah thawng in hihi ka phan, zei dah na duh bik, tangka kan kuat lai,..." ti-in holh dawh le bia thlum in chawn hna u. Fa le sin in hmurka thlum theih hi nu le ca-ah sii ttha bik, damnak asi. Tangka zong kua hna u. An thih hnu ruak vuinak ca-ah tangka na kuat mi cu na nu nih a thei ti lai lo. A nun lio na kuat mi hi a theih lai i ai lawm lai. "Pa-te, Nu-te nih tangka a tingting in a ka kuat" tiah a hawi le a chimh hna lai.

Mifim Henry Bickersteth nih "Vawlei pumpi le ka nu hi cuaithlainak cungah chia hna sehlaw, ka nu lei nih a lerh hnga" a ti.
Israel phungthluk: "Pathian hi hmunkip ah a um manh lo ca-ah hringtu nu le hi Amah aiawh ah a kan serpiak mi an si" an ti.
Dewitt nih "Nu le cu kan thilrit vialte le kan ruahchannak chiahnak BANK an si" a ti.
Honore de Nalzac: "Nu le thinlung cu fa le ca-ah a ngaihthiamnak in a khatmi donghhngal lo khur bantuk a si"
Anne Morrow Lindbergh: "Nu le cu rian off ngei lo, over time a ttuan zungzal mi an si"

Tenneva Jordan: "Nu le cu minung panga ca-ah changreu cheu li lawng a cheumi an si, fa le lawng an phawt hna"
Sailo pa: "Chungkhar nuamhnak cu nu le kut chungah a um".
Baibal nih, "Nupi ttha cu hlawn nak in tampi a sung deuh, a va nih ai bochan i a va cu a si a fak bal lai lo, thazang tlung ngai le lungtho ngai in rian kha a ttuan i a ngan zong a dam, sifak rethei mi sinah nun a siang, a kaa cu fimnak in a pau i a lei cungah zangfah cawnpiaknak kha a um, a fa le nih khan thluachuak nu an ti i a va zong nih khan a thangtthat, iang hi hlen a hmang, dawh hi a ziam kho, sihmanhsehlaw Bawipa a ttihmi nu cu thangtthat awk an si.

Hringtu nu le hna, hmaizah upatnak kan in pek hna. Hringtu nu dirhmun in kan dir piak peng ko u. Nan nih cu fa le ca-ah fimnak chimtu saya hmasa bik nan si. Nan kut chung ah semmawng rual, taksa thinlung thlarau damnak a um. Na chimbia an zulh khawh lo hmanh ah na tuahsernak kha tampi an rak I lak ti kha philh hlah u. Awkaa ttha na pau le an pau ve lai, na thin a chiat le an chia ve lai. Nan va le cung zongah nupi ttha sinak he thilrit tthumtu, le chawngtu le dawtu si zungzal ko u.

By- Sailo Pa

Lai Nungak Dawh Nih Laimi News Tialtu Pawl Sin Cakuat A Tialmi

Ka ule hohmanh nih an tial khawh lo mi Thawngzamh (News) tampi nan rak tial khawh i kan lawm pi ngai hna. Thawngzamh (News) tial hi a fawi lo ti cu zatuak ah zaa (100%) cu ka fiang tuk ko. Nannih ca zong ah a fawi lai lo ti ka thei. A fawi lo mi rian pakhat nan i awt cang ahcun tha tein le a hman tein nan tial ding cu nanmah rian si cang, cun Vawlei cungpi ah zei dah a cang ti mi zong tampi a hlat ding nan si. Ca zong a hlei in tampi na rel ding si. Atu cu tampi reltu i tim lo in tam pi Tialtu na zuam. Tampi na tialmi ah, a herhmi nakin a herh lo mi tam deuh fawn. Atu le atu a herh lo mi nan tialmi nakin a herh tak mi le Vawleicung ah a biapi ti ah an chia mi thawngpang (News) tu kha Zarhkhat ah voi khat nan tial ah kan caah a tha deuh hnga. Nan tialmi thawngzamh (news) kha laimi tam deuh kawlca le mirang ca a rel khawh lo mi nih an rel peng fawn. Nannih thawng nan rak tialmi le a herh lo tuk mi khi an si fawn. A tak ah cun atu News nan ti i nan rak tial lengmang mi hi News cu si deuh lo.

Cataang ngeimi le mifim pakhat nan si ahcun kanmah a reltu nak hmanh in nanmah nih nan thei deuh lai. Tahchunhnak ah 1.Pakhat pa nih Hakha ah mi Aar a fir i Sang upa sin a phan. Mah hi tial a hau nak ka thei lem lo. Mahnak a herh deuh mi le a biapi deuh mi thawngpang Vawleicung ah a cangmi tampi lak ah mah kong nan rak tial cu a poi ngai.

 2.Laimi nih Arfi bantuk in kan i zohthlami Hlawn Sung hi Hlasak lawng si loin Thawngpang Chim zong a rak thiam tuk hi rak zoh ve. Mah hi News pakhat ah tial hau ma? Cun Mah kong cu ta thawngzamhnak ah pakhat ah tial a phu tak ma? A dang thawngpang news tial ding a bia deuh mi um ti lo ma? Cun Kawl pawl nih an tial lengmang mi thawngpang le na let peng fawn. Mah nan leh ding si cun kawlpa nih a tial mi news lawng kha let loin a dang pakhat nih ta zeitin dah a tial ti kha biatak ngai in na rel hnu lawng ah Laica in let law tha deuh lo ma? Kawlram ah a cang mi nak in Ram 3 nak news nih a tial mi zong kha tampi let piak hna law nan thawngzamh thlahnakah ah rak tial ulaw tha deuh lai tiah ka ruah.

Ka lawm ......

Note : Ka fim ter ruang ah tial mi si loin ka ruat nak le ka hmuhning ka langhter duh bia.
Catialtu- Helen Biak Cin Tial

💗 KA NU NIH KHAN LIH A RAK CHIM. 💗

A tang chungah a ka pawm i,
"Ka fa vawleicungah ai dawh bikmi na si" tiah a ka ti.
Ka Nu nih khan lih a rak chim!

A ka puak, a ka cawi, a ka awih,
"Ka liang a fak loh" tiah a ti.
Ka Nu nih khan lih a rak chim!

Ka zaw i, keimah ruangah zankhua a dei,
"Ka baloh, ka cei hrimhrim loh.." tiah a ti,
Ka Nu nih khan lih a rak chim!

Ka duhmi thil ka hauh caan ah,
"ka fa dawt, na caah cun zei paoh ka ngeih" tiah a ti,
Ka Nu nih khan lih a rak chim!

Tirawl a thawmi paoh keimah a ka pek i,
"Ka fa dawt,nangmah na paw a khim ah cun kei zong ka khim ve" tiah a ti,
Ka Nu nih cun lih lawngte a rak chim!

Keimah caah chawva tampi dih a herh caanah,
"Na lungrethei hlah, phaisa a um ko " tiah a ka ti ,
Ka Nu nih khan lih a rak chim!

Atu ah cun ka hawng upa i,
hiti hin khua ka ruat;

Muidawh ka si na loin ,
ka Nu mit ah cun mui dawhbik ka rak si,

"Ka liang a fakloh.." a titu kha, Nu lakah Nu tiatumlo bik a si!

"Ka baloh, ka cei hrimhrim loh" a ti lio ah khan, thawnnak thazang hrimhrim a ngei loh ,

"Ka fa dawt, na caah cun zeizong vialte ka ngeih" ti tu ka Nu kha, Mi sifak bik mi a si!

"Ka fadawt, na pawkhimah cun kei zong a khim ve"  a ti ko nan,
Keimah ruangah rawltam tihal i a um caan hi a tlawmloh,

"Na lungrethei hlah, phaisa a um ko" a ti lio ah khan, Ni lin le Ruahsur tangah rianhrang tuan in chunni a rak tla!

Ka Nu nih khan lih a rak chim!
Asinan, cu thil hna cu a ka Dawttuk ruangah a rak si,
Ka Nu nih cun lih a rak chim ko,
Lih vialte lakah Duh a nungbik mi lihbia an si,

Nu le DAWTNAK hi zei he dah kan tahchunh hnga?
Pathian nih minung a kan DAWTNAK dah tilo cu,
Nule nih Fale an kan dawtnak bantuk i a sungmi DAWTNAK hi a um ti hnga maw....???????

By- Vincy Thawng

Salai Van Lian Thang: Lainu cu hni aa fenhmi phun kan si.

Hlan Lainu cu "fual ngaiin hni an rak ifenh; an tanpor cu him lo; an fengbeu hmanh a lang bal lo"

Nu pakhat le khat an ifak tikah “a nih cu a fengbeu zong a lang bal lo” tiah an rak ifak tawn.

Thapet cu chim lo, tanpor le khuk langh cu tawlangh tlukah an rak ruah. Mi hmaiah hni an iremh lelek bal lo.

Dawh tein le rem tein hni an ifenh dih.

Chan nih a kan phak!

Bongbi zong ihruk a herh caan a hun um.

Vawlei hruk aihning nih a kalpimi dawi ve zong cu a biapi.

Nain, Lainu cu hni aa fenhmi phun kan si.

Lainu hni aa fenhmi cu nan iang a tlai deuh.

Lainu hni aa fenhmi cu nan "nu" deuh suaumau.

Nu lakah a "nu" mi uar an um bik.

Hnipuan dawh tein ituah cu mahca lawng asi lo; hawi le pawngkam upat zong asi chih.

Lainu asimi nih cun "hnifenh" uar awk asi lai.

#Sawhsawhte ka hun tenhta.

Blessed Sunday!

Zumhnak Loin Zeitindah, Ngakchia Vanram An Kai Khawh Lai? Hrambik Lian

Biadomhnak:

A zum kho rih lomi ngakchia an thih tikah, Hell an tla lai maw? timi biahalnak kan tuah tikah mipi ruahnak hi tthen thum in a chuak tawn. Micheu nih an tla lai, an ti. Cun micheu nihcun, zumtu fale cu an tla lai lo i, zumlotu  fale cu an tla lai, an ti ve. Micheu tthan nihcun, ngakchia cu an dihlak in van cung an kai ko lai, tiah an ti.

Hi kong i, kan zumhning aa dan cionak a ruang cu Baibal nih piang fiang tein a kan chimh lomi, a si caah a si. Sihmanhsehlaw, Baibal nih piangfiang tein a kan chimh lo ruangah a biapi lo tinak, a si hrimhrim lo. Baibal biadang bantuk tein a biapi ve ko. Cucaah, Baibal dihlak nih a cawnpiakning zohkhawm chih in fianter kan hun i zuam lai.


Zumhning Dang Dang Le An Cherhchan:

An tla Lai: Zeicatiah minung Hell kan tlak cu, kan tuahmi sualnak/pumpak sualnak ruangah siloin a sual cia in hrin kan sinak ruangah a si. Hihi, chuahpi sualnak tiah auh a si i, Adam cithlah kan dihlak nih nuhrinnak in, kan i chuakpi mi a si. Cu tangah cun, ngakchia zong an dihlak in sual phawt an si ve. Cucaah Hell an tlak ve a hau ko, tiah an zumh. Hihi, Baibal cawnpiakning in al-awk ah a har ngaingai mi zumhning a si.

Zumlotu  Fale Lawng An Tla Lai: Zeicatiah, I Cor. 7:14 ah “Zeicatiah a zum lomi pa cu, a zummi a nupi thawng in thianter a si i, a zum lomi nupi cu a zummi a pasal thawng in thianter a si. Hitihin rak si hlah sehlaw, an fale a thiang lomi ah an cang hnga; asinain atu cu cohlantlakmi le a thiangmi an si cang”, tiah kan hmuh. Hi Baibal cacang nih hin, zumtu fale le zumlotu fale cu aa dang bak ah a chiah hna: zumlotu fale cu thiang lo a ti hna i, zumtu fale cu cohlan awktlak le thiang, tiah a ti hna. Cucaah zumtu fale an si ahcun, ngakchia cu van an kai ko lai. Nain zumlotu fale cu an kai lai lo, tiah an ti. Hi zumhnak hi cu, a cunglei an langhtermi Baibal cang khat chim lo ah, dirkamhtu cang dang a ngei lem lo. A dirhmun a derthawm ngaingai. An lak cacang zong hi, a context he ttha tein cithlat tikah zumtu le zumtu fale caah khamhnak cokhawhnak lam a kauh deuhning a cawnpiaknak tu a si. Zeicatiah, khamhnak cu theihnak in a rat caah zumtu chungkhar ahcun thawngttha theihnak lam cu a fawi deuh rhimhrim cu mu.

Ngakchia Cu Van Cung An Kai Dih Lai: zumtu le zumlotu fale karlak ah thleidannak zeihmanh a um lo. Zumhnak ngeih khawh hlan ah a thimi ngakchia cu an dihlak in van cung an kai dih lai, tiah an zumh. Hihi, ca tialtu keimah zong nih ka dirpimi zumhning a si. Cucaah, hi zumhning hi zeiruangah dah ka dirpi timi fianternak a tawi fiannak in ka hun tuah lai. Zeicatiah, Adam Sual  Aa hrawm Vemi  Ngakchia cu zumhnak tel loin Zeitindah Vanram An Kai Khawh Lai, timi hi ruahpiak lo awk a ttha lo.


A.  A Zummi Lawng Van Cung Kai Ding, Tihi Pathian Chimmi A Si:

Zumhnak loin van cung kai khawh a si lo, timi le zumhnak lawngin van cung kai khawh a si, timi hi kan Baibal chung hmun tampi ah kan hmuh. Zumhnak (faith) timi biafang  le zumh (believe) timi biafang an chuahnak hram hi Greek holh in “pistis” ti a si. Hi biafang hi, Biakamthar cauk chung lawng hmanh ah voi 243 kan hmuh khawh.

Hi vialte hi “Pathian bia” tiah cohlan asimi Baibal chung bia an si lawng siloin hi hna lakah Pathian fapa Jesuh hrimhrim nih “Nan zumh ahcun…zumh lo ahcun” tiah a chimmi voi tampi aa tel ve (eg. John 3:16, 14:1, 12:44, Mark 16:15-16). Cucaah, kan hngalh a herhmi cu “Zumhnak a ngeimi lawng van kai ding”, timi hi minung phuah cop men siloin a thok  in a dongh tiang a hmu chung dihtu, Pathian hrimhrim nih a chimmi a si. Hihi, zungzal nunnak le thihnak kong biachattu a si caah mi vialte nih kan hngalh khawhnak hnga, piang fiang tein Baibal in Pathian nih a kan hnalhter i, Baibal rel awk mui a hmu lomi hna sinah a rianttuantu hna thawngtha chimnak in a theihter ve hna.


Hi bantuk in, theihternak a tuah ko cang hnu ah, a thei ko nain a zum duh lomi hna caah cun  ngaihthiamnak a um ti lo (John 3:18). Hell tlak bak si ko cang! Zeicatiah, zumhnak lawnglawng hi Pathian nih van kai khawhnak lam a kan onpiakmi a si. Baibal a dihlak in va rel law, zumhnak dah ti lo vancung kai khawhnak lam, fiang tein, langhtermi na hmu lai lo: zumhnak thawng lawngin khamhnak co khawh a si (Ephisa 2:8). A si ahcun, step pahnihnak hun zoh rih hmanh u sih!


B. Minung Thihnak le Nunnak KongahNawl Ngeitu Zong Pathian A Si:

Luke 21:18 Kan zoh tikah “Sihmanhsehlaw nan lu cung samfa fa khat hmanh (Pathian nawl loin) a tlau lai lo”, tiah kan hmuh. Baibal chung kan zoh tikah “ Thih zat hlan ah Pathian nih a thithermi minung tampi kan hmuh hna. Cun micheu khat cu, thi ding an si ko hnu zongah an nun a pehpiak tthan fawn hna (eg. 2 King 20, Isaiah 38:5). Ka chim duhmi cu, nunnak hi minung nih kan duh caan poah ah kan sauter khawhmi le kan tawiter khawhmi a si lo: nunnak cungah nawl ngeitu cu Pathian a si. Upa nunnak ngeitu zong Pathian a si i, ngakchia nunnak ngeitu zong Pathian thiamthiam a si ko.

Cucaah, zumh khawhnak thluak-lung a ngei rih lomi ngakchia hna thihnak zong hi Pathian hnatlaknak aa tel caah a si. Phun dang in chim ahcun, Pathian nih a thither hna, ti khawh a si. Zumhnak a ngeimi lawng vancung an kai lai, tiah nawlbia a chuah ttung i, a mah lila nih zumhnak an ngeih khawh hlan ah a thihtermi ngakchia hna zungzal hremhmun Hell ah a thlak hna ahcun, kan Pathian hi  a diklomi biaceihtu, Pathian tihnung le Pathian sual a rak si, tinak a si hnga. A mah nih a chuahmi zulhphung, a mah lila nih a buar tinak a si hnga.

I Cor. 14:33, Number 23:19, Titus 1:2, Heb. 6:18 hna kan zoh tikah, Pathian cu lih a chim bak lo….a rianttuanmi ah ikalhnak a ngei bak lomi a si, tiah fiang tein kan hmuh. A hleice tein Heb. 6:18 ah hin, Pathian nih lih a chim khawh lonak hi khamhnak kong he pehtlai in a chim. Pathian nih khamhnak kong he pehtlai hrimhrim ah, a lih a chim bak lo i, a rianttuan ning zong aa kalh bak fawn lo, tihi fiang tein a kan cawnpiakmi a si. Cucaah, zumhnak lawng in van kai ding, a ti caah zumhnak ngeih khawh hlan ah a thimi ngakchia cu Pathian nih Hell ah a thla hna lo hrimhrim lai. Asiah Cun, Zeibantuk Lam In Dah, An Sual Ngaihthiam An Si I Vancung Kaiter An Si Kun?

A si..minung Hell tlak tlak sualnak a kan ngeihtertu hi kan tuahmi sualnak ruang lawngah siloin misual cia in hrim kan sinak ruangah a si. Sualnak he hrin a si ko cangmi kha, keimah nawl a si aipat tiah, ngaithiamnak lam um loin Pathian nih vancung a kaiter kho lo. Zeicatiah, an nih cu a dihmi biaceihtu a si. Cucaah, Jesuh khrih nih vailam cungah sual ngaihthiamnak raithawinak a kan tuahpiakmi kha, vawlei cung minung vialte pumpak cio nih kan tuahmi sualnak phunphun caah siloin kan sinak hrimhrim in, mi vialte nih kan i chuahpimi sinak sual sualphawtnak in luatnak kan hmuh khawhnak hnga catu ah a si.

Cu ruangah cun, vawlei cung minung hi mi ttha kan si ah, mi chia kan si ah, ahohmanh khamhnak co aa tlakmi kan um lo: misual sinak ah kan dirhmun aa khat dih! Cuca ahcun pei, Ephesa 2:8-9, ah kan dihlak in “Pathian vel thawng lawng lawng in khamh kan si (we are saved by grace through faith) tiah a tinak khi a si cu! Mi vialte hi, Pathian vel thawng lawng in khamhnak a hmumi kan si.

Cucaah, logical tein a hung chuakmi cu zeidah si, tiah cun; ngakchia cu zumh khawhnak lungthin an ngeih khawh hlan ah, Pathian nih a thither hna ahcun an caah van kai khawhnak lam a serpiak hna hrimhrim a hau. Hi kongah Baibal nih indirect in a hmuhsakmi cu, khrih nih mi vialte caah sual ngeihthiamnak thisen a luantermi, a vel kha direct in a hrawmh hna nak thawngin an nih cu vancung a kaiter ko hna lai, tihi a si. Hi cawnpiaknak hi indirect in a dirkamhtu Baibal cacang tampi a ngei nain direct in dohkalhtu Baibal cacang kei nihcun ka hmu bak lo.

Cucaah, ngakchia cu zumtu fa an si zongah, zum lotu fa an si zongah, khrih nih minung le Pathian a kan tthentu chuahpi sualnak ngaihthiamnak caah a thetmi thisen, Pathian vel thawng in an chuahpi sualnak cu a ngahthiam hna caah van kaiter an si ko, tihi Baibal cawnpiaknak he aa rem bik in hmuhmi a si. Hi zumhning hi Baibal chungah tehte a ngei maw?


Ngei e. Ngakchia bawhte van an kai ko, timi tehte Baibal chungah an um ko. Tahchunhnak ah II Samuel 12 chungah siangpahrang David nih a fapa a thih lio ah,” An nih cu a kir ti lai lo, keimah tu a sinah ka kal te lai” tiah a timi kan hmuh. David cu van kai ding hrimhrim (zumhmi) a si caah, a bia chimmi nih a fapa (bawhte) cu vancung ah a kai ti, a fianter. Cun,  Johnah 4:11 kan zoh tikah Pathian nih “Keh le orh hmanh a hngal rih lomi sing khat le sang hnih an umnak hi…..zangfah loin ka um awk a si hnga maw?” tiah zei hngal rih lomi ngakchia cungah zangfahnak a ngeihmi a langhternak kan hmuh fawn.

Biadonghnak

“Pathian vel” timi sullam cu “Khamhnak coawk ah aa tlak lomi minung, khamhnak a pek hna” tinak a si. “Pathian zangfahnak”timi sullam cu “Zungzal hremhmun Hell kal tlakmi   minung, khamhnak a pek hna” tinak khi a si ve. Ngakchia nih van an kai khawhnak cu, Khrih thisen in langhter cangmi cu “Pathian vel le zangfahnak” ruang ahcun a si. Khah, Ngakchiat tein a thimi kong lawng kan ceih, tihi philh sual hlah u mu!


Note: Thawngttha a thei bal bak lomi hna ta, an kai lai maw? timi kan hun peh tthan te lai.

Catialtu: Hrambik Lian

‘Na Palh’ Tiah Chimhhrintu Kan Ngeih Hi Pathian Nih A Kan Dawt Rih Caah A si (I). By- Henry Thang

                           
Voikhat cu inn pakhat a kaang. Khuate asi caah ‘mi-tat’ zong cu an um lo. Cu a kaang liomi innchung ahcun hngakchia pakhat a tap lengmang nain ahohmanh va luh i chanh awk a tha ti lo. A pa nih a ruahmi pakhat a um. Cucu, ‘ka fapa hi tangtla ko in mautlor saupi in ka sawh lai. A kut, a ke kiah sual zongah sizung ah ka thlop than lai, meikangh i ciam ding cu asi kho hrimhrim lo’ a ti i mautlor saupi cun a sawh. A fapa cu tangah a tla i a kut a kiak nain a dang zeihmanh aa khawng lo. Sizung ah an kalpi i a kut cu an tlop i a dam than,’ tiah catialtu pakhat nih a tial.

Pathian a zumlotu cu thil diklo an tuahnak thawngin an thangcho thluamah tawn. An sung tuk fawn lai lo. Asinain, Pathian nih a dawtmi a fa le cu sualnak chungah thih tiang iciah ding hi a kan siang lo. Sualnak kan tuah pengmi ah aa lawm lo. Cucaah, a kan chimhrin tawn. Cucu, zumtu le zumlotu kan idannak hmelchunhnak pakhat asi. Khrihfa kan si ve tung i thil diklo kan tuah caan ah kan inuam tuk, kan hlawh a tling tuk ahcun mah le mah lung ihrinh ding hmanh asi.

Baibal chungah minthang ngai asi nain an tuanbia dawh lo ngai in a dong mi hna lakah pakhat cu Solomon asi. Solomon cu kan theih cio bantukin mirum le mifim asi. Amah chan lio tlukin Israel ram hi a rum bal lo, a minthang bal lo i a ukmi ram a kau bal lo. ‘Fimnak’ timi biafang hmanh hi Solomon hlan ahcun theih balmi biafang hmanh a rak si lo. A mah chan hnu lawngin ‘fimnak’ biafang hi tampi hmuh khawh asi.

Zeiruangah dah a tuanbia donghnak aa dawh lo? Zeiruangah dah Israel ram tiang aa cheu? A ruang tampi lakah Solomon a sunghnak cu ‘chimhrintu a ngei lo’ caah asi. Fimnak le rumnak ah aa za. Cu vialte a petu Pathian a rak philh. David cu sualnak i a tluk caan ah ‘na palh hih’ tiah chimhrintu Prophet Nathan a rak um. Solomon chan ahcun Prophet aw an um lo. Pathian bia a ngeih lo ruangah Deuteronomy 17 ningin Solomon hi a fim bik asi, timi hi Baibal thiamsang tampi an lunghrin phahnak zong asi.

Solomon bantukin chimhrintu ngeih lo nakin David bantukin ‘na palh’ tiah ‘chimhrintu’ ngeih hi a tha deuhmi asi.

Nihin tiang, ka lawmh bikmi pakhat cu Pathian chitti thuhmi chimhrimtu “Na Palh Khah, Kha Ti Khan Tuah Hlah,” titu upa tampi ka cungah an um mi hi asi. Nu le pa ka ngeihmi hi an si. Chungkhar ka ngeihmi hi asi. U le nau, hawikom tha ka ngeihmi hi asi. Cu vialte hna cu Pathian nih a rak chiahmi lawngte an si. Phungthlukbia nih ‘chimhhrinnak a hua mi cu a kiak cikcek lai,’ tiah a ti.

Mipa nih a fapa meikanh in ciamviar nakin a kut a ke kiak ithlawp than a siang deuh bantukin Pathian nih a dawtmi a fa le cu sualnak, palhnak le thil diklo chung i a thlithup i kan umpeng nakin ‘na palh’ ti i chimhhrin a kan duh deuh ve.

‘Na palh’ tiah chimhrintu kan ngeihmi hi Pathian nih a kan dawt rih caah asi.

By Henry Nawlthangbik Hlawnceu

Phaisa Tam Dih Lo In Thitumnak Puai Tuahning. Catialtu: Salai Van Bawi Mang

Tu hrawng cu I thitumnak puai a tam ngai. Lawmhpi tuk awk zong an si. Mah lio ah, thawngpang ka theih tawn mi cu; Nupi thit hi a fawi hrim lo, phaisa tamtuk a dih. Mah thit umnak puai tuahnak in cun, i tlikpi khi a tha deuh tiah tlamtlin lonak he a um mi hna ka theih pah caah hika hin ruahnak cheuhnak ca tlawmpal te ka hun tial.
1.Nan puai a ra mi caah ei din kha, rawl pek lo ding. Hlakphakti hraikhat a thlum ngai mi kha nan pek hna lai. Cun, changreu a man fawi mi te (tazi biscuit n batuk) kha chiah piak ding. Cutin na tuah sicun plastic zong a dih lai lo, saram sa zong an nunnak a him i thluchuah nan hmuh deuh lai.

2. Nan puai a ra ding mi hna um kalnak an i foih deuhnak ding caah motor kha nan tawl rel piak hna lai. Cun, motor chung an luh dih le cangka in motor man nan hal hna lai. Mahbel, Yangon YBS bantuk in aw hrang in nan hal hna lai lo. Tch; Inn thar lut ding le chungkhar thar caah nan lunglawmhpinak cungah Pathian nih hi nakin thluachuah tampi in in pe chin ko hna seh, tbk in aw nem khawh chung in nan chawnh biak hna lai.

3. Nan puai chung ah zunput kha tawh nan hrenh lai. Cun, an hun rat hnu ah kutkaa tawh nan on piak hna lai i an dih bak in phaisa nan hal hna lai. Tch; Ngakchia – 200, Nungak – 400, Tlangval – 500, Upa – 500 kyats tbk in. A ruang cu, zunput haw hi a chiat hlei ah ngandamnak he a kalh ngai mi a si. Cucu, anmah ngandamnak kha ruat piak thiam in kutkaa kha nan hrenh piak a hau hna.

4. Tissue hrim nan chia lai lo. A dih a fawi hlei ah pawngkam zohkhennak he aa kalh tuk. Rua tampi an hau i an ser mi a si. Cucaah, vawlei pi dawtnak he puanchia nan hman lai. Cu puanchia hmanh cu, hri in nan tem chih lai. Cuti na tuah sicun nan phaisa dih mi a tlawm hlei ah pawngkam zohkhenhtu pawl nih laksawng hmanh an in pek khawh men hna.

5. Nan puai a ra mi hna kha, hman tampi i thlak pi hrimhrim uh. Mah bantuk a sunglawi mi caan kha ngeih khawh caan a um ti lo. Cucaah, a tam khawh chung in i thlak pi ulaw a dih le cangka in voucher he an hmanthlak man kha hal chih uh. Inn chungkhar thar a sermi nan si caah hmanthlak man kha tlawmpal te kai ter deuh ko uh.

6.  Kuat a zu mi hna caah kuat zuknak hmunhma pakhat ser piak hrim uh. Minung pakhat le pakhat i thleidan lo zong a si i, a dang mi upat zong a si caah hihi cu nan tuah piak hrim hna a herh. Mahka hmunhma an phak le cangka in kuat man le service man hal colh uh. A ruang cu, kuat khu nih minung tampi a thah khawh caah hitin nan tuah mi cungah doctor pawl zong an i lawm tuk lai.

7. A donghnak ah, a cunglei hna nan tuah lo ahcun phaisa kha tawr le cheng in va liam te ko ne ulaw tiah.
Ka lawm.

Note. Capo men in rel ding. Cun, mah ca hi Kawlpa Hing Way Yan timi account nih a tial mi kha laica he keimah ruahnak fonh in ka tial mi a si.

By- Salai Van Bawi Mang