Merry Christmas Timi Biafang Kong Fianternak ( Merry X'mas Timi Fianternak )

                   🎄🎄🎄🎄🎄🎄🎄🎄🎄🎄🎄🎄🎄🎄

#Merry"  ​ti a suallam cu << i lawmh, lawmhnak >> tinak a si.
#Christ " a sullam cu << Chiti thuhmi, thimmi >> tinak asi.
#Mas " a sullam cu << mibupi, mi tampi >> tinak  a si.

X'mas ti hi a hlan cun << Jesuh Khrih philhlonak puai >> in an rak hman i sullam an rak ngeihter. Cuti caan saupi a kal hnu in nihin ahcun " X'mas" cu << Jesuh Khrih chuah ni lawmhnak puai >> in kan hman i sullam kan ngeihter..
.

X'mas, Christmas
*******************
Christmas hi X'mas tiin tial a poinak a um lo. Aruang cu X'mas i " X " hi mirang ca holh khi a si lo. Greek caholh a si. Greek ca Χριστος i " X " kha lak in " X'mas " tiin tial a si. Greek caholh *Χριστος* ti a sullam cu *Christ* tinak a si.

<< X'mas le Christmas >> hi a sullam ai dannak a um lo. A sullam ai khat. Krismas tiin tial zongah a poinak a um thiam lo.

X'mas hi ➳ ➳ ➳ Xmas, X-mas, x-mas, xmas ti ttial cun a dik deuh lo.
X'mas tiin ttial hi a dik bik i sullam a ngei bik.
.

" Mas " Biafang kong Fianternak
*********************************
" Mas " hi a hlan cun " Mass " ti a rak si i hi biafang ruangah mitampi an lung a rak buai ti a si. Mah ruangah R.C pawl nih " Mas' tiin 's' pakhat an hlonh i "Mas" tiin an rak tlen.

#Mass cu hmaizahmi, upatmi tinak si. Mass hi mitampi/mibupi ti zong in sullam ngeihter a si.

-Satu Khaimichhô
(Palhnak a um cun rak ka sawh piak u law, Kaalawm...)

Note:
" Merry​ ေမရီ " ti hi thenkhat nih Jesuh a nu " Mery ​ေမရီ " ah an ruah. A dik lo.
Merry  ​ေမရီ " ti a si

Christmas Sullam (Tha Meaning of Christmas)

Christmas hi kum fatin in kan hmanmi a si nain Christmas timi a sullam hi a thei fiang lomi kan um tuk rih. A hleiin kanmah Chinmi ko hi kan i fiang lo. Mirang ca (English) Christsmas timi sullam hi a tanglei ah van rel ve. Christmas hi cafang ( 9 ) a um bantuk in cafang pakhat cio nih sullam an ngei cio.

CHRISTMAS
*************
C = Christ (Khrih)
H = Herod (Herod)
R = Redeemer (Khamhtu)
I = Israel (Israel)
S = Shepherd (Tuukhal)
T = Three wise men (Mifim hna pathum)
M = Manger (caw rawl einak kuang)
A = Angel (Vancungmi)
S = Star (Arfi)

Christmas timi hi cafang pakhat te cio nih hin sulluam an rak ngei taktak ti kha van hngalh khawh a si.

Siangpahrang Herod cu Galili ram ah bawi a rak si lioah khan `"Khamhtu"´ `"Khirh"´ cu `"Israel"´ citla in `"caw rawl einak kuang"´ah thlim in a chuak. Cu lio ahcun `"vancungmi"´ cu tuurun a zohkhenh i ramlak ah a riakmi `"tuukhal"´ hna sinah a van lang i an thin a phang tuk hringhran, sihmanhsehlaw vancungmi nih cun a thawh hna i  “Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sinah lunglawmhnak a tlunter lai. " a ti.

A chuah tlawmpal ahcun "arfi zohthiam, mifim hna" kha nichuahlei in Jerusalem khua ah khan an ra i, “Judah siangpahrang a si lai dingmi ngakchia a chuakmi cu khuazei ah dah a um? A "arfi" nichuahlei in a chuah kha kan hmuh i amah biak awkah cun atu hi kan ra,” an ti.

Hihi Christmas timi sullam a chim duhnak cu a si ko. Kaalawm...

Gredit: Rev. Pual Khochhai
Translated by Satu Khaimiechhô

Biaknak Thiang le Biaknak Taktak Cu Zeiset Dah A Si?

1•Nuhmei ngaktah tha tein zohkhenh
2•Hi vawlei cungah thurhnawm lo tein um

Mah hna pahnih hi Pathian nih biaknak thiang le biaknak taktak ah a ruahmi cu an si.

Mi tampi nih "Pathian cu kanmah duhning le siarem ning in kan biak awk a si lo, amah duhning in kan biak awk a si" kan ti tawn.

Hi cabia nih hin Pumhnak, Biakinn ah Pathian thangthat lio le biak lio caan, Thlacam lio hna lawng khi a sawhter, a huap in ka hmu.

Mi thenkhat nih cun I pumh lio, Pathian hlasak lio le Thlacam lio ti bantuk lawng khi Pathian biak ah kan ruah tak ko.

Pathian Biak cu i pumh lio, Pathian hla sak lio le Thlacaam lio lawng khi a rak si lem lo.

Pathian biak cu nitin kan nun kha a si ko. Nitin kan nun in Pathian kan bia cio hna.
Baibal ka chiah mi nih a fianter ngai.

"Hi Vawlei cungah Thurhnawm lo tein um" timi nih hin tam taktak, a dihlak ti awk in a huap.

Pathian Duhning Tein Nitin Nun

"Pathian nih Hmailei kan caah a tha in khua a khan dih ko, zeihmanh phan awk le lungretheih awk a um lo" kan ti i kanmah duh paoh in, Pathian duh lo ning in kan nun huar ko ahcun Hmailei kan caah Pathian nih a tha in khua a khang dih bal lai lo.

Pathian duh lo ning in kan nun huar cun Thlamtlin lonak, lungre theih buai bainak hna a chuak lulh ko lai.

<<Pathian nih Hmailei kan caah a tha in khua a khan dih ko>> timi nih hin Pathian duhning tein nun a hau zia zong kha a kan cawnpiak.

Pathian Nih Unfriend, Unfollow le Block A Kan Tuah Hmasa Bal Lai Lo

Tutan FB  hmangmi hna nih Unfriends le Block tuah kan van hmang chin lengmang hna. Unfriend ti cu kan theih cio bang Mirang ca a si i a sullam cu "Hawikom si nakin hlawt, I Hawikomh kan duh ti lo" ti duhnak khi a si ko.

FB ahcun kan rem pah lomi hna le an umtu ziaza hna kan rem lo pah lomi hna kha Unfriend, Unfollow le Block kan i tuah tawn hna. Cun FB fri.. tamtuk ruang zongah Unfriend tuah a si i hawithar cohlannak ca zongah hawithing Unfriend ... tuah a si. Ruang ngei lo cun Unfriend, le Block tuah a si tawn lo.

Kan FB Hawikom(friend) pakhatkhat nih FB in Unfriend si lo Block a kan tuahmi kan theih cun kan lung a tha tawn lo ngai.

Kei FB in Unfriend tuah ka simi lakah Pastor Thawngling Mualhlun nih  Unfriend a ka tuahmi kha ka lung a thalo bik. Kan rak i friend lioah a sermon tialmi hna ka rak rel lengmang i thazaang ka rak ngah ngaingai. Caan zeimaw zat a kal hnu in Pator Thawngling ca thlahmi ka hmu kho tawn ti lo i ka van hlam. A rak ka Unfriend diam cangmi ka van theih i Ka lung a nuam lo colh. Add than zong a ngah ti lo. Zei ruangah Unfriend a ka tuah hna ti cu ka hngal lo nain a FB hawikom a tam tuk ruangah, hawithar cohlan a duh ruangah hawithing Unfriend a ka tuah hi a si ko lai tiah ka ruah.

FB te hna in Unfriend tuah le Block tuah hi a rak fak ngai ve ruangah Pakhat pa cu a Innpa a simi Nu nih FB in maw, Unfriend a rak tuah ruangah a lung fah tuk ah an Inn zuat Chizawh maw si dek, a rak thah ti a si. Naite zongah Boxing thongh thiam Mayweather cu hlasak thiam a hawikom Justin Birber nih Instagram in Unfollow a tuah ruangah a lung a fak tuk ti a si.

Hi ca ka tial duhnak bikah kan lut cang lai.

Minung nih Unfriend le Unfollow le Block tuahmi a poi ah kan chiah i kan lung a that lo chinchin a si ahcun Pathian Unfriend, Unfollow le Block tuahmi si chinchin cun zei tluk in dah a poi hnga..

Amah Pathian nih cun minung hi amah lei nih zeitik hmanhah Unfriend, Unfollow le Block a kan tuah hmasa bal lai lo. Kanmah minung lei tu nih Pathian kha Unfriend, Unfollow si lo Block kan tuah le tuah lo lawng a si. Kanmah minung nih Pathian kan friend(hawikomh) chung paoh cu Pathian nih a kan hawikomh(friend) peng ko lai. A kan unfriend, Unfollow, Block bal lai lo.

FB in Hawithar kan cohlan duh tikah kan FB friends a khat cang si cun hawithing kha Unfriends or Block tuah hmasa hnu lawngin FB friend in cohlan khawh a si nain Pathian nih cun Fa thar a cohlan duh tikah fa thing kha a hlaw hlei lo.. Fathing kha hlawt hau loin Fa thar kha a kan cohlan lengmang. Amen.

FB a hmangmi thenkhat cu ahopaoh kha va hawikomh(, Friend) khawh a si lo I Friends(hawikom) si ding zong a duh lomi kan um. Asinain Pathian cu a duhmi paoh nih Hawikom ah ser khawh a si i "Follow Me" "keimah ah i peh u" tiah a kan ti dih. Ka khamhtu le ka Bawipa ka Pathian ah ka cohlan hna seh, hung ka zum hna seh law hung ka bia hna seh ti hi a duhmi a si. Amen.

Nai A voi thumnak CBCUSA Conferences an tuahmi an motto zong kha "Follow Me" ti a si. A tha ngaingai. "Follow me" ti cu "keimah ah i peh u" ti duhnak a si ko.

Follow me ti a si caah Baibal ning in tial cun Minung nih Pathian kha kan va Follow hmasa a hau ko. Aruang cu" Keimah ah hin i peh u law kei zong nanmah he kaa peh ve lai." tiah Baibal Johan 15:4 ah kan hmuh.

Minunh hna hi Pathian/Jesuh ah kan i peh (follow) ding hi a herh tuk hringhran. Jesuh ah kan i peh rih lo si cun a rannak in i peh zokzok hna u sih..

A tang Baibal nih hin Jesuh ah i peh cu thlauchuah vanluh a sinak le Jesuh ah i peh lo tih nunzia hna kha fiang tein a langhter ko.

Keimah ah hin i peh u law kei zong nanmah he kaa peh ve lai. Mitsur nge nih amahte in thei a tlai khawh lo i a ruang ah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo. Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo. Ka chungah a um lomi cu mitsur nge car bantukin lengah hlonh an si ko. Cu bantuk nge cu an pumh hna i mei ah an paih hna i cuka ah cun an kang dih. Ka chung i nan um i ka bia kha nan chungah a hmunh ahcun, nan duhmi paoh kha nan ka hal lai i nan hmuh ko lai. Nannih nih thei tampi nan tlai thawngin ka Pa sunparnak kha nan langhter i cuticun ka zultu i nan i canning cu a si. Amen
JOHAN 15:4‭-‬8

- Bawipa Sunparnak Caah....

New York khualipi ummi world trade center innsang pahnih Vanlawng Pah Lio i Robert timi Khrih zumtu pa kong

KAN HMELCHUNH

Thlacam hawile hna,
Bawipa min in nan kut kan tlaih hna.

September 11 hi USA caah philh awk a tha lo mi ni a si. Kan hnulei kum 16 lio, September 11, 2001 ah New York khualipi ummi world trade center innsang pahnih miṭhalo hna nih vanlawng in an rak puak. Minung a thongthong in an thi. An tuanbia hi a tam lengluang ko. Cu chung ah pakhat te laak ka duhmi cu, Robert timi Khrih zumtu pa kong a si.

Vanlawng nih innpi a suk lio ah amah hi dot 80 hrawng ah aa hreng ve mi pa a si. Electric a rawh dih caah hleihlak in dot 80 cu huamsam tein a ṭum i a donghnak ah a hram a phan. Cu ka hmun ahcun a hawile minung 15 hrawng a va hmuh hna. A tangbik dot an phan nain innka chuahnak a pit dih. A hawile cu an thin a phang, an ṭap, an ai. Zeiti um awk an hngal lo. Cu lio ah Robert nih a chimhmi hna cu, Jesuh tiah au u, a ti hna. Dawtnak he hmailei kong a cuanh tik ah Jesuh dah tilo cu an caah ruahchannak a um ti lo ti kha a hngalh. Cucaah an pumsa loral hmanh sehlaw an thlarau tal him seh tiin amah nunnak zawnruat bak lo in Jesuh kong a chimh hna. Cutluk muilak, thinphang thla lau um lio ah Jesuh kong a chimh cuahmah hna. A cheu cu an lung pem i Khrih cu Khamhtu le Bawi ah an cohlan colh. A chim dih in Robert cu chuahnak lam zeital ka hmu kho hnga maw tiah a hawile sin cun a van i thawn i, pe 10 hrawng a phanh ah khin a taangmi a hawile vialte cu cunglei a cimmi nih a hon khuh hna i an thi dih. Robert tu cu a nunnak a him. Rau lo te ah chuahnak lam a hmu kho i a leng ah a chuak kho colh. Robert nun bantuk hi Khrifa nun tak cu a si. Dawtnak in a khatmi nun, vawlei chawva nih a cawk khawhlo mi dawtnak nun, thlaraulei zawnruahnak nun cu a si.

Hawile hna,
Kan Bawipa Jesuh Khrih nih a kan duhpiakmi cu Robert nun bantuk hi a si. Zeicahtiah cu bantuk nun te cu pei Amah Jesuh nih a kan thokpiakmi nun cu a si cu. ‘Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. Patkhat le pakhat nan zawn nan i ruah ahcun mi vailte nih, hi hna hi amah a zultu kha an si, tiah an in hngalh hna lai, tiah a ti hna’ (Johan 13:34,35)

Zumtu Johan nih hitin a nolh than rih: ‘Ka fale hna, kan i dawtnak hi hmur le kaa lawng in a si awk a si lo, dawtnak taktak, thil tinak ah a langmi dawtnak in a si awk a si’ (1 Johan 3:18)

Pathian zumtu kan si, 
Khrih hnuzul kan si, 
Vawlei ceutertu kan si, 
Midang kha Pathian sin ah 
a hruaitu ding kan si 

tiah kan I ti tik ah VAWLEI nih a rak ZOHMI cu TAKSA, THINLUNG, THLARAU RAM AH DAWTNAK KAN LANGHTER MI KHA A SI.

Kan kaa in kan chimmi hi a rak za ballo.
Kan kut in kan ttialmi hi a rak za ballo.
DAWTNAK NUN tu hi mi lungthin a thlengtu taktak cu a si.

Cucu Bawipa Jesuh nih a kan nunpiakmi cu a si. Van sunparnak vialte a kaltak khawhnak cu dawtnak a si. A niambik caw rawl kuang chuah zong a poi ah a chiahter lo tu cu dawtnak a si. Santlailo tiah rak ruahmi hna, mihrut sitian, hmeinu hmeipa le hlawhlang hna, ngunkhuai khawl hna sin ah tlumtla tein khua a sakter kho tu cu dawtnak a si.
A kutthir in an khenh cuahmah lio zong ah, a ke thir in an khenh cuahmah lio zong ah, a hnak fei in an sawh cuahmah lio zong ah ‘Ka Pa, ngaithiam hna. An tuahmi kha zei a si ti awk an hngal lo,’ (Lk 23:34) tiah a ti ter khotu cu dawtnak a si. Keimah tein kaa hrilhfiahmi pakhat cu hihi a si: A Fapa ngeihchun fak tuk in an hrem ruang ah Pa a thin hung tuk lai i thalo in a tongh cang hna lai ti a phan tuk caah pei ‘Ka Pa, ngaithiam hna’ tiah a ti kanh ko hi tiin. Minung hmanh nih kan fale hrem cu chimlo, an zawtfah menmen hmanh ah kan celh ttung lo. An lu a fah dikdek ah, an paw a fah dikdek ah um awk hngallo in pei kan um ko kha. Jesuh kan Bawipa an hrem lio ahhin Pa hi a thin a phawh taktak ve ko lai e. Cucaah pei kan Bawipa Jesuh Pathian Fapa nih a Pa sin ah a kan nawlpiak hi. Haleluia!
Hi vialte a temtuarnak hi dawtnak lawngte, thilti nak ah a langmi dawtnak, kaa lawng in chimmi a silo mi dawtnak taktak cu a si.  

Jesuh dawtnak nih dawt awk tlaklo a kan cawi kha philh hlah.
Jesuh dawtnak nih hlawm awk tlaklo a kan hlawm kha philh hlah.
Jesuh dawtnak nih fihnung ṭeifiak a simi vialte a kan thianh kha philh hlah.

Cu dawtnak cu Pa nih a Fapa Jesuh chung ah a langhter i, zumtu kan nun ah Thiang Thlarau in a kan pek ve mi dawtnak cu a si. Zumtu kan nun zong cuchung ah cun a dir. Dawtu hna sin zong ah, huatu hna sin zong ah i dang hleilo in cu dawtnak kan langhtermi kha a muru, KAN HMELCHUNH cu a si.

Khrih ah hawile hna,
Nihin zumtu cu thlaraulei ah kan van a tha tuk. Bawi Jesuh aiawh in nunnak cantha kan hmu, a nun muru simi dawtnak langhternak cantha kan ngei.
Kan pawngkam kha zohhmanh u, A rawk cuahmah mi nun tamtuk pei an um kha; Community chung ah, innchungkhar ah, pumpak nun ah tamtuk te pei kan rawk cuahmah ko hi.
Dawtnak he kan fuh hna a hau.
Dawtnak he kan nunpi hna a hau.
Dawtnak ngeitu Jesuh kha kan hngalhter hna a hau.

Dawtnak kong a chimtu ah kan i tel dih cio lai tiah ka zumh.
Kei zong ka chim lengmang ve ko. Asi nain Bawipa nih a kan duhpiak deuh mi cu dawtnak kong chim silo in dawtnak nun tu kha a si deuh. Amen.  

Zumtu KAN HMELCHUNH cu DAWTNAK a si. Haleluia!

Bawipa nih sunparnak co ko seh. Amen.

Khrih ah nan hawi,

Thawngling Mualhlun
CEBC Indianapolis 
September 10, 2017

Vancung Ah Zeitin Dah Pathian Kan Hmuh Te Lai: Baibal Ning

Hmanthlak: Dr. Thomas Hwang(Ph.D)

Vancung ah Pathian hi Pathum(3) in maw kan hmuh lai? Pakhat in dah kan hmuh lai? Tuufa(Jesuh) le Pa Pathian hi a dang tein kan hmu lai maw ti a fianter cikcek tu Baibal caang a si. Baibal ah Pathian pakhat lawng a hmuh lo zong kha a fiang ngai ko. A tang Baibal hi Thiang Thlarau Bawmh hal in Thlacam bu tein dihtiang in rak rel cio hrim u....
 Biathlam 4,5,6

Vancung Pumhnak

(Isa 6:1-3)

4

1 Cu hnu cun ka hun zoh i, zohhmanh u, van ah innka hun ciami ka hmuh! Cun, hmasa ah a rak ka chawnmi aw nih khan muko tum thawng bantukin, “Hika ah hin rung tuah, hi thil hna a cang hrimhrin laimi hi kan hmuhsak lai,” a ka ti.

 

2 Cun, chikkhatte ah Thlarau in ka hung um; zohhmanh u, van ah bawi òhutdan aa hung ko i cu bawi òhutdan ah cun mipa pakhat a òhu!

 

3 A mui cu jasper le carnelian lungvar mui bantuk a simi bawi òhutdan cu emeral lungvar mui bantuk chuncha nih ceu pum in a kulh.

 

4 Cu bawi òhutdan velchum ah cun bawi òhutdan pakul le pali an um i an cungah cun upa pakul le pali an òhu, puan rang an i aih i an lu ah sui bawi luchin an i chinh.

 

5 Bawi òhutdan cun nimtlau aa lek zukmak i aw le khuari zong an tur dulmal. Bawi òhutdan hmaiah cun meifar pasarih an i vang hluahmah ko; cucu Pathian Thlarau pasarih an si,

 

6 Bawi òhutdan hmailei ah cun cristal lungvar bantukin a ceumi rili thlalang a um fawn.

A laifang i bawi òhutdan velchum ah cun an hnulei he an hmailei he mit lawng tein a khatmi thilnung pali an dir.

7 Tonter bik thilnung cu chiandeih bantuk a si i a changtu cu cawtum bantuk a si; a pathumnak cu minung hmai bantuk a pu i a palinak cu a zuang liomi murapi bantuk a si.

 

8 An pali cun thla paruk cio an ngei i an chunglei he an lenglei he mit in an khat i chun he zan he ngol loin hla an sa.

“A thiang, a thiang, a thiang.

Lianngan bik Bawipa Pathian cu

A um cangmi le um liomi le a um laimi a si,”

an ti.

 

9 Bawipa òhutdan ah a òhumi, a zungzal a nungmi cu thilnung pali hna nih cun sunparnak le upatnak le thangòhatnak hla in an hlawi tikah upa pakul le pali hna nih a hmaiah bawk in an biak.

 

10 An bawi luchin cu a hmaiah an chiah i,

11 “Kan bawipa le kan Pathian,

Sunparnak le upatnak le lianhngannak cu,

Na hmuh awkah aa tlak.

Zeizong vialte na ser i

Nangmah nawl in an chuak i an nung,”

tiah hla an sa.

Cazual Le Tuufa

5

1 Bawi òhutdan ah a òhumi orhlei kut ah a chung he a leng he ca aa òial i a phaw ah chingchiahnak khenh sarih in aa khenhmi cazual ka hmuh.

 

2 Cun a lianngan vanmi ka hmuh i “Ahodah hi cazual hi samh awk le chingchiahnak khenhmi phoih awkah aa tlakmi a um?” tiah fak piin a au.

 

3 Vancung le vawlei cung le vawlei tang zongah cazual a kau khomi le a zoh khomi ahohmanh an um lo.

 

4 Cun ahohmanh cazual samh i zoh awkah aa tlakmi an um lo caah fak piin ka òap.

 

5 Cun upa lak i pakhat nih a ka thawh i “Òap hlah, Judah phun chiandeih, David hrimhrim nih a tei cang, cazual le a cakhenh pasarih kha a phoih khawh cang lai khih,” a ka ti.

6 Cun bawi òhutdan le thilnung pali hna karlak le upa hna lakah cun thahcia a lomi Tuufa a dir ko kha ka hmuh. Tuufa nih cun mit pasarih, ki pasarih a ngeih; cucu vawlei cung pumpuluk ah thlahmi Pathian Thlarau pasarih an si.

 

7 Tuufa cu bawi òhutdan cungah a òhumi orhlei kut i cazual cu lak awkin a ra.

 

8 A rak lak ah cun thilnung pali le upa pakul le pali hna cu Tuufa hmaiah cun an bawk, tingtang le mithiang hna thlacamnak rimhmui in a khatmi sui kanto cio an i put i hla thar an sa.

9 “Nangmah cu cazual lak awk le

Chingchiahnak phoih dingah naa tlak;

Zeitintiah na thi i na thisen in

Miphun kip, holh phun kip le ram kip hna zong

Pathian caah na cawk hna.

10 Pennak ah na ser hna i

Pathian tlangbawi ah na canter hna.

Hi vawlei hi an uk hna lai,”

an ti.

11 Cun, ka hei zoh i bawi òhutdan le thilnung hna le upa hna velchum ah cun vanmi a thong a sang in an dir i aw ka theih. Fak piin an au i.

12 “Tuufa thahmi cu

Nawlngeihnak, rumnak, fimnak

Òhawnnak, upatnak,

sunparnak le thluachuahnak

ngeih awkah aa tlak,”

an ti.

13 Vancung le vawlei cung le vawlei tang le rili chung le cuka chung i a ummi thilnung kip sinin aw ka theih:

“Bawi òhutdan cungah a òhumi le Tuufa cungah

Thluachuahnak le upatnak

Sunparnak le òhawnnak

A zungzal in a zungzal tiang

Um thluangthluan ko seh,” an ti.

14 Cun thilnung pali hna nih “Amen,” an ti. Upa kul le pali hna nih cun an bawk i an biak.

Thiang Thlarau Nih Kan Fianter Hram Seh...

Cakhenh Pasarih

6

1 Cun Tuufa nih cakhenh pasarih lakah pakhat a phoih khi ka hmuh i thilnung pali lak i pakhat nih khuari tor bantukin “Ra chuak,” a ti khi ka theih.

2 Ka hei zoh i rang rang ka hmuh, a cungah aa citmi nih cun likuk aa put; cun bawi luchin an pek, cucun tei chin thluahmah awkin a chuak.

3 Cakhenh a pahnihnak cu a hun phoih i thilnung a pahnihnak nih cun “Ra chuak,” a ti ka theih.

 

4 Ka hei zoh i rang sen tleu ngai pakhat a hung chuak. A cungah aa citmi pa cu pakhat le pakhat i sam dih awkin vawlei i daihnak chuhnak nawl an pek. Vainam nganpi pakhat an pek fawn.

5 Cakhenh a pathumnak a phoih òhan i thilnung pathumnak nih “Ra chuak,” a ti kha ka theih. Zohhmanh, ka hei zoh i rang nak pakhat ka hmuh.

 

6 A cungah aa citmi nih cun cuaithlainak aa put, thilnung pali hna lakah pakhat aw si dawh ngaimi ka theih i “Ni khat hlawh chiti cu tawng hlah,” a ti.

 

7 Cakhenh a palinak a phoih i thilnung a palinak nih cun, “Ra chuak,” a ti ka theih.

 

8 Ka hei zoh i rang rau ka hmuh, a cungah aa citmi cu a min ah Thihnak a si i Mithi khua nih a hun zulh. Vainam, mangòam, hrirai le sahrang hna in vawlei cheu li cheukhat cung i mithah khawhnak nawl pek a si.

9 Cakhenh a panganak a phoih ah cun biakòheng tangah Pathian ca le phungchim ruangah thahmi mithiang thlarau ka hmuh hna.

 

10 Aw thangpi in an au i “A Liannganmi Bawipa a thiangmi le a dikmi, vawlei i a ummi hna cungah kan thisen phu na hlam le an cungah bia na ceih hlan hi zei can hen a rauh rih lai?” tiah an au.

 

11 Cun puan rang an pek cio hna i anmah bantukin thahnak a ing dingmi an hawile an tlin tiang cu tlawmpal in hngak ko rih u, an ti hna.

12 Cakhenh a paruknak a phoih òhan ahcun li aa hnin ciamman i sahmul nak bantukin ni a mui i thlapa cu thisen bantukin a sen dih.

 

13 Thlichia nih theipi nawl a òhilh bantukin van in arfi cu vawlei ah an tla thluahmah.

 

14 Van cu cazual bantukin aa zual zuahmah i tlang le tikulh vialte hna cu òhial dih an si.

15 Cun vawlei cung siangpahrang hna le mi lianngan le ralbawi lian le mirum hna le mi òhawngòha hna le a mi kip, sal le miluat hna cu lungkua le thingkung ngan pipi phenah an i thup.

 

16 Tlang le lung ngan pipi hna cu, “Rak kan cimh hnawh u law bawi òhutdan i a òhumi hmai le Tuufa thinhunnak cun rak kan thup ko u;

 

17 zeitintiah an thinhunnak ni òihnung cu a phan cang i ahodah a celh lai?” tiah an au.

SEHTAN RIAN BAWMTU..ZUUMTU. Lian Hre

Pathian nih Amah sunparnak ca le Khrihfabu tungtlaang ah a sermi hna, a hman cuahmahmi hna nih kan hngalh lo karah sehtan rian kan bomh tawn, Pathian lung kan fahter tawn! Peter nih, "Jesuh zawnruah in bia a chim na in, "Sehtan ka hnu ah i thawn" a rak ti bang, kan i hngalh lo-in sehtan nih a kan hmang sual maw?

1.Lucifer bang hawihlei cungcuang kan sinak nih kan lung a puamter sual maw?
2.Kan fiimnak kha a pingah kan hmang sual maw?
3.Pastor te doh le soisel kan hmang maw?
4.Midang kha lung dong ding tlu dingin kan tuukforh hna maw?
5.Khrifabu chungah rem lonak thlaici kan tuh maw?
6.Hnahchuah ziarngeih nak kan ngei maw?
7.Cheuhra cheukhat peek lo-in kan hmang maw?
8.Rian truan lo, Na dam ko bu ah Zarhpini na fir maw? Nangmah herh men ah na hmang maw?
9.Zudin sa ei nakah na nunnak na hmang maw?
10.Bible ceih lo-in mi kong lawng na caih peng deuh maw! Na rawk sual lai(Ezekiel 28:17-19).

Ruah lo karah sehtan rian a bawmmi nun cu trial cawk ding si lo! Peter nun a remhtu arkhuan aw bang hi nih hin ralrin in pee cio hraam hna seh!

Lian Hre

Jesuh Vancung Kai Ni - Ascension Day Sermon. By- Pastor Sang Nawl

Kan Bawipa Jesuh cu thihnak in a thawhthan i ni (40) hnu ah vancung ah a kai than. Cu Bawipa Jesuh  vancung a si ni caan cu 'Jesuh Vancung Kai Ni' - 'Ascension Day' a si i, tukum cu May-25 ni khi a si lai.  Cucaah Europe ram ṭhenkhat hna ahcun zungkhar ni public holiday  ah an hman. Hlan lio ah Europe ram cu Pathian a rak duhmi le ṭhanghnak Revival a rak tlungmi ram an si caah mah bantuk biaknak ni hna hi an rak sunhsak ngaingai. Thlacam ni hna an rak ngei i, zung le rian khar dihin thla an rak cam tawn. Asinain atu ahcun zapi cu  mah bantuk ni sunglawi caan ahcun thlacam ti lo le Pathian thangthatnak tuah ti loin , vawlei nuamnak le zu din caan tu ah an hman cang hna.

Jesuh nih zultu hna cu thihnak a in lainak ding le a thawhṭhannak ding kong a rak chim chung hna. Cu bantukin vancung a kai lainak ding zong tihin  a chim hna. Jesuh nih zultu hna cu   ’Khuaruahhar lungrethei in um hlah u. Pathian kha zum u, keimah zong kha ka zum ve u. Ka Pa inn chungah khaan tampi a um ko i cuka i nan caah hmun va timh awkah ka rak kal lai.  Cun ka va kal lai i nan ca i ka va timh dih hnuah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai’’ (Johan 14:1-3) tiah a ti hna. Hebrumi hna an tuanbia phun ah nupi an ṭhit hlan ahhin inn le lo, zeizong vialte an timh lamh dih hnu ah nupi an ṭhit ti a si. Cu bantukin Jesuh zong zumtu hna cu ṭhit ve ding kan si caah, zeizong vialte kha timhtuah dingin ka Pa sinah ka va kal lai i nan umnak ding ka va timtuah lai  a tinak a si.

Thomas nih cun a thawh i, “Bawipa, khuazei i na kal lai kha kan hngalh ṭung lo, zeitindah cuka phaknak lam cu kan hngalh khawh lai?” tiah a ti. Cu tikah  Jesuh nih, “Keimah hi lam le biatak le nunnak ka si; keimah sinin ti dah lo cun ahohmanh Pa sin an phan kho lo (Johan 14:5-6) tiah a ti. Filip zong nih  “Bawipa, na Pa cu kan hmuhsak law cu vial cu kan herhmi a si ko,” tiah a ti ve i, Jesuh nihcun, “Nan sinah saupi ka um ko cang, asinain na ka hngal rih lo maw?  Keimah a ka hmutu paoh nih cun ka Pa kha an hmuh ve ko, cucaah zeicahdah na Pa cu kan hmuhsak, na ka ti? (Johan 14:8-9 tiah a ti.

Jesuh cu thihnak in a thawhṭhan hnu ah zultu hna sinah voi tampi aa langh ṭhan. Jesuh nih a cah takmi hna cu vawlei cung khua khuazakip ah va kal u law miphun vialte kha ka thawngṭha hi va chim hna u ti hi a si. Thluachuahnak a pek hna i,  cuticun Oliv Tlang khan an sinin aa ṭhen i vangcungah a kai. Cun minmei nih a hun phenh i an hmu kho ti lo. (Mark 16:15, Luka 24:50, Lam 1:8).

Zultu hna nih Jesuh a liam riahmah kha an cuanh ko lioah cun, puan rang aih in minung pahnih an pawngah cun chikkhatte ah khin an rung dir i, “Galilee mi hna, zeicahdah van lei zoh in nan dir ko? Nan sinin van ah a kaimi Jesuh hi, van ah a kai nan hmuh bantukte hin a ra kir ṭhan lai,” (lam 1:10-11) tiah an ti hna. Amen.

Hawidawt hna Jesuh nih a chim bantukin  pakhat hnu pakhat  a tling thluamah cang i, atu a tangmi cu vawlei cungah a rat ṭannak ding lawng a si cang.  Jesuh Khrih cu vancungmi he an rak ra lai i, nichuahlei in nitlak tiang aa lekmi  nimtlau bantukin a ra lai. ni cu ruah lo piin a si lai i, mifir an rat bantuk in a si lai. Cu ni le caan hna cu ahnohmanh nih an hngal lo. Cucaah fimkhur te le timhcia tein rak  um i rak hngak ding kha cathiang nih a kan cawnpiak lengmangmi a si. (Matthai 16:27, 24:27, 24:36).  Kan Bawipa Jesuh cu rualo piin a rak rat lai caah  timhcia tein rak hngak ve cang hna usih.  

Sang Nawl
Gospel Revival Ministries
Email: gospelrevival2012@yahoo.com
Phone : 0045 42424116

Vailam Nih a kan khamh kho lo, Jesuh nih tu nih a kan Khamh khawh. Rev. Tial Lian Thang

Vailam VS JESUH

Vailam cu:

-Kan nunnak a si lo

-Kan khamhnak a si lo

-A thiangmi/ kan thiannak a si lo.

Jesuh cu:

-Kan nunnak a si

-Kan khamhnak a si

-A thiangmi /kan thiannaak a si.

Vailam hi Jesuh loin sullam a ngeih lo. A zei caah ti ahcun Vailam hi misual caah ser a si. Sual biaceihnak a si i misual (a sual tak takmi) pawl thahnaak sawhsawh lawng a si. 

Vailam nih a kan khamh kho lo, Jesuh nih tu nih a kan khamh khawh.

By- Pastor Tial Lian Thang

HRINGTU NULE NI Sermon. By- Sailo Pa

Phungthlukbia 31:29 "Nupi tha tampi an um, sihmanhsehlaw nangmah nih na lonh dih hna"

"Hringtu Nu le Ni" kan phan than cang. Phungthlukbia ah kan hman bantuk in, "Nu tha tampi an um nain na/ka nu nih a lonh dih hna". Atu kan sining cio kan phak khawh hi kan nu le thawng in a si. An kan pawi chung vialte an thla a no, an khiing a rit, an tha a ba, an re a thei, an mang a chia, an thla a lau. Cu vialte harnak cu an tuar na-in pum chung i naute a cawl tikah pawitu anu cu a rak ilawm tuk ve.

Thisen tampi chuak in kan nu le pum chungin kan hong chuah lio ah nu le cu nganfah celh lo ah an tap, an ai, an hram, an kui, an thlahripi nih a paih hna. Nganfak sau i naute chuah khawhlo ruangah an tha a dong, thihnak tlangah an dir. Khuate lei hna ah cun nau cung in nu he naute hen thih a tam ngai. A umning a hman lo ruang ah maw, lu a chuah khawh lo maw, sen a pek lo ca-ah maw, a senning thiamlo ruang ah maw, tha a dongh tikah maw, ruak in a chuakmi an um tawn. Cu thihnak horkuang pi cu pah in hrin mi kan si.

Kan hong chuah bak i kan ttah thawng an theih mi khi nu le ca-ah a thlum bikmi zaihla rem dawh asi. Nu le nih hal hmasa bikmi bia cu "Nu maw a si pa?". Cu hnu ah "A kutke a tlam a tling maw?". Thisen le hnawm an van thenh dih in nu le paw cungah an hun kan bawhter. Hringtu nu le mithmai ah lomhnak in a khat. A mitthli hmanh hnawt thlu lo-in panhsirsiar te-in hmai a hun hoi. A van kan hmuh hmasa cem lio hi, minung vialte lak ah aa dawh bik in a kan hmuh. Pa kan si ah "Pate"; nu kan si ah "Nute"; "Ka dawtte"; "Nai dawh tuk" a hun kan ti. Lawmhnak, lunghmuihnak, damnak, dawtnak, mithmai a hung tlang.

Cuca-ah cun pei mifim nih, "Nu le cu laksawng zei tluk man sung na pek hmanh ah, amah nih a kan pekmi laksawng nunnak (life) hi cu a tluk kho bal lai lo" an ti fam cu.
A phei cungah pom in hnukte an kan dinh lio ah khin, "Vawleicung ah fa dawh bik, fa ttha bik, duhnung bik, ..." ah a kan hmuh. A lung chung in "Hi ka fa te hi thiamnak sangpi cawng seh, Pathian duhning te-in tthang seh, nu le pa lawmh tertu, miphun nih hman awk tlak, siseh tiah saduh a kan thahpiak. Kan lu te a kut lum in a kan muai i Pa-te, Nu-te nai dawh tuk,… tiah bia a kan ruah, kan biang te ah an kan hnamh.

Eidin thaw mi poah amah ei siang lo-in a kan hoih. kan tlukrilh sual caan ah a cilsa te-in a kan domh. A ttang ah a kan pom i lumsa te-in a kan tuah. Kan ttah caan ah kan mitthli a kan hnawhpiak. Kan zawt sual caan ah amah tu nih chawn a kan duh. Nu le keng cu fa le ca-ah rizai ttha bik a rak si, an kan puak pah in rian tampi an ttuan rih. A tangka man in tuak si sehlaw a tamtuk hnga. Pawi man, hrin man, hnuk dinh man, zun le ek fim man, kholh man, zohkhenh man, cawm man, eidin man, thilpuan man, ca a kan cawnter man, nun a kan chimh man, fim a kan cawnpiak man, chim cawk asi lo. Bawi Jesuh vailam cung ai thlai lio ah khan anu Mary ca-ah cun "Pa-te, ka sian lo te, ka thin thlum te, zei le zei ko hme na in le na tuar ..." ti a si ko rih. Kan upat hnu pi tiang zong ah kan nu le ca-ah cun "Pa-te le Nu-te" kan si peng ko.
Pupa bia le hla cuang ah, "Sunghno ka nu, ruunhlum ka pa" ti asi. Nu le hi sunghno an ti hna.

Sung = Vawlei thil vialte lakah a SUNG bik mi, a ttha bikmi.
Hno = Tiva kam a kho mi thingkung, a hnah a uai bal lo i a hningHNO zungzal mi, thei ttha tampi a tlai i par dawh tampi a chuah kho mi. Hringtu nu le cu an sung in an hno taktak ko.
Tuanphung bia ah, mihrutpa Tenglam (Chura) nih Kawlrawn khi thingtan in a den lengmang ca-ah a rawn dih mi asi, an ti. Fing le tlang a hrawh dih sual lai, va ko u, tiah mi an thlah hna. An kawh len ah a ma duh hlei lo. "Na inn a kang, hong tlung" an ti ah "Inn cu ka sak tthan te ko lai" a ti hna. "Na nupi a thi" an ti zongah "Nupi cu ka tthit tthan te ko lai" a ti hna. "Na fa a thi an ti hmanh ah, "Fa cu ka ngeih tthan te ko lai" a ti. Zei ti awk hngalh lo hnu ah "Na nu a thi" an ti. Khua a ruat i, "Ka nu cu a ka hringtu a si, nu dang ka ngei ti lo," a ti i a tlung an ti. Saram le mihrut hmanh nih nu le dawtnak an theih. Mifim le zumtu chinchin nih cun theih tuk ding a si.

Kawl miphun hi nu le pa a upat ngaingai mi an si. Nu le pa hmai ah an khuk an i bil i upatnak an pek tawn hna. Nu le pa nih thluachuah an halpiak ve tawn hna. Cuticun mitthli tla thluahmah in an i tthen tawn. Nu le a nung rih mi hna, mi vanttha nan si. Nan nu le hi daw cikcek hna u. Fawn in chawn hna ulaw, "Ka nu na ka dawtnak hi a ngan tuk, kan cham cawk lai lo, na cungah kai lawm tuk, nangmah thawng in hihi ka phan, zei dah na duh bik, tangka kan kuat lai,..." ti-in holh dawh le bia thlum in chawn hna u. Fa le sin in hmurka thlum theih hi nu le ca-ah sii ttha bik, damnak asi. Tangka zong kua hna u. An thih hnu ruak vuinak ca-ah tangka na kuat mi cu na nu nih a thei ti lai lo. A nun lio na kuat mi hi a theih lai i ai lawm lai. "Pa-te, Nu-te nih tangka a tingting in a ka kuat" tiah a hawi le a chimh hna lai.

Mifim Henry Bickersteth nih "Vawlei pumpi le ka nu hi cuaithlainak cungah chia hna sehlaw, ka nu lei nih a lerh hnga" a ti.
Israel phungthluk: "Pathian hi hmunkip ah a um manh lo ca-ah hringtu nu le hi Amah aiawh ah a kan serpiak mi an si" an ti.
Dewitt nih "Nu le cu kan thilrit vialte le kan ruahchannak chiahnak BANK an si" a ti.
Honore de Nalzac: "Nu le thinlung cu fa le ca-ah a ngaihthiamnak in a khatmi donghhngal lo khur bantuk a si"
Anne Morrow Lindbergh: "Nu le cu rian off ngei lo, over time a ttuan zungzal mi an si"

Tenneva Jordan: "Nu le cu minung panga ca-ah changreu cheu li lawng a cheumi an si, fa le lawng an phawt hna"
Sailo pa: "Chungkhar nuamhnak cu nu le kut chungah a um".
Baibal nih, "Nupi ttha cu hlawn nak in tampi a sung deuh, a va nih ai bochan i a va cu a si a fak bal lai lo, thazang tlung ngai le lungtho ngai in rian kha a ttuan i a ngan zong a dam, sifak rethei mi sinah nun a siang, a kaa cu fimnak in a pau i a lei cungah zangfah cawnpiaknak kha a um, a fa le nih khan thluachuak nu an ti i a va zong nih khan a thangtthat, iang hi hlen a hmang, dawh hi a ziam kho, sihmanhsehlaw Bawipa a ttihmi nu cu thangtthat awk an si.

Hringtu nu le hna, hmaizah upatnak kan in pek hna. Hringtu nu dirhmun in kan dir piak peng ko u. Nan nih cu fa le ca-ah fimnak chimtu saya hmasa bik nan si. Nan kut chung ah semmawng rual, taksa thinlung thlarau damnak a um. Na chimbia an zulh khawh lo hmanh ah na tuahsernak kha tampi an rak I lak ti kha philh hlah u. Awkaa ttha na pau le an pau ve lai, na thin a chiat le an chia ve lai. Nan va le cung zongah nupi ttha sinak he thilrit tthumtu, le chawngtu le dawtu si zungzal ko u.

By- Sailo Pa

💗 KA NU NIH KHAN LIH A RAK CHIM. 💗

A tang chungah a ka pawm i,
"Ka fa vawleicungah ai dawh bikmi na si" tiah a ka ti.
Ka Nu nih khan lih a rak chim!

A ka puak, a ka cawi, a ka awih,
"Ka liang a fak loh" tiah a ti.
Ka Nu nih khan lih a rak chim!

Ka zaw i, keimah ruangah zankhua a dei,
"Ka baloh, ka cei hrimhrim loh.." tiah a ti,
Ka Nu nih khan lih a rak chim!

Ka duhmi thil ka hauh caan ah,
"ka fa dawt, na caah cun zei paoh ka ngeih" tiah a ti,
Ka Nu nih khan lih a rak chim!

Tirawl a thawmi paoh keimah a ka pek i,
"Ka fa dawt,nangmah na paw a khim ah cun kei zong ka khim ve" tiah a ti,
Ka Nu nih cun lih lawngte a rak chim!

Keimah caah chawva tampi dih a herh caanah,
"Na lungrethei hlah, phaisa a um ko " tiah a ka ti ,
Ka Nu nih khan lih a rak chim!

Atu ah cun ka hawng upa i,
hiti hin khua ka ruat;

Muidawh ka si na loin ,
ka Nu mit ah cun mui dawhbik ka rak si,

"Ka liang a fakloh.." a titu kha, Nu lakah Nu tiatumlo bik a si!

"Ka baloh, ka cei hrimhrim loh" a ti lio ah khan, thawnnak thazang hrimhrim a ngei loh ,

"Ka fa dawt, na caah cun zeizong vialte ka ngeih" ti tu ka Nu kha, Mi sifak bik mi a si!

"Ka fadawt, na pawkhimah cun kei zong a khim ve"  a ti ko nan,
Keimah ruangah rawltam tihal i a um caan hi a tlawmloh,

"Na lungrethei hlah, phaisa a um ko" a ti lio ah khan, Ni lin le Ruahsur tangah rianhrang tuan in chunni a rak tla!

Ka Nu nih khan lih a rak chim!
Asinan, cu thil hna cu a ka Dawttuk ruangah a rak si,
Ka Nu nih cun lih a rak chim ko,
Lih vialte lakah Duh a nungbik mi lihbia an si,

Nu le DAWTNAK hi zei he dah kan tahchunh hnga?
Pathian nih minung a kan DAWTNAK dah tilo cu,
Nule nih Fale an kan dawtnak bantuk i a sungmi DAWTNAK hi a um ti hnga maw....???????

By- Vincy Thawng

‘Na Palh’ Tiah Chimhhrintu Kan Ngeih Hi Pathian Nih A Kan Dawt Rih Caah A si (I). By- Henry Thang

                           
Voikhat cu inn pakhat a kaang. Khuate asi caah ‘mi-tat’ zong cu an um lo. Cu a kaang liomi innchung ahcun hngakchia pakhat a tap lengmang nain ahohmanh va luh i chanh awk a tha ti lo. A pa nih a ruahmi pakhat a um. Cucu, ‘ka fapa hi tangtla ko in mautlor saupi in ka sawh lai. A kut, a ke kiah sual zongah sizung ah ka thlop than lai, meikangh i ciam ding cu asi kho hrimhrim lo’ a ti i mautlor saupi cun a sawh. A fapa cu tangah a tla i a kut a kiak nain a dang zeihmanh aa khawng lo. Sizung ah an kalpi i a kut cu an tlop i a dam than,’ tiah catialtu pakhat nih a tial.

Pathian a zumlotu cu thil diklo an tuahnak thawngin an thangcho thluamah tawn. An sung tuk fawn lai lo. Asinain, Pathian nih a dawtmi a fa le cu sualnak chungah thih tiang iciah ding hi a kan siang lo. Sualnak kan tuah pengmi ah aa lawm lo. Cucaah, a kan chimhrin tawn. Cucu, zumtu le zumlotu kan idannak hmelchunhnak pakhat asi. Khrihfa kan si ve tung i thil diklo kan tuah caan ah kan inuam tuk, kan hlawh a tling tuk ahcun mah le mah lung ihrinh ding hmanh asi.

Baibal chungah minthang ngai asi nain an tuanbia dawh lo ngai in a dong mi hna lakah pakhat cu Solomon asi. Solomon cu kan theih cio bantukin mirum le mifim asi. Amah chan lio tlukin Israel ram hi a rum bal lo, a minthang bal lo i a ukmi ram a kau bal lo. ‘Fimnak’ timi biafang hmanh hi Solomon hlan ahcun theih balmi biafang hmanh a rak si lo. A mah chan hnu lawngin ‘fimnak’ biafang hi tampi hmuh khawh asi.

Zeiruangah dah a tuanbia donghnak aa dawh lo? Zeiruangah dah Israel ram tiang aa cheu? A ruang tampi lakah Solomon a sunghnak cu ‘chimhrintu a ngei lo’ caah asi. Fimnak le rumnak ah aa za. Cu vialte a petu Pathian a rak philh. David cu sualnak i a tluk caan ah ‘na palh hih’ tiah chimhrintu Prophet Nathan a rak um. Solomon chan ahcun Prophet aw an um lo. Pathian bia a ngeih lo ruangah Deuteronomy 17 ningin Solomon hi a fim bik asi, timi hi Baibal thiamsang tampi an lunghrin phahnak zong asi.

Solomon bantukin chimhrintu ngeih lo nakin David bantukin ‘na palh’ tiah ‘chimhrintu’ ngeih hi a tha deuhmi asi.

Nihin tiang, ka lawmh bikmi pakhat cu Pathian chitti thuhmi chimhrimtu “Na Palh Khah, Kha Ti Khan Tuah Hlah,” titu upa tampi ka cungah an um mi hi asi. Nu le pa ka ngeihmi hi an si. Chungkhar ka ngeihmi hi asi. U le nau, hawikom tha ka ngeihmi hi asi. Cu vialte hna cu Pathian nih a rak chiahmi lawngte an si. Phungthlukbia nih ‘chimhhrinnak a hua mi cu a kiak cikcek lai,’ tiah a ti.

Mipa nih a fapa meikanh in ciamviar nakin a kut a ke kiak ithlawp than a siang deuh bantukin Pathian nih a dawtmi a fa le cu sualnak, palhnak le thil diklo chung i a thlithup i kan umpeng nakin ‘na palh’ ti i chimhhrin a kan duh deuh ve.

‘Na palh’ tiah chimhrintu kan ngeihmi hi Pathian nih a kan dawt rih caah asi.

By Henry Nawlthangbik Hlawnceu

Hallelujah Le Amen Tihi Kan Hman Awk A Si Tuk Hen Ta

"Hallelujah le Amen" ti hman le hman lo kongah a buai pahmi hna atu tiang um rih hi cu a poi ngai. Khrih thawngtha kan sin a phaknak kum 100 leng a si cang nain kan i fian lomi a tam ning le buai lo dingah kan buai hna ning hi a poi ngai ko.

Hallelujah" ti cu "Bawipa cu thangthat si ko seh" ti khi a si ko.

Amen" ti cu " Mahti cun si ko seh, Ka lung a tling" tinak khi a si ko.

Baptist mi thenkhat nih "Hallelujah le Amen" ti hman kan duh lonak a ruang cu Jesuh nih a hman lo ruangah hman kan duh/uar lo, cu e, kha e ti len zong hi lungrawk a si.Jesuh cu Pathian a si caah ziah Hallelujah ti cu a hman rua hnga? HALLELUJAH ti cu Pathian a simi Jesuh nih a hman awk si loin minung tu nih kan hman awk a simi a si.

Hallelujah le Amen ti hi Baptist a simi, Pathian nih a hman cuahmah liomi Pastor Sang Nawl le Sarah Ngun Doi Fam zong nih an hman tuk. Pastor Thawngling Mualhlun zong nih a hman tuk. Baptist a simi Pastor tampi nih Hallelujah le Amen ti hi a hman tuk ko. Hallelujah le Amen ti a hmang duh lomi Pastor cu tlawmte lawng an si.

Hallelujah kan ti tikah "BAWIPA Pathian cu thangthat si ko seh" kan ti khi a si ko. Mah "BAWIPA Pathian cu thangthat si ko seh" ti hna kan hman duh lo hi cu "Hallelujah" ti sullam kan i fian lo ruangah maw a si hnga?
(Hallelujah Sullam relnak)

"Hallelujah" ti hi hman kan duh lo cun "Pathian cu thangthat kan duh lo" tinak bantuk khi a si ko hnga.. 'HALLELUIAH le Amen" ti hman a duh lomi hna hi mi thlawmte an si i biaknak leiah a thluak deuh a hmangmi an si lai tiah ruah a um ko.

UPC zong, Baptist le tist lo zong, Khrihfa kip nih "Hallelujah" ti hi kan hman tuk awk a si i Amen zong kan hman tuk ding a si. "Hallelujah le Amen" tihi hi hman a herh in a herh ko ti ning law ka palh lai lo.

Hallelujah le Amen ti hman a duhmi nih kanmah le lung duhning in hmang ko hna u sih law a hmang duh lem lomi hna kha kutdong va sawh len hna hlah u sih. Cun Hallelujah le Amen ti hman a duh lomi cu mahle duh loning te khan um ve ko u law a hmangmi hna kha kutdong sawh len loin dai tein um ve ko u law buai lennak hi a um hnga lo.

>>>>>>>SHARE<<<<<<<

Rom 14:2-3,10
Mipa pakhat cu a zumhnak nih zei ei paoh a onh ko, sihmanhsehlaw zumhnak a dermi nih cun anhringso lawng kha a ei.

Zeipaoh a eimi nih khan cu bantukin a ei ve lomi kha a zawmhtaih awk a si lo, cun zeipaoh a eimi kha anhringso lawng a eimi nih a soi awk a si ve lo, zeicahtiah Pathian nih cun a cohlan veve ko hna cu ta.

A si ahcun, nannih anhringso lawng a eimi nih zeicahdah nan unau hna cu nan soi kun hna? Cun nannih anhringso ei lo pawl zong nih zeicahdah nan unau cu nan zawmhtaih ve hna? Kan dihlak in Pathian hmaiah biaceih awkah kan chuak cio ko lai. "

JESUH KHRIH A THIHNAK LE A THAWHTHANNAK NIH…. Rev. Thawngling Mualhlun

Luka 24:6 Hi ka ah a um tilo, a tho cang… ’ 

Thlacamnak: ‘Ka Pa, na bia hi Thlarau in kan fianter ko tiah kan nawl i, na kan fianter ti zong ka zumh caah ka lawm. Bawipa Jesuh min in thla ka cam. Amen.’

Vawlei ahhin khuaruahhar thil an tam lengluang ko nain Jesuh Khrih thawhthanak hi khuaruahhar lak ah khuaruahhar bik cu a si. Amen.

Jesuh thawhthannak khuaruahhar a si khunnak cu, Amah thawhthannak lawnglawng hi vawlei le van a pehtlai khotu, Pathian le minung a  kan tlaihter kho tu, ral nganbik thihnak zong a hrawk kho tu a si caah a si. Culawng si lo, cu thihnak le thawhṭhannak thawng in nang le kei zong kan nun khawh ve nak hi a si. Vanmi hna nih nu hna sin ah, ‘Hika ah a um lo, a tho cang’ (Luka 24:6) an timi bia hi kan caah thawngṭha bik cu a si taktak ko. Haleluia!

Paul nih cun, Khrih hi thawhter si hlah sehlaw kan nih cu chim awk kan ngei hnga lo i, nan nih zong zumh awk nan ngei ve hnga lo. Cun Pathian cu lih kan chimter a si hnga, a ti ve.  ‘Khrih cu thihnak in thawhter a si lo ahcun, kannih cu chim awk zeihmanh kan ngei hnga lo I nannih zong zumh awk zeihmanh nan ngei hnga lo. Cuhlei ah Pathian cu lih kan chimter a si hnga’ (1 Korin 15:14-15) A dik tuk, Jesuh Khrih a thawhthan caah kan nih zong zumh awk kan ngeihnak a si. Jesuh Khrih kan Bawipa cu thihnak teitu, minthang Khamhbawi a si caah amah thawhthannak nih hin vawlei tuanbia hi a thlen dih i, minung kan sining zong a thlen dih cikcek.

Jesuh Khrih a thi i, a thawhthan caah thil tamtuk aa thleng. Minung kan nunnak aa thleng. Mi sualbik a simi keimah nunnak tiang hmanh ai thleng ve. Kan sining chung ah a kan hrawmmi thil tampi a um. Cu lak ah pahnih in langhter ka duh.



Pakhatnak:

Jesuh Khrih a thih i, a thawhthan caah Pathian ngaihthiamnak kan co i, Amah he kan i rem. Sertu Pathian nawl kan buar caah sualnak ah kan tlu. Amah sin in kan rak i ṭhen caah a ral ah kan i cang fawn. Ral kan si hlei ah kan donghnak ding cu hell chung ah a si. Sihmanhsehlaw a ral a simi kha a Fapa Jesuh thisen thawng in  ngaihthiam kan si i, remter kan si cang. ‘Khrih thisen nih kannih cu a kan luatter, cucu kan sualnak kha ngaihthiam kan si tinak a si’ (Efesa 1:17). Cupin ah misual mi kha ngaihthiam lawng si rih lo, remter kan si cang i, a ral kha a hawi ah a kan canter cang. ‘..Pathian nih cun Khrih thawng in kan nih a ral a simi cu amah he a kan remter i, midang zong rem ve nak rian cu a kan pek (2 Korin 5:18) Cucaah remnak thawngtha chimding ah sawm le kawh kan si ve. ‘Pathian he i rem ko u, tiah Khrih min in kan in nawl hna’ (2 Korin 5:20). Amen.

Pathian nih a kan ngaihthiam, cu pin ah  kan i rem. Cu ngaihthiamnak le remnak nih minung hawi cung ah ngaihthiamnak le remnak a chuahpi chih. Vailamtah kong a hrilhfiahmi hna nih an kan chimhmi pakhat cu, a tunglei nih minung le Pathian kan i pehtlaihnak a langhter i, a pheilei nih minung le minung i remnak a langhter ti a si. Pathian le minung kan i rem cang caah minung le minung zong kan i rem. 

Pastor Beecher timi pa nih cun, ‘kan lungthin chung ah hin hawikom palhnak vuinak thlanmual kan ngeih hrimhrim awk a si’ tiah a ti. Midang nih kan cung i an palhnak vialte kha kan lung chung ah caamter lo in, i chiah peng lo in kan hloh dih lai, kan philh dih lai a tinak a si.

Josh Billing timi pa nih cun, ‘teirulcham lak ah a ṭhawngbikmi hriamnam cu ngaihthiamnak a si’ a ti ve. A hman tuk ti law. Bawipa Jesuh min in kan ngaihthiam ti cu vawlei cung ah a sunglawibik mi bia a si ko. Amen.

Matthai 18:15-35 tiang kan rel ahcun Pathian nih minung a kan rem cang caah minung le minung zong kan i ngaihthiam i, kan i rem a herhnak kong fiang tein kan hmuh khawh. Minung hawi he i rem cu Pathian nih a kan tinhpiakmi, Jesuh a thihnak le a thawhthannak ah aa telchih mi, Jesuh thihnak le thawhthannak nih a hon kan kah chihmi le a kan hrawmhmi  thawngtha a si.

‘…cun bawipa nih cu sal cu a kawh i, saltha lo, na cung i zaangfahnak ka ngeih bantuk in pei na sal hawi cung ah na ngeih ve awk a si cu, tiah a ti’ (Mtt.18:33).
‘Bawipa nih an ngaihthiam hna bantuk in pakhat le pakhat nan i ngaithiam lai’ (kolose 3:13).
‘Pakhat le pakhat cung ah zaangfahnak lungthin le nemnak lungthin ngei ulaw Pathian nih Khrih thawng in an ngaihthiam hna bantuk in pakhat le pakhat i ngaithiam u’ (Efesa 4:32). Amen.

Pahnihnak:

Jesuh Khrih a thi  i, a thawhthan caah zungzal nunnak kan ngei. Khamh hnangamnak kan hmu i, kan sining pi hi ruahchannak in a khat. Jesuh kan zumh cangka in zungzal nunnak kan ngei.
‘Pathian Fapa a zummi paoh nih cun a lungchung ah Pathian i tehte a khaannak bia kha a ngei;.. Cu tehte cu hihi a si: Pathian nih zungzal nunnak a kan pek cang i cu nunnak cu a Fapa chung ah a um. Pathian Fapa a ngeimi paoh nih cu nunnak cu an ngeih i, Pathian Fapa a ngei lomi paoh nih cu nunnak cu an ngei lo’ (1 Johan 5:10-12) Kan zumh cangka in zungzal nunnak a kan pek cang i, zeicahdah a kan co ter chih tiahcun khamh hnangamnak kan ngeih khawhnak caah a si. Lung awṭawm in um ti hlah, khamh ka si hnga maw, silo hme tiah chim leen ti hlah. Bawipa nawl si ko seh, tiah titi hlah. A kan pek cang khah. A cakuat dawh kan kut chung ah a phan cang hih.

‘Pathian Fapa a zummi nih zungzal nunnak  kan ngei ti kha nan i hngalhkhawhnak hnga hi ca hi kan kuat hna’ (1 Jn 5:13). Haleluia!

Ule nau, ramhnihnak in refuzi kan sawk i, ramthumnak ah kan kal cang lai ti kan hngalhnak cu zunglei in thawng an kan thanh caah a si. Cu thawngthanhmi cu kan i zumh. Cucaah kan hna a ngam. Kan lung ahmui. Ramthumnak kong lawng kan ruat, kan i lawm, lailei thawng cu kan ruatduh set ti lo. Ramthumnak kha kan mitthlam ah a cuang i, culei lawng kan lung ah aum. ‘A si tak maw aih?’ tiah an kan hal dikdek hmanh ah kan thin a hang nawn. Zoh u hih, zunglei ca hi, phone an kan chawnhnak hi, tiah kan chimh hna. A kalding kan si kha kan i fiang tuk, lung awṭawmnak zeihmanh kan ngei lo.

A tlinglo ngaimi tahchunhnak a si ko nain a hmanthlak cu cu bantuk te cu a si. Vawlei ah kan um rih nain vanram ah kan kal cang lai tinak tehte a kan hmuhter tu asi. Cucaah zungzal nunnak a kan co ternak nih khamh hnangamnak a kan pek i, ruahchannak he nifa tein a kan nunter khawhnak a si.

Ule nau,
KAN BAWIPA JESUH  KHRIH A THIHNAK LE A THAWHTHANNAK NIH PA PATHIAN HE A KAN REMTER, MINUNG HAWI HE A KAN REMTER, ZUNGZAL NUNNAK A KAN CO TER CHIH I, KHAMH HNANGAMNAK A KAN PEK.
Haleluia!
Haleluia!
Haleluia!

Bawipa nih sunparnak co ko sehlaw kan dihlak caah thluachuahnak kan pek piak ko seh. Amen.

Bawipa Rianthiang ah,

Thawngling Mualhlun
Senior Pastor, CEBC Indy 
Email: tmualhlun51@yahoo.com 
Website: www.incebc.org

Kannih Kan Sual Sifah Ingtu, Kan Bawi Jesuh A Si Lai. Sermon- Pastor Sang Nawl

                         

Baibal Cang: Matthai 11:28-30, Isai 40:29-31

Derek Anthony Redmond timi pa hi Great Britain a si i tlik a ṭhawng ngaingaimi a si. World Championships, European Championships le Commonwealth Games tehna zongah sui medals a hmumi tawntu a si. Derek cu 1992 Barcelona Olympics lio ah metres 400 tlik zuamnak ah a zuam ṭhan i, a tlik in metres 150 hrawng a vun phak in ruahlo piin orhlei ke thahri a cat i a tli kho ti lo. A vun i hrim ṭhan i a dir kho na lo tein. a dir chih i, ke khat in a hawile cu a dawi ṭhan ve hna. 

Cu bantuk i a thahri a cah le a celh ti na loin a thawh ṭhan i a ke khat tein a tlik ṭhan cu a hringtu a pa Jim nih a zoh khawh ti lo caah tlik zuamnak tual chungah ahcun a fapa Derek sinah cun a va tli. Security pawl nihcun an rak kham len nain a hnu ahcun an thlah ṭhan i, a fapa cu a liang in a hruai i a tlik pi. Cuticun an pafa in an tli i ṭha tein Metres 400 tlik zuamnak cu an chuak khawh. Olympics a zohmi minung 65,000 renglo nih an dirpiak i lunglawmhnak le upatnak in an kut an pekpiak. Derek nih pakhatnak hmu ti lo hmanhselaw tlik zuamnak cu tha tein a chuak khawh i, minung a thawngthawng nih lunglawmhnak le upanak an pek i thazaang an hmuh. Derek cu nihin ni tiang a kong chim a dai lo i, amah bantuk a rak tuar vemi hna caah thazaang petu bik ah a chuak.

¤ Zumtu Hna Nunnak Ah; 

Nifate zumtu hna kan nunnak hi tlikzuamnak ah a tli lengmangmi bantukin (1Kor 9:24) kan si. Cu bantukin nifate zumhnak in kan tlik lengmang lio ahhin a chan ahcun zawtfahnak le i khondennak, ngeihchiatnak le lungfahnak tampi kan tong tawn i, kan lamthluan hi pekzulh kho lo ding tiang dirhmun kan phan tawn. Kan sianginn kainak ah siseh, kan rianṭuannak ah siseh, kan chungkhurkhar ah siseh, kan khrihfabu ah siseh, kan nungak tlangval kongah siseh, zeidang a phunphun ruangah siseh tuar khawh lo le in khawh lo tiangin fahnak le ngaihchiatnak kan ton caan tampi a um tawn. Hi vawlei nih a kan pek khawhmi cu lungfahnak le ngeihchiatnak lawngte an rak si pinah kan ralpa Sata hrimrhim cu Pathian fale hna hi a phunphun in fir, hrawh le thah dingin (Johan 10:10) a kan dawi lengmang. Cucaah minung leicun tuar khawh le tei khawh hi a har hringhran ko. 

¤ Rethei le Thilrit Vialte Hna;

Sihmanhselaw cu zumtu hna nihcun kan harnak le kan ngeihchiatnak vialte a an tuarpitu, a kan bawmtu le a kan teipiaktu Jesuh Khrih kan ngei. Jesuh Khrih cu kan hawikom ṭhabik zong a si i, kan Bawipa le kan Pathian zong a si. Jesuh nihcun zeitlik hmanh ah a kan kaltak bal lo i, a dawtmi a fale hna cu a kan umpi zungzal ko. A kan bawmh zungzal i thazaang a kan pek zungzal ko. ''A dermi le a bami kha thazang a pek hna'' (Isai 40:29). 

Sihmanhselaw zumtu tampi cu kan harsatnak le kan retheihnak vialte hi kanmah nih kan i phurh dih tawn. Kan tonmi harsatnak vialte hna zong hi kanmah tein tuar kan i zuam tawn. Cu tikah minung kan si caah kan tuar kho tawn lo i, kan phur kho tawn lo caah vawleicung nun hmanh zuam lo in kan nunnak tiang hna a dih tawnnak a si. 

Cucaah kan Bawipa Jesuh nihcun ''Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang,”(Matt 11:28-30) tiah a ti, Amen. 

¤ Hawidawt Hna;

Vawlei cung a si caah le minung kan si caah kan thih hlan loin hi vawlei harsatnak le ngeihchiatnak, lungretheihnak le khuaruahhar vansannak hna zong kan tong lengmang rih lai i ahohmanh nih kan hrial kho lai lo. Chungkhar zong bauinak a chuak lai i Khrihfabu buainak a chuak peng ko lai. Kan rianṭuannak, kan sianginn kainak le kan umkalnak hmun kipah buainak zong a chuak peng ko lai. Sihmanhselaw zei kan tonmi kip le kan umkalnak kipah Jesuh Khrih he kan tuarṭi i, kan kal ṭi a si ahcun zeizongte ah kan tuar khawh ko lai. Jordan tilet tho hmanhselaw lunglawmhnak in kan tan ngam cang lai. Sihmanhselaw Bawipa a bochanmi cu thazang thar an la. Mupi bangin an zuang lai, an tlik tikah an baa lai lo, an kal tik zongah an tha a di lai lo (Isai 40:31) Amen. 

¤ Khrihfa Hla No.307

Kannih kan sual sifah ingtu kan hawi Jesuh a si lai, Pathian sinah kan duh vialte hal ahcun a tha dah ngai. Hnangamnak tampi um in fahnak ngaihchiatnak kan huah kan duh duh vialte Pathian sinah hal loin kan um caah.

http://www.youtube.com/watch?v=KQxY-3yOdvY

Bawipa nih hnangamnak le daihnak in pe ko hna seh.

Sang Nawl

Gospel Revival Ministries

Email: gospelrevival2012@yahoo.com

Facebook: Nitin Thlarau Rawl

Phone : 0045 51 27 85 68

Kan Caah A Si. Good Friday

•Jesuh  A Thihnak `Vailam´ cu
 Kan caah `Vanlam´ a si. Amen..

•Jesuh an `Tuknak Hmavual´ cu
 Kan caah `Damnak´ a si. Amen..

•Jesuh `Thisen a Luangmi´ cu
 Kan caah `Sual Thiannak´a si. Amen..

•Jesuh caah `Hling Luchin` cu
Kan caah `Sui Luchin´ a si. Amen.

•Jesuh nih `A Intuarnak´ hna cu
Kan caah `Lawmhnak´ a si. Amen....

•Jesuh `A Thihnak´ cu
Kan caah `Nunnak le Luatnak´ asi. Amen..

Halelluiah......
A Sunglawi tuk hringhran....

>>>>>>> SHARE <<<<<<<<

Jesuh He Chatting: Sailo Pa (2016)

Nihin Good Friday cu keimah lawng Syracuse, NY, Super-8 Hotel i  ka um lio ah, Jesuh he chatting kan tuahmi a rel huammi caah kan hrawmh ve hna.

SP (Sailo Pa) : Ziahdah nihin Friday hi Good Friday an ti?
Jesuh : Ka Pa, Pathian lung awi ni asi caah Good Friday an ti.

SP: Zei ruang ah dah na Pa lung cu a awi?
Jesuh: Nangmah sual man kan pek piak ni asi caah a si.

SP: Ka sual man cu zeizatdah a si?
Jesuh: Vawlei chawva, thilri le sui ngun vialte fonh nak in a tam deuh, relcawklo. Thong, sang sing, nuai, vaibelchia-----

SP: Cu vialte lei ka bat cu ka theih ttung lo?
Jesuh: Mirumpa zong a thei ve lo, hell a tlak hnu lawng ah a theih ve.

SP: Cu ka leiba cu zeizat vial dah na ka pek piak?
Jesuh: A zapi tein kan pek (paid off) piak dih cang.

 SP: Ka lawm tuk ko nain vailamtahnak tung na put mi kha a rit tuk lo maw?
Jesuh: Ka vailamtahnak tung nak in na sualnak a rit deuh. Cucaah ka pu kho lo i ka tlu.

SP: Vailamtah lam ah na tuar mi kha a fak tuk lo maw?
Jesuh: Ka temtuar mi vialte nak in nangmah he i tthen hi a fak deuh.

SP: Thih cio cio zong ah zaangdam deuh thih a ngah lo maw?
Jesuh: Hma ka in le zawtnak ka tuar mi cu – nangmah sualnak ruang ah a si. Ka tuar ruang ah nang nih luatnak na hmuh.(Isa.53:5)

SP: Tuknak na huah mi kha tah?
Jesuh: Nangmah thatlonak ruang ah an ka tuk. An ka tuknak vual cu nangmah caah damnak a si. (Isa.53:5)

SP: Thisen a luang mi kha tah?
Jesuh: Sen duk le sen lar in na sualmi vialte thianternak caah an si.(Isa.1:18)

SP: Hlungluchin hna kha cu a herh lo nain?
Jesuh: Suiluchin nai chinhnak ding caah a si.

SP: Nangmah Pathian Fapa thih ni i na Pa lung a awi ko cu zeitindah kan zumh khawh lai?
Jesuh: Keimah nak in ka Pa nih an dawt deuh caah a si. Johan 3:16 “Pathian nih SP a dawt tuk hringhran caah a Fapa (JS) kha a pek” ti pei asi kha. Dawt deuhmi ah nangmah na si, kei cu pekmi thilri ceo lawng ka si…

SP: Cu tluk cun maw na Pa nih hin a rak ka dawt???
Jesuh: Eden dum i nan i tthen lio ah nang cu ka Pa nih ttah bu in an kawl (SP, khoi dah na um?). Kei cu vailam cung i kan i tthen lio le ka thih cuahmah lio hmanh ah a ka ttah ve lo, a ka kaltak. Cucaah keimah tu fak piin ka ttap i, “Ka Pathian, ka Pathian, zeicadah na ka kaltak” ti’n ka auh len zong ah hnulei chit in a ka kaltak.

SP: Ziahdah cuticun a si hnga?
Jesuh: Ka Pa nih an dawt tuk hringhran caah a si ko.

SP: (Mitthli dairial ti he) Kai lawm tuk Bawipa, hi tluk na Fapa nak hmanh in na ka dawt deuh nak thawngttha hi ka nun chung ka phuan ve cang lai.

Haleluiah! Bawipa min thangthat si ko seh.

>>>>>> SHARE<<<<<<<

Lungtekep Auter Sawh Hlah

LUKA 19:40
Jesuh nih cun a leh hna i, “Hi hna hi an daih ahcun lung hrimhrim hi an au lai,” tiah a ti. Amen...

Acung Baibal kan relnak cu Jesuh Jerusalem khua chungah Sunparnak in a luh lio ah "A hmai i a kalmi hna le a hnu in a zulmi hna cu an bu ning piin an au i, “David Fapa cu thangthat ko u! Bawipa min in a rami cu Pathian nih thluachuah pe ko seh, Pathian cu thangthat ko u,” tiin an au lioah MATTHAI 21:9 Farasi mi a cheukhat hna nih Jesuh cu “na zultu hna hi daihter hna," tiin an ti i Jesuh nih a lehnak hna bia a si. Luka 19:39

Hi nih a kan cawnpiak duhmi cu-

•Mipi an dai cun lung zong a auter khawh ko hna ti kha a si.

•Pathian kan thangthat duh lo cun Pathian a thangthat duhmi le a thangthat tu ding midang an um ko.

•Pathian rian tuan kan duh lo cun a tuan duhmi le a tuantu ding Midang an um ko.

•Khamhnak Thawngtha kan chim duh lo cun a chimh duhmi le a chimtu ding midang an um ko.

•Mission caah tangkaa kan pek duh lo cu a pe duhmi le a petu ding midang an um ko.

•Miharsa kan bawmh duh lo cun a bawm duhmi le a bawmtu ding midang an um ko.

Kanmah lungtho tein Pathian rian thiang ah "Tlakrawh pakhat, these fangkhat" bantukin kan i tel khawh ve hi a sunglawi tuk. Cu caah hi bantuk Pathian rian sung i kan i tel ve nak ah hin phunzai lo tein kan tuan ding hi a biapi tuk. Kan phunzai a si cun Pathian nih "kal ko, midang an um ko" a kan ti khawh. Phunzai hi Pathian nih a duh lo ngaimi a si.

A tangah hin "Lungtekep Auter Sawh Hlah- Rem Rem" nih a sakmi rak ngai cio u law..Thazaang zong nan hmuh ko lai.

BAWIPA nih Sunparnak co ko seh. Amen...