Nihin zumtu tampi nihcun Yahshua Messiah (Jesuh Khrih) chuah ni cu December 25 ah an tuah cio. Asi ahcun Yahshua Messiah hi December 25 ah maw a chuah taktak ko? December 25 hi Yahshua Messiah chuah thla taktak a si lonak kong bible cherhchan he a dotdot in zohti hna usih.
Tlangbawi Riantuannak
Messiah chuahnak kong zoh le tial timh ahcun Israel mi Tlangbawi riantuannak le Johan chuahkehnak kong langhter chih lo awk a tha lo. Bible kan zoh tikah Israel mi nih biakinn chung riantuantu Tlangbawi 24 an chiah hna. Cu Tlangbawi hna cu Aron tefa chung in Eleazar fapa 16 le Ithama fapa 8, an zapi 24 an si (1Chanrelnak 24:4).
Kumkhat ah thla 12 a um i ni 360 a si caah Tlangbawi 24 nihcun camcawh fung zuh in ni 15 cio biakinn rian cu an tuan. Abijah phu chung in Tlangbawi Zekhariah nih camcawh fung 8nak a zuh i biakinn rian a tuan, bible nithla relnak thlalinak a simi Tammuz (July) thla dih ah rian a lim (1Chanrelnak 24:7-18, Luka 1:8-9).
Zetik ah dah Mary nih fa a pawi?
Tlangbawi Zekhariah nih Tammuz (July) thla ah rian a lim i biakinn riantuannak in Ab thla (August) thawkka in inn ah a nupi Elizabeth sin ah a hung tin. Elizabeth cu nau a hung pawi colh i thla 5 chung leng chuak lo in a um (Luka 1:23-25). Elizabeth pum lawng lo in a um, a thlaruknak Tebeth (January) thla ah vancungmi Gabriel cu Mary sin ah a vung kal i nau na pawi lai i fapa na hrin lai. A min ah Yahshua na sak lai, a ti (Luka 1:26-31).
Messiah Hrinnak
Vancung mi nih thiangthlarau in fa na pawi lai tiah Mary an chimh le fa pawi hram aa thawk ahhin Elizabeth nih Johan cu a paw chung ah thlaruk a pawi cang (Luka 1:36). Mary nih nau a hun pawinak in a thla 9nak le ni 15nak, bible thla relnak in thla 7nak Ethanim 15 ni ah ngaknu thiang Mary nih Yahshua Messiah cu Bethlehem khua caw inn ah a hrin (Luka 2:7; 21)
Messiah Chuah Thla Taktak Cu…
Tlangbawi Zekhariah nupi Elizabeth nih Johan cu bible nithla relnak in thla 5nak Ab (August) thla thawkka in a pawi. Elizabeth nih Johan a pawi thlaruk a si ah Mary nih Yahshua Messiah pawi hram aa thawk ve. Cucaah, Mary nih Messiah a pawi thla hi bible nithla relnak in thla 10nak Tebeth (January) thla ah a si. Minung nih fa hi a tlangpi in thla 9 pawi a si caah Mary nih Yahshua Messiah a hrin hi bible nithla relnak in thla 7nak Ethanim (September thla canceo in October canceo ) thla ah a si.
Ethanim Thla Fianternak
Bible nithla relnak Ethanim thla cu Rom nithla relnak in September thla canceo in October thla canceo kar a si. Bible ah thla 7nak thla Ethanim timi cu 1Siangpahrang 8:2 ah fiangte in kan hmuh khawh. Yahshuah Messiah chuah thla hi Israel miphun nih Deu Puai an tuah ni caan he aa tong. Cucaah, Deu Puai nih a hmuhsakmi cu Yahshua Messiah chuahnak ding a si (Hebru 10:1-7). Israel miphun nih Ethanim (October) thla ah Deu Puai le Messiah chuah ni thla aa khahmi le aa tonmi nih bible cathiang (biakam hlun le biakam thar) aa kawpnak tette a langhter.
Cucaah, Yahshua Messiah chuah thla hi December thla a si hrimhrim lonak le Ethanim thla ah a chuahnak kong cathiang ah fiangte in kan hmuh khawh. Zumtu hawidawt, bible kan i tlaih i thil sining kan hngalh ko ahcun December 25 ah Messiah chuahcam hi hmang ti hna hlah usih. Bible cathiang nih a kan chimhmi le a kan fialmi ningte in a hmangmi zumtu taktak si cang hna usih.
Thiangthlarau nih a thuk tukmi a biathli hngalhfian khawhnak thluachuah in pe cio ko hna seh! Amen.
-Biakamfa Mino
