Ahopaoh mithmai tha le Thangthatnak hmuh cu kan duh cio hna. Zum lotu tampi le zumtu a si ko nain Baibal rel a daitlangmi hna nih Baibal chungah a um komi kha thei loin mithmai tha le thangthatnak cu zeitin kan hmuh khawh lai tiin hehchat an kawl i hmuh an i zuam hna.
Mi pakhat nih kan um a harmi nakin mi mithmai tha ka hmuh lo hi a har deuh a ti. Mah cu bia ngai a si. Minung mithmuh ah mithmai tha hmuh lo hna mahtluk a har ahcun Pathian mithmuh ah mithmai tha hmuh lo chinchin cu zeitluk in dah a har chinchin lai?
Mi tampi nih nitin kan kalnak lamthluan caah Maw BAWIPA nihin ni ka tlawnlennak ah mithmaitha ka pe ko tiin thla kan cam tawn. Mahtin thla kan cam cu mipi lakah Mithmai tha hmuh a rak hau tuk ti kha kan i fiang caah a si.
Mithmai tha le Thangthatnak hmuh khawhnak caah cun a tang i Pathian Bia hi kan zulh i kan i nunpi si cun kan hmuh hrimhrim ko lai. Zeicahtiah Pathian Bia, Baibal cu lih a si lo. Biatak hrimhrim a si. Cu caah Pathian le Minung Mithmuh ah Mithmai tha kan hmuh khawhnak hnga caah Pathian Bia, Baibal hi nunpi i zuam cio hna u sih. Pathian nih i nunpi hna seh ti a kan duh piak. A mi fa hna cu mithmai tha le thangthatnak hmu cio hna seh ti zong hi a kan duh piakmi a si.
Phungthlukbia 3:3-4
Felnak le zumh awk tlakmi sinak kha i chuahtakter hna hlah, Na hngawng ah i: ngerh hna law na lung tlap cungah i ṭial hna.
Cuticun Pathian le minung mithmuh ah Mithmai ṭha le thangṭhatnak na hmuh lai.
Hmanthlak: Rosy Tawk Par
