Tlanghra Dan Ummi He I Uar CHAN

Tuchan cu kan Pawngkam um, a ziaza le a sining kan theih mi hna he fawi tein i uar i fawi tein i thitumh khawh a si ko mi nungak tlangval uar duh loin, tlanghra dan ramdang um, a ziaza le sining hna theih bak lomi tu he i uar, i duhdawt i i thit-umh chan kan van phan.

•Thantlang ummi pa nih a pawngkam nungak dawhdawh a lawng komi hna uar loin Singapore a ummi nu tu a va uar.

•Malay ummi pa nih a pawngkam a lawngmi nungak tungtai tha pawl uar loin US ummi nu tu a van uar. 

•Norway ummi pa nih a pawngkam nungak dawh tungtai tha tampi an um komi hna uar loin Australia ummi nu tu a va uar.

Umnak i khat lomi he i uar cu a har tuk nain chanti luan ning a si fawn cang.. Mah hi Phundang in tial cun Online daling ngeih kan ti lai. Online Daling ngeih cu a har tuk hringhran ve. I uar kaa cun cakuat zoh lo le leh loin a kan ummi te hmanh khi thinlung a fak dom.

Online DL ngeih a harning

Tuchan Laimi zong Atak nakin Online in aa uarmi kan van tam deuh men lai. Aa thi-um cangmi hna um a van si. Thiltha ngai a si ko.

Tlanghra dan, umnak i khat lomi he Online in i uar, i thit-umh hi Ruah ngai le fir khur ngai a hau ve. Umnak Tlanghra dan, ziaza le sining theih lomi he i thut-umh hlan i duhnak hi a tawi bik kum khat hnih tal cu si seh law a tha bik lai.

Duhnak cu a thawng tuk nain chikhat te men a si ko caah i umh hnu, a rauh hlan ah i then than a fawi te...

Online ah Ziaza le Sining theih lomi he fawi tein kan i uar awk a si lo.

Atak in DL ngeih (kan pawngkam mi he i dl) khawh lo hrat cun Online Daling ngeih hi a tha deuh tuk.

Online DL ngeih hi tuchan cun Zohchuk awk a si ti lo. 

CNA/F Ah Kan Lut Awk A Si Hnga Lo, Anmah Hmanh An Harsa Tuk.

Atu ah hin CNA/F ah kan va lut cun Khuate ah a ummi, a harsa ngaingai mi, bawmchantu le ramdang in tangkaa kuatu zong a ngei lomi chungkhar hna sinah ah va tlun bantuk a si hnga i harsatnak va pek chin lehlam tu a si hnga.

Mah ti ka tial hi CNA/F ka doh a si hrim lo.

A ngaingai in ka duhnak bik cu CNA/F ah lut thluahmah hna u sih ti hi a si ko.

Miphun Dawtu CNA/F An Harsa Ning Youtube bia ruahnak kan zoh cun kan i sum kho lo, nusal le pasal pi zong kan mitthli a tla ruangmang theo an ti.

CNA/F An nun khua sakning ka ruah ah Chinmi lakah nun khuasa a har bik an si lai. Miphun le Ram an dawt ruangah khi tluk harsatnak an tuar i an in chih khi ruah ah khuaruahhar a si ko. Upat lo awk an tha lo..

Khi hna khi Fim thiamnak a ngeimi nusal tha le pasal tha lawngte an si ko. CNA/F in chuah i kanmah bang Inn thatha le motor thatha he, rawl thawthaw le meh thawthaw he khua a sa kho ding lawngte an si ko. Asinain kan Chinram le miphun an dawt tuk ruangah harsatnak tu an i thim deuh. An lungput le an lungthin cu uar a um kho dah ngai.

Khrihfa kan si kan ti i mi phundang bawmhchannak hna zongah kan si khawh tawkin kan kut kan samh. A si nain miphun le ram caah nuntep in rian a tuanmi miphun dawtu CNA/F cu hnu kan chit tak diam ko.

Kan Unau Kachin pawl vial, Kachin Hriamtlai an dirhkamh ning le an bawmhning. Kannih Chinmi vial nih harsatnak tampi huah le Nuntep in miphun le ram caah rian a tuanmi CNA/F kan hei bawmh lo ning le kan dirhkamh lo ning. A phunphun tu in kan hei soisel hna, kan mawhchiat hna, kan tanglamh hna.

Ruah ah Ngiahchia tuk kan si ko.

Chin mipi kan lungfim cang seh law
Miphun dawtu CNA/F hi kan si khawh chung in, dongcat loin bawm/dirhkamh chinchin hna u sih....

Miphun Dawtu CNA/F Hi Dongcat Loin Bawmh/Dirhkamh A Hau

Online ah CNF dirkamhnak le tanhnak ca hna kan rak tial lengmang hi a tha tukmi a si. Asinain atu cu catial lei lawngin dirhkamh(Bawmh) caan le tanh caan a si ti lo. Kan ngeihchiah chawva le phaisa hna in dirhkamh(bawmh) caan le tanh caan a si cang.

Catial leiin CNA/F caah thazaang chuah len nakin Chawva lei tu in thazaang chuah deuh u sih law a thahnem deuh saumau lai.

CNA/F nih catial lei in CNF dirkamh(bawmh) le tanh nakin Ngeihchiah Chawva hna in dirhkamh(bawmh) le tanh hi an herh deuh. An duh deuh fawn lai i an i lawm zong an i lawm deuh fawn lai.

CNF dirkamhnak le tanhnak hna a tial kho ngai mi a si nain ngeihchiah chawva hna in a bawm duh bal lomi, bawmh ding in aa tim bal lomi kan si cun a poi tuk lai.


Miphun dawtu CNA/F zeitluk in an harsa ti cu kan theih tuk cio cang ko lai.

Kan Chinram dothlennak caah nuntap le retheinak phunphun tuar in ram caah rian a tuanmi hna hi voikhat te hmanh bawmh loin um cu kan sia a rem ko lai maw?

Ramleng um rian a tuanmi hna nih kan ngeihmi chawva tlawmte zong a si ah, kan sian tawk tein CNA/F hi bawmh pah lengmang hna u sih. "Bawmh" ti nakin "ka thawh ve" ti tu hi a dik deuh.

Kan Unua Kachin hna hi Chinmi nih kan i zohchun ding an si.
Kachin mipi hna nih Kachin Hriamtlai hna khi dongcat loin an bawmh peng hna i an thangcho taktak. An ei awk lawng hlah, hriam le Meithal thatha cawknak tiang in an bawmh hna.

"Mission caah chawva le tangka pek lawng hi Pathian rian tuan le a tha mi a si lem lo. CNA/F pek le bawmh zong hi a Pathian rian tuan le thil thatuk a si" ti hi pom kho cio hna u sih law ram le miphun dawtu CNA/F hi dongcat loin kan ngeihchiah chawva in bawm hna u sih.

Lai Online Thawngzamh hna zong thawngzamh nan tuannak in nan hmuhmi kha Salai Lungthli Tum bang CNA/F caah nan sian tawkte hlu pah ve u law uar nan um chin lai.

Baibal bia bang "Pek leiah hin hmuh lei nakin lunglawmhnak a um deuh. "Lam20:35 tiin ka catial ka donghter.

Lawmhnak he...
~Satu Khaimiechhô

Zarhpi Ni Riantuan Hi A Sual Tuk Ko Maw?

Biadomhnak

Vawlei khuaza ramkip kan phanh ve cang caah, Lai miphun kan mah duhning in khua kan sa kho ti lo i kan siarem zawng in Pathian zong kan bia kho ti lo! Hlan ahcun piangthar he thar lo he zarhpi ni riantuan cu a chia-kha taktak ah a ruat tawnmi miphun kan si. Rit- donh caan ilawnglawng ahhin, "Pathian nih kan theithiam ko seh" ti bu in lo rit-donh ah a kalmi miphun kan si! Asinain atu ahcun ram ttha ummi Lai miphun tampi cu zarhpi ni ah paw- cawmnak rian biatak tein an tuan cang hna. Khikhi a sual maw? Bible nih zeitindah a chim?

A. Zarhpi Ni Ulh Aa Thoknak 

"Zarhpi Ni nan ulh lai" tiah Bible nih voikhat zong a chim sual lo.Sabath ni (ni sarih ni) nan ulh lai, ti bal cu hmun tampi ah a chim. Sabath ni (ni sarih ni) timi hi Judah nithla relnak in relmi ni sarihnak ni a si i cucu nihin i kan niruk Ni hi a si. Atu kan zarhpi ni hi cu Bible chan lio auhning le tialning ahcun cacawn nikhat ni a rak si. Jesuh thihnak in a thawh tthan hnu ah, kha lio cacawn nikhat ni (atu kan zarhpi Ni) hi phundang tein langh hram aa thok. Tahchunhnak ah:

1. Cawn nikhat ni ah thlan in Jesuh a tho (Mark 16:9, Msatt. 28:1)
2. Lamkaltu hna sin ah aa lang (John 20:19)
3. Lamkaltu le zumtu hmasa pawl nikhat ni ah pumhnak an ngei (Acts 20:7, 1 Corinthians 16:1-2)
4. Pentecost Ni kha cawn nikhat ni a si (Lam. 2:1, (Leviticus 23:15-16)

Hi langhtermi leng ahhin Bible cacang dang tampi an um rih nain tahchunhnak caah lawng hi langhter ko ning. A cunglei cacang vialte zong ahhin "cawn nikhat ni (zarhpi ni) ah Pathian nan bia lai, nan ulh lai" timi pakhat hmanh a um lo.

Cun, lamkaltu khrihfabu zong hi ni ahhin an rak i pum ko nain zeiruang ah dah hi ahhin an rak i pumh? timi khuazei Bible hmanh nih direct in a chim bak lo. Jesuh hnu zultu taktak pawl an thih dih hnu kum zabuu 100 le 200 kar ahhin Khrihfabu pale tampi nih an zumhnak defend an tuahnak ah, zei ruang ah dah zarhpi ni ah an i pumh timi fiang tein an langhter. Tahchunhnak ah, Justin (A.D 114-165) nih "Hi ni hi Jesuh Khrih thihnak in a thawh tthan ni a si caah Khrih zultu dihlak hi ni ahhin hmun khat ah kan i pum" tiah a rak ttial.

Hi caan hnu deuh hrawng ahhin cun, lamkaltu cawnpiaknak (Apostolic Teachings) an timizulh phung cauk zong ah "Khrih a zummi poh nih zarhpi Ni ulh ding, i pumh ding" tiah an rak ttial cang. Khah, a fiangmi cu zarhpi ni ah Pathian kan biakmi hi Bible nih "hi ni ahhin bia u" tiah nawl a kan pekmi si lo in "Khrih hnu zul, Lamkaltu hna le zumtu hmasa hna nih an rak tuah pengmi a si caah Jesuh chan in nihin tiang pehzulh pengmi tu khi a si deuh! Nawl pek cu a si lo!

B. Asi ahcun zarhpi Ni riantuan cu sual a si kun maw? 

A tawinak in chim ahcun, "tuah u" timi a um lo ahcun "sual" timi a um kho ve lo. Pathian nih nawl a pek lomi thil kong ah minung sual a puh bal lo! Cucaah zarhpi Ni "rian tuan lo ding" timi hi Pathian nawlpek siloin Lai mi ruahnak a si caah hi ruang ahhin Pathian nih direct in sual a kan phaw lai lo. Zarhpi ni riantuanmi hi an chungkhar khuasaknak le dirhmun nih a pek bak lo caah a tuanmi an si ve ko hna lai. Lo theih lo si ttung loin pumh le Pathian thangthat zuam lo ruang ah zarhpi ni rian tuanmi zong kan um lai.

Cu hna cu zarhpi ni rian an tuan ruang ah siloin Pathian that an zuam lo ah sual phawt an si ko lai. A ummi thil pakhat bal cu, zumtu hawi he Pathian thangthat caan na hman lo ahcun tukforhnak tei na harh deuh lai. Tukforhnak ah na tluk ahcun zarhpi ni riantuan ruang siloin tukforhnak tei lo ruang tu ah sual phawt na si ko lai...

-Hrambik Lian

"CACC le Chin Idol" kong hi nikum an tuah lioah fakpi in soiselnak ka rak ttial bal

"CACC le Chin Idol" kong hi nikum an tuah lioah fakpi in soiselnak ka rak ttial bal i, tukum zong an peh rih thiam caah tawite in ka von inolh ve :) CACC cu zei bu dah a si i, aho te pawl nihdah an tuah? timi in kan thawk ahcun ifian a fawi cem lai.

CACC cu a saunak in "Chin Association For Christian Communication" ti a si i, a tuahtu hi Baptist Khrifabu an si. CACC ah riantuantu dihlak khi Pastors lawngte deuh an si fawn. Cun, CACC caah phaisa a thotu zong hi Khrifabu thiam an si. Cucaah, CACC cu Pathian sinah pekchanh cangmi Phaisa/thawhlawm in rian a ttuanmi a si kha hngalh zungzal awk a si. Cutin, Pathian sinah pekchanhmi Phaisa/thawhlawm in riantuantu/pastors hna nih Idol/siasal or milar thimnak an hung tuahmi cu aa tlak maw? An rian a si maw? An sining he tah aa keih/tlak maw? timi kha mi tampi thinlung ah a hung itap ngaimi/ siarem lo ngaimi cu a si.

CACC cu "Christian Communication" caah sermi a si bantuk in Khrifa he aa pehtlaihmi hmang in Miphun tunmernak/hungchonak tbk hi an ttuan awk a si. Asinain, cuti siloin, zatlang minung nih an tuah hnga dingmi zatlang milar/celebrities thimnak rianpi hna an hung ilak ngammi hi cu, an pastors sinak or Pathian riantuantu an sinak he cun aa ralkah takmi a si i, caan dongh lai Ni ahcun khuaruahhar thil tampi an um lai timi tlintertu hlah maw an si ti awk in a um ko.. xoxo

-Zasang Cinzah

Austrial Um Chin miphun caah thawngpang tha taktak

Pathian lam hruainak le hawi tha ruangah Australia sathahnak i rian pe mi lakah a lian bik 2nd a si mi Company ah HR Recruiment Coordinator rian ka tuan. Ka tuan cang ka in ka hmuh mi cu kan rian ngei mi pawl hi kan Chin miphun ca'h a tha hnem tuk mi a si lai ti Ka ruah caah ruahchannak tampi he Facebook ah kan van langhter ve. Kan company ah Australia ram a rak phan mi chung in miphun tling in rian an tuan nain Chin mi kan um rih lo.

Atawinak chim ahcun kan Cozah hi thlakhat hnu thlakhat an cian deuh deuh i Centrelink lawng a bawh mi ca cun Australia khuasak tuntuk hi a fawi ti lo. Brisbane, Sydney, Melbourne le Adelaide khuachung le khua pawng hna ah hin Permanent Full-time rian hi an har taktak. B.A le M.A degree ngei mi ca hmanh ah a fawi lo. Casual in tuan kan si dih ngawt hna. Cucaah, kan hmailei caah thin a phang peng. Nai tan rammi sinak upadi an thlen mi ah le tax pek in rian a tuan bal lo mi cu rammi sinak pek khawh a si ti lo. Kan fak chin lengmang ko.

Asinain, cu vialte cu thinphan ding a um ti lo. Kan company nih rian tam taktak a neih. Nan tuan duh chung in rian a um. Nu/va in siseh, tlangval nungak siseh, mino secondary dih mi pawl ca tiang in Apprenticeship in hmailei thanchonak ding tiang rian kan ngei. Kan nih rian cu;
1. Full-time Permanent kan in pek hna lai.
2. Leave Ni 20 kan in pek hna lai.
3. Sick leave Ni 10 kan in pek hna lai.

Riantuannak bal te lamhlat nak ah an si. Naracoorte (SA) Victoria ramri pawng te le Waga Waga (NSW) le Brisbane lei ah an si. Atu lio hi Naracoorte ah mi an herh bik lio a si.

Naracoorte nai thial ruangah na miaknak na hmuh ding mi hna cu;
1. Inn man a fawi tuk. Mebourne ah 2 bedrooms hi $1300-1400 kan pek lio ah an nih cu $650 lawng a si.
2. Asian Dawr a um zei paoh a tling dih. Kan compan nih na tuan ruangah mah dawr hi thil na cawk mi paoh 5% discount an in pek lai.
3. An khua thiamhling i Cozah secondary sianginn lawng siloin Private Christian College zong a um chih.
4. An khua pawng ah Lake lianpi a um hi sio thlaknak a lar taktak. An khua hi Ai dawh lawng siloin nuamnak le sports an huam.
5. Daycare caah Childcare Certificate a ngah mi kan Laimi chung in an um le bang ahcun hmailei ah a tha tuk ding khi a si.
6. Rian hi thlaruk ah lahkhah a kai colh lai. Sat-Sun zong ah OT tuan huam ahcun a um lengmang kho.

Nu/va nih kum 2-3 tha tein rian nan tuan ahcun Melbourne ah inn man cawk khawh colh. Melbourne i khuasak cun nu/va riantuan ko zong ah kum tam taktak tangka khawn a hau. Kumkhat $10,000 hmanh a khawng lo mi kan tampi. Melbourne ah siseh, Adelaide ah siseh hmailei ah kum 3 chung ah inn cawk a duh mi nupa hna um ah in Naracoorte hi a tha bik. Miphun dang zong Naracoorte hin an tuan i an fa le Mebourne ah University an kai ter ko hna.

Kan company i rian nan tuan ahcun keimah kan zoh khen peng hna lai. Direct in nan manager le big boss pawl he ai chawn kho Ka si i nan lungtlin lonak cu keimah nan ka chimh khawh colh.

Cozah Bomhnak a um rih!
************************
Cozah he neih niam tein riantuan mi kan si bantuk in mah rian na ngah thawng na hmuh ding mi a tam ngaingai. Rian a tuan bal lomi le sianginn lawng a kai peng mi le Centrelink ah Job Active rian kawl ah bomh a hau mi Streamline C ah a um mi man si ahcun Naracoorte ah rianhmuh man le thial man ah Cozah nih $6,000 in $10,000 tiang an in bomh rih hna lai.

Tam deuh in theih a duh mi le peihtleihnak tuah a duh mi nih a tanglei btk hin peihtleihnak tuah khawh a si.

Contact;
Simon Sang Hre
Email: ssanghre@meatprocessors.com.au
Work mobile: 0436 662 602

Messiah A Chuah Thla Taktak Na Hngal Cang Maw? (Thlarau Biathli)

Nihin zumtu tampi nihcun Yahshua Messiah (Jesuh Khrih) chuah ni cu December 25 ah an tuah cio.  Asi ahcun Yahshua Messiah hi December 25 ah maw a chuah taktak ko? December 25 hi Yahshua Messiah chuah thla taktak a si lonak kong bible cherhchan he a dotdot in zohti hna usih.

Tlangbawi Riantuannak
Messiah chuahnak kong zoh le tial timh ahcun Israel mi Tlangbawi riantuannak le Johan chuahkehnak kong langhter chih lo awk a tha lo. Bible kan zoh tikah Israel mi nih biakinn chung riantuantu Tlangbawi 24 an chiah hna. Cu Tlangbawi hna cu Aron tefa chung in Eleazar fapa 16 le Ithama fapa 8, an zapi 24 an si (1Chanrelnak 24:4).

Kumkhat ah thla 12 a um i ni 360 a si caah Tlangbawi 24 nihcun camcawh fung zuh in ni 15 cio biakinn rian cu an tuan. Abijah phu chung in Tlangbawi Zekhariah nih camcawh fung 8nak a zuh i biakinn rian a tuan, bible nithla relnak thlalinak a simi Tammuz (July) thla dih ah rian a lim (1Chanrelnak 24:7-18, Luka 1:8-9).

Zetik ah dah Mary nih fa a pawi?
Tlangbawi Zekhariah nih Tammuz (July) thla ah rian a lim i biakinn riantuannak in Ab thla (August) thawkka in inn ah a nupi Elizabeth sin ah a hung tin. Elizabeth cu nau a hung pawi colh i thla 5 chung leng chuak lo in a um (Luka 1:23-25). Elizabeth pum lawng lo in a um, a thlaruknak  Tebeth (January) thla ah vancungmi Gabriel cu Mary sin ah a vung kal i nau na pawi lai i fapa na hrin lai. A min ah Yahshua na sak lai, a ti (Luka 1:26-31).

Messiah Hrinnak
Vancung mi nih thiangthlarau in fa na pawi lai tiah Mary an chimh le fa pawi hram aa thawk ahhin Elizabeth nih Johan cu a paw chung ah thlaruk a pawi cang (Luka 1:36).  Mary nih nau a hun pawinak in a thla 9nak le ni 15nak, bible thla relnak in thla 7nak Ethanim 15 ni ah ngaknu thiang Mary nih Yahshua Messiah cu Bethlehem khua caw inn ah a hrin (Luka 2:7; 21)

Messiah Chuah Thla Taktak Cu…
Tlangbawi Zekhariah nupi Elizabeth nih Johan cu bible nithla relnak in thla 5nak Ab (August) thla thawkka in a pawi. Elizabeth nih Johan a pawi thlaruk a si ah Mary nih Yahshua Messiah pawi hram aa thawk ve. Cucaah, Mary nih Messiah a pawi thla hi bible nithla relnak in thla 10nak Tebeth (January) thla ah a si. Minung nih fa hi a tlangpi in thla 9 pawi a si caah Mary nih Yahshua Messiah a hrin hi bible nithla relnak in thla 7nak Ethanim (September thla canceo in October canceo ) thla ah a si.

Ethanim Thla Fianternak
Bible nithla relnak Ethanim thla cu Rom nithla relnak in September thla canceo in October thla canceo kar a si. Bible ah thla 7nak thla Ethanim timi cu 1Siangpahrang 8:2 ah fiangte in kan hmuh khawh. Yahshuah Messiah chuah thla hi Israel miphun nih Deu Puai an tuah ni caan he aa tong. Cucaah, Deu Puai nih a hmuhsakmi cu Yahshua Messiah chuahnak ding a si (Hebru 10:1-7). Israel miphun nih Ethanim (October) thla ah Deu Puai le Messiah chuah ni thla aa khahmi le aa tonmi nih bible cathiang (biakam hlun le biakam thar) aa kawpnak tette a langhter.

Cucaah, Yahshua Messiah chuah thla hi December thla a si hrimhrim lonak le Ethanim  thla ah a chuahnak kong cathiang ah fiangte in kan hmuh khawh.  Zumtu hawidawt, bible kan i tlaih i thil sining kan hngalh ko ahcun December 25 ah Messiah chuahcam hi hmang ti hna hlah usih. Bible cathiang nih a kan chimhmi le a kan fialmi ningte in a hmangmi zumtu taktak si cang hna usih.

Thiangthlarau nih a thuk tukmi a biathli hngalhfian khawhnak thluachuah in pe cio ko hna seh! Amen.


-Biakamfa Mino