1a Biaknak inn na kal ah hin i ralring. Cu ka i na va kal tikah zeidah kaa cawn khawh lai ti kha ruat deuh, 2a Bia na chim hlanah i ruat hmasa (Phungchimtu 5:1a-2a).
Nihin Laimi zumtu tampi cu Biaknak inn (Church) kan kal zongah "nun cawn" Pathian bia in thazaang la ti loin thinhung bu tuin inn ah a kir tthan mi kan tam. Pumh caan a sau, thangthat caan a sau, thlacam a sau, bible rel caan a sau, thlacam cah a tam, tehte khan a tam, a nih pa/nu biachim cu ka duh lo tiin kan phunzai tawn.
Pekchanhnak kong chim kan duh lo, nun thiannak kong chim kan duh lo, biatak in nun remhnak kong chim kan duh lo. Kan duh deuh mi cu zatlang nun he a tlak mi tthanchonak, pumh sau tuk nih tthathnemnak a chuahpi lo, Sunday chun riantuan poi lo, kuak, zuu, khaini le a dang zukhawm a poi lo, na pumh khawh lo zongah a poi lo, thangthat na celh lo zongah a poi lo tiin zatlang kong chim i, mah topic he a tlak mi bible verses lak in chim tu hna tu kan uar hna. Sihmanhsehlaw... ( relchih: 2 Timothy 3:16)
1 Timothy 4 chung bangin Pathian biatak nak in minung nih phuahchom mi bia hna an uar deuh tak cang. Cucaah a poi lo tiin chimtu hna zong “kan mah nih chim i kanmah hrimhrim Pathian pennak ah” a lut lomi si sual a fawi ve te caah mi uar nak in Pathian uar mi si tu duh deuh usihlaw Biatak kan luatnak ding tu chim i zuam deuh usih. A cheu cu kan chim mi Pathian bia lila kan mah nih kan fiang ve lo. Cucaah chimtu nakin tuah tu si hi zumtu nun cu a si deuh ko (Jeim 2:14-16) .
Cucaah zumtu hna Biak inn (Church) kan kal ahhin, zeidah ka cawn lai timi tu hi biapi ah chia hna usih. An chim mi na cohlan khawh rih lo zongah, na cawn khawh mi, an chim mi chung tuin a um mi te kha nunpi i zuam ko. Pu Thawng Za Kam nih hlaphuah mi cu “caantawi te chung, thangthat hmanh na zuam locun, zungzal in thangthatnak ding vanram ahcun zeitindah na um khawh lai” a ti. Cucaah pumh caantawi te chung ahhin thangthat caan ah thangthat ko usih, Thawngtha ngaih caan ah ttha tein ngai ko usih. Nun cawn i tim usih, zai i tim hlah usih, Cucu Pathian bia nih a kan cawnpiak mi a si. Zumtu lam hi a har caah i hnek ko hna usih, a herh caan ah hnek hi kan caah Thluachuahnak a si. (Bia 22:6-17)
Joshua Thawng Zathang
