Thlacamnak: ‘Ka Pa, na bia hi Thlarau in kan fianter ko tiah kan nawl i, na kan fianter ti zong ka zumh caah ka lawm. Bawipa Jesuh min in thla ka cam. Amen.’
Vawlei ahhin khuaruahhar thil an tam lengluang ko nain Jesuh Khrih thawhthanak hi khuaruahhar lak ah khuaruahhar bik cu a si. Amen.
Jesuh thawhthannak khuaruahhar a si khunnak cu, Amah thawhthannak lawnglawng hi vawlei le van a pehtlai khotu, Pathian le minung a kan tlaihter kho tu, ral nganbik thihnak zong a hrawk kho tu a si caah a si. Culawng si lo, cu thihnak le thawhṭhannak thawng in nang le kei zong kan nun khawh ve nak hi a si. Vanmi hna nih nu hna sin ah, ‘Hika ah a um lo, a tho cang’ (Luka 24:6) an timi bia hi kan caah thawngṭha bik cu a si taktak ko. Haleluia!
Paul nih cun, Khrih hi thawhter si hlah sehlaw kan nih cu chim awk kan ngei hnga lo i, nan nih zong zumh awk nan ngei ve hnga lo. Cun Pathian cu lih kan chimter a si hnga, a ti ve. ‘Khrih cu thihnak in thawhter a si lo ahcun, kannih cu chim awk zeihmanh kan ngei hnga lo I nannih zong zumh awk zeihmanh nan ngei hnga lo. Cuhlei ah Pathian cu lih kan chimter a si hnga’ (1 Korin 15:14-15) A dik tuk, Jesuh Khrih a thawhthan caah kan nih zong zumh awk kan ngeihnak a si. Jesuh Khrih kan Bawipa cu thihnak teitu, minthang Khamhbawi a si caah amah thawhthannak nih hin vawlei tuanbia hi a thlen dih i, minung kan sining zong a thlen dih cikcek.
Jesuh Khrih a thi i, a thawhthan caah thil tamtuk aa thleng. Minung kan nunnak aa thleng. Mi sualbik a simi keimah nunnak tiang hmanh ai thleng ve. Kan sining chung ah a kan hrawmmi thil tampi a um. Cu lak ah pahnih in langhter ka duh.
Pakhatnak:
Jesuh Khrih a thih i, a thawhthan caah Pathian ngaihthiamnak kan co i, Amah he kan i rem. Sertu Pathian nawl kan buar caah sualnak ah kan tlu. Amah sin in kan rak i ṭhen caah a ral ah kan i cang fawn. Ral kan si hlei ah kan donghnak ding cu hell chung ah a si. Sihmanhsehlaw a ral a simi kha a Fapa Jesuh thisen thawng in ngaihthiam kan si i, remter kan si cang. ‘Khrih thisen nih kannih cu a kan luatter, cucu kan sualnak kha ngaihthiam kan si tinak a si’ (Efesa 1:17). Cupin ah misual mi kha ngaihthiam lawng si rih lo, remter kan si cang i, a ral kha a hawi ah a kan canter cang. ‘..Pathian nih cun Khrih thawng in kan nih a ral a simi cu amah he a kan remter i, midang zong rem ve nak rian cu a kan pek (2 Korin 5:18) Cucaah remnak thawngtha chimding ah sawm le kawh kan si ve. ‘Pathian he i rem ko u, tiah Khrih min in kan in nawl hna’ (2 Korin 5:20). Amen.
Pathian nih a kan ngaihthiam, cu pin ah kan i rem. Cu ngaihthiamnak le remnak nih minung hawi cung ah ngaihthiamnak le remnak a chuahpi chih. Vailamtah kong a hrilhfiahmi hna nih an kan chimhmi pakhat cu, a tunglei nih minung le Pathian kan i pehtlaihnak a langhter i, a pheilei nih minung le minung i remnak a langhter ti a si. Pathian le minung kan i rem cang caah minung le minung zong kan i rem.
Pastor Beecher timi pa nih cun, ‘kan lungthin chung ah hin hawikom palhnak vuinak thlanmual kan ngeih hrimhrim awk a si’ tiah a ti. Midang nih kan cung i an palhnak vialte kha kan lung chung ah caamter lo in, i chiah peng lo in kan hloh dih lai, kan philh dih lai a tinak a si.
Josh Billing timi pa nih cun, ‘teirulcham lak ah a ṭhawngbikmi hriamnam cu ngaihthiamnak a si’ a ti ve. A hman tuk ti law. Bawipa Jesuh min in kan ngaihthiam ti cu vawlei cung ah a sunglawibik mi bia a si ko. Amen.
Matthai 18:15-35 tiang kan rel ahcun Pathian nih minung a kan rem cang caah minung le minung zong kan i ngaihthiam i, kan i rem a herhnak kong fiang tein kan hmuh khawh. Minung hawi he i rem cu Pathian nih a kan tinhpiakmi, Jesuh a thihnak le a thawhthannak ah aa telchih mi, Jesuh thihnak le thawhthannak nih a hon kan kah chihmi le a kan hrawmhmi thawngtha a si.
‘…cun bawipa nih cu sal cu a kawh i, saltha lo, na cung i zaangfahnak ka ngeih bantuk in pei na sal hawi cung ah na ngeih ve awk a si cu, tiah a ti’ (Mtt.18:33).
‘Bawipa nih an ngaihthiam hna bantuk in pakhat le pakhat nan i ngaithiam lai’ (kolose 3:13).
‘Pakhat le pakhat cung ah zaangfahnak lungthin le nemnak lungthin ngei ulaw Pathian nih Khrih thawng in an ngaihthiam hna bantuk in pakhat le pakhat i ngaithiam u’ (Efesa 4:32). Amen.
Pahnihnak:
Jesuh Khrih a thi i, a thawhthan caah zungzal nunnak kan ngei. Khamh hnangamnak kan hmu i, kan sining pi hi ruahchannak in a khat. Jesuh kan zumh cangka in zungzal nunnak kan ngei.
‘Pathian Fapa a zummi paoh nih cun a lungchung ah Pathian i tehte a khaannak bia kha a ngei;.. Cu tehte cu hihi a si: Pathian nih zungzal nunnak a kan pek cang i cu nunnak cu a Fapa chung ah a um. Pathian Fapa a ngeimi paoh nih cu nunnak cu an ngeih i, Pathian Fapa a ngei lomi paoh nih cu nunnak cu an ngei lo’ (1 Johan 5:10-12) Kan zumh cangka in zungzal nunnak a kan pek cang i, zeicahdah a kan co ter chih tiahcun khamh hnangamnak kan ngeih khawhnak caah a si. Lung awṭawm in um ti hlah, khamh ka si hnga maw, silo hme tiah chim leen ti hlah. Bawipa nawl si ko seh, tiah titi hlah. A kan pek cang khah. A cakuat dawh kan kut chung ah a phan cang hih.
‘Pathian Fapa a zummi nih zungzal nunnak kan ngei ti kha nan i hngalhkhawhnak hnga hi ca hi kan kuat hna’ (1 Jn 5:13). Haleluia!
Ule nau, ramhnihnak in refuzi kan sawk i, ramthumnak ah kan kal cang lai ti kan hngalhnak cu zunglei in thawng an kan thanh caah a si. Cu thawngthanhmi cu kan i zumh. Cucaah kan hna a ngam. Kan lung ahmui. Ramthumnak kong lawng kan ruat, kan i lawm, lailei thawng cu kan ruatduh set ti lo. Ramthumnak kha kan mitthlam ah a cuang i, culei lawng kan lung ah aum. ‘A si tak maw aih?’ tiah an kan hal dikdek hmanh ah kan thin a hang nawn. Zoh u hih, zunglei ca hi, phone an kan chawnhnak hi, tiah kan chimh hna. A kalding kan si kha kan i fiang tuk, lung awṭawmnak zeihmanh kan ngei lo.
A tlinglo ngaimi tahchunhnak a si ko nain a hmanthlak cu cu bantuk te cu a si. Vawlei ah kan um rih nain vanram ah kan kal cang lai tinak tehte a kan hmuhter tu asi. Cucaah zungzal nunnak a kan co ternak nih khamh hnangamnak a kan pek i, ruahchannak he nifa tein a kan nunter khawhnak a si.
Ule nau,
KAN BAWIPA JESUH KHRIH A THIHNAK LE A THAWHTHANNAK NIH PA PATHIAN HE A KAN REMTER, MINUNG HAWI HE A KAN REMTER, ZUNGZAL NUNNAK A KAN CO TER CHIH I, KHAMH HNANGAMNAK A KAN PEK.
Haleluia!
Haleluia!
Haleluia!
Bawipa nih sunparnak co ko sehlaw kan dihlak caah thluachuahnak kan pek piak ko seh. Amen.
Bawipa Rianthiang ah,
Thawngling Mualhlun
Senior Pastor, CEBC Indy
Email: tmualhlun51@yahoo.com
Website: www.incebc.org
