Ngaihthiamnak Hnu Chit Aa Timi Laimi Zumtu Khrihfa

Ngaihthiam timi hi minung kan nunnak ah a biapi tuk. Minung le minung kan i pehtlaihnak ah si seh, Minung le Pathian kan i pehtlaihnak ah si seh, a biapi tuk. Pathian nih cun Hell thla ding misual hna kha a Fapa Jesuh Khrih thawng in a kan ngaihthiam. Amen.

Cu caah "Pathian nih an ngaihthiam hna bantukin Pakhat le pakhat kha i nan sualnak i ngaihthiam ve u" tiah Jesuh nih a kan cawnpiak chin.

Jesuh nih "Na unau nih Ni khat ah na cungah voi sarih a sual i voi sarih ningin, ‘Kaa ngaichih,’ a ti ahcun na ngaihthiam hrimhrim lai,” tiah bia a kan cah ta ( Luka 17:4 )

Asinain tuchan Laimi Khrihfa thenkhat cu Voikhat kan palh sual hmanhah kan i ngaithiam duh ti lo. A kan lem, I ngaihthiam ding a si ti lo kan ti colh i a sual pah mi kha Thong ah thla colh u, Biachia kha rel cawk lo in kan soisel i kan tlanglamh colh hna. Voikhat palh hmanh ah "a nung ti lai lo" a timi hna um a van si. Voihnih palh chinchin a sual palh mi nun cun a dih ko hnga..


Laimi Zumtu Khrihfa thenkhat hna nih Jesuh cawnpiaknak le Baibal bia hi kan zul duh ti lo. A poi tuk. Jesuh nih a kan cawnpiak mi hi kan zulh khawh lo a si lo. A zulh hrim in kan zul duh ti lo hi teh ti hi Baibal zoh chih in ka hmuhning a si.

Zeitin kan zulh duh lo.

Nai Malaysia CND 2018, Jenevy Sui hla a sak lioah Zuu ri pa pakhat nih a kut in a dawh i Stage cungin a tlak lo lawng a si.
Mah cu ngaithiam bak hlah u, a nun hmanh nunter ding a si lo a timi hna an um. Mah cu kai ngaihchih, ka palh tuk, a ti hlan tein Jenevy Sui nih cun a rak ngaihthiam diam i a zaang a fak lehlam lio ah Zei hmanh aa pehtlai(san) lomi pawl nih kan rak ngaithiam kho lo i biachiakha rel cawk lo le rel ngam lo bia zaza in an rak thangchiat i ka ngaithiam u ka palh tuk a ti hnu zongah kan rak ngaithiam duh bak lo. Hi zawn ah hin Jesuh nih a kan cawnpiak mi kan zulh duh lo cu a lang ngaingai. Ngaihthiamnak hi hnuchit kan timh diam ko.

" Mi nih kan cung i an sualmi kan ngaih thiam hna bangin kan sualnak zong kan ngaithhiam ve tuah" timi BAWIPA  Thlacam hi zarhchiar te le nichiar te ti awk in kan cam nain kan cungah a sual lomi hmanh kan rak ngaithiam duh lo. Kan cungah a sual theng mi lawng ngaihthiam ding ah kan ruah rua. Bawipa thlacam cu kan cam sawhsawh lawng a rak si ko.

A kan lem, i ngaihthiam ding a si lo, Tazacuai colh ko u timi bia hi thenkhat nih "a hmaan tuk, a dik tuk" an ti len. Hi bia hi Baibal he cun aa kalh diam, aa kalh tuk.

 Peter nih Jesuh kha hitin a hal.
“Bawipa, ka unau pakhatkhat nih ka cungah sualnak tuah seh law voi zeizat dah ka ngaihthiam lai? Voi sarih tiang maw?” tiah a hal.  Jesuh nih cun, “Sihlah, voi sarih si loin voi sawm sarih voi sarih, tiah a leh. Mat 18:21‭-‬22 A sullam cu "a sual palh mi paoh  ngaihthiam peng ding, a dong lomi ngaihthiamnak" a si tiah Thenkhat kan Pastor hna nih an hrilhfiah.

Jesuh nih "Na unau nih Ni khat ah na cungah voi sarih a sual i voi sarih ningin, ‘Kaa ngaichih,’ a ti ahcun na ngaihthiam hrimhrim lai,” Luka 17:4 tiah a kan cawnpiak lio ah Laimi cu kan i ngaithiam duh ti bak lo. A poi tuk. Jesuh cawnpiaknak le Baibal bia thenkhat cu hnu kan chit diam.

Laimi hi a hlan ahcun thihlohnak ton tiang hmanh kha a rak i ngaithiam mi miphun, ngaihthiam nun a ngei mi kan si. Atu ahcun nemnam kan si cang rua..

Jesuh cawnpiaknak hmanh a zul duh bak ti lomi nih hin maw Jesuh a zumtu Khrihfa kan i ti ko lai? Laimi Khrihfa hna nih kan nun i chek than kan herh tuk.

Zumtu nih cun ngaihthiam nun kan ngeih a herh. Pathian zong nih amah zumh lo sualnak dah lo cu sualnak paoh a kan ngaihthiam khawh dih.

Hmailei kan kalnak lamtluan ah ngaihthiam ding tampi a um rih lai. Cu tikah Ngaihthiam ding in i tim cia u sih.

Ngaihthiamnak kha kan ngawng ah Thi bantukin i oih u sih law kan cung i an sual palh tikah ngaihthiamnak hngawng ngerh kan i oih mi kha zo hnawh colh hna u sih law ngaithiam lengmang ko hna u sih. Cucu Pathian duh tuk mi a si.

Chim U Sih

Mi dang cungah kan sual palh tikah
Ka palh, ka ngaithiam ti hi chim u sih. Kan ningzak hlah seh. Sorry ti lawng chim hi cu Laimi kan sinak ah a zaa deuh lo. Di a riam lo. Ka ngaithiam, ka palh ti chim fim a si i Laimi kan sinak ah di a riam bik. ±±±


Careltu cungah kailawm.

-Satu Kmc

Ka PHANG! By Salai Van Lian Thang

Kan zoh lai lo ti zongah a hun kai lengmang ahcun chelah hrial awk a ttha tawn lo. Zoh duh lo zongah hmuh kha asi.

Tuk a sum tukmi le thlakokbar hmanthlak pawl a khat tawn i, chelcun FB chuahtaak hna ka lung a chuak thut tawn.

Laimi nih ca kan relmi phun hi zei asi tiah khua a ka ruahter theo.

–Capipa (research paper tbk.) a thukmi ca khi rel kan huam tuk lo; tukmatak tete le biaporpok tete ah kan ibu

–Cauk, Magazine le Journal phun i catthattha a relmi kan tlawmte, FB ah capelpawi le thawng linsa tete kan zuanhnawh

Zingzan kan relmi le kan hmuhmi hi ithahnak; inonnak; tlaihhremnak; ituk velhnak; isik hronak tbk. kha an tam.

Lum le sa in thi ichuah lio; hngawng tan lio; hri thlai lio; inn khangh lio; nam le hreitlung in ituk lio; kut le ke icik lio; mei in ihrem lio, ngaihchia vansang in um lio; bomkhu le zenkhu nih zelh lio tbk. tuk a summi le ngaihchiami tamtuk kan tar.

Ka ngiat tikah hihi kum zeimaw nawn a kal cang. Media nih a linsami poh thlah an izuam. Zohtu le reltu nih a duh phun poh cu an kawl––an mawh ve lo.

Tulio Laimi nih nitin kan relmi le kan hmuhmi tampi hi a ngan a dammi an si ti lo. Kan caah san a tlaimi a tlawmte. Positive a tlawm; negative a tam.

Western ram a phan ciami Muslim mino tampi nih ralhrang IS sin an kalnak a ruang pakhat cu: social media i an hmuhmi nih an thinlung a thawhter, ti asi.

Misualbu (gangster) a lutmi mino tampi zong misual pawl an thiltuah an hmuhmi nih an thinlung a thawhter, ti asi.

Biafaang pakhat le hmanthlak pakhatte nih minung hi a thlen khawh.

Research an tuah tikah a chiatnak in a hmumi (pessimist) le a tthatnak in a ruatmi (optimist) minung ah a chiatnak in thil a hmumi hi an nunkhua a tawi deuh.

Tuni zei kan rel; zei kan hmuh; zei kan cawn; zeidah kan thinlung a taang timi hi kan thaizing caah an biapi ngai.

Hihi ka phang!

Nitin hmuhmi le relmi hi tuk a summi le a chiami (negative) lawngte an si i, kum zeimaw hitin a kal rihcun Laimi kan khuaruahnak tamtuk a hrawh lai; kan thinlungput kalning tampi a ping ah a hruai lai, kan thluak le thinlung tampi a zawtter sual lai ti ka phang!

–Negative nakin positive thil nih kan miphun hi tuam deuh seh.

–Thinlung, taksa, thlarau damnak a petu thil nih kan zatlang hi tuam deuh seh.

––Khuaruahnak a tthanchotertu cabia le thawngpang nih Laimi hi tuam deuh seh.

Lai media nih hihi kan zuampi hmasa tuah uh, tiah kan nawl hna.

Chunttha uh, keimah leiin.

-Credit: Salai Van Lian Thang

Minung kan Thil ton hi Hmuh thiam a biapi

Minung cu

kan i nuamh lio ahcun thazaang pek kan herh lo.
Kan lungdongh caan ah thazaang pek kan herh tuk.

Kan tluk rilh lo caan ahcun thawh kan herh lo.
Kan tluk rilh caan bel ah thawh kan herh.

A sual lomi cu ngaihthiam an herh lo.
A sual mi lawng ngaihthiam an herh.

Cu bantuk in Kan sual palh caan le kan tluk rilh caan ah thawh i thazaang pek kan herh tuk. Bantuk caan ah soisel nihsawh capo saih i thangchiat lehlam cu Zumtu Khrihfa nun a si lo. Pathian huat mi lehlam a si.

An sual palh lio le Ngaihthiam an herh lio caan ah ngaihthiam loin thangchiat chih i thawh an herh caan ah thawh lo cu kanmah Fim lo(Molh) a si.

Mi pakhat a thil ton lio mi ah khin Thazaang pek a herh lio a si maw?  bawmh a herh lio a si maw? A si loah cawnpiak dah a herh? ti bantuk kan hmuh thiam ding a biapi tuk.

-Satu Kmc

Kan Sual Tuah Ruangah Pathian Dantat Lengmang Kan Si.

Pathian nih sualnak kan tuahmi a kan ngaihthiam tawn ko nain mah sual kan tuah ruangah dan zong a kan tat thiam tawn. Phundang in "kan tuh man kan zun thiam". Mah cu Baibal kalning a si ko.

Baibal ning zohnak

David siangpahrang pa zong sualnak a tuah mi ngaihthiam a si nain a sual tuah ruangah fak taktak in dantat thiam a rak si.

David nih Uriah nupi Bethsheba aa sualpi i a va pa Uriah a thah ruangah Pathian a thin a hung ngai i Profet Nathan hmang in a sualnak a hmuhter.

"David nih Bawipa sin ah ka sual cang" tiah a sual a phuan i aa ngaihchih colh.  "Bawipa zong nih na sualnak kha an ngaihthiam cang" tiah a sual a ngaihthiam a si Nain "na sual ruangah nangmah cu na thi lai lo nain na hrinmi na fapa cu a thi lai" tiih dantat thiam a si. (2 Samuel 12:13) Cu lawng si loin Mah a sual ruangah A nupichun hna cu amah Fapa cia Abshalom nih a sualpi hna. Mah tiang in David nih fahnak(dantatnak) a huah chih. (2 Samuel 12:10-12, 16:22-23)

Hi kongah hin Pathian nih David Sual tuahnak a ngaihthiam ko nain David nih a sualman a zun thiam ko ti kha fiang tein hmuh khawh a si.

Sualnak hna hi thihnak tiang a phan mi sualnak an si dih lo caah amah cu a thi lo nain a sual tuah man kha a zun thiam ko.

Miriam zong Moses a mawhchiat ruangah Pathian nih thinghmui zawtnak in dan a tat. Moses nih Ngaihthiam ding a nawl nain ningzahnak in dantat ta rih hnu, a pa nih a hmai thengah a cil a chak hnu, ni sarih hnu lawngah a dam.

Kan Baibal cauk i aa tialmi hna rel nakah mi pakhat khat a sual tuahmi ngaihthiam a si tawn nain dan zong tat thiam tawn a si ko ti hmuh khawh a si.

Sual tuahnak cu Dantatnak he aa pehtlai zungzal. Sual man cu thihnak a si.

Dam lonak le zawtnak hna zong hi sual tuahnak he aa pehtlai mi an si kha A tang Baibal nih an fianter.

.... Bawipa nih damnak kha a pek Than lai i sualnak a tuahmi kha ngaihthiam a si lai.
JEIM 5:15

... nan sualnak kha pakhat le pakhat i chim u law pakhat le pakhat thla i campiak u, cu ti nan tuah ahcun damnak nan hmuh lai...
JEIM 5:16

Zawtnak le dam lonak hna hi Sual tuahnak he aa pehtlai maw ti cu pumpak pakhat cio nih nihin tiang kan nunnak ah kan i fiang ko lai dah...

Carel tu cungah kai lawm. Ka palh mi a um cun rak ka sawh piak u law ka duh ko.

- Satu Kmc

" CND, Chin Miphun Ni " Ah Zeiholh Dah Kan Hman Awk A Si?

Chin National Day

Chin Miphun Ni a nai cang cun hi ni ah hin zeiholh dah kan hman awk a si tiah kan chim rel theo. Hi kong he pehtlai in ka hmuhning a tanglei bang in ka rak tial sawh ve.

CND ah zeiholh dah kan hman awk a si ti cu a hmunhma zoh in aa rem bikmi Holh kha kan hman awk a si ko. CND ah Laiholh theng lawng hman awk a thalo. Aruang cu Halkha Thantlang, Falam dah lo cu Laiholh a hngal lomi deuh Lawngte an si. Chinmi nih tlangholh kan ngei kho rih lo ruangah kan Chinram ah Laiholh a theimi nakin a thei lomi an tam deuh.

Chin National Day cu kanmah Lai pawl ta lawngah ruah ding a si lo. Matupi, mindat, Kanpalat ti bantuk zong kan ruah chih tawn lo caah Chin National Day ah holh hman kongah kan buai tawnnak hi a si ve. A tang hmanthlak Chinram peng 9 ah hin Laiholh cu Peng thum lawng nih kan thiam i cu hmanh ah a thei lotu tamtuk kan um. Hivial hmanh in Chin Miphun Ni ah mipi nih theih bikmi Kawlholh hman a that biknak le a poi lonak kha a langhter.

Kalay, Yongon, Mandalay hna cun CND ah Laiholh telh loin Kawl holh lawng zong hei hmang ko hna seh. Aruang cu Laiholh a hngal lomi Matupi, mindat, Kanpalet ti bantuk hna khi Chinmi an si. An theihmi holh hman a hau.

CND, Halkha, Thangtlang hna ahcun Laiholh hman awk hrim a si ko. Kawl holh hman ve ding a si cun Laiholh in chim i Laiholh a thei lomi hna caah Kawlholh in chim zulh. Falam ahcun Falam holh hman i Falam holh a thei lomi hna caah Kawl holh in leh.

Malaysia cun Kawl holh lawng hman loin Laiholh zong hman chih khawh ve ah a tha.

Kan Chin Miphun Ni cu Kawl pawl le Miphun dang he aa pehtlainak a um lo caah kanmah Holh a hmai ah chiah in hman tawn awk a si.

Kan Chin Miphun Ni ah Kawl holh, Mirang holh kha hmai ah chiah i kan Lai holh kha hnu ah chiah lo ah a tha..

US lei ahcun Kawl holh hna hi sau kan hmang kho ti lai lo. Kum 10 hnu cun Kawlholh chiah ta i Lai holh le Mirang holh in hman bik a si lan te lai. Kawl holh cu chim lo kanmah Laiholh hmanh kan Fa le an thiam huaha ti lo caah Lai holh telh loin Mirang holh lawng hna in CND hi hman a si te kho.

-Satu Khaimiechhô

Ralzam in Ramthumnak kan phanh hi Pathian Thluachuah A Si.

Chinmi hna Ralzam in Ramthumnak kan phanh hi Pathian Thluachuah sunglawi tuk a si.

Lih kan chimnak in Ram thumnak kan phanh hi kanmah Thluachuah kan hmuh lawng si loin kan Chinram zong thluachuah a hmuh a si. Ram Thumnak kan phanh hi Pathian khuakhan cia a rak si i a rak kan duh piakmi zong a rak si ko.

Baibal ah Jacob kha a nu Rebecca nih lih a chimter ti kan theih cio. Jocob a nu nih lih a chimternak cu a pa sin ah a si. Thluachuah van luhnak tampi a hmuh nakhnga caah lih le hrokhrawl a tuahter i ti cun Thluachuah a co. Kei zong US kal khawhnak ding caah ka nu nih UN ah Lih a ka chimter ve. Ka chim lioah khan Lih a si ti cu ka mit au in a fiang tuk.

Keimah lawng hlah, Ram thumnak phan, Chinmi dihlak tiawk in lih in ram leng US le Australia le Europe, etc, hna ah kan phanh khawh hi thluachuah kan hmuhnak hnga caah Pathian khuakhan a rak si kan ti cun kan palh lai lo.

Lih kan chim nain Pathian nih a kan zaangfah i ram thangcho le ram rum kan phan. Lairam ah um u sih law zeidek kan va lawnh hnga. Hi ca ka tial khawh mi le Phone hmanh hi kai tlaih kho hnga lo.

Lih chim in ram thumnak kan phak hi Pathian nih lih hrokhrol tuah nakin Jacob thlauchuah hmuhding a rak duh piak bang kannih zong thlachuah hmuh ding a kan duh piak hi a si bak ko. Ai lo ngaingai.

•Ramleng kan phanhnak thawngin Mission lei kan tuan khawh deuhmi te hna

•Ramleng kan phanknak thawngin
mi hrasa kan bawmh khawh deuh mi te hna

•Ramleng kan phanknak thawngin
Pathian nih mah chungkhar zohkhenh a kan fialmi kan zohkhenh khawh deuhmi te hna

•Ramleng kan phaknak thawng in kan Chinram zong kan thanchoter deuhmi te hna, Kan Chinram thanchonak caah a lamkip in kan i tel khawh deuhmi te hna cuahnak in Lih chim in Raleng kan phak hi Pathian khuakhan a si ti cu a fiang ngai ko.

Cucaah Ramthumnak um Chinmi hna hi ramchung ummi hna nih Lih le Hrolkhrol in an phan tiah,
Nan kan mawhchiat awk a si lo,
Nan kan soisel awk a si lo,
Nan kan tlanglamh awk a si lo,
Nan kan zohchuk awk a si lo,
Nan kan nihsawh awk zong a si lo i
Zei nan kan rel lo awk zong a si lo.

By- Satu Khaimiechhô

Nupi Le Nih Pasal Le Chungkhar Uk Hruai Hi...

Annih chungkhar cu an Pa nih uk hruai loin an Nu nih a uk hruai tuk e, a nupi nih a pasal a uk hruai tuk e ti an chim hi theih lengmang a si. Pa bik nih chungkhar uk hruai loin Nu bik nih chungkhar a uk hruaimi Chungkhar hi a tam pah.

Ka theihmi Chungkhar ah Pa bik nih uk hruai loin Nu bik nih a uk hruai tawnnak a ruang cu Pa nih Nu a duh tuk ruang le a uar tuk ruangah a si bik. Pasal nih ka Nupi nih a ka duh uar lo sual lai i a ka zam tak sual lai ti ruang zongah a si men lai. Australia  ahcun Nu pawl covo (right) a tam deuh ruangah a si an ti bang. Hi bantuk hna ruangah Nupi le kuttang ah Pasal le an i chia tawn.

Pasal hi hawi tluk lo a thluak bul pahmi hna si cun Nupi nih van uk hruai hi thiltha a si ko nain Pasal fim ngai le thil ti kho ngai ve komi Nupi nih a van uk hruai hi cu chim awk a um pah. Nubik nih a uk hruaimi chungkhar cu mi nih zohchuk pah ziar a si ko.

Chungkhar ah Nupi i a uk hruaiter tuk nak nih a chuahpi mi ka hmuhton theihmi cu nupi nih pasal zei rel lonak le zohchuknak hna, hmailei chungkhar khuasaknak ah Pasal lei chungkhar zoh duh lo le bawmh duh loin mah Nupi lei chungkhar lawng zohnak hna a chuahter.

Chungkhar ah Nupi nih Pasal uk hruai tuk ding a si lo bang Pasal nih nupi uar tuk ruangah zeizong te Nupi kuttang ah i chiah ding a si hnga lo. Nupi le hi Hramhram in Pasal lu cungah chuan a hmangmi zong an um ngai hna. 1 KORIN 11:3 ah pa cu nu lu a si tiin kan hmuh. Nu cu pa lu a si tiin kan hmu lo. Pasal lu cungah hramhram in i chuan hi Nupi le nih i tinh a hau. Pasal nawlngaih ding tu hi Baibal nih a kan cawnpiak deuh. KOLOSE 3:18 Nupi hna, nan vale nawl kha ngai hna u, cucu Khrihfa nan si bantukin nan tuah awk a si.

Mahti tikah Pasal le hna zong Chungkhar ah Pabik ka si, ka nawlngai u tiin Nupi le fale hna kha mah lei lawng nih a uk in uk i nawl pek lengmang hna hi a tha lo ngaimi a si. I tinh a hau ve. Pabik nih a uk in uk i nawlpekmi chungkhar ahcun i bia elnak holh tamnak le buainak hna a chuak theo tawn. A Dammi chungkhar a si tawn lo.

Baibal ning in ka tial cun Pual cakuat ah Nu cu Pa nak niam deuh ah a chiah lengmang. 1 KORIN 11:8‭-‬9 zeicahtiah pa cu, nu chungin ser a si lo, nu tu kha pa chungin sermi cu a si.  Cun pa cu, nu caah ser a si fawn lo, nu tu kha pa ca i sermi cu a si.

Mahti ka tial tikah Pasal nih Nupi uk hrui ding ti si loin Nupi nih Pasal uk tuk lo ding ti duhnak a si. Nupi le Pasal cu nuva an si cang bang i pakhat nih uk tuk loin pakhat le pakhat aa ruang tein i thit hruai cun a tha bik ko hnga.

Nuva aa thi ruang tein aa hruaimi chungkhar cu a ngan a dammi chungkhar an si.

-Satu Khaimiechhô

Mah Le Mah I Thah Kongah Baibal Zoh In Biahal awk le Ruah Awk sawh

Tuchan hi Laimi lakah (suicide) mah le mah i thah hi a karh ngai. A bikin kanmah Mino lakah a tam khun.

Mah le mah i thah hi theih hngalh cio bang lungdongh ruangah a si bik. Tuchan Chinmi ah a lungdong mi mino kan tam chin lengmang tinak a si. Hi bantuk kongah hin ai that mi nu le pa, unau le Pastor le Khrihfabu, Mino Hruaitu upa hna nih tuanvo an ngei bik. Tuanvo ngan tuk khi a si.

"Zeiruangah Kan lung a dongh?"
Tiin biahalnak tuah ka duh. Baibal 1 PETER 2:6 ah "Amah/Jesuh a zummi cu zeitikhmanh ah an lung a dong lai lo,” tiin kan hmuh.

Asinain Zumtu hna hi Jesuh kan zumh ko buin kan lung a dong theo. Zei ruangah dah kan lung hi a dongh ne??? Jesuh kan zumh taktak lo ruangah maw kan lung hi a dongh? Ti biahalawk le ruah awk a umter... (mah le mah i thah lo paoh cun kan lung a dong thai rih lo. Kan lung a dong taktak lo ti zong in chim khawh a si.)

Mah le mah i thah kongah Biahalnak tuah ka duh ngai rih mi pakhat cu "mah le mah ai that mi hi Vanram/Paradis ah an kai lai maw?" ti hi a si. Kannih Laimi zumtu hna nih atu tiang kan pomning ka hmuhning cun "mah le mah ai that mi cu Vanram/Paradis ah an kai lai lo" ti hi a si.

Tahchunnak ah kei nih "Jesuh cu ka Khamhtu" ah ka zumh. Nain keimah le keimah kai that hnga. Asi cun Hell ah maw ka tlak hnga? Hell ka tlak cun Jesuh ka zumh mi le "Jesuh nih a ka zum mi cu an thi ti lai lo, zungzal nunnak an ngei lai" Johan 3:16 timi Pathian Bia kha lih a si hnga..

Hell a tla ding cu Jesuh Khamhtu ah a zum lomi lawng an si lai. A si cun Laimi nih kan pomning "mah le mah ai that mi cu vanran an kai lai lo" ti hi phundang in "mah le mah i thah cu Jesuh zumh lo a si" tiin a sullam a chuak....

Ngaihthiam khawh lomi sualnak kong Baibal i aa tialmi ah "Mah le mah i thah" hi aa tel hraw lo. "Jesuh zumh lo, Thiang Thlarau sersat" tu khi ngaihthiam khawh lomi sualnak cu a si tiin a kan cawnpiak.

Tlangkawmnak ah...
Mah le mah i thah hi mi vathah nakin a let in a sual. Midang va thah cu i ngaihchihnak caan tha a um kho rih. Nain mah le mah i thah bel cu i ngaihchihnak caan tha a um kho ti lo. Mah le mah i thah nakin midang va thah a tha deuh...

Mah le mah i thah cu "BAWIPA duhmi a si hrimhrim lo". Nun kan huam ti lo i Zeitluk in kan lung a dongh ko zongah kanmah tein i that hrimhrim hlah u sih. BAWIPA nih Nunnak thaw a kan pek rih mi cu amah nih a caan a zaa a ti tikah a lak te ko lai. Mah tein i thah cu BAWIPA duh mi le Lawmhmi a si hrimhrim lo.

-Satu Khaimiechhô

Ramkip Um Chin Mino fonh in Cauk Chuah Hna U Sih

Tuchan Mino hna hi kan men lo bang Mino catial thiam an chauk lengluang.
Lai Cauk chuahmi hna ah Mino catialmi hi a tlawm ngai tiawk a si. Ka lung a tha lo ngai. Catial sawm zong an si fawn lo i an pahrang chiah sawh ko cu a paam tuk.

Ramkip um Chin mino pawl i fonh in cauk chuah hna u sih law..

Kum khat voikhat chuah khawh lo hmanh ah, kum hnih voikhat in chuah peng si seh law...

Cahmai a tam bik 200 hrawng si seh law $10 hrawng in zuar si seh law... (kum hnih voikhat chuah si cun cahmai 300 zong si ko seh law..., a man zong $20 hrawng zong si ko seh law...)

Cauk cu chuah tawn ciomi bang Sermon, Hmuhning, Capar, Lenhlio, Biazai, Muitawn, Capo le a dangdang Phunkip fonh si seh law...

CYO si lo, CACC si lo, "Chin mino catial phu" zong dirh i a ngeitu in tuanvo van la seh law, van thok colh seh law, hmaikum in chuah khawh si colh seh law a thatuk hnga...

Cauk cu amin ah "Miphun Caah Mino" si lo, "Chin Mino" ti bantuk, a dawhmi a picalmi si seh law... Single a si mi papek in, mino kum 15-35 kar mino paoh i fonh in chuah si seh law. (Fa ngei cang pawl, kum 30 cung lei cu telh bak lo)

Ramkip Um Mino fonh in cauk hei chuah khawh cun a that lai ning. Phundang tawn i cauk chuahmi nakin a Cawtu an tam deuh lai.

Kan Chin Miphun caah thahnem santlai a si lai i mino pawl zong upat hmaizah an si deuh lai.

Tuchan Mino kan men ti lo. Thu sawh i caan liamter sawh ding a si ti lo.
Tho i thilpipa zong tuan caan a si cang..

"Phungchim" Ti Le "Thawngtha Chim" Ti Kongah Kan Buai Awk A Si Ko Maw?

"Phungchim" ti le "Thawngtha Chim" ti kongah kan rak buai pah bal. Thawngtha chim kan sawm hna i Thawngtha chim loin Phung tu an chim tawn caah Thawngtha chim kan sawm lai ti ti loin Phungchim kan sawn lai ti tuin kan hman cang lai tiah kan rak chimrel len bal. A nehhnu ah "Sermon" tiah kan hman lawlaw.

A ngaingai ti cun "Phungchim" ti le "Thawngtha Chim" ti kongah buai awk a rak si lem lo. Mah hna ah kan buai hi Baibal kalning kan i fian deuh lo caah a rak si ko.

Jesuh nih cun “Vawlei cung khuazakip ah va kal u law miphun kip kha thawngthabia va chim hna u. MARKA 16:15 tiah a kan fial tak. Hi nih hin Khuazakip um a zum rih lomi hna sinah va kal i Thawngthabia va chimh hna ding ti kha a sawh duh bik mi le a kan fial duhnak bik cu a si.

A zum rih lomi(zum lotu) hna sinah cun Thawngtha Chimh fial kan si. A zum cangmi (Zumtu) hna sinah cun Thawngtha lawng chimh fial kan si lo. Pungchim zong fakpi in nawl le fial kan si.

Mah cu Pual nih Timote ca a kuatmi ah fiang tein hmuh khawh a si. Phung kha chim hna, A caan a rem zongah, a rem lo zongah Phung kha chim hna tiah fak piin a nawl. 2 Timote 4:2. Hika ah Thawngtha chim hna tiah a fial bak lo hi mu. A zum cangmi hna sinah cun Phung zong kha chimh ding a si ko ti a fianter. Baibal dang zong van zoh chap u sih..

Mizapi cu ka rat hlantiang Cathiang kha rak relpiak lengmang hna, phung kha rak chim lengmang hna law rak cawnpiak lengmang hna. 1 TIMOTE 4:13

Thawngtha chim tikah Pathian bia chim a si bantukin Phungchim tik zongah Pathian bia kha chim thiam a si ve ko caah Phungchim ti hi duh lo awk a rak si hrim lo. Phungchim kha zeirello in um hlah u" 1 THESALON 5:20 tiah fial chap kan si.

Mah ruangah kannih a zum cangmi hna nih Phungchim ti le Thawngtha chim ti kongah kan buai awk a si ti lo. Buai awk a rak si lo. Buai ti hna hlah u sih.

Rev. HOI CUNG TUM nih Laimi hi Phungchim Tampi ngaih kan hau tiah Phungchim tampi ngaih ding a kan forh.

Ka catial a fian lo sual Phungchim ti aa telmi Baibal pawl a tanglei ah ka van chiah chih hna. Phungchim ti bia hi zei bantuk zawn ah hman a si ti tha tein van zoh u law nan fian ko lai...

Ka Catial a reltu cungah tampi kaalawm...
-Satu Khaimiechhô
.
👇
👇

Cucaah Johan cu ramlak ah khan a hung chuak i mi kha tipilnak a pek hna i phung kha a chimh hna. “Nan lung i thleng u law tipilnak kha ing tuah u; cun Pathian nih nan sualnak kha an ngaihthiam hna lai,” tiah a ti hna.
MARKA 1:4, MATTHAI 3:1

 Thlarau in a nunnak cun thong i thlakmi thlarau hna sinah khan a va kal i phung a chim.
1 PETER 3:19

Phungchim kha zeirello in um hlah u.
1 THESALON 5:20

hleihnih kha a rak thim hna i annih cu lamkaltu tiah min a rak sak hna. A thawh hna i, “Ka sin i um awkah kan thim hna. Cun phung chim awkah kan thlah hna lai i
MARKA 3:14


GALATI 1:23
Midang nih, “A rak kan hremtu nih khan atu cu hrawh a rak i zuammi phung kha a tanh i a chim lengmang,” an ti lawng kha an theih i


 Silas le Timote kha Masidonia ram in an rak phanh tikah Paul nih a caan kha a dihlak in phungchimnak ah khan a hman i Jesuh cu Messiah kha a si ti kha Judah mi kha a chimh lengmang hna.
LAMKALTU 18:5

.... pakhat nih holhtheihlo in phung chim ding nan ngei ko lai i pakhat nih cu holhtheihlo a sullam leh khawhnak cu nan ngei ko lai. Cu vialte cu a zeipaoh hmanh kha, khrihfabu òhathnemnak ding caah tuah si hna seh.
1 KORIN 14:26

Mizapi cu ka rat hlantiang Cathiang kha rak relpiak lengmang hna, phung kha rak chim lengmang hna law rak cawnpiak lengmang hna. 1 TIMOTE 4:13

phung kha chim hna, a caan a rem zongah a rem lo zongah chim hna; al a herh ahcun al hna, chimhhrin a herh ahcun chimhring hna, a nawl in nawl a herh ahcun nawl hna law lungsau thinfual in cawnpiak hna.
2 TIMOTE 4:2

Lai Catial Thiam A Hau Khunmi Hna

Lai Catial biafang le Cafang fonhkomh thiam a herh khunmi an si tiah ka hmuhmi hna a tanglei bangin ka van tial.

1•Editor a tuanmi hna
Cauk pakhat khat ah Editor a tuanmi hna hi Lai catial Cafang fonhkonh a thiam bakmi an si a herh. CACC tial ning a zulh lo hmanhah Baibal Tialning tal a zulh a hau. Lai catial biafang le Cafang  Fonhkomh a thiam bak lomi cu Zeitik hmanhah Editor tuan lo ding.

2•Video Editor a tuanmi hna
Annih hi Lai catial Cafang fonhkomh an thiam bak a hau ve. Chanthar hla pawl hi ka zoh tawn hna i Lai catial Cafang fonhkomh a dik lomi deuh lawngte an si cang hna. A poi bak ka ti. Video edit tu hna hi Lai catial cafang fonhkonh a thiam lomi an si cun a thiam mi sawm i, hla bia tial i bawmhter ding. (Sawm an duh tuk lai, an i lawm fawn lai)
Hiti ti tikah hla bia tial lopi in maw ka tuah cang lai ti hlah u mu. Nanmah kut ah Laica thanchonak lam tampi a um i nan biapi tuk. A zei hla paoh hla bia dik tein tial chih peng cun Laica thanchonak bawtu tha taktak a si.

3•Online Thawngzamh(news,media) Hna
Laica tein Group kip ah ca a thlah tawntu hna hi tulio cun Lai Catial cafang fonhkomh a thiam bakmi le thiam a herh bikmi an si hna. Caholh a dawmi an si zong a hau. Cu hlei ah Kawlca a si khawh chung in a hrialmi an si a hau fawn.
Annih pawl hi tulio cun Laica a thanchotertu le a hrawk khotu dirhhmun ah a ummi an si. An biapi taktak.

4•Pastor, Evan, Chairman, Secretary A Tuanmi hna
Annih hi Lai catial a thiam bakmi, Lai catial bkafang le cafang fonhkomh a thiam lomi hmanh a chim khotu si a haumi an si hna.

5•Holh let le Office ah rian a tuanmi hna
Annih pawl zong hi an rian kong he pehtlai in Laica a tial tawnmi an si hna i cafang fonhkomh an i palhmi rel ah sia a rem lo ngai. Thiam bak an hau ve.

Hiti tial tikah a dang pawl cu thiam an hau lo ti duhnak a si lo mu. Thiam cio kan hau nain kan thiam cio lo. Rak Langhter mi pawl bel hi thiam hrimhrim an hau.
(..Hivial hi si ko seh. Rak peh ve u..)

Reltu cungah tampi kaalawm.

Mah Le Mah Hnawk Ngai In I Ser/ I Hrawh

Pathian nih minung hna hi tliang tein(tha tein) a kan ser ko nain kanmah le kanmah kan i hrawh.
Zeitin kan i hrawh tiah cun:-

•A thlumal mi tamtuk kan ei, kan dinnak in kanmah le kanmah kan i hrawh.
Nikhat ah Thangthling pakhat ei a zaa komi panga hna ei theo, nikhat ah အခ်ဳ ဳ ိရည္​ dur khat din a za komi dur hnih thum din theo, Case aa telmi Cocacola, Spriit ti bantuk nikhat ah dur hnih leng din theo.

•Zukhmawnh (Zuu, Kuak, Sadah, kunza, Kunpawng) ti bantuk a tha lomi hna kan tongh nakin kanmah le kanmah kan i hrawh.

•Rithai si, Bing ti bantuk a tha lo taktak mi hna kan tawngh nakin kanmah le kanmah kan i hrawh.

•Nikhat ah Phone, computer hna suimilam Pahra leng zoh.
Zan ihtlai, Zan tlaipi tiang Phone zoh theo, zinglei i thangh bakin phone zoh thluahmah colh, bantuk hna hi mah le mah hrawh a si ve.
(Ih, Hngilh caan tha bik, 9 pm - 5 am karlak)

•Rawl ei caan ah ei lo, rawl ei tlai tuk hna zong hi mah le mah i hrawh a si ve.
(Rawl ei caan tha bik,
thaithawh 7am-11am karlak,
zanlei 5pm-8pm kar lak)

Nun khuasau hi kan duh cio ko nain A phunphun in kanmah le kanmah kan i hrawh i kan nun khua tawinak ding lam kan sial. Ti hin Ningcang loin kan kal peng cun kum 70 tiang nung ding in bia khiah ciami kum 65 tiang lawng kan nung kho lai.

Tuchan cu mah le mah i hrawh chan a si.
Mah le mah i hman thiam lo zong a si i  caan upat lo zong a si. Mah le mah i dawt lo zong a si. Mah le mah i hrawh hi Phundang in Pathian Biakinn hrawh kan ti lai.

A cunglei tialmi phun hna hi a tha lomi le ngandamnak caah a tha lomi an si hna.
Zumtu caah Thlabulbal in khuasak zong a si. Kan i remh dih cang a hau.

Ka va hngalhmi cu mah vial hi a si ko: Pathian nih hin cun minung hi tliang tein a kan ser ko, sihmanhsehlaw kanmah le kanmah nih hin hnawk ngaiin kan i ser.
PHUNGCHIMTU 7:29

Baibal bia hi a dik kho tuk hringhran tiah ka ca ka donghter. Kai Lawm.

-Satu Khaimiechho

Pathian Duhning Tein Nitin Nun

"Pathian nih Hmailei kan caah a tha in khua a khan dih ko, zeihmanh phan awk le lungretheih awk a um lo" kan ti i kanmah duh paoh in, Pathian duh lo ning in kan nun huar ko ahcun Hmailei kan caah Pathian nih a tha in khua a khang dih bal lai lo.

Pathian duh lo ning in kan nun huar cun Thlamtlin lonak, lungre theih buai bainak hna a chuak lulh ko lai.

<<Pathian nih Hmailei kan caah a tha in khua a khan dih ko>> timi nih hin Pathian duhning tein nun a hau zia zong kha a kan cawnpiak.

David Fapa Anmom Le Tamar Tuanbia Nih A Kan Hmuhsakmi Duhnak Kong

2 Samuel 13:14-15.
  "Khi tikah Amnon nih cun a fak ngaingaimi huatnak in a huat ṭhan ṭung i a rak duh lio i a dawtnak nakkhan a huatnak cu a ngan deuh ṭhan. Cun Amnon nih amah cu a thawh i, “Tho law, kal zok,” tiah a ti.

Kan Baibal ah David fapa Amnon nih a farnu Tamar hi a duh tuk hringhran i a sualpinak kong a um. Amnon nih Tamar hi a duhtuk ruangah a lungre a thei ngaingai i a zaw lomi aa zawtter. Cuti cun a neh hnu ah a duh lo buin a ihpi, a sualpi. A ihpi hlan cun a duh taktak nain a ihpi hnu (a sualpi hnu) ahcun a duhnak cu a cat than dih colh. A sualpi hlan a duhnak cu a sualpi hnu in A fak ngaingaimi huatnak in aa thleng dih colh i "tho law kalzok" tiah a thawl colh.

Kan Baibal nih i duhnak a tawining a kan hmuhsaknak cu mahka Amnon le Tamar kong hi a si ko.

Hi kong nih a langhter khun mi cu *duhnak cu chiakhat te men a si ko i duhnak cu chikhat te ah a cat than colh ko* ti hi a si.

Tuchan nungak tlangval hna zong hi chikhat te i duhnak in aa thi-um colhmi hna um a van si.
An i duhnak sau rih loin an i thit-umh caah caan sau nguh lo, a rauh hlan ah aa then than colh mi an um hna.

Mah caah nungak tlangval hna i thit-umh hlan i duhnak hi a tawibik kum khat hnih cu si sehlaw a tha.

I Thit-Umh cu Nun chung ca ding a si caah i duhnak thla thum, thlaruk, kumkhat hei ti hna in cun i thit-umh colh loah a tha.

Duhnak cu a thawng tuk nain Chikhat te men a si ko ti kan philh loah a tha.

Cheukhat nungak tlangval cu voikhat diriamhnak men le pumsa dunak men hna in duh a hmangmi an um zong kan theih/Philh lo ah a tha.

(Laimi chung in)Voikhat hnih ihpi/sualpi hnu in kal tak than i Nungak Lungkuai in chiah a hmangmi an um len zong kan theih/philh lo ah a tha. (Miphun dang chinchin cu i ralring tak ding)

I thit-umh hlan voikhat hnih ihpi hnu in kal tak a hmangmi tlangval an um caah i thit-umh hlan tuah/Sual hi ahopaoh nih ka duh lo ding a si.

Pa nih a kaltak ruangah a mah tein aa that mi zong vawlei cungah a um len cang.

I thit-umh hlan tuah cu sual a si caah ahopaoh nih hrial hrimhrim i zuam u sih.

I Thit-umh hlan tuah cun "A thiang thit-Umhnak" tiin tuah ngam zong a si ti lai lo i "A thiang thit-Umhnak" tiin catar zongah sullam a ngei ti hnga lo. Ningzahnak men a si cang lai.

Nunchung voikhat lawng tuahdingmi Thit Umhnak hmanh a thian lo ding cu a hohmanh nih duh lo ding a si.

Cucaah "A Thiang Thit-Umhnak" In tuahding hi leng le val poah nih i zuam hna u sih..
.
.
Biakilh: Baibal zoh in keimah lungum ka tialmi a si caah thlangkhenh ning in a kal lo cun rak theithiam u..

Tlanghra Dan Ummi He I Uar CHAN

Tuchan cu kan Pawngkam um, a ziaza le a sining kan theih mi hna he fawi tein i uar i fawi tein i thitumh khawh a si ko mi nungak tlangval uar duh loin, tlanghra dan ramdang um, a ziaza le sining hna theih bak lomi tu he i uar, i duhdawt i i thit-umh chan kan van phan.

•Thantlang ummi pa nih a pawngkam nungak dawhdawh a lawng komi hna uar loin Singapore a ummi nu tu a va uar.

•Malay ummi pa nih a pawngkam a lawngmi nungak tungtai tha pawl uar loin US ummi nu tu a van uar. 

•Norway ummi pa nih a pawngkam nungak dawh tungtai tha tampi an um komi hna uar loin Australia ummi nu tu a va uar.

Umnak i khat lomi he i uar cu a har tuk nain chanti luan ning a si fawn cang.. Mah hi Phundang in tial cun Online daling ngeih kan ti lai. Online Daling ngeih cu a har tuk hringhran ve. I uar kaa cun cakuat zoh lo le leh loin a kan ummi te hmanh khi thinlung a fak dom.

Online DL ngeih a harning

Tuchan Laimi zong Atak nakin Online in aa uarmi kan van tam deuh men lai. Aa thi-um cangmi hna um a van si. Thiltha ngai a si ko.

Tlanghra dan, umnak i khat lomi he Online in i uar, i thit-umh hi Ruah ngai le fir khur ngai a hau ve. Umnak Tlanghra dan, ziaza le sining theih lomi he i thut-umh hlan i duhnak hi a tawi bik kum khat hnih tal cu si seh law a tha bik lai.

Duhnak cu a thawng tuk nain chikhat te men a si ko caah i umh hnu, a rauh hlan ah i then than a fawi te...

Online ah Ziaza le Sining theih lomi he fawi tein kan i uar awk a si lo.

Atak in DL ngeih (kan pawngkam mi he i dl) khawh lo hrat cun Online Daling ngeih hi a tha deuh tuk.

Online DL ngeih hi tuchan cun Zohchuk awk a si ti lo. 

CNA/F Ah Kan Lut Awk A Si Hnga Lo, Anmah Hmanh An Harsa Tuk.

Atu ah hin CNA/F ah kan va lut cun Khuate ah a ummi, a harsa ngaingai mi, bawmchantu le ramdang in tangkaa kuatu zong a ngei lomi chungkhar hna sinah ah va tlun bantuk a si hnga i harsatnak va pek chin lehlam tu a si hnga.

Mah ti ka tial hi CNA/F ka doh a si hrim lo.

A ngaingai in ka duhnak bik cu CNA/F ah lut thluahmah hna u sih ti hi a si ko.

Miphun Dawtu CNA/F An Harsa Ning Youtube bia ruahnak kan zoh cun kan i sum kho lo, nusal le pasal pi zong kan mitthli a tla ruangmang theo an ti.

CNA/F An nun khua sakning ka ruah ah Chinmi lakah nun khuasa a har bik an si lai. Miphun le Ram an dawt ruangah khi tluk harsatnak an tuar i an in chih khi ruah ah khuaruahhar a si ko. Upat lo awk an tha lo..

Khi hna khi Fim thiamnak a ngeimi nusal tha le pasal tha lawngte an si ko. CNA/F in chuah i kanmah bang Inn thatha le motor thatha he, rawl thawthaw le meh thawthaw he khua a sa kho ding lawngte an si ko. Asinain kan Chinram le miphun an dawt tuk ruangah harsatnak tu an i thim deuh. An lungput le an lungthin cu uar a um kho dah ngai.

Khrihfa kan si kan ti i mi phundang bawmhchannak hna zongah kan si khawh tawkin kan kut kan samh. A si nain miphun le ram caah nuntep in rian a tuanmi miphun dawtu CNA/F cu hnu kan chit tak diam ko.

Kan Unau Kachin pawl vial, Kachin Hriamtlai an dirhkamh ning le an bawmhning. Kannih Chinmi vial nih harsatnak tampi huah le Nuntep in miphun le ram caah rian a tuanmi CNA/F kan hei bawmh lo ning le kan dirhkamh lo ning. A phunphun tu in kan hei soisel hna, kan mawhchiat hna, kan tanglamh hna.

Ruah ah Ngiahchia tuk kan si ko.

Chin mipi kan lungfim cang seh law
Miphun dawtu CNA/F hi kan si khawh chung in, dongcat loin bawm/dirhkamh chinchin hna u sih....

Miphun Dawtu CNA/F Hi Dongcat Loin Bawmh/Dirhkamh A Hau

Online ah CNF dirkamhnak le tanhnak ca hna kan rak tial lengmang hi a tha tukmi a si. Asinain atu cu catial lei lawngin dirhkamh(Bawmh) caan le tanh caan a si ti lo. Kan ngeihchiah chawva le phaisa hna in dirhkamh(bawmh) caan le tanh caan a si cang.

Catial leiin CNA/F caah thazaang chuah len nakin Chawva lei tu in thazaang chuah deuh u sih law a thahnem deuh saumau lai.

CNA/F nih catial lei in CNF dirkamh(bawmh) le tanh nakin Ngeihchiah Chawva hna in dirhkamh(bawmh) le tanh hi an herh deuh. An duh deuh fawn lai i an i lawm zong an i lawm deuh fawn lai.

CNF dirkamhnak le tanhnak hna a tial kho ngai mi a si nain ngeihchiah chawva hna in a bawm duh bal lomi, bawmh ding in aa tim bal lomi kan si cun a poi tuk lai.


Miphun dawtu CNA/F zeitluk in an harsa ti cu kan theih tuk cio cang ko lai.

Kan Chinram dothlennak caah nuntap le retheinak phunphun tuar in ram caah rian a tuanmi hna hi voikhat te hmanh bawmh loin um cu kan sia a rem ko lai maw?

Ramleng um rian a tuanmi hna nih kan ngeihmi chawva tlawmte zong a si ah, kan sian tawk tein CNA/F hi bawmh pah lengmang hna u sih. "Bawmh" ti nakin "ka thawh ve" ti tu hi a dik deuh.

Kan Unua Kachin hna hi Chinmi nih kan i zohchun ding an si.
Kachin mipi hna nih Kachin Hriamtlai hna khi dongcat loin an bawmh peng hna i an thangcho taktak. An ei awk lawng hlah, hriam le Meithal thatha cawknak tiang in an bawmh hna.

"Mission caah chawva le tangka pek lawng hi Pathian rian tuan le a tha mi a si lem lo. CNA/F pek le bawmh zong hi a Pathian rian tuan le thil thatuk a si" ti hi pom kho cio hna u sih law ram le miphun dawtu CNA/F hi dongcat loin kan ngeihchiah chawva in bawm hna u sih.

Lai Online Thawngzamh hna zong thawngzamh nan tuannak in nan hmuhmi kha Salai Lungthli Tum bang CNA/F caah nan sian tawkte hlu pah ve u law uar nan um chin lai.

Baibal bia bang "Pek leiah hin hmuh lei nakin lunglawmhnak a um deuh. "Lam20:35 tiin ka catial ka donghter.

Lawmhnak he...
~Satu Khaimiechhô

"CACC le Chin Idol" kong hi nikum an tuah lioah fakpi in soiselnak ka rak ttial bal

"CACC le Chin Idol" kong hi nikum an tuah lioah fakpi in soiselnak ka rak ttial bal i, tukum zong an peh rih thiam caah tawite in ka von inolh ve :) CACC cu zei bu dah a si i, aho te pawl nihdah an tuah? timi in kan thawk ahcun ifian a fawi cem lai.

CACC cu a saunak in "Chin Association For Christian Communication" ti a si i, a tuahtu hi Baptist Khrifabu an si. CACC ah riantuantu dihlak khi Pastors lawngte deuh an si fawn. Cun, CACC caah phaisa a thotu zong hi Khrifabu thiam an si. Cucaah, CACC cu Pathian sinah pekchanh cangmi Phaisa/thawhlawm in rian a ttuanmi a si kha hngalh zungzal awk a si. Cutin, Pathian sinah pekchanhmi Phaisa/thawhlawm in riantuantu/pastors hna nih Idol/siasal or milar thimnak an hung tuahmi cu aa tlak maw? An rian a si maw? An sining he tah aa keih/tlak maw? timi kha mi tampi thinlung ah a hung itap ngaimi/ siarem lo ngaimi cu a si.

CACC cu "Christian Communication" caah sermi a si bantuk in Khrifa he aa pehtlaihmi hmang in Miphun tunmernak/hungchonak tbk hi an ttuan awk a si. Asinain, cuti siloin, zatlang minung nih an tuah hnga dingmi zatlang milar/celebrities thimnak rianpi hna an hung ilak ngammi hi cu, an pastors sinak or Pathian riantuantu an sinak he cun aa ralkah takmi a si i, caan dongh lai Ni ahcun khuaruahhar thil tampi an um lai timi tlintertu hlah maw an si ti awk in a um ko.. xoxo

-Zasang Cinzah

Chin Angki lak ah Sullam a Ngeibik mi Chin Angki pakhat

Tutan Kawlram Vice President Henry Van Thio nih UN bia a chimnak ah Angki aa hruk mi khi kan voikhat hmuhnak a si theo lai.

Tutan VP. Henry Van Thio Aa Hrukmi Angki hi Hakha , Falam , Tidim, Matupi, Mindat, Paletwa, Kampalet, Mizo kan dih lak thuam kha tling dih cikcek in fonh i Angki zunkhat ah thitmi a si. Lai thuam le Lai Coat kan ti cun kan palh men lai. Chin thuam si lo Chin Caot kan ti lai.

Tutan VP. Henry Van Thio nih aa hrukmi Angki hi sullam ttha bik a ngeitu Chin Thuam a si lai.

Mah Angki hi Chinmi khat kan sinak caah a ttha hnem lai i Lungrualnak zong a chuahpi lai.

A tutan ai hrukmi Chin Coat hi hnu ah Chinram chung a um mi dihlak pa paohpaoh nih mah le miphun hoih tiin siloin Phunkhat chuak khat kan sinak ding caah hitihin chuah zungzal siseh law attha bik hnga..

Zeitin nan ruah...?

#Ruah Awk Tha

\Tulio Lai holh in thawngpang ttialtu tampi hna nih Laica an ttialning zoh tikah ka lung a tling lomi a tam ngai. Catlang an serning siseh, biafang an charmi a si ah tuaktan loin ttial sawhsawhmi a tam. Cu lawng siloin ca kan ttialning nih zeibantuk sullam dah a ngeih i, careltu le a theihtu vialte thinlung ah zeitindah sullam a va ngeih lai tbk zong an ruat lo. Biafang kan hmanning le catlang kan serning hna nih miphun thleidannak lei a hawih sual kho maw tbk zong an tuaktan lo. Cu tikah an catialmi hi tulio online chin community lakah hnawm a hung fenhtu tthal tilianh bantuk an si. Careltu caah hnawm a hung phawrhtu or hnawm a hung barhtu kan ti deuh lai dah! Tahthimhnak ah:

#. Mipa pakhat kong an ttial tikah a fawinak in "US pa, India Pa, Falam pa, Hakha Pa" tbk in an ttial mei. Hibantuk racial identity a chuahpitu biatlang hi hrial ding an si. Mipa pakhat kong an ttial duh ahcun, "USA ah mipa pakhat cu" asilo ah "Chin ram ah chungkhar pakhat hna cu" tbk in zapi/miphunpi huap loin ttialmi pa or ttialmi nu kong te kha char thiam izuam ding a si. Cuti siloin "Chin Pa, Kawl Pa" tbk mi pakhat chiatnak or tthatnak kha miphunpi huapter in catial hi ttih a nung ngaimi a si.

Aw! hung peh vima ahcun, hlan lio pipu chan, a fawinak mi zeimaw nihcun hruh lio chan tiah an timi chan hlah khi maw, tulio kanmah chan nakin an rak fim deuh ti awk in a um. Zeicatiah, pipu chan lio an bia le hla zoh tikah "meici fate nih lo ram kaupi a kangh bantuk in biafang pakhat nih siapi liamh i huah khawh a si tbk ralrin bia tete an rak ngei. Biachim holh-rel an i fim-kang ngaite tinak a si. Asinain, nihin online le social media chan Laimi nih kan biachim/ kan catial zoh tikah iralrinnak a tlawm chin lengmang. A bik in online community ah pakhat le pakhat "comment" kan ipek ning zoh tikah kan catial kan za lawng taktak. Ka bia nih midang an thinlung a fahter sual lai maw? An ngai a chiatter sual hna lai maw? tbk pelte hmanh a ruat lomi kan karh chin lengmang. Social media chan kan hung luh ve tikah Laimi sining thate in ruah ahcun ngaichia te khi kan si ko.##\

Zasang Cinzah