Pastor Sang Nawl: Zeiruangdah Thlacampiak Tikah An Tluk?

Baibal cang: Bawipa inn kha, minmei in a khah caah tlangbawi hna cu rianṭuan awkah khan dir awk an si nain minmei ruangah cun an dir kho lo; zeicahtiah Pathian inn cu Bawipa sunparnak kha a khat.(2Chanrelnak 5:14)

Kan um kalnak ah mi tampi nih biahalnak an tuahmi cu zeiruangdah thlacampiak tikah ṭhenkhat an tluk tawn tiah an ti?.  Zeitindah nan ruahning a si ve kan ti hna tikah an sual ruangah a timi an um, thlarau ṭhalo an ngeih ruangah a timi an um i a phunphun in an ruahnak an chim cio.  Thiang Thlarau rianṭuannak hi  minung mit cun theihthiam khawh a har tuk. Tahchunnak an chim tawnmi mitcaw pa paruk nih vui an tong i an ruahnak an chim cio bantukin chim le zumh a fawi te. Thlarau lei kar kan hlannak ah mah bantuk hna zong hi theih herhmi tete an si caah tlampal in keimah hmuhning ka van langhter.

Jesuh Khrih cu nizan le nihin le zungzal in amah ning a si ko (Heb 13:8) tiah a ti bantukin, Thiang Thlarau cu aa theng bal lomi a si. Asinain minung sinah a riantuanning le a phuanning tu cu a phunphun in a si ko. Ṭhenkhat sin i a phuan tikah an sualpalhnak i hmuh i an ṭap, cheukhat lunglawmhnak in an khat i an ni peng ti bantukin rak hmu tonning a dang cio. Cu bantuk ṭhiamṭhiam in  thlacampiak tik hna ah a tlumi hna an rak um.

An Tluknak Ruang;
Babal kan zoh tikah Jesuh nih siseh, lamkaltu pawl hna le Paul  zong nih siseh, altar call an tuah i, thla an campiak hna i an hnu leiah an tlu i an rak tlaih hna ti kan hmu lo. Sihmanhselaw Bawipa inn ah Pahtian sunparnak a phuan tikah tlangbawi tehna rianṭuan an si ko nain dir kho loin an tluknak  (2Chan 5:14) hna le Jesuh cu tlaih awk ah a kawlmi hna kha Jesuh nih keimah ka si a van ti bakin an hnulei ah an i tawn i an tlu (Johan18:6) ti hna kan hmuh. Cun Paul kha Damska khua pawngah Jesuh he an i ton tikah vawlei ah a tlu (Lam 9:4) ti hna kan hmuh.  Cu bantukin  thla kan cam tik i Pathian suanparnak le Thiang Thlarau ṭhawnnak kan cungah a rak i phuan tikah kan tluk ve tawnnak cu a si.

Zeibantuk Mi Dah An Tlu?
Thiang Thlarau ṭhawnnak a phuan tikah mi zei paoh an tlu tawn ko. Cu chungah cun thlarau ṭhalo a ngeimi si hna seh, a piangthar cangmi si hna seh, Pathian dawtnak a thei rih lomi zong si hna seh an tlu ko hna.  A tam deuh a tlumi hna  cu thinlung dihlakin a pumpemi hna le nun a kekkuai deuhmi hna  an si. Cun mi cheukhat cu a thinlung a  khawng taktakmi a  tluk kho lomi zong an rak um ve i. a piangthar ngai ko nain a tlu ve lomi zong an rak um ve thiamthiam ko. 

An Tluk Tikah Zeitindah An Um?
Ṭhenkhat cu Thiang Thlarau ṭhawnnak an cung a vun tlun bakin, electric bantukin a laih hna, ṭhenkhat cu an tha a dih tibantukin a phunphun in an um i an dir khawh lo caah an tluknak a si. An tluk tikah mi tampi cu Thiang Thlarau  nih an sualnak kha a hmuh ter hna, ṭhenkhat cu hmailei kong vision hna a hmuhter hna,  ṭhenkhat cu an zawtnak hna  a damter hna i, ṭhenkhat cu an chungin thlarau ṭhalo hna nih a chuak tak hna. Sihmanhselaw ṭhenkhat pawl cu zeihmanh zong um lo le hmu loin, an tlu i an tho ṭhanmi zong an um ve ṭhiamthiam.

Cucaah Thiang Thlarau rian ṭuannak hi minung nih theih khawh le fian khawh a har tuk. Atu thlacampiak tikah tluknak he pehtlaiin keimah nih ka tonmi le ka hmuhmi pinah tampi a um ko rih lai. Paul nih Thiang Thlarau kha a ngeihchiater hlah u!(Efesa 4:30). Thlarau tu khan khat deuh u (Efesa 5:18) a  ti bangin Thiang Thlarau ngeihchiater lo le Thiang Thlarau in khat deuh tu kha i zuam cio in, thlacam cio ko hna usih.  Bawipa nih nan diklak theihfian khawhnak in pe hram ko hna seh. Amen.

Bornholm Crusade Thlacampiaknak le Thiang Thlarau  rianṭuannak;

Note: Hi ca hi May25 2014 ah a rak thlahmi a thar in van zamh thanmi a si. Pastor Sang Nawl hi Denmark Chin Emanuel Church CEC ah Pastor a tuan liomi a si i thawngtha chim ah khual a tlawng lengmangmi a si. Pathian Nih hmang chin lengmang ko seh.

Rak Share Cio U...

Pumh Komhnak(Biakinn) Ah Baibal Cauk Kan I Ken Lo Cun... (Khoiah Kan I Ken Ti Lai?)..

Biakinn ah le Zarhpi ni Pumh komhnak hna ah Baibal cauk hi kan i put lo ahcun kan i putnak ding a um tuk lem ti lo. Micheu nih Baibal cauk put a hau lo, kan phone ah a um ko kan ti nain Pumh lio ah phone van zoh lengmang cu `anih cu pumhnak ah a phone lawng a zoh lengmang´ tiin ruahnak tha loin a rak kan ruah tawnmi hna an um caah Baibal Cauk in i put i Baibal cauk kau zoh hi a tha bik ko. Baibal cauk kawl kan thiam deuhnak zong a si fawn.

Pumh kan kal lai ah kan Phone kan philh sual si cun inn ah ka va kir zau i ka va lak than zau bantukin Baibal cauk i ken philh si cun va la than zau ve u sih law i ken philh hlah u sih. Pumh komhnak lei ah Baibal Cauk i put hi zoh a dawh tuk lawng si loin Zumtu Khrihfa kan sinak a langhnak pakhat zong a si. Micheu khat nih zoh dawh le a feltuk, a piangthar tuk kan ti hna seh tiin aa ken kan ti ko hna hmanhseh law a poi lo....:-) . I put lengmang hna u sih law Kau lengmang ko hna u sih.

SALM 119:105 
Na bia cu ka ke caah meiinn a si, 
ka lam ah ceunak a si.

Hebru 4:12 
Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih. 

Media Thenkhat Pawl Nih Salai Lungthli Tum An Tluk Ruam Lo Ti Kongah Tial Duhnak...

Kha kong i Tlangkhenh le Salai Lungthli tum an tluk lonak, amah kong tialmi hna kha tial duhnak hna si loin Mi lung lak dingin tialmi an si. Ka catialmi ah Media Dihlak ti loin Media thenkhat ka ti zong kha carel tu hna nih nan theih thiam a hau.

Ca ka tialmi ah ka tial duhnak thei lem loin Salai Lungthli Tum a rak mawhchiat lenmi hna nan um pah. Cun kan Media hna thazaang pek loin soisel thangchiat cu a tha lo a timi zong nan um hna. Tutan kan Media hna zoh tikah kan Laimi zat he tuak cun an tam tuk lawmman hna. Burbulak bang an tam a timi hna zong an um. Hi ti ning Media aa timi hna an kal ko cun Hmailei ah Lai Cauk chuah a tlawm chin lengmang lai tiin ruah damh a si.

Cu lakah Lai catial cafangfonh thiam huaha loin thawng tial a van i thawhmi zong cu um a si. Cafangfonh thiam lo kong ka tial theumi a poi maw tiah a poi caah ka rak tial lengmang. (Cafangfonh kong cu a hnuah ka rak thlah than te lai.) Cafangfonh palh ngai in tialmi thawng kha group 4,5 ah an van thlah hin cun cafangfonh na thiam lo he, Group pakhat ah thlah law a zaa ko va ti zong a phu. Mah ahcun an min tak le hmanthlak takin a lang ngam lo Media aa timi tete zong an rak um pah.

Media thenkhat hna Group kip ah an thlahzamhmi hna kha (Salai LTT bantukin)  Group Pakhat te ah thlah cun a zaa ko ti kha tial duhnak bik pakhat a si. Media thenkhat lawng si lo, an dihlak tiawk in thawngpang theih herh tuk dah lo cu Salai LTT bantukin Group pakhat te ah an thlah cun a hei zaa ko.

Salai LTT Lai cafangfonh kong zongah a rak soiselmi hna nan um pah. Lai catial cafangfonh a thiam pah lo kong hna theih cun soi len awk a um lo. Cafangfonh a thaim ti ka tialmi kongah a nih a chuak menmi hna um a si nain Media thenkhat hna cu cafangfonh leiah a tei diam hna.

Kan Media an tam ngai cang ko i Lai Catial Cafangfonh a thiam lem lomi Media hna cu thazaang pek awk le dirhkamh awk an tha lo. Caholh man an niamter men nain Ruahnak cu cheuh ve ding an si ko. Catialtu nih Lai Media pawl ah tanhmi zong ka ngei ve lo nain Lai catial Cafangfonh a thiammi hna cu tanh lo awk le dirhkamh lo awk an tha lo.

Kan Media Thenkhat Pawl Nih Salai Lungthli Tum An Tluk Ruam lo, An I Zohchun Awk A Si.

Salai Lungthli Tum hi Media pawl le kan mifim kan timi hna nih an soisel pah lengmang. Amah nih a ti hmasa caan cu a um ve nain a caan ahcun Amah tein a um komi an rak soisel lengmang ve. News a lehmi ဝီရသူ(မစုိးရိမ္​) ti a tial kong hna a rak soi i aa ceih lenmi hna an um pah. Mifim nih mi a nihsawh lo i a soisel bal lem lo ti a si bang a rak nihsawh tu le a soitu hna hi mifim, Bochan mi le upatmi hruaitu hna hei si ko hna hmanhsehlaw a ngaingai ti cun mifim tak cu an si ve ruam lai lo. Thil sining kan theih ve caan cun Lungthli Tum a tanh lotu hna zong a rak soisel tu pawl cungah a caan ah cun kan thin a rak hung pah ve tawn. Tuan deuh ahcun Amah tluk Thawngzamh a rengmi hna an rak um lo tikah kan thawngzamhtu Thazaang pek loin soisel tanglamh cu a tha ruam lo cu mu.

Ka biatlang ah ka kal cang lai. Media thenkhat nih an thluk lonak hna cu News a tial tikah:...

1. Milung lak dingin tlang khenh a thiam.
2. Thenkhat hna nakin Lai Catial
    cafangfonh zong a thiam deuh i a catial
    rel an tlak deuh.
3. A news tialmi Soure a lakmi chim awk
    um lo a si tawn.
4. Media thenkhat hna bang Group kip ah
    thlah zamh a hmang lo.
5. Mi thlah ciami thlah a hmang lem lo.

Lai Media aa timi thenkhat hna cu mipi zawn zong ruat loin thawngpang zei huaha lo hna Group kip ah thlah hnawh an hmang. Group 1,2,3 hna ah thlah cun a zaa diam komi Group 4,5,6 hna ah a kan thlah hnawh tikah Mipi nih FB kan zohmi zong anmah ca lawngte in aa tlar thup tawn i a kan simh ngaingai. Group tlangtar le Ca thlahmi zong aa rem tawn lomi a tam. Mah ruangah Group hna in voi tampi kan chuak lengmang. Nain a kan luh(add) than peng ve. Group hi block khawh si seh law kan block mi group a tam lengluang cang lai.

Kan Media thenkhat cu Media pakhat nih a thlah ciami zong hechat in thlah hnawh a hmangmi an rak ve hoi ai. Henry Van Thio, Khupbil kongah Salai Ceubik Thawng nih a hmuhning a tialmi zong Media 3,4 nih group pakhat ah a rak kan thlah hnawh cio. Group Anddmine pakhat nih Link loin tuan bik ah a thlah cang komi Media tete nih An van kan thalh cio ve cu lungmit a si ko. A dang tawngpang zong cu thiam. Thawng pakhat hi an van thlah cio hin cun a caan ah tahlak nihchuak hna a si. Mipi a kan siaherh ruangah maw a si hnga? a si loah an Phaisa lutnak dingah ti ruah ah lungrawk a si.

Thenkhat Media hna Politice lei zong thei huaha loin le Lai Cafangfonh hna zong thiam huaha loin cafangfonh palh ngaiin a rak thlah lenmi hna zong rak um len a si hoi. Bantuk hna hi Caholh dawtu hna caah cun lungrawk tahchuak an si pah.

Kan Laimi Group hna zoh tikah Group pakhat ah an thlahmi group dang pakhat zongah an rak thlah thiam ve. Thawng pakhat kha Group dang zongah a rak um ve thiam ko i kan Laimi Group hna hi aa dannak zong an um lem hna lo. Mipi Menber tamnak Group ah biatak in i funtom hna u sih law a thatuk ding khi a hei si ko.

Kawl Media le Vawlei cung media hna zoh tikah Group hi an hmang lem hna lo. Anmah Page te tu biatak in an hman hna. Kannih Laimi Media hna zong Page cu ngeih cio a si ko. Page a like tu an tam cun group hi hmang tuk lem loin thawngpang theih a herh tuk lomi cu kanmah page te le ka FB Timeline te tuah thlah i group ah thlah loin um ko hna u sih law a tha tuk ko hnga. Cu loin Group kip ah Zei huapa lo thawng hna an thlah len hi cu Phaisa (duh tuk) an kawl tuk ti a fiang ko. Salai Lungthil Tum hi Tutan cu a rak thlah lengmang nak CDNews Group zongah a rak thlah ti lo. A ruang ka hal. Ka FB flowing an tam ngai cang ko i thlah herh ah ka ruah ti lo a ti.

Media Thenkhat hna nih Salai Lunthli Tum kha rak i zohchun u law a tha ko hnga ti hi mipi nih kan duh i nanmah ca zongah kan in duh piak hna.

Soisel Tanglamh A Tongmi A Pumrual Cu Mi Ar Koin A Tuahtu Body Art In Aa Thleng

A caan caan ahcun minung hna hi van tha lo le minl nih nihsawh ding dertawmnak hna kan rak ngei. Asinain hi bantuk dirhhmun kan um zongah lung dong hin loin ral tha tein pah chih ding a si ko ti kha hi nu i a sining he kan van langhter duh.

Kum 21 a simi Ast Toto an timi nu cu kum 12 a si lio tein a har ngaimi tak vun zawknak a tha lo ngaimi(​အ​ေရးျပား​ေရာဂါ) a tuar ti a si. Mahti cun a zawtnak cu a hnu ah duhsah in a rangmi hna tampi an chuak. Mahti dirhhmun ruangah Ash Toto cu a thirual a hawikom hna sinah a tlawnglen ngam ti lo i bawngbi tawi hna zong hruk ngam ti loin a um ti a si. Asinain nikhat ah Ast Tito cu a hmutu hna ar ko in a tuahtu ding pakhat tuah dingin bia aa khiah.

Ast Toto cu Art Body tiin an timi tak pum cungah an suaimi thiamnak pakhat in a zawtnak a takpum cu aa dawh taktak mi in aa tamh lawlaw ti a si. A zawtnak ruangah a simi a kulh tete ahcun vawlei pum puluk ( ​ေျမပုံ) bantuk in a suai i a zawtnak in mi lunglak dingin a tuah khawh. Hi bantuk tuar a harmi pakhat cu tha thawngding thil in a tuah khawhmi Ast Toto i a lungthin hi upat lo awk a tha lo ti a si. Instagram ah radiantbambi tiin Hika ah a hmanthlak hna zoh chap khawh a si.

Gredit, Ref: MomoLay

Ngakchia Hna Sii Dinh Tikah Ralring Taktak A Herh

Hngakchia pakhat te cu Sii A Din duh Lo Ruangah A hnar an Phih Buin An Dinter Chin ruangah a thaw nih a phih i a thi ti a si. 

Ngakchia Sii Dinhter tik zongah ralrin ngai a rak hau. A video in ka rak thlah chih. A tangah zoh khawh a si. Zoh ah ngaih a chia tuk hringhran...

Video ah Ngakchia a nu zong lung zuar taktak in a tap chih.

Ngakchia Sii dinh tikah i ralring cio hna u sih. Rak Share Ve...

Gredit: Marip Naw Htoi

Facebook A Hmangmi A Puitling Cangmi Hna Nih Cun...

1. Profile pic...le Cover photo hna atu le tu thlen loin an van um thiam.

2. Ca an leh duh lomi hna cu a zoh lawng zoh i zei thei lo tein dai tein an van um thiam.

3. Kan duh lomi le a tha lomi post hna a um cun comment len i bia i al len kha tuah ti loin a thei lo bangin kan van lanhtak thiam.

4. Si lo le si lo hna post a hmangmi cu dai tein Unfriend kan van tuah thiam.

5. A herh tuk lem lo ahcun Faceboom zoh loin um kan van i zuam thiam.

6. Kan i rem lomi hna kha Mention i i sik len ti loin Block tuin kan van tuah cang.

7. Kan duh uarmi minthang hna hmanthlak tangah Add me tiin comment len ti loin dai tein an FB See First tuah kan van thiam.

8. Friends a tammi duh ti loin biatak in kan i kommi hna lawng chiah i kan theih lomi hna cu Unfriend tuah kan van thiam.

9. A caan caan ah cun kan duh herhmi hna kha Only me in share i save post tein i chiah hna kan van thiam.

10. Page deu le hi page hi like law share heiti i Awngbali kan tuah, Iphone kan in pek lai ti bantuk hna kha dai tein kan van lanhtak thiam. A caan ah sik caak hna kan van thiam

11. Thawngpang a dik lomi hna tlawmpal kan relnak in kan van theih i Media deu hna kan van theih deuh i Lih Media hna Block tuah kan van thiam.

12. Facebook hi nuamhnak in si loin cawnnak kan hmuhnak hnga le thawngpang dikmi hna kan theihnak ah, cun hawikom tha karh ding le rian hna ca tu ah kan hman cang.

I Thi-Um Ding Biakamnak Zulh Lo Ruangah A Hnuk A Bommi Pa

Nu bantuk in a hnuk a bommi mah thawngpang hi atu lio mi tam bik lung a latu thawng a si.

Africa pa pakhat cu nu he kan i thi um ko lai a timi a biakamnak a zulh lo ruangah nu nih a duh lo, a lungtling (cenat) lo i hnam in a doih nakah Pa cu nu bantuk in a hnuk a bom, a hnuk par a chuak tiin theih a si.

Africa ah Juju tiin an auhmi doih thiamnak hi a thazaang a cak ngai tiin a tialmi le a thanhmi hna an um i Sii leiin ti ahcun Gynecomastia tiin a min an auh tiah theih a si.

Papawl hna nih nu pawl biakamnak nan pekmi i let hlah u, nan hnuk a bom ve cun ruah ngam awk a si lo tiin an peh chap..

Ref: Popolay Com

Ramle Miphun Dawtu/Tanhtu Kan Si Cio Ko

Malay ka um lio nikhat cu ka rian tuannak kedanh tlam a tling pah lo caah kedanh chiahru pi a si nain danh awk a tha komi kaa denh i rian ah ka kal. Kaa denhmi ka kedenh ka zoh ah ka tap chuak na ka nih a chuak na. Rian cun ka phan, ka rian tuan ti hawi Bangala pa cu ka kedanh kaa denhmi cu ka hmuhsak. A chiatuk i eii fihnung in, hlonh Malay holhin Buang a ka ti i ka nihchuak ngai. Ka bia cu ka thok than mah hi Bangala nih an serchuahmi a si, Buatan Bangala, made in Bangala ka van ti i aww si maw? ka kedanh cu zoh pah in a tha ngai ko cu teh a van ti than.

Mahnih a langhtermi cu zei huaha lo te a simi le mi nih zei rel lomi, miphun dawtnak le tanhnak kong hna zong a chim bal lo i aa ceih bal lomi hna zong nih kan ram le kan miphun hi a hnulei tein kan rak tanh ziar ko hna i ka dawt ziar ko hna ti hi a si. Mi zeipaoh nih miphun dawtnak le tanhnak lungput hmete tel cu an ngei cio ko hna ti hi kei ka hmuhning a si. Nihin ni kannih Chinmi dirhhmun ahcun Nationalims (miphun dawtnak/tanhnak) lungput kan ngeihmi hi Miphun dang hna nih an ngeihmi Nationalims nakin a ngan deuh vingmi kan ngeih a herh tuk lio caan a si. 

Miphun daw ziartu le tanh ziartu kan si aa theihnak cu Chin timi hi miphun dang hna nih a tha lo leiin an van chim cun Chin a simi kan thin a kan kenh colh. Mah hihi Chin ciruang kan si le Chin thisen kan ngeih ruangah kan lungthli tein Chin miphun daw ziartu le tanh ziartu kan sinak aa theinak cu a si ko.

Miphun dawtnak/tanhnak cu nuhrin nakin i chuahpimi a si lo an ti nain tlawmpal van upat hnu in miphun dawtnak/tanhnak lungput hi ksn chungah tlawm palte cu a van i sem ko. Mah a van i semmi miphun dawtnak/tanhnak lungput cu kan nganter i kan thawnter ding le a nganpi ah kan ser ding hi a biapi tuk. 


Miphun dawtnak le tanhnak lungput cu zeitin kan nganter lai i kan thawnter lai ti cu CNF Chairman Pu Zing Cung nih a chimmi Miphun Dawtnak Kong tawite a tangah hin rak relchap te u law..

Miphun dawtnak cu nuhrin nakin i chuahpimi a si lo. A cawn in cawn a haumi a si.  Nihin  Chin Miphun hna zong nih Miphun dawtnak hi kan cawn hrimhrim a hau.
CNF Chairman Pu Zing Cung. 
မ်ဳိးခ်စ္စိ္တ္ဓာတ္ဆိုတာ ေမြးရာပါ ပါလာတာမဟုတ္ဘူး ၊သင္ကုိသင္ယူရမည့္အရာျဖစ္တယ္ ။ ယေန႔ခ်င္းလူမ်ဳိးမ်ားလည္း မ်ုဳိးခ်စ္စိတ္ဓာတ္ရွိဖုိ႔ သင္ယူၾကရမည္။
  
    ပူးဇင္က်ဳံး 
       ဥကၠဌ 
ခ်င္းအမ်ဳိးသားတပ္ဦး

Bit(Bikini) Hman Kongah Ngandamnak Lei Theih A Herh Ngaimi

Atu rak langhtermi hna hi nu hna nih an i palh tawnmi theih a herhmi a si nain Pa ca zongah theih herh ngai a si. A tanglei ca hi Nauin lei tlawpbultu(Obstetrics and Gynaecology Professor of psychiatry)  Seventeen Octavia Connon nih a chimmi an si.

(1) G-String Bit I Hruk Hrial Ding
Bawngbi hri bantuk aa zammi le (သား​​ေရးျကုိး) G-string bit hna i hruk hi a ngaingai ti cun a tha lo. G-String bit hna i hruknak hi ngandamnak lei ah harnak hna a chuahter khawh. Mah bantik bit hna hruknak nih Nu hna caah nau inn lei zawhnak a chuahter khawh.

(2) Lailawn in Tuahmi Bit Nakin Laa In Tuahmi Bit I Thim Deuh Ding
Aa dawhmi bit cawk tikah Lailawn( ပုိးခ်ည္)​in tahmi bit hi thim awk a si an ti. Asinain ngandamnak lei in zoh cun Lailawn in tuahmi Bit nakin Laa(ခ်ည္​ထည္​) in tuahmi bit hi thim deuh awk a si. Laa in tuahmi bit hi thli lut thli chuak hna a thami a si caah bit cawk tikah Laa in tahmi Bit phun hi i thim deuh awk a si.

(3) Gym Tuahnak Ah Hmanmi Bit I Thlen Colh Ding
Gym chikhat kan tuahnak ah i hrutmi Bit hi zeiti a si paohah i thlen colh ding a si. Aruang cu Gym, Eksiksai kan tuah lio ah kan thlen chuakmi nih Bit a cinhter i kan rim he a si tikah Bit ah Puu(မႈိ) le Betariya(ဗက္​တီးရီးယား) hna an um chuak.

(4) Bit Kha A Rim A Nam Tukmi Chapiat In Suk Loding
Bit suk tikah a rim a nam tukmi chapiat/dip le zimui hna in suk loding a si. Chapiat a rim namtukmi hna cu Datuh(ဓာတု) thil hna cawhin tuahmi a si caah mah Datuh hna nih Nu hna Nau in lam ti bantuk hna a tawngh sual cun SENSITIVE a simi takvun kengmi hna cu dat rem lonak hna a chuahter khawh.

(5) Mah He Aa Rupmi Bit Hman Ding
Bit cawk tikah a size mah he aa remmi te cawk ding a si. A hme tukmi cawk cun reh tuk ruangah takvun hna a senter. A ngan tukmi hna cu i hruk cun tlamtlin lonak hna a siter.

(6) Bit Suk Loin I Hruk Than Loding
Bit i hrukmi suk loin i hruk than lengmang hi hman lo ding a si. Voikhat i hrut khawh in suk colh ding a si. I hruk ciami suk loin i hrut peng cu Batriya hna bit ah a chuahter.

 Ref: Shwemom, Daily Mail

Facebook Hi Baibal Relnak Le Thlacamnak Ah Dawn Khantu A Si Maw?

Tuchan cu IT chan kan ti. Chan tiluan hi dawi thiam a hau kan ti i FB hi mino he Upa he kan van hmang cio hna. Chinmi kip Khuate lei tiang tiawk in FB kan hmang kho cang hna. Khuapi ummi nih cun FB pa nga leng aa tuah bal cangmi hna um a van si. Chinmi ah FB a hmangmi zeitluk in kan tam ti cu Myanmar ram ah FB a hmang bikmi cu Chinmi kan si men lai. Ramleng zongah miphun dang hna nakin FB kan hmang khun.

FB chikhat van zoh cang hin cun chuah duh ti lo tiangin a um i mi a kan lem kho ngaingai. A kan lem I kan van zoh deuhdeuh tikah rian hna kan van tlawlh i a lamkip in FB nih a rak kan dawnh cio. Rian a tuanmi  ka hawinu nih FB ka zohnak ah ka rian tlawlh caan hna a tam a ti. Sianginn a kaimi ka hawipa zong nih capo bangin FB sertu 'Mark' zukp...ruangah ka 'Mark' zong a chia viar a ti. Rian a tuanmi le Sianginn a kaimi hna dawntu a si bang Biaknak lei tiang zongah a van kan dawnh.

FB nih biaknak lei ah a kan dawn taktak maw tiah Ka hawile nih FB hi Baibal ka relnak ah a ka donh ngai an ka ti tawn. Hi ca a tialtu keimah hrim zong a ka donh ngaingai. A ka donhnak pakhat in hun tial ko ninglaw Kumkhat ah Baibal Voikhat ka chuah lai tiin kaa sehchihmi cu FB zoh lengmang ruangah kum khat le a cheu in ka chuah ai. Zumtu tampi a hlan ah kan rak tuah lengmangmi Baibal Cauk kau rel le Thlacam hna kha FB kan zoh tuk ruangah kan van daitlang deuh. Facebook hmangin thatnak tampi kan hmu nain Baibal relnak ah dawn khantu a rak si ziar.

Tuchan ah cun FB hi kan zoh tuk hna i Nikhat te hmanh FB zoh loin a um kho lomi kan um hna. A caan ah FB van zoh cang hin cun FB chungah phunkip a tlin tikah chuah (off)duh ti lo tiangin kan um. FB zohnak ah kan caan tha tampi kan hman dih dawh. FB lawng chun nitlak, zan tlaipi tiang kan zoh lengmang. Mah ruangah FB chung i thil a cangmi lawngte nih kan khua ruahnak le kan lungthin ah hmunhma a lak dih.

Cu tikah Baibal van rel le thla van cam zongah FB lei lawng teah kan ruahnak le kan lungthin hna a um cang. Mahti cun Nikhat hnu nikhat in Baibal rel le thlacam kan van daitlang thluahmah. Ahnu ah kan Baibal rel le thlacam kaa zong a van thaw lo chin lengmang. A nehhnu ah Baibal rel le Thlacam zong huam ti loin kan um thai. Baibal Cauk kau rel ti loin kan van um beh. FB lawng chun nitlak zaan tlaipi tiang kan van zoh i kaa hngilh cang lai tiin Phone van chiah in a tlai tuk cang, ka mitku tuk cang tiin thla zong tha tein cam loin kan it diam. FB Khua ruat lengmang in i hngilh kho loin Tlawmpal ih hnu in kaa hngilh kho lo e tiin phone van banh i FB cu van zoh than a hmangmi hna kan rak um hoi.

Zingkaa van thawhkaa zongah FB zoh colh a hmangmi kan tampi hoi hna. Cheukhat cu rian kan tin khawh, rawl chumh pah zongah, rawl ei pah zongah, chikhat van thut zongah, ih pah zongah, ek ek pah zongah FB cu thlah kho bak loin kan zoh pah lengmang. Mahtluk in FB kan zoh komi Pumhnak tetal ah FB zoh loin a um kho lomi hna rak um a si. Pumh caan ah FB zoh hrial zong i zuam loin kan zoh hi FB nih a kan lem khunnak a langhnak cu a si. Huat zong an tlai caah Pumhnak ah FB zoh cu rak soi le thangchiat lengmang a rak si nain atu tiangin zoh a hmangmi an um hna.
2 Peter 2:19... — minung hi a teitu paoh sal a si ko. Mi tampi zumtu aa timi hna zong FB nih a kan tei tuk cang. 

Rev. David Lah nih Facebook nih na nunnak an hrawk a si lo. Na nunnak caah a thahnem lomi thil hna kha tamtuk na zoh cun na rawk ko lai tiin a chim. Mah cu bia ngai a si ko. FB kan zoh peng ahcun FB chung lawngah kan khuaruahnak a um tawn. Cu bantukin Baibal cauk kan kau rel deuh paoh ah Pathian Bia Baibal tu kha kan ruah deuh ve. Cucaah FB nak in Bible ca rel caan tam deuh pe hna u sih. Salm 1:2 ah An i lawmhnak cu Bawipa nawlbia tu ah khan a si i cu nawlbia cu chunzan in an ruat.

Facebook hmangin thatnak tampi kan hmu hna. Pastor te thawngtha chim live hna le an sermon tialmi hna kan zoh rel khawh tawn i kan thlarau ca zongah thathnemtuk a si. Sermi thil vialte hi Lamkaltu an si dih ko tiin hla phuahtu nih a phuah bang sermi thil hna hi hmanzia kan thiam cun a thami lawngte an si hna nain a hmanzia kan thiam lo cun kan rawkralnak tu ah an cang tawn.

FB kan hman/zoh tuk ruangah Baibal Cauk a rak rel lengmangmi hna a kan dawnh ngai a si ko cun Baibal Cauk a rak rel lem lomi hna cu an relnak ding lam a bi deuh rih ko lai. Baibal rel ti lo le Thlacam ti loin um i FB lawng zoh pengnak cun Baibal rel, thlacam lengmang i FB tu zoh ti loin kan um cun kan thlarau ca le kanmah caah a tha deuh hnga. Fb hi Thahnemnak tampi kan hmuhnak lam hei sihmanhsehlaw BAIBAL rel le THLACAM hna a kan dawn khantu a si cun FB zoh hi kan i sum pah le kan hrial pah cu a rak hau ko. Cun FB kan hmanmi hi Baibal relnak le Thlacamnak ah a kan dawnh khan nakhnga lo Thlacam ngai zong kan hau.

Careltu cungah kaalawm...A tang hmanthlak hna hi Pakhat hnu pakhat in rak zoh hna u. Bia tampi a chimmi an si. Hi ca hi mi tam deuh nih an hmuh rel khawh nak lai rak share ve......

Facebook kan zoh hnu in Baibal kan rel deuh lo hrim ko i Baibal a reltu an tawm deuh ko ti kha a tang hmantlak nih a langhter.

Hawile kom he i ton caan zongah mahtin...

Facebook nih Kan Caan tha a ei dih...

Mihrut Bang FB lawng kan zohnak a langhter..

 FB nih lem cang cun FB in chuah a har tuk cang...

Mawtor kalh pah zingin FB zoh loin an um kho lo

Phone, FB heiti hna nih Cauk le Baibal kau rel a rak kan donhnak a langhter.

An cawngh....

Phum an timh lawlaw...

Social Media Nih A Sal...

Chinmi Nih Chin Mifir Kong Hi Khuazakip Um Chinmi Theih Dingin Thawng Kan Zamhawk A Si/Herh Maw?

(ChinMifir kong Chin mipi theihin tawngzamh a herh lo ti ka hmuhning a tanglei bangin ka rak tial.)

Mifir an um paoh ah mifir kong thawng cu khuazakip um Chinmi theih dingin Online ah kan zamh len hna. Jesuh nih Mifir kong thawng va chim u law va zamh u, Khuazakip theih in va aupi u tiin a kan fial dara. Thawngtha tu va chim u tiin pei a kan fial. A kan fialmi Thawngtha hmanh chim lo le aupi loin mifir kong thawng cu kan chim kan aupi len hi cu a si deuh lai lo.

Chinmi chungin mifir thawngpang hi cu khuazakip ummi hna theih dingin Online ah thawngzamh hi a herh lem lomi a si. Halkha mifir kong cu Halkha ummi mipi nih an theih cun a zaa ko. Malay le Ramthumnak um Chinmi kip nih kan theih a herh lem lo. Cu bantukin US Chin mifir thawng zong Malay le Chinram ummi nih theih a herh lem lo. US um Chinmi nih kan theih cun a zaa ko.
Mifir kong thawng an zamhmi a poi lo, a tha ko, hmailei mipi ralrinnak ah tiin a timi tampi cu kan um ve hna. Mifir thawngzamhmi ralrinnak caah tiin kan timi nakin a tha deuhmi cu ralrinnak catial le fir a thatlonak le thih a nunnak ca hna tial i thlacam hna hi a si hnga. Cun mifir sinah va kal i a thalei in thazang kan pek ding le a chialei in thangchiat loin a thalei in thangchiat i a fir ti lo dingin kan chimhhrin deuh awktu a si hnga. Baibal caangkhat in van rel ta hna u sih. 2 Korin 2:7 Atu cu nannih nih nan ngaihthiam awk le thazang nan pek awk a si, a ngaih a chiat tuk ahcun a lung a dong sual lai. Mifir nih a fir man cu palek nih tuanvo an lak ko cang i fuk in an tuk ko cang, dan an tat cang i an hrem ko cang, thong an thlak ko cang caah kanmah aa pehtlai(san) lomi nih hehchat in thangchia soisel tanglamh a herh ti lem hnga lo. Mifir soisel thangchiat a hmang tukmi hna caah Jesuh nih JOHAN 8:7 a chimmi “Nan lak i sualnak a tuah bal lomi nih chep hmasa bik seh,” ti le Rom 2:1...zeicahtiah midang kha sual na phawt hna tikah, an tuahmi kha na tuah ve ko ṭung caah, nangmah lila sual naa phawt a si ko. "

Mifir kong Khuazakip theih in thawngzamhmi nih a chuahpi bikmi cu ralrinnak a si lo. Mifir thangchiatnak lawngte tiawk in a chuahpi tawn. Mifir a kum tling rih lomi hna a si cun lung dongin mahle mah i thah duhnak tiang hna a chuahpi khawh. Chungkhar ca zongah in tuar khawh lo tiangin soisel thangchiatnak hna a chuahter tawn. Mah lawng si loin pengtlang le Khua min chiatnak tiang hna a chuahter tawn.

Chinmi cu innpa changthlak, sang le khuami tiangin aa thei hngal dihmi kan si caah Chin Media hna zong media phung e, media rian e tiin au khuang sawh loin Chinmi khuasak ning le Chin Khrihfa biaknak le zumhnak hna zoh in thangchiatnak le soiselnak a chuahpi tu  Mifir thawng zamh hi cu i sum pah ko u. Halkha mifir kong kha Halkha mipi theihin ca in hei chuah u law khuazakip um Chinmi theih dingin Online ah cun rak zamh duh hlah u.

Media pawl nih Mifir kong thawng zamh i nan phaisa kawlnak ah hman nan duh tuk cun Halkha, Thantlang mifir thawng, Thingthei fir thawng, Ti le Mei fir thawng, satial fir thawng le sui ngun tangka fir thawng, anhringso fir thawng hna nan zamh cawk lai lo. Nan zamh thlu cawk ding a si lo caah zei thil fir thawng hmanh hi rak zamh loin um ko u law a tha ko hnga. 

Indianapolis i Chin mifir kong cu kanmah Indinapolis ummi lawng nih thei ko u sih law Halkha i mifir thawng cu Halkha ummi lawng nih rak theih ve ko u. Mifir kong Thawngchia cu a hohmanh nih theih kan duh lo bang theih a herh tuk lomi a si cun rak zamh ti hin hlah u. Mifir thawng nan zamhnak cha cun mifir caah thla tu rak cam piak ko u law nan caah a tha deuh hnga.

Mahtin ka tial tikah mifir thazang pek hna nan ka lawhter ko lai nain mifir thazang ka pek a si lo cu Pathian le keimah theih a si ko. Hi ca ka tialmi hi mifir i a chungkhat cingla rualchan hna ah nan ka ruah men lai nain Online ah mifir thawng a leng balmi hna he chungkhat sinak pakhat hmanh a ngeimi ka si lo. Khrihfa biaknak in mifir ca le an chungkhat hna caah ka ruah tikah kannih Chinmi Khrihfa hna nih cun Mifir kong khuazakip theihin thawngzamh hi cu a tha deuh lai lo tiin ka ruah caah hi ca hi ka van tialnak a si.

.........................................
Rev. Hoi Cung Tum nih a chimmi
"Kan Inn Tangka Firtu Theih Kan Duh Lo" timi relchap khawh a si.
Rev. Hoi Cung Tum: Kan Inn Tangkaa A Firtu Theih Kan Duh Lo, Aruang.... 

"Kan inn mifir nih an bauh i phaisa tlawmpal an laak.
Palik Bawi nih, a firtu theih na duh maw? kan hlathlai piak lai a ka ti.

Asinain a firtu ka theih ah cun, A firtu kha ka lungchung le ka mit ah a thiang loin ka hmuh zungzal sual lai i, ka fale zong nih an hmuh tikah a thur in an hmuh sual lai ti ka phang i, a firtu theih ka duh lo i, Palik zong ka hlathlai ter lo" a ti.

Rev. Hoi Cung Tum le a chungkhar hmuhning le ruahmi hi a va thianhlim ning. Mi tampi nih kanmah kan i pehtlai lomi le kan i thlak a herh lomi zongah theih ve le i thlak ve kan hei duh ning. Mah Rev. Hoi Cung Tum a bia te hi nifatin ka nunnak ah ka lungchung in ka philh kho lo bikmi a si.

Mi nih thil an tuah sualmi le mi santlaih lonak kan va hmuh le kan theih tik ah, kan lungchung le kan mit in midang kha kanmah nakin niam deuh le zeirel lonak lungthin he mi kan zoh hna hi kanmah caah a rak thiang ve hrimhrim lo i a rak t'ha hrimhrim lo hi ta ka ti.

Na Theih Te Lai

Ti dorlhat i a man a sunglawi zia cu these rawn na phak tikah na theih te lai.

Rawl eika thawt a sunglawi zia cu na rawl eika a thawt lo tikah na theih te lai.

Dam a sunglawi zia cu na zawtfah tikah na theih te lai.

Ei awk rawl le din awk ti na ngeihmi hna a sunglawi zia cu ei awk le din awk na ngeih lo tikah na theih te lai.

Pum tlamtling a sunglawi zia cu pum tlawmtling lo na si tikah na theih te lai.

Jesuh Khrih khamhtu ah cohlan duh lo cu Hell ram na tlak tikah na theih te lai.

Pulpit cungah bia a chimmi hna an bia ngaih piak duh lo phunin um i kaa dang hoih tak, lu khun tak hna a that lo zia cu nangmah pulpit cung bia na chim tikah na theih te lai.