Kumle caan hi thiampheifung bang tlaih awk ṭha loin an liam a reng hringhran. Kumpi kumkhat cu a liam ruangmang hoi cang. Caan nih an liam i nunnak zong an liam. Nunnak hna hi tlaih khawh si loin caan sin ah an liam lengmang ve i kan nun zong a tawi chin lengmang ve.
Caan khaṭ lio ah ka u pa kha aziah na rak i pum tawn ko lo? Naa manh caan te tal ahcun rak i pum ko law tiin pumh ka sawm. A ka lehnak cu US ka kal tikah Baibal sianginn ka kai lai i Pathian rian ka tuan lai, Thawngṭha ka chim lai tiin a ka leh. A ka lehnak bia cu a ṭhatukmi a si. Mahti a ka leh in ka lungah a van chuakmi cu minung kan nunnak cu minmei zaam bang a si ko. Ram bantuk in chikhat te men a si ko. Thaizing ah a lotlau in a thi khomi kan si ko ti a si.
Caan liam a reng hringhranmi kan chan ahhin Pathian rian tuan hna hi hmailei ah ka tuan te lai tiding a si ti lo. Zaan kan i hngilh in zinglei ah tho ṭhan ti loin a thi khomi kan si ko. Caan nih a kan liam tak lai i Pathian rian ṭuan manh lo hna in kan nunnak hi a lotlau kho ko dawkaw Hawidawt. Cucaah atu cu Bawipa kha tih u law, amah rian kha lungtak te le zumhawktlak tein tuan tuah u; JOSHUA 24:14
Kan nunnak hi a tawi tuk caah
Salm 90:12 ah Kan nunnak hi zeitluk in dah a tawi ti kha kan hngalhter law cuticun kan fim deuh lai, tiin kan hmuh.
Pathian rian ṭuan hna hi US ka phak tikah, Kawlram ka tlun tikah, cu tikah, hmailei ah ti bantuk in kan tiding a si ti lo. Atu caan te bakin Pathian leiah i pumpek in a rian thiangah i tel ve i pumhkomhnak ah i pumh ve lengmang ding kan si. Hmailei ah kan tiding a si hrimhrim ti lo. ROM 14:8 ah
kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si. Kanmah ta a si lomi nunnak caan tawite hi BAWIPA caah hmang ko hna u sih. Minung kan nunnak a tawi zia kha a tanglei ah Baibal tlawmte in ka van tial..
Jeim 4:14 "Thaizing ah na nunnak cu zei a lawh lai hmanh na hngalh ṭung lo. Nang cu minmei zaammi bantuk, atute a hung um i a lo zaumi bantuk pei na si ko cu. "
Isaiah 40:7 Bawipa nih thli a chemter hna tikah ram cu an car i pangpar cu an uai. Minung hi ram bantuk men cu a si taktak ko.
Isaiah 40:6 Aw pakhat nih "Thanh tuah," tiah a ti. Kei nih, "Zeidah ka thanh lai?" tiah ka leh. "Minung vialte hi ram bantuk men an si, ramlak pangpar nakin an chan a sau hlei lo.
Salm 103:15-16 Minung cu a nunnak hi ram bantuk men a si ko; a hung ṭhang i ramlak pangpar bangin a hungpar,
"Cun thli a hung hrang ciammam i a lo ai, ahohmanh nih an hmu ṭhan ti lo. "
BAWIPA nih Sunparnak Co ko seh. Amen..
Tar Hnuah PATHIAN Rian timi Hi kaa ah rel chap khawh a si. Na caan a lak a si lai lo.
