KAN HMELCHUNH
Thlacam hawile hna,
Bawipa min in nan kut kan tlaih hna.
September 11 hi USA caah philh awk a tha lo mi ni a si. Kan hnulei kum 16 lio, September 11, 2001 ah New York khualipi ummi world trade center innsang pahnih miṭhalo hna nih vanlawng in an rak puak. Minung a thongthong in an thi. An tuanbia hi a tam lengluang ko. Cu chung ah pakhat te laak ka duhmi cu, Robert timi Khrih zumtu pa kong a si.
Vanlawng nih innpi a suk lio ah amah hi dot 80 hrawng ah aa hreng ve mi pa a si. Electric a rawh dih caah hleihlak in dot 80 cu huamsam tein a ṭum i a donghnak ah a hram a phan. Cu ka hmun ahcun a hawile minung 15 hrawng a va hmuh hna. A tangbik dot an phan nain innka chuahnak a pit dih. A hawile cu an thin a phang, an ṭap, an ai. Zeiti um awk an hngal lo. Cu lio ah Robert nih a chimhmi hna cu, Jesuh tiah au u, a ti hna. Dawtnak he hmailei kong a cuanh tik ah Jesuh dah tilo cu an caah ruahchannak a um ti lo ti kha a hngalh. Cucaah an pumsa loral hmanh sehlaw an thlarau tal him seh tiin amah nunnak zawnruat bak lo in Jesuh kong a chimh hna. Cutluk muilak, thinphang thla lau um lio ah Jesuh kong a chimh cuahmah hna. A cheu cu an lung pem i Khrih cu Khamhtu le Bawi ah an cohlan colh. A chim dih in Robert cu chuahnak lam zeital ka hmu kho hnga maw tiah a hawile sin cun a van i thawn i, pe 10 hrawng a phanh ah khin a taangmi a hawile vialte cu cunglei a cimmi nih a hon khuh hna i an thi dih. Robert tu cu a nunnak a him. Rau lo te ah chuahnak lam a hmu kho i a leng ah a chuak kho colh. Robert nun bantuk hi Khrifa nun tak cu a si. Dawtnak in a khatmi nun, vawlei chawva nih a cawk khawhlo mi dawtnak nun, thlaraulei zawnruahnak nun cu a si.
Hawile hna,
Kan Bawipa Jesuh Khrih nih a kan duhpiakmi cu Robert nun bantuk hi a si. Zeicahtiah cu bantuk nun te cu pei Amah Jesuh nih a kan thokpiakmi nun cu a si cu. ‘Nawlbia thar kan pek hna: pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si. Patkhat le pakhat nan zawn nan i ruah ahcun mi vailte nih, hi hna hi amah a zultu kha an si, tiah an in hngalh hna lai, tiah a ti hna’ (Johan 13:34,35)
Zumtu Johan nih hitin a nolh than rih: ‘Ka fale hna, kan i dawtnak hi hmur le kaa lawng in a si awk a si lo, dawtnak taktak, thil tinak ah a langmi dawtnak in a si awk a si’ (1 Johan 3:18)
Pathian zumtu kan si,
Khrih hnuzul kan si,
Vawlei ceutertu kan si,
Midang kha Pathian sin ah
a hruaitu ding kan si
tiah kan I ti tik ah VAWLEI nih a rak ZOHMI cu TAKSA, THINLUNG, THLARAU RAM AH DAWTNAK KAN LANGHTER MI KHA A SI.
Kan kaa in kan chimmi hi a rak za ballo.
Kan kut in kan ttialmi hi a rak za ballo.
DAWTNAK NUN tu hi mi lungthin a thlengtu taktak cu a si.
Cucu Bawipa Jesuh nih a kan nunpiakmi cu a si. Van sunparnak vialte a kaltak khawhnak cu dawtnak a si. A niambik caw rawl kuang chuah zong a poi ah a chiahter lo tu cu dawtnak a si. Santlailo tiah rak ruahmi hna, mihrut sitian, hmeinu hmeipa le hlawhlang hna, ngunkhuai khawl hna sin ah tlumtla tein khua a sakter kho tu cu dawtnak a si.
A kutthir in an khenh cuahmah lio zong ah, a ke thir in an khenh cuahmah lio zong ah, a hnak fei in an sawh cuahmah lio zong ah ‘Ka Pa, ngaithiam hna. An tuahmi kha zei a si ti awk an hngal lo,’ (Lk 23:34) tiah a ti ter khotu cu dawtnak a si. Keimah tein kaa hrilhfiahmi pakhat cu hihi a si: A Fapa ngeihchun fak tuk in an hrem ruang ah Pa a thin hung tuk lai i thalo in a tongh cang hna lai ti a phan tuk caah pei ‘Ka Pa, ngaithiam hna’ tiah a ti kanh ko hi tiin. Minung hmanh nih kan fale hrem cu chimlo, an zawtfah menmen hmanh ah kan celh ttung lo. An lu a fah dikdek ah, an paw a fah dikdek ah um awk hngallo in pei kan um ko kha. Jesuh kan Bawipa an hrem lio ahhin Pa hi a thin a phawh taktak ve ko lai e. Cucaah pei kan Bawipa Jesuh Pathian Fapa nih a Pa sin ah a kan nawlpiak hi. Haleluia!
Hi vialte a temtuarnak hi dawtnak lawngte, thilti nak ah a langmi dawtnak, kaa lawng in chimmi a silo mi dawtnak taktak cu a si.
Jesuh dawtnak nih dawt awk tlaklo a kan cawi kha philh hlah.
Jesuh dawtnak nih hlawm awk tlaklo a kan hlawm kha philh hlah.
Jesuh dawtnak nih fihnung ṭeifiak a simi vialte a kan thianh kha philh hlah.
Cu dawtnak cu Pa nih a Fapa Jesuh chung ah a langhter i, zumtu kan nun ah Thiang Thlarau in a kan pek ve mi dawtnak cu a si. Zumtu kan nun zong cuchung ah cun a dir. Dawtu hna sin zong ah, huatu hna sin zong ah i dang hleilo in cu dawtnak kan langhtermi kha a muru, KAN HMELCHUNH cu a si.
Khrih ah hawile hna,
Nihin zumtu cu thlaraulei ah kan van a tha tuk. Bawi Jesuh aiawh in nunnak cantha kan hmu, a nun muru simi dawtnak langhternak cantha kan ngei.
Kan pawngkam kha zohhmanh u, A rawk cuahmah mi nun tamtuk pei an um kha; Community chung ah, innchungkhar ah, pumpak nun ah tamtuk te pei kan rawk cuahmah ko hi.
Dawtnak he kan fuh hna a hau.
Dawtnak he kan nunpi hna a hau.
Dawtnak ngeitu Jesuh kha kan hngalhter hna a hau.
Dawtnak kong a chimtu ah kan i tel dih cio lai tiah ka zumh.
Kei zong ka chim lengmang ve ko. Asi nain Bawipa nih a kan duhpiak deuh mi cu dawtnak kong chim silo in dawtnak nun tu kha a si deuh. Amen.
Zumtu KAN HMELCHUNH cu DAWTNAK a si. Haleluia!
Bawipa nih sunparnak co ko seh. Amen.
Khrih ah nan hawi,
Thawngling Mualhlun
CEBC Indianapolis
September 10, 2017
