A hmasa bikah thil pakhat kan theih dingmi cu Bible hrilhfiahnak kan ttial tikah hin a ttialtu nih kan mah le kan pomning hoih cio deuh in ttial a si caah midang hmuhning lezumh -pomning he a rak i dangmi zong a um kho ve, cu ruangah keimah chim mi le hrilhfiahmi hi a hmaanbik lai timi cu chim khawh a si lo.
(Biathla 11:3) "ka Tehte pahnih kha ka thlah hna lai an nih cu Buri an i aih lai i ni thawng khat le zahnih le sawmruk chung Pathian bia kha an chim lai"
Hikaa zawn Bible caang i ka hmuh ka fian ve ning ah cun hi tik lio caan i Pathian thawngtha bia a chimtu dingmi “Tehte pahnih” hna cu Enoch le Elizah hi an si ko ti hi a si ( Mi tampi nih cun Abraham le Moses ti zongin a zummi an tampi, nain a si kho deuh rua lo ka ti).
A ruang cu; Hi Tehte pahnih hna nih Pathian Thawngthabia an chim lai caan hi “kumsarih harnak” a thok ri in kumthum le a cheu a dih hnu, a taangmi kumthum le a cheu a vun i thok caan, Judah mi hna caah velngeihnak caan a vun thok bak ah khin a si dawh a si( 1260 days = 42 months = 3.5 years). (Biathlam 11:7) a donghnak lei kan zoh si ah cun “Donghngal lo khur chungin a hung chuakmi Sahrang nih a doh hna lai cun a tei hna lai i a thah hna lai” tiah kan hmuh, cun (Biathlam 11:11) kan zoh than a si ah cun “ Nithum le a cheu hnuah Pathian sinin nunnak petu thaw kha a ra i an chungah a lut i an nih cu an dir” tiin kan hmuh than. Cu nih a sawh duhmi le a langhtermi cu hi Tehte pahnih hna hi an thi hrim hrim lai tinak a si. Cu caah Abhram le Moses cu an si kho ruam loh zeicaah tiah an nih cu an thi bal cang.
(Genesis 25:18) kan rel ah cun Abraham thihnak cu fiang tein kan hmuh i (Deuteronomy 34:5) kan zoh ve si ah cun Moses thihnak zong fiang tuk in kan hmuh khawh ve. Cun(Genesis 5:24) kan zoh ah cun Enoch cu a thi ti cun kan hmu lo i Pathian nih a laak ti tuin kan hmuh caah Pathian nih a nun buin a laak tiah kan ti khawh, cun (2King 2:11) kan zoh ve tikah Pathian nih Elizah cu a nun bu bakin a cawinak cu fiang tein kan hmuh ve fawn( Hi ka zawnah mi tampi nih cun Malakhi 4:5 le John 11:14 te hna hmangin Elizah cu a rak kir than cang tiah an zumh nain mah cu zumhnak cu a dik bak lomi si). Zei caah tiah(Hebrew 9:27) chung kan zoh ah cun kan Bible nih “Thi kir”(Reincarnation) timi hi a pom lo bak mi in a lang i Pathian nih minung hi voikhat thih lawng a kan sianh tinak in a lang.
Cu caah keimah ka hmuh ning le ka zumh ning ah cun (Biathlam 11:3) chung i “Ka Tehte pahnih” a timi cu “Enoch” le “Elizah” hi an si ko timi hi a si…
By- David Nicunglian Lawtlai
