Naite ah "SBS nih Australia i a karh a rangbikmi miphun" tiin Vawleipi theih in a hun kan thanh lio ah ca tawite ka tial. Tihin asi; hi SBS nih a kan thanh ruangah hin, a kan hnahchuahmi miphun dang zong an um lai, media dangdang zong nih an hun kan kherhhlai ngaite lai caah fimkhurte in khuasak le rammi tha (good citizen) kan si ngaingai a hau" tiin ka tial.
Thla 2 a raulo, tutan kan naule tuahsernak cu kan miphun muihmai a chiattertu, Cozah le rammi hna hmai ah belnang a kan nehtu le hmailei ralzam in a ra dingmi kan unau hna caah dawnkhantu asi sual lai ti ka ruah ah, lung a pit ko. Nizan nai ah kan farnu Ruby Sawmhal nih Immigration Acts 1958 chirhchan in "hibantuk sualnak a tuahtu hna hi, an visa cancel in an chuahkehnak ram ah kuat than khawh an sinak" a tialmi hmuh cio asi. Apex Gang timi he pehtlaih ruangah African mino hna zong visa cancel piak an ton zong news ah rel cio asi.
Miphun dangdang tampi zong nih an ton ciomi asi i, an nih bel cu; gang related (misualbu he ikopnak) , rubbery (thil fir le chuh) le illegal drugs issue (ritsii) tibantuk kong deuh asi. Tutan kan miphun kan nih kan tonmi bel hi cu fihnung le zohchia ngaingai asi. Kan tonmi cu kan ton lawlaw cang ko i zei ti awk tha hlah. Hihnu hmailei, kan Khrihfabu le kan Community cio nih kan iralrin awk le i cawnpiaknak tha ah cang hram ko seh.
-Ram Tinthei
