Minung tampi nih innlo ṭhaṭha le chawva tampi ngeih cu kan duh ko nain, kan ngeih khawhnak dingah tangka kawlning dan kan thei o i kan thiam lo. Mifim le mithiam si cu kan duh dih nain, fimnak caah cawn le reltu cu kan zuam lo. Cu bantukin zumtu tampi zong zumtu ṭha si le thawngṭha chim thiam si hna hi kan duh ko nain, cu kan sikhawhnak dingah Baibal carel le thlacamtu cu kan zuam fawn lo i, a relning zong kan thei fawn lo. Cucaah zumtu hrinṭhanka hna caah ṭhathnemnak a si hnga maw tiah Baibal ca relning tlawmpal in ka vun ṭial.
¤ A Caan
Baibal ca rel tik le Bible study tuah tikah a caan hi a biapi tukmi a si. Kan caan a rem cem le a ṭhat bik caan te ahkhan nikhat ah suimilam pakhat maw, pahnih maw tibantukin Baibal ca relnak ah suai piak ding a si. Kanmah te lawngin caan kan pek khawh lio le a daih lio caan teah khan a ṭha bik. Nule pa fa ngeimi kan si ahcun kan fale sianginn an kai kar, zingka an thawh hlan le zan an ih hnu tibantuk caan kha a ṭha. Sianginn kaimi kan si cun kan ih lai maw, kan thawhka maw, sianginn kan ṭinka maw ti bantuk caan kha suai piak ding a si. Kan lungthawh caan le kan huam caan lawngah relding a si lo. Kan huam lo zongah kan lung a thawh lo zongah a caan kan khiahmi ahkhan rel khawh peng i zuam ding a si.
¤ Ahmun
A hlei in study room ca zohnak a ngeimi kan si lo hmanh ah ihnak khan ah maw, mileng khan ah maw a daihnak le zapi he umṭi lonak hmunhma ahkhan rel ding a si. Baibal ca kan rel pah in thawngpang a aukhuangmi le a ringmi pawl tam tuk theih kha thinlung a lut kho lo. Baiba rel lio ah phone zong kha phih chung ah a ṭha i hawikom le chungkhar he zong i chawnh tuk ding a si lo.
¤ Hmanding Thilri Hna
Baibal ca kan rel tikah cauk, cafung le colour pen tibantuk kha i chiah chih pengding a si. Kan thinlungah a ummi tete kha Baibal ca chungah rin piak i, kan cauk chungte zongah ṭial ding a si. Cun kan theih lomi le kan fian deuh lomi zong kha ṭha tein ṭial i kan Pastorte sinah hal peng ding a si.
Mirang ca a rel kho pahmi kan si ahcun Bible Dictionary, Commentary, Concordance, Reference le Bible Study cauk pawl zong i chiah chih ahcun bawmtu ṭha bik an si hna. Mirang holh kan thiam lo zongah kawl le mizo kan thiam ahcun kawl Baiba le mizo Baibal hna zong i chiah chih ahcun a kan bawmh ngai lai. Atu cu Internet chan a si caah google ah kan duhmi vialte kha minute pakhat ah kawl khawh dih a si cang i Internet zong bawmtu ngai a si ve.
¤ Baibal rel hmasa dingmi hna
Bibal ca a rel theng lomi le voikhat hmanh a chuah balmi kan si lo ahcun Biakam thar asilo le Salm cauk chungin rel hmasa ah a ṭha. Cu hnu ah Biakam hlun in van kir ṭhan ding a si. Genesis in nan thawk ahcun nan thinlung an buai sual hna lai. Cun atu kan relciami kha ṭha tein chingchiah tuah i, thaizing rel tika pek zulh ding a si. Mino pawl caah cun music aw dawh tete hna zong ngeih pah ah thinlung tha a dam ngai.
¤Pekzulh Lengmang Dingmi
Voikhat hnih hrawng Baibal ca kan chuah khawh cun, a hnu deuh cun Baibal chung i minung kong ( David, Daniel, Peter, Paul) tibantuk in siseh, khuaram kong ( Canaan, Korin khua, Efesa khua) tibantukin siseh, Baibal cauk ( Genisis, Exodus, Mathai, Mark) tibantukin siseh, kan duhmi tlangtar in pekchanhnak, zumhnak, nun thiananak tibantuk kha pakhat hnu pakhat in study tuah khawh i zuam peng ding a si. Voikhat ka rel cang caah nolh ding a si ti lo ti ding a si lo. Kan thih hlan lo taksa ti rawl kan ei bantukin kan thlarau rawl le nitin kan nun hmuhsak tu Baibal hi rel peng ve ding kan si.
Bawlung chuihnak video lawngte kan zoh ahcun zeitikah an chuih lai? Ahodah a min a thang i a thiam ti bantukin bawlung chuihnak kong kha kan theih dih. Korea movie lawngte kan zoh ahcun Korea lemcang ah ahodah a dawh, hodah a thiam tibantuk kha kan theih dih. Cu bantukin Baibal ca rel pengmi le study a tuah pengmi kan si ahcun Pathian bia le Pathian aw kan theih i, a duhnak kha kan hngalh khawh deuh ve lai. A reltu nan dilak Bawipa nih thluachuahnak in pe ko hna seh.
Sang Nawl
Gospel Revival Ministries
Email: gospelrevival2012@yahoo.com
Facebook: Nitin Thlarau Rawl
Phone : 0045 51 27 85 68
