Nu le pa (parents) nihcun a ttha bikin fale cu zohkanh le kilkawi asi ko. Asinain, fale hi zeitindah kan cawnpiak hna ning asi; kan hrit-hruai hna ning asi tihi a rak biapi ngai.
Nu le pa tampi nih zeiruang ahdah fale hi chimh an har tuk tihi a ruah-awk an hngal tawn lo. Zeithil paoh hi a sawhsawh in a cang lo. A ruang a rak um zungzal. A ruang tampi lak ah a tanglei thil pawl hi aa tel kho:
(i) Nu le pa nih fale kha an hngakchiat lio tein bia-neem tein chawnhbiak le hrit-hruai loin – a hro in hro, tuk-velh ruangah.
(ii) Nu le pa nih fale he zeitindah ngamhtla tein kan um lai, neihte in bia kan iruah lai, kan um tti khawh lai tiah izuam loin – fale kha a ttih in ittih ter hna ruangah.
(iii) Nu le pa nih fale thinlungput, ziaza le sining theih itim loin – fale kha uk thlorh in uk itimh ruangah.
Cun micheukhat kan nu le kan pa cu fale nih an uk hna. Cucu zeiruang ahdah a si hnga?
Hibantuk lei mithiamsang (experts) pawl nih an chimning ahcun hngakchia bawhte an si lio in aa thok cang, ti asi. Na fa kha kum thum (3) asi lio tein na uk khawh lo ahcun kum hleithum (13) asi tik ah cun uk khawh a har tuk cang, ti asi.
Cucaah, fa a ngei cangmi nu le pa cu fale caah cawnpiaktu ttha bik rak si a herh. Fale hna nih an nunnak lamthluan ah Bawipa lamding a zulmi an si khawhnak hnga an hngakchiat lio tein thlacamnak he cawnpiak thiam le hrit-hruai thiam a rak herh hringgran ko.
*{Fale cawnpiak ning an ttialmi tete ka relmi pawl he hun pehtonh pah in vun ttialmi asi.}
Van Dawt Ceu
