1. Debate Tuah Ding Timhlamhnak Kongah Keimah Ruahmi
Salai Samuel timi Facebook min a hmang mi nih, "kan challenge," a rak ka ti lioah hin ka hawipa Lai Kam Thang le Zophei Christian Fellowship Chairman kha ka zohter hna i, "Kan hngalhmi a si lo," an ka ti ve ve. Cucaah Kuala Lumpur ka phak hlan zarh ah Global UPC Youth Conference an ngei ti a si caah USA lei in asiloah Australia lei in asiloah Europe lei in a rami pastor asiloah evangelist a si ttheu lai tiah kan ruah.
Cucaah hi pa he Baibal i al (Debate) si loin i ceihttinak (discussion) kan tuah ahcun, keh le orh, hnu le hmai a hngal kho lomi Chin Miphun kan caah tthathnemnak a ngeih khawh caah Pathian tinhmi a si kho tiah ka rak ruah. Cucaah, "Keimah nih cun ngamhnak ka ngei lo; Sihmanhsehlaw Thiang Thlarau bawmhnak thawngin na duh ahcun ka duh ve ko," tiah ka rak lehnak kha a si.
2. Chin Miphun Upa Deuh Nan Ruahnak
Kawlram, USA, U K, Canada, Australia, Europe lei in a ka chawntu Upa Lungfim deuh le kan Miphun a daw i, Pathian Rianttuantu hna nih debate tuah lo dingin nan duhnak nan langhter cio.
Cun Kula Lumpur i khua a sami Upa tam deuh zong nih tuah lo an duh deuh. Tthatnak nakin tthat lonak a chuahpi deuh lai tiah nan ruah. Cucaah nangmah nih kan tuah lai lo, ti ko nan ka ti cio. Asinain amah Salai Samuel le Saya Tluang Hei Hripi nih cun tuah an tuah tuk!
3. Keimah Biachahnak A Si
Cuticun hi thawngpang a linsat lio chung hi ZPCF Biakinn ah Campaign Follow Up kan tuah liopi a si caah ka manh lo tuk i Salai Samuel le Saya Tluang Hei nih an kuatmi ca a um len nain ka let manh tuk hna lo. Zahan zarhte zan pumh dih ah an cakuat pawl cu ka rel tikah a bikin Salai Samuel nih a ka kuatmi ca ka rel i voice in a rak chiahmi hna ka ngaih tikah Pathian Biatak dirpi duhnak le mipi nih Biatak hngal hna seh timi duhpinak si loin Vawlei cung i a um mi Laimi dihlak sinah mah min langh duhnak a si hlei ah ngakchia thil hauh bantukin a hnek in a ka hnek chih (Zophei Christian Fellowship EC le Pastor he debate kan tuah lai maw, tuah lai lo timi ceih kan timh ko lio ah) tikah tinhmi ttha/lungput hman he a si lo timi ka hngalh fian caah tuah lo dingin biachahnak ka tuah.
Biachahnak Ka Tuah Hlan Ah
Zophei Christian Fellowship Chairman pa nih, "Salai Samuel nih a ka chawnh i debate tuahnak caah nan biakinn nan kan hlanh ko lai, nan saya pa kha ka tupa a si,' a ka ti," tiah a ka chimh. Cucaah mah ka pu pa cu a ho ko dah a si hnga Pathian Biatak ka ttanh ka tinak ah, "Na nisawh hlah na taw a kua lai," timi phungthluk hna ka hluan sual lai ti phan ah a facebook time-line ka zoh cu, "Sernak kong a ttial i text caah Genesis chung ta pakhat hmanh lak loin Biathlam Cauk a donghnak lei ta a lak. Cun "elohim" kong a ttial hoi i elohim hi pulral form a si lonak a langhter i text caah Isaiah Cauk lei ta a lak hoi. Cucaah mah ka pu pa he Baibal Thiang kan i ceihtti ahcun Tiva hrawng u sih ka ti lai i Meithal aa ken lai, Tlangram kal u sih ka ti ahcun Sur aa ken ding phun a si tikah keimah a tupa nih cun ka tei kho hrim hrim lai lo timi ka fiang. Kuala Lumpur i Laimi upa lungfim deuh hna an bia bangin kan mipi ca zongah hlawknak a um lai lo. Cucaah keimah nih debate tuah lo dingin kaa zukpiak tthan.
4. Lunglawmhnak
Kan thawngpang a thei i dawtnak tak tak he ka umnak ah bia a ka ruah i phone le chatting in a ka chawntu le Pathian biatak a duh i kan miphun a dawtu nan dihlak cungah upatnak kan pek hna i nan dihlak cungah ka lawm. Kan Chin Miphun nih Pathian Biatak kan pemh cio nak dingah fak piin thlacam i bawm cio ko hna u sih.
Nan dawtmi,
Salpa B. Khamh Bawi Aung
Current: K L, Mlaaysia
