Zumtu thenkhat hi kan lungput a chia ngai. A caan ah Bia thatha le bia dawhdawh, Thluachuah bia hna kan kaa in a chuak i a caan ah i sum hin loin Bia chiakha taktak le Hling bangin mi a chunmi bia, chiatserhnak bia hna kan kaa in a chuak.. Zumtu kaa pahnih ngei kan tam ko.
Pastor le Rev. pi hna nih Doctrine kongah Heresi na si, a pial sualmi na si ti bantuk bia thalo,Bia dawhcah lo le hling bang in mi a chunmi bia kan chim/tial hi cu a poi ko ka ti.
FB chung kan catial hna zong nih kan lungput an langhter caah FB i catial le comment te hna zong hi a nemnak tein kan tial thiam a hau ngai.
Minung kan si caah a si awk a si ko kan ti ko lai nain Zumtu mi hrinthar kan si cang cun Bia chiakha, Bia thalo le bia dawh cah lo chim le tial hna cu i sum kan i zuam a hau.
Pual nih
•Thangthatnak bia le chiatserhnak bia kha kan kaa pakhat chung cun an chuak. Ka u le ka nau hna, hitihin cun a si awk a si lo.
•Cerh pakhat chungin ti thlum le ti kha an chuak ti bal lo. Ka u le ka nau hna, theipi kung nih oliv thei a tlai bal lo, mitsur ruang nih theipi a tlai bal fawn lo; ti al zong nih ti thlum a chuahter kho ve lo. JEIM 3:10-12 tiah cawnpiaknak cakuat a kan chiah ta..
Bawipa Sunparnak caah....
