India ram Gujirat state i khuapi pakhat ah pupa chan in mirum chungkhar ti pengmi Pu Sumit Rathore (Kum 35) le a nupi Pi Anamika (kum 34) an um. Mirum an si! Atu an umnak inn hi India phaisa in ting thong 100 man a si i kum 3 a simi fanu dawh pakhat an ngei. An nih Jainism biaknak a biami an si.
Anmah biaknak lei hruaitu saya te nih an pathian caah zeizongte kal tak in i pumpek a herh zia an cawnpiakmi nih an lung a tongh tuk hna caah atu cu an inn, an ngeihmi thil vialte le an fanu te zong kal tak in phungkyi ah luh an i tim cang. Pathian kan dawt ruang ah kan zeizongte kal tak in kan zulh, a rian kan tuan ti khi an si!
Hi kong hi atu lio India ram ah an buaipi ngaingai mi thil pakhat ah a hung cang. Nuhrin covo lei riantuantu hna nih "an fanu covo an buar" tiah an mawhchiat hna. Biaknak lei minung cheukhat nih "pathian caah hi tiangtiang tuah a herh lo" tiah an mawhchiat hna. Cu lak ahcun a naupa pakhat Pu Sandeep Rathore nihcun "kei cu ka nupi, ka fale le ka nu le pa ka dawt tuk hna caah hi bantuk thil hi cu ka tuah bal lai lo" tiah media sin ah a chim.
Pathian caah caan pek, Pathian riantuan kan timi kan chungkar caah rawhralnak chuahpitu a si ahcun cucu Pathian duhmi a si hnga maw? Mah chungkhar nih a herhmi tawlrel piak i mah le fanu fapa hnangam tein chiah tim loin Pathian caah kaa pe ti hi Pathian nih a uar phun si ve hnga maw?
Kan hnu kum ah khan, atu lio Lai miphun lakah Pathian mihman pakhat pakhat zong a simi, ka hawipa nih "ka kawi, Pathian caah i manh lo taktak in ka um; kan nu he thit-umh puai kan tuah thaizing in khua dang camping tuah ah ka kal tak. kan i umh in tu ni tiang hi kan nu sin ah pehtlai in zarhkhat hmanh ka um kho bal rih lo" tiah a ka ti.
"Ka kawi, naa tthinh a hau. Atu ning in Pathian rian ka tuan tiah khua dang i na kal peng ahcun nan nu nih Pathian hi khua dang lawng ah a um rua tiah a ruah te lai" tiah ka leh.
Ka hawipa sual ka phawt nak si loin Lai miphun lak ah a ummi thil langhter ka duh caah a si. Pathian riantuan ruang i chungkhar kal tak poh a sual ka tinak a si hrimhrim lo. Nain kan chungkhar zong ah Pathian hi midang chungkhar, biakinn, khua dang le ram dang lawng ah a um rua, kan nih chungkhar chung ahcun Pathian nih rian a ngei rua lo tiah an ruah sual tawn.
Pathian riantuantu nupi le fale cheukhat nih "Pathian hi chungkhar a daw lo tukmi Pathian" ah an ruah cang. Lenglei mission rian le thawngthachim a biapit tluk tein chungkhar ah pa bik le nu bik nih kan tuanvo tlamtlinh hi a biapi tuk vemi a si!
1 Timithy 3:5 ahcun "A chungkhar hmanh tha tein a kilveng lomi cu Khrihfabu hruaitu ah aa tlak lo" tiah a ti. Cucaah biaknak lei rian a tuanmi zumtu poh nih Pathian ca kan caan pekmi le chungkhar ca kan caan pekmi aa balance maw? tihi check peng a hau.
A nupi nih a thlacam le a thawngthachim sunglawi le thlumel in a ngeih piak khawh ti lomi Pathian riantuantu cu a chan, a lar caan a sau lai lo.
Lesson of the day,
Hrambik Lian
