Baibal Cang: Matthai 11:28-30, Isai 40:29-31
Derek Anthony Redmond timi pa hi Great Britain a si i tlik a ṭhawng ngaingaimi a si. World Championships, European Championships le Commonwealth Games tehna zongah sui medals a hmumi tawntu a si. Derek cu 1992 Barcelona Olympics lio ah metres 400 tlik zuamnak ah a zuam ṭhan i, a tlik in metres 150 hrawng a vun phak in ruahlo piin orhlei ke thahri a cat i a tli kho ti lo. A vun i hrim ṭhan i a dir kho na lo tein. a dir chih i, ke khat in a hawile cu a dawi ṭhan ve hna.
Cu bantuk i a thahri a cah le a celh ti na loin a thawh ṭhan i a ke khat tein a tlik ṭhan cu a hringtu a pa Jim nih a zoh khawh ti lo caah tlik zuamnak tual chungah ahcun a fapa Derek sinah cun a va tli. Security pawl nihcun an rak kham len nain a hnu ahcun an thlah ṭhan i, a fapa cu a liang in a hruai i a tlik pi. Cuticun an pafa in an tli i ṭha tein Metres 400 tlik zuamnak cu an chuak khawh. Olympics a zohmi minung 65,000 renglo nih an dirpiak i lunglawmhnak le upatnak in an kut an pekpiak. Derek nih pakhatnak hmu ti lo hmanhselaw tlik zuamnak cu tha tein a chuak khawh i, minung a thawngthawng nih lunglawmhnak le upanak an pek i thazaang an hmuh. Derek cu nihin ni tiang a kong chim a dai lo i, amah bantuk a rak tuar vemi hna caah thazaang petu bik ah a chuak.
¤ Zumtu Hna Nunnak Ah;
Nifate zumtu hna kan nunnak hi tlikzuamnak ah a tli lengmangmi bantukin (1Kor 9:24) kan si. Cu bantukin nifate zumhnak in kan tlik lengmang lio ahhin a chan ahcun zawtfahnak le i khondennak, ngeihchiatnak le lungfahnak tampi kan tong tawn i, kan lamthluan hi pekzulh kho lo ding tiang dirhmun kan phan tawn. Kan sianginn kainak ah siseh, kan rianṭuannak ah siseh, kan chungkhurkhar ah siseh, kan khrihfabu ah siseh, kan nungak tlangval kongah siseh, zeidang a phunphun ruangah siseh tuar khawh lo le in khawh lo tiangin fahnak le ngaihchiatnak kan ton caan tampi a um tawn. Hi vawlei nih a kan pek khawhmi cu lungfahnak le ngeihchiatnak lawngte an rak si pinah kan ralpa Sata hrimrhim cu Pathian fale hna hi a phunphun in fir, hrawh le thah dingin (Johan 10:10) a kan dawi lengmang. Cucaah minung leicun tuar khawh le tei khawh hi a har hringhran ko.
¤ Rethei le Thilrit Vialte Hna;
Sihmanhselaw cu zumtu hna nihcun kan harnak le kan ngeihchiatnak vialte a an tuarpitu, a kan bawmtu le a kan teipiaktu Jesuh Khrih kan ngei. Jesuh Khrih cu kan hawikom ṭhabik zong a si i, kan Bawipa le kan Pathian zong a si. Jesuh nihcun zeitlik hmanh ah a kan kaltak bal lo i, a dawtmi a fale hna cu a kan umpi zungzal ko. A kan bawmh zungzal i thazaang a kan pek zungzal ko. ''A dermi le a bami kha thazang a pek hna'' (Isai 40:29).
Sihmanhselaw zumtu tampi cu kan harsatnak le kan retheihnak vialte hi kanmah nih kan i phurh dih tawn. Kan tonmi harsatnak vialte hna zong hi kanmah tein tuar kan i zuam tawn. Cu tikah minung kan si caah kan tuar kho tawn lo i, kan phur kho tawn lo caah vawleicung nun hmanh zuam lo in kan nunnak tiang hna a dih tawnnak a si.
Cucaah kan Bawipa Jesuh nihcun ''Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang,”(Matt 11:28-30) tiah a ti, Amen.
¤ Hawidawt Hna;
Vawlei cung a si caah le minung kan si caah kan thih hlan loin hi vawlei harsatnak le ngeihchiatnak, lungretheihnak le khuaruahhar vansannak hna zong kan tong lengmang rih lai i ahohmanh nih kan hrial kho lai lo. Chungkhar zong bauinak a chuak lai i Khrihfabu buainak a chuak peng ko lai. Kan rianṭuannak, kan sianginn kainak le kan umkalnak hmun kipah buainak zong a chuak peng ko lai. Sihmanhselaw zei kan tonmi kip le kan umkalnak kipah Jesuh Khrih he kan tuarṭi i, kan kal ṭi a si ahcun zeizongte ah kan tuar khawh ko lai. Jordan tilet tho hmanhselaw lunglawmhnak in kan tan ngam cang lai. Sihmanhselaw Bawipa a bochanmi cu thazang thar an la. Mupi bangin an zuang lai, an tlik tikah an baa lai lo, an kal tik zongah an tha a di lai lo (Isai 40:31) Amen.
¤ Khrihfa Hla No.307
Kannih kan sual sifah ingtu kan hawi Jesuh a si lai, Pathian sinah kan duh vialte hal ahcun a tha dah ngai. Hnangamnak tampi um in fahnak ngaihchiatnak kan huah kan duh duh vialte Pathian sinah hal loin kan um caah.
Bawipa nih hnangamnak le daihnak in pe ko hna seh.
Sang Nawl
Gospel Revival Ministries
Email: gospelrevival2012@yahoo.com
Facebook: Nitin Thlarau Rawl
Phone : 0045 51 27 85 68
