Mi tthenkhat nih "Love Song hi a sual, sak ding a si lo." tiah kan ti hlei ah Love Song a satu pawl hi a sual ngaimi hmuh in kan hmuh hna. Nain kei nih cun Love Song sak hi a sual in ka hmu lo.
#_Aruang: Love Song ah kan hmuhmi cu:
aa duhmi le aa duhmi karlak i i dawtnak hla, i ngaihnak hla, ngaihthiam i halnak hla, lungfahnak hla, i lungsaknak hla etc te pawl hna hi an si. Hi pawl hi a hla in kan sak lo zongah bia in kan chim pengmi an si. Kan duhmi hna sinah "Kan duhtuk, kan dawttuk, kan tlaihchantuk, nang lo cu ka nun a nuam lo, kan ngaituk etc, tiah kan chim i, i phiatnak a um tikah maw asilole i duhnak karlak i tlam a tlin lo tikah "Ka ngaithiam, ka palh, etc" tiah ngaithiam kan i hal. Kan tlamtlin khawh thai lo tikah i lungsaknak bia kan chim. Hihi mi zei paoh nih kan duhmi hna sinah kan chimmi a si i, nupi pasal a ngei rih lomi Pastor te hna le Pathian rian ttuantu zong nih an duhmi hna sinah an chim pengmi a si.
Hibantuk in kan chimmi bia pawl kha SOLFA an bunh i, hla in kan sak. Cucu a si ko. Bia le hla cu aa khatmi an si, aa dannak pakhat bel cu hla cu SOLFA in a kal. Sicun abia in chim le a hla in sak cu zeidah aa dannak a um hnga? Hla cu bia a si ko i, solfa te nih khin a hei danter ko le, sicun solfa maw a sual ne hnga? Solfa hi a sual a si ahcun Pathian hla zong solfa in a kalmi a si ko i, Pathian hla zong a sual ah a tla hnga.
Bia in chim vial ah a sual loin hmuh, hla in sak vial ah a sual in hmuh. Muslim pa nih "Voksa ka ei lo, a haang lawng ka din." a timi he aa khat ngai. Love Song hi a sual kan ti a si ahcun nu le pa karlak i duhdawtnak bia chim zong hi sual a si ve tinak a si hnga. Nu le pa karlak i duhdawtnak chim hi sual a si lo ahcun Love Song zong hi a sual lo ti a fiang.
Mi tthen nih cun Love Song a satu pawl an thang kan chiat hna i, kan soi hna. Love Song a satu an nun le a soitu kan nun a cuai vun thlai ahcun a soitu hi kan rak sual deuh. Zeicatiah bible nih mi va soi hlah a ti (Matthai 7.1) Love Song sak nak in mi va soi le, an chiatnak va chim te tu hna hi kan doh deuh awk cu an si.
Love Song sak hi kan duh lo a si ahcun sak lo tein kan um ding a si ko i, a satu pawl kha kan va soi len hna ding a si lo. Cu ve bantuk in Love Song sak a duh lomi pawl hna zong kha kan soi ve hna ding cu a si ve lo.
DUHDAWTNAK BIA + SOLFA = HLA (love song)
Duhdawtnak bia chim a sual lo, Solfa zong a sual lo. A sual lomi veve an si caah a fiangtukmi cu Love Song hi a sual lo tinak a si. Tinchia a cawngmi nih cun "+ x + = +" hi kan hngalh ko lai. Mah bantuk cu a si. Cun a sual lomi hla a si caah a satu pawl zong hi Love Song an sak ruangah an sual lo ti a lang fawn.
Pumpak Hmuhning
By- Fambawl Ro Lan
