...
...
...
1. Zisuh min in hnam kan tthawlnak kong hi zeicadah ka rak thlak (post) tiahcun (a) Pathian fale hna hi hnam nih a kan ttih tuk i Zisuh nih nawlngeihnak a kan pek mi kha kan hman tikah khawchia thlarau cu an zaam taktak ko ti mi kha theih cio hna seh ti kan duh hna. (b) Cun mah hi nu, a tuah tu hnam kan tthawl piak tik ah hin, mah hi nu te a thei mi zong nan um lai caah, hi minu te hi zeitlukindah Pathian nih a dawt ti hi nan rak theih cio i a chungkhat hna nih Pathian sinah lunglomhnak nan chim ve ding asi ti kha theih ter kan duh hna. (c) Midang zong khawchia le hnam nih an tuah hna i lungrethei in nan um ahcun kei mah sinah nan rak rat pi hna i Khrih min in kan thawl tti cio hna nak hnga caah a tthahnem lai ti mi saduhthahnak hna he ka van post mi asi.
2. Kan theih ding ah ka deuh mi cu hi hngakchia nu hi, a mah hi hnam ngei mi asilo. A nu le a pa zong hi hnam ngei mi an si lo. Kan mah chungkhat an si. Hnam ngei mi midang nih an tuah mi tu khi asi. A chim mi bia hi a mah bia an si lo. Achung i a um rih mi hnam nih a chim mi bia asi. Nau kan ngeih ka asi caah umpitu kan herh tuk hringhran i rak kan umpi ding in zaangfah kan nawl mi khi asi.
3. Aluan cia mi kum thum, tthla can ah khan kei kha Korea ah ka rak kal. Cu lio ahcun a chung ah hnam a lut tawn i, zaan ah khua lak hna ah tlik ai tim, thlalangawng hna in zuan ai tim, a caan ah thi deng hna in a ai hraam. Cucaah kan Baibal siahngakchia Pali nih zan var in an cawng zungzal. Kan nu le Korea pastor pa nih thla an rak camh piak i can tawi te cu a ttha.
4. Korea in Ka tlun hnu ah cu ti cun a um tthiamtthiam. Sinpaku Clinic i a tthu mi Thinlung le Thluak lei sibawi sinah ka kal pi. A pek mi si a din poh ah a zual tu in a zual chin. North Okkalahpak Sizungpi ah ka kal pi i an kan riak ter. Sizung ah zaan ah a tap, a au, a khuang, sayamah te zong thongh dih a timh hna. Zeiti ti awk an hngal hlei lo. A hnam a chuah caan ahcun a dam mi te a lo fawn. Mi sin um asi caah khan sibawi te nih hi nu hi, nan um nak hna nih an in daw maw? An in vel maw? ti te hna kha an hal i kan mah inchungkhar cung tu ah khan lunghrinnak an kan ngeih. A chung le nih an velh nak ah a lu hna a kuai maw an ti le a lu x-ray hna a lak, a keruh x-ray hna an lak. A ttha dih fawn. kan mah inchungkhar leh lam tu kha palik nih check dingin khua an khan. An pek mi si-ai kha a caah zeihmanh a tthathnem hlei lo caah sizung in ka chuah pi.
5. Hnam hi a chung ah a lut peng lo. A luh caan, a chuah caan ti khin a um. A luh caan cu a mah te lawng a ih i ai hngilh caan ah khin asi. Asinain a mit a ku peng. A ih i ai hngilh can poh ah le a lut peng fawn. A kio i a raak tawn i kan zuan hnawk lengmang. Thla kan cam, a chuak, cun a lut tthan lengmang i cuticun zarh thum chung cu kan buai. Kan mah zohkhenhtu le bawm tu ding ah kan i cah mi cu a mah kong tu ah cun thi deng in kan buai. Cun hi hnam hi hnam zir a si. Kei mah a ka hmuh bak ahcun a rannak in a chuak le biahal awk zong a ttha lo. Hnam nih a chuahtaak tikah a tha a dih dih. A paw a faak pah tawn.
6. Voikhat cu hnam a chung i a luh i a kio a raak lio ah khan ka siahngakchia kha sur in va khuh uh ka ti hna. Kan Baibal siahngakchia hi a ttih hna lo. Zei ruang ah dah asi hnga ti cu ka thei ve lo. Cuccuah a sin i an va luh zongah hnam kha a chuak lo i, sur cun an va khuh. Culio cu rian ka ttuan lio asi. A lin tuk i angki lo in rian ka tuan lio asi. Cucuuah video ah khan angki zong kai eih manh ti lo i angki eih lo in nan ka hmuhnak kha asi. Zisuh nih Sabbat nih ah mizaw a dam ter tikah mizaw dam mi cung ah Pharasi pawl i lawm lo in, a sabbat ni ruang tu i an buai bantuk khan, kan Laimi micheu cu hi nu a damnak kong ah i lawm lo in, angki kai eih lo mi kongah nan rak buai ve. Pharasi nan lo. Angki kai hruk lo zong ah Pathian nih ka thlacamnak a theih ahcun a zaa ko lo maw? Angki kai hruk lo zongah Zisuh min in khawchia kan tthawl khawh ahcun a zaa ko lo maw? A context thei lo in nan rak au cio ve.
7. Sur in kan khuh hnu ah ka duh mi hnam kong vialte ka hal dih khawh. Practical Demonology study tuahnak caah a ttah taktak mi a si. Baibal siangin zong i ka cawn bal lo mi ka cawn khawh. A chung i hnam a luh lai poh ah hin kan uico hi an zaapi te in an bo, an ttap. Hnam a chung i a um lio ah khan ka hal i, hi nu sin i na luh lai ah hin na rat lio kha kan uico nih an in thei maw tiah ka hal. "Minung nihcun nan ka thei lo, uico nih cun an ka theih le an bo peng", tiah a ka leh. Zeibantuk uico, a nu zeizat, a pa zeizat, zeibantuk zawng ti pawl ka hal mi vialte hi hman te in a chim khawh dih. Zeiruang ahdah na tuah ti te hna, zeidah na ttih mi asi ti te hna, zeidah na ei duh mi asi ti te hna tling tein ka hal dih.
8. A donghnak ahcun video ah nan hmuh bang khan khawchia rap chung in luatnak a hmu thai. Hi nu te hi kan sin a um chung ka zoh lengmang tikah mittha, mifim, mi ngawlngai, midawh, mitluang te khi asi. Hnam hi kei mah thazaang le fimnak le degree in ka tthawl khawh mi asi lo. Zisuh nih chawchia cungah nawlngeihnak a kan pek mi tthawnnak kha kan hman i a mah sunparnak caah a mah min tthiamtthiam in kan tthawl mi asi. Hi nu te zong hi nangmah le keimah bantuk mi ngandam, mi luat Khrih min in asi ve cang. Pathian cu a ttha, a min cu zungzal in a thianghlim.
Lomhnak he
Aung Myint Thang
Online Evangelist and Demonologist
Lungler
