Voikhat cu inn pakhat a kaang. Khuate asi caah ‘mi-tat’ zong cu an um lo. Cu a kaang liomi innchung ahcun hngakchia pakhat a tap lengmang nain ahohmanh va luh i chanh awk a tha ti lo. A pa nih a ruahmi pakhat a um. Cucu, ‘ka fapa hi tangtla ko in mautlor saupi in ka sawh lai. A kut, a ke kiah sual zongah sizung ah ka thlop than lai, meikangh i ciam ding cu asi kho hrimhrim lo’ a ti i mautlor saupi cun a sawh. A fapa cu tangah a tla i a kut a kiak nain a dang zeihmanh aa khawng lo. Sizung ah an kalpi i a kut cu an tlop i a dam than,’ tiah catialtu pakhat nih a tial.
Pathian a zumlotu cu thil diklo an tuahnak thawngin an thangcho thluamah tawn. An sung tuk fawn lai lo. Asinain, Pathian nih a dawtmi a fa le cu sualnak chungah thih tiang iciah ding hi a kan siang lo. Sualnak kan tuah pengmi ah aa lawm lo. Cucaah, a kan chimhrin tawn. Cucu, zumtu le zumlotu kan idannak hmelchunhnak pakhat asi. Khrihfa kan si ve tung i thil diklo kan tuah caan ah kan inuam tuk, kan hlawh a tling tuk ahcun mah le mah lung ihrinh ding hmanh asi.
Baibal chungah minthang ngai asi nain an tuanbia dawh lo ngai in a dong mi hna lakah pakhat cu Solomon asi. Solomon cu kan theih cio bantukin mirum le mifim asi. Amah chan lio tlukin Israel ram hi a rum bal lo, a minthang bal lo i a ukmi ram a kau bal lo. ‘Fimnak’ timi biafang hmanh hi Solomon hlan ahcun theih balmi biafang hmanh a rak si lo. A mah chan hnu lawngin ‘fimnak’ biafang hi tampi hmuh khawh asi.
Zeiruangah dah a tuanbia donghnak aa dawh lo? Zeiruangah dah Israel ram tiang aa cheu? A ruang tampi lakah Solomon a sunghnak cu ‘chimhrintu a ngei lo’ caah asi. Fimnak le rumnak ah aa za. Cu vialte a petu Pathian a rak philh. David cu sualnak i a tluk caan ah ‘na palh hih’ tiah chimhrintu Prophet Nathan a rak um. Solomon chan ahcun Prophet aw an um lo. Pathian bia a ngeih lo ruangah Deuteronomy 17 ningin Solomon hi a fim bik asi, timi hi Baibal thiamsang tampi an lunghrin phahnak zong asi.
Solomon bantukin chimhrintu ngeih lo nakin David bantukin ‘na palh’ tiah ‘chimhrintu’ ngeih hi a tha deuhmi asi.
Nihin tiang, ka lawmh bikmi pakhat cu Pathian chitti thuhmi chimhrimtu “Na Palh Khah, Kha Ti Khan Tuah Hlah,” titu upa tampi ka cungah an um mi hi asi. Nu le pa ka ngeihmi hi an si. Chungkhar ka ngeihmi hi asi. U le nau, hawikom tha ka ngeihmi hi asi. Cu vialte hna cu Pathian nih a rak chiahmi lawngte an si. Phungthlukbia nih ‘chimhhrinnak a hua mi cu a kiak cikcek lai,’ tiah a ti.
Mipa nih a fapa meikanh in ciamviar nakin a kut a ke kiak ithlawp than a siang deuh bantukin Pathian nih a dawtmi a fa le cu sualnak, palhnak le thil diklo chung i a thlithup i kan umpeng nakin ‘na palh’ ti i chimhhrin a kan duh deuh ve.
‘Na palh’ tiah chimhrintu kan ngeihmi hi Pathian nih a kan dawt rih caah asi.
By Henry Nawlthangbik Hlawnceu
