Hi ka zawn ah Reverend ti mi biafang hi zeiruangah dah Thawngtha chim tu khrihfa bu hruai tu hna caah cun aitlak mi asi lo, hman awk a si lo ti ka zumh nak tlawmpal te langhter ka vun duh.
A hramthok i Reverent ti an rak hman mi hrim hi a rak palh cang: Hi Reverent ti rak hman nak hi Ireland in Roman Catholic biak nak in a thok i cu cu England Protestant biak nak zongah 1865 hrawng ah a rak lut ve.Cu hnu zongah cun hi Bible ning a si lo mi Reverend hman ning hi American khrihfa bu chungah a phan ve. Hi Reverend ti mi Bible ning le asi loah Lamkaltu hna chan or caan ah an rak hman bal lomi a si. Reverend ti mi biatlang(title) hi Roman catholic in a thawk mi asi ii, hngalh set sai loin Protestand biak nak chungah a rak luh ve caah, minung ii cawisannak, Minthat nak le upat nak caah an hman.(by CV JOHN)
Hi Reverent ti mi hi Biakam thar chungah mah biafang a hman mi hi kan hmu lo cu ve bantuk thiam thiam in Lamkaltu hna zong nih an hmangbal lo ii an mim hmai zong ah kan hmu bal lo). Peter nih a hawi le sin ah bia a chimlio caan zongah Reverend Paul a ti bal lo i, Kan Pa Paul a ti bal lo, Reverend Dr. a ti bal lo a si nain kan dawt mi kan unau Paul tiah a hman ( 2Peter 3:15).
Phungning te cun Reverend ti hman ning hi Bible nih a pom lo. Jesuh nih Farasimi le phunthiam hna sin ah biafak tein a ti mi hna cu “ Zeipoah poah kha mi hmuhnak ah aa rem lo lawng tein an tuah, an cal i an i khih chih mi cathiang bia khumhnak bawmte khi zeitluk in dah an ngan i an puanki khi zeitluk in dah an fual, zoh hna hmanh uh! Rawl dum nak hmuh ah upat nak hmuh i thut kha an duh i pumh nak in ah thut nak ham piak kha an ngen. Zatlang lam ah mi nih upat nak in upat nak kan pek hnaseh ti kha an duh i ‘saya, saya’ ti khan a tlaihchan. Sihmanhsehlaw nan nih cu Saya ti kha va duh hlah uh, zei cahtiah Saya cu pakhat lawng hi nan ngei i nan dih lak in u le nau nan si.Cun vawlei cungah hin a hohmanh ka pa tiah va ti hlah uh, zeicahtiah pa cu pakhat lawng lawng nan ngei i a mah cu vancung khua i a um mi a si. Hruaitu ti zong hi duh hlah uh, zeicahtiah Messiah lawng lawng hi nan hruai tu cu a si ko. Nan lak i a ngan bik cu nan sal a si awk a si. Mah le mah a ngan ter mi cu thumh an si lai i mitoi a dormi cu mingan ah ser an si lai tiah a ti” ( Matthai 23:5-12).
Khamhtu Jesuh khrih nih a mah le mah a cawi sang i zumtu unau hmai ah a ngan ter mi cu sual a phawt hna, Hi tlangtar pi hi Jesuh Khrih a sining he a ralchan mi a si. Hi bantuk tlangtar dduh nak ngeih zong hi Jesuh nih a duh lo mi a kham mi a si.
Reverend ti hi a donghnak bik Efesa khrihfa bu chung Pathian rian tuan tu hna sin zongah kan hmuh lo.Efesa hi A.D 61 hrawngah an rak tial i, Efesa 4:11kan rel tik ah a tial mi cu : Mi kha laksawng a petu hna cu a mah ( Khrih)kha asi, a cheu cu lamkaltu ah a ser hna i a cheu cu profet aha ser hna, a cheu cu thawngtha chim tu ah a ser hna i a cheu cu pastor le cawnpiak tu ah a ser hna.Khrih pum kha than ter awk ah Pathian mi vialte cu hi bantuk in Khrihfa rian tuan awk ah a timh hna.
Kan hngalh dingmi thil pakhat cu Special chan le caan lio ah Pathiannih Special in minung hna athimhna ii Special in thawnnak, thil tikhawh nak arak pek hna tihi kan philh lo ding asi. Cu caah nihin Pathian riantu hna nih hin hlan lio lamkal tuhna le Pathiannih arak thimmi hna bantuk in, Thawnnak, hmuhnak(prophecy), damternak(healing)hna hi kan ngeih ve hrim lai ti i ruat ti hlah uhsih. Abia ah a tling cang cucu na Zumh ah cun ti kha asi cang.
Ni hin Pathian rian tuantu hna hi BAWIPA SAL TU KHI kan si(we are the servant of God).Cu caah REV tihi cu silo in khrih sal asiloah Khrih ah kan Unau ti hi kei cu kaduh deuh i ka uar deuh ii ka siarem deuh fawn.
Ca reltu nan zate Baawipa nih thlauchuah in pe ko hnaseh Amen.
Khrih ah nan Unau
John F.Thawng
Zeiruang Dah Ka Min Hmai I Reverend Ti ka sia arem lo?(OR)
Zeiruangah Fah Ka Min Hmai Ah Khin Reverend (Rev) Hi Ha Hman Ngam Lo?
