I RALRING TUAH‼ Tangka Duhnak Nih Na Nunnak Le Na Thlarau A Hrawh Cang Lai Kha! Pastor Sang Nawl

1 Timote 6:10
’’Tangka duhnak hi that lonak phunkip chuahnak hram a si. Mi a cheu cu tangka ngeih an duh caah zumhnak kha an kaltak i ngaihchiatnak a phunphun an tong’’. 

Malaysia ka um lio ah Company pakhat ah Supervisor  ka rak tuan i, thlakhat ah RM.3000 hrawng lahkhah an rak ka pek i, cu lioah cun a rak tam ngaingai. Pathian zangfahnak in kan Company nih Sudan-Africa ah  rian a ngeihmi a um i, an ka thlah ve i ka rak kal ve.   Sudan ahcun lahkhah a tam deuh pinah kan lahkhah chungin fangkhat hmanh kan hmang lo. Cucaah  RM.30000 thawng sawmthum hrawng ka van phurh. Cu lio cu 1998 hrawng a si i, tangka man a rak ngei ngaingai.  Asinain  ka thinlung ah tangka duh chihchinnak le haukaunak a rak chuak sual i, ka ngeih chunmi  tangka cun thil tihnung tukmi ka rak tuah. Computer le zeidang seh thilri RM.12000 in ka cawk hna i, Kawlpa computer a thiam taktakmi RM.8000 in ka hlan i,  Kuala Lampur khuachung inn dot kulnak ah inn a floor ningin  thlakhat ah RM.2000 in ka hlan. Cuka ahcun keimah le Kawlpa lawng te cu zan fate in Permit a tuh pawl kan tuah. Cu lio cu Refugee tuah a um hlan a si caah, permit tuh dih rak i tuah a si i, ahopaoh nih rak tuah a si. Cucaah tangka hmuhnak ah a rak tha hringhran. Cun hman khawh dingin kan van tuah khawh cun,  zankhat lawngah RM.5000 hna ka hmuh. Thla khat hnih chung caah cun tangka lut cu a tha taktak a si.  Asinain  . . . cu tangka vialte cu an thla a corh ciamam i khawika an zuan le an tlak manh zong ka theih kho hna lo. Cu tangka vaihfuanhnak nakin a poi deuhmi cu..........

Kan Lai phungthlukah ’’Mfir cu doi loin an zam’’  an ti bantukin, keimah tein kan thinlung le ka ruahnak cu ahohmanh doi loin ka zam thluahmah ve. Zeitikdah Police he kan i ton lai i, zeitikdah ka inn ah an ka luh hnawh lai  timi khua lawngte ka ruah cang i, keimahle keimah ka phahrung  cang.  Zan ka ih zongah cu rumro ka ruat i, chun i Company riantuannak ka um zongah ka mitthlam ah tangka le Police lawngte an i pai cang.  Kan hawile Lawmi a tuah vemi dang pawl zong an van tlaih thluamah hna i kum hra reng lo thong an van thlak hna cun ka chung thlarau zong a chuak deng mang cang.  Cu nihcun .....Ka theih lo kar tein Pathian he kan i pektlaihnak le ka thlarua thazang vialte cu a hrak hrawh dih i, thinphan le lungrehteihnak nih ka nunnak cu a van uk cang. C u hlan ah zingzan in thlacamnak ka rak ngeih tawnmi le zarhkhat chung hna rawlulh thlacamnak ka rak ngeih tawnmi vialte  kha , cu hnu cun ka tuah kho ti lo.   Ka hngakchiat tein zu ding, kuak zu le hawi he a sivua balmi ka si lo caah, ka tuah sernak le ka lenglei in soisel awk le theih awk a um lo. Keimah ka rak sining tein ka pum, mi ka bawmh chanh hna i, CCF le Khirhfabu ah Chairman hna, upa hna ka tuan peng ko.  Asinain mit in hmuh khawh lomi ka thlarau thla a ba i, ka  rak i lawmhnak le  ka hnangam vialte an lo dih cang. Cu hlan bantuk ka si ti lo.. ......Citicun kum hra renglo ka um hnuah Bawipa nih a ka siang lo i,  a thar in a riantuan dingin a van ka auh than.. Bawipa min thangthat si ko seh.

Cu bantukin mi tampi cu tangka nih sal ah a thlak hna i, bawi nih a salpa duhpoah in a tuah bantukin tangka duhnak nih a duhning poah in a kan tuah cang. Tangka kan duh  tuk ruangah thil zong kan fir, thil thalo tampi kan tuah i riantha lo tampi kan tuan, chaw kan let,  minung caah tih a nung tukmi ritnak sii phunkip kan zuar, damiah kan taih i, mi thah tiangin a poi ah kan ruah ti lo.  Tukum CND lioah kan khuapa cu Hakha ah a rak ra i, a fale nih tangka tampi an kuat kha a theihmi an um caah  a thli in an dawi i, nam in an sawh i a zal chung i tangka tinghra an lak piak. Pathian nih a zangfah i a numnak bel a dih lo.

 A poi tukmi cu zeidang chim loin Pathian chaw Khrihfabu tangk hmanh duhpoah in kan suaksam ngam cang.  Pathian nih keimah ta si tiah tha tein a kan chimhmi Cheu hra cheu khat hmanh kan fir ngam i, kan pek duh ti lo. Cucaah Pathian thluachuahnak  kan don lo pinah, a hrinthan cangmi hna zong  kan thlarau thazang  than lei panh ti loin, a zaw i kumkhat hnu kumkhat in a der thluahmah cang.  Cucaah tangka hi kan kawl khawh chungin kawl ding le rian zong kan tuan khawh chungin tuan ding kan si ko nain  a hmanlo ning le  a silo ningin tangka kan kawl i kan hmuhmi hi a thalo i tih zong a nungtuk. . Inn thatha le lo thahta zong cawk i ngeih ve ding kan si. Kan umnak ram ah hawi bangin mawtaw thatha hna zong kan i cit ve i,  thilpuan thatha hna zong i hruk ve ding kan si ko. Sihmanhselaw  cu hna  ahcun kan thinglung lekan ruahnak kha kan chiah dih awk a si lo i, a za tawk te tu kha theih ding a si. Kanmahle kan sikawh tawk le thianghlim tein kan hmuhmi ahkhan  i lawmh ding a si. A herh lo le hlei hluat i, thilta lo tuahnak in tangka le chawva kan kawl ding a si lo.   Cucaah Timote cakuat ''Tangka duhnak hi that lonak phunkip chuahnak hram a si. Mi a cheu cu tangka ngeih an duh tuk caah zumhnak kha an kaltak i ngaihchiatnak a phunphun an tong'' tiah a ti. Bawipa nih tangka duhtuk nakin Amah tu kha kan duh deuhnak dingah thluachuahnak kan pekpiak ko seh. Amen.

Hawidawt hna, Tangka duh tukmi na si ahcun tihin thla rak cam ! Bawipa tangka ka duhnak thinlung thalo vialte ka lakpiak dih law, tangka nakin Nangmahtu kan duh deuh i kan tlaihchan deuhnak ding  le Paul bantukin ka ngeihmi chun teah lunglawmh ka thiam khawh chungnak dingah na Thiang Thlarau thawnnak in ka bawm ko sawh tiah Jesuh Khrih na min thawnnak in thla ka cam’’ tiah thla rak cam te.   !!Share rak tuah ve te!!!

Catialtu: Pastor Sang Nawl