Tulio cu doctrine (trinity le oneness) kong bia i alnak a tam ngai ngai. Ka timeline ah a tu le tu a lang i hitihin kei nih ka hmuhning ka hun langhter ve. A tang caa tawite hi van reel ve ulaw doctrine kong i alnak hi rak ngol cang uh.
Doctrine timi cu minung pahnih nih cafang pakhat an hmuh i cu an hmuhmi cafang cu an hmuhning aa lo lomi he aa khat. Pakhat nih "W' a si" ati i pakhat deuh nih "M' a si" tiah a ti ve. An hmuhning aa dang. Pakhat pa ca ahcun amah hmuhning kha a dik i, a hawipa hmuhning kha a palh, asinain pakhat deuh pa ve ca ahcun amah hmuhning kha a dik ve i a hawipa hmuhning kha a palh ve. Zeiruang ah an hmuhning aa dan ti ahcun an umnak hmun aa dan caah a si. An umhmun le an hmuhmi cafang zoh tikah ahohmanh thiamcoter awk le palh phawt awk an ttha veve lo. Zeiruang ti ahcun cu an hmuhmi cafang cu "W" maw a si "M" ti cu a ttialtu pa lawnglawng nih a hngalh. Cucaah ahodah a palh i ahodah a dik ti cu a ttialtu pa an hmuh tik lawng ah an hal lai i a fiang te dingmi a si.
Cu ve bantuk in doctrine zong hi kanmah le doctrine cio kha a dik bik cio ko i midang doctrine kha kan caah a palh cio ko. Amahbelte cunglei in kan hun cuanh a si ahcun cafang pakhat a hmumi hna pahnih bantuk khan kanmah hmuhning a dik ruang ah midang hmuhning kha a palh ti awk a ttha lo. Cucaah trinity maw a dik oneness dah ti cu cafang a ttialtu pa kan hmuh tik lawnglawng ah a fiang te dingmi a si. Cucaah nang na palh, kei ka dik tiah i al awk a ttha lo. Baibal chung i aa ttialmi paoh paoh cu chim deuh deuh ah chim ding a chuak chin lengmangmi a si caah kan i al deuh deuh lai i a phi hmu ttung loin kan ttanhmi doctrine kong chimding tu kha a chuak chin lengmang lai. Cu nih cun dawtnak le remnak chuahpi loin huatnak, thinhunnak le i komh khawh lonak tu a chuahpi lai. Cucaah a herh lomi kong i al len nakin Pathian nih zeitluk in dah a kan dawt timi kong tu kha chim hna usihlaw Pathian zong aa lawm deuh lai. Doctrine cu vanram kainak zong a si lo, Pathian lunglawmhternak zong a si lo. Baibal kan reel i Pathian kan hei hmuhning sawh sawh lawng a si. Cucaah a herh lomi ah i al len loin a herhmi Pathian dawtnak kong tu kha kan chimrel deuh awk a si.
Lung sau in ka caa nan ka reelpiak caah kaa lawm. Pathian nih thluachuah in pe ko hna seh!
-Ro Lan Fambawl
