Buddha biaknak ningin Laimi cheukhat nih minung le saram cu aa khatmi thlarau ngei in ca an rak ttial. Saram cu a thih tikah leidip ah a kir i, thlarau nung or thlarau thi kongah bia-al len awk a um lo. Minung cu a thaw a dih tik poah kha a donghni a si ko, athi kho lomi thlarau a ngei lo, tiin Buddha biaknak nih cun an zumh (Buddhist nu pakhat nih a zumh ning a chimmi). Laimi chungin Buddha biaknak pomning aa hrawmmi um dawh kan si?
http://www.thechinnews.com/minung-nih-thi-kho-lomi-thlarau-kan-ngei-lo/
http://www.thechinnews.com/minung-nih-thi-kho-lomi-thlarau-kan-ngei-lo/
Genesis 2:7 ah, “Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung” tiin kan hmuh. Pathian nih a chuahhnawh mi thaw hmangin mipa cu a hung nung tinak a si. Cu thaw cu a thi/loral kho ma kho lo?
Acunglei Link ka rak chiahmi ah ka relmi cu, “Pathian nih thaw a kan pekmi a dih lai i khikhi kan thih cu a si ko, kan thih cun zei thlarau cu dah a um ti hnga … Soul = Spirit timi zong cu kan thih cun a dih ve ko lai” ti a si. Phundang in chim cun, Pathian nih minung cu leidip in a ser i nunnak petu thaw kha a har chungah a chuahhnawh. Cun, mipa thaw cu a dih tikah a thi, a thaw cu a dih ve an ti ahcun, thawh tthannak ah a tho tthanmi cu amah kha si ti loin midang piin a tho tthan lai an ti he khin aa khat bakmi a si?
Pathian nih minung cu leidip in a ser i, a thih tikah a takpum cu leidip ah a kir tthan lai, ticu biafiang le biadik a si (Gen. 3: 19). Asiah, Pathian nih nunnak petu thaw, mipa hnar ah a chuahhawh mi kha Pathian sin kir loin maw a loralh beh kun lai? Matthai 16:26, “Mi nih hin vawlei pumpi hi co hmanh seh law, a nunnak a sungh ttung ahcun zeital a miak hnga maw?”? Mirang Bible ah a fiang tuk hih, “And what do you benefit if you gain the whole world but lose your own soul? Is anything worth more than your soul?” (NLT).
Taksa thihnak timi sullam hi “takpum le nunnak thaw or thlarau tthennak” kha a si. Biakam Hlun ah ‘Verb’ le ‘Noun’ in voi900 ringlo a hman. Biakam Thar ahcun, ‘Verb’ in voi75, phundang deuh in voi7 ahman hnu ah, ‘Noun’ in voi115 a langhnak hmuh khawh a si.
Asiah, thihnak hi Bible nih zeitin dah a chim chap timi kan zoh hna lai. Thih timi hi ‘i hngilh’ tizong in Bible nih a hman. Biakam Hlun nih a hmanmi Hebrew biafang phunhnih nih thihnak cu ‘i hngilh’ timi sullam a langhter. Biakam Hlun chan siangpahrang an thih tikah, an pale sin ah an ‘i hngilh’ or ‘i din’ tiin a hmannak Bible cacang a tam ngai (1 Kings 2:10; 11:43; 14:20; 31; 22:40; 50; 2 Kings 10:35; 13:13; 14:29; 15:38; 16:20/ESV). ‘I hngilh’ timi Hebrew biafang nih a chimmi dang zoh chih tikah thlan ‘Grave’ he aa pehtlaiin thihnak kha a chim duhnak a si. Leidip ah kir i thlarau tlaulan or loralh lan or dih kha a chim duhnak a si hrimhrim lo. Minung kan thih hi kan donghnak a si lo, kan i hngilh i kan tho tthan te lai tinak a si deuh.
Biakam Thar ah Jesuh nih Jairus fanu a thih tikah, a thi lo, aa hngilh tiin a rak chim (Mark 5:39). Lazarus thihnak zong kha aa hngilh tiin Jesuh nih a chim (John 11:11/ESV). Paul zong nih athi ciami hna kha aa hngilhmi hna tiin a hman (1 Thess. 4:13).
Minung nih a thi kho lomi thlarau kan ngei maw, ngei lo? Leidip sermi cu leidip ah a kir tthan lai, Pathian thaw chuahhnawhmi zong Pathian sinah a kir tthan lai. Kan thi lan lai lo. Kan lo thai lai lo. Kan i hngilh tu khi a si. Kan i hngilh timi a sullam cu kan tho tthan te lai tinak a si ve. Kan thawh tik zongah kanmah tthiamtthiam kan si lai. Aa dangmi pakhat cu thihhlan pumsa le thawhtthannak pumsa cu a rawk khomi tiin le a rawk kho lomi pumsa tiin an i dang lai (1 Korin 15: 50-58; 1 Thesalon 4:13-18).
Note:
1. Hebrew le Greek biafang ttial chih awk ah, a ttialtu cale a rel tucaah hna a hnok deuh caah ka rak ttial lonak a si (Source ka hmanmi ah tlingten fianternak a um).
2. Zumtu le zumlotu thihnak le thawhtthannak kong aa dang tein ka ttialmi a si lo caah nan lung a buai sual nak hnga lo ka van langhter ta.
3. Source a check duhmi nan um sual ah pumpak in pehtlaih khawh ka si.
-Bawilianthang
