Nihin cu Bible ca ka rel. Bible ah aa tialmi le Laimi nih kan zumhning hi aa pialkal hlah maw, tiah ka zumh tete a um. Cucu, Vancung khua ah kai le kailo kong hi a si. Kan ngakchia tein kan rak zumhmi, "thih hnu kalnak cu, "Vancung khua a si lai tiah rak zumh pengmi hi a dik rua lo e! Pathian nih minung hi Vancung khua ah kai ding le Vancung khua ah khuasa ve te ding in a sermi kan si rua lo. Fiangte in chim ahcun, minung paoh/zumhtu paoh kan thih tikah, "Vancung khua kai" timi a um lai lo' tinak a si. Na thih tikah Vancung kai ding in na ruah ahcun, ka chim mi hi, "ah! a si kho lo tuk mi a si" na ti ko lai. Asinain palh sual a fawi hi mu! Bible hi thate in rel hna usih!
Khrifa a timi Laimi 100 chung ah 90% cu Vancung khua ah kaite ding in aa ruatmi kan si kho men caah, Vancung khua ah kan kai bak ko lai, tiah a zummi paoh nih, khawika dah vancung khua a um i, zeitik ah dah kan kai lai? Vancung khua ahcun, zeidah kan tuah lai? Vancung khua ahcun, a zungzal in maw kan um lai or caan zeimawzat chung dah? timi na zumhnak a ruang kha fiangte in comment ah rak tial ding in kan sawm hna.
Kan Bible cauk, "Genesis" in "Revelation" tiang ka relmi ah minung hi "Vanram" kai ding in Pathian nih a kan ser lo hi ta tiah biafunnak ka tuah. A ruang cu tulio kan umnak vulei (earth) hi a hrawh te lai i, zungzal kan umnak ding vulei (earth) thar a kan ser piak te lai. Phundang in chim ahcun, "Genesis" ah a sermi vulei ah minung a kan chiah i, "Revelation" ah a kan promise mi, Vulei thar ah kan itthial te lai tinak a si. Cucaah, Vulei hlun in, Vulei thar ah kan itthial te lai tinak a si cu!
Fiangkhun in ka langhter rih lai. Genesis ah Vulei hi a ser. Minung zong a kan ser. Vulei he minung he, thianghlim tein sermi kan si ko. Asinain Satan nih Addam a tukforh khawh ruang ah Vulei ah sualnak a tlung. Tulio kan umnak Vulei a hrawh hlan chung paoh cu, misual he, miding he, Satan le Khuachia he, vulei ahhin a kan umter. Tulio kan umnak Vulei hi Apartment building pakhat bantuk sisehlaw, mah building ahhin, Satan he, khuachia he, misual he, miding he cawh hrup in inn kan hlang ti tinak a si cu! Cucaah, vuleicung a buai tuknak hi a si.
Asinain Revelation cauk ah Pathian nih promise mi aum. Tulio ahcun icawh hrup in nan um ko lai nain, partment thar ah nan itthial tik ahcun, umnak a dangte in kan ser piak te hna lai, a ti. Misual le Miding kha hmunkhat ah a kan chiah ti lai lo. Cucu, tu le meheh tthennak timi kha a si. Miding/ zumhtu paoh cu Sui in sakmi, brand new apartment building ah kan itthial te lai i, Khuachia le Misual vialte cu "Hell" ah zungzal in thong a thlak te hna lai.
Hika zawnah biahalnak nan tuah khawhmi cu, Vulei thar ah kan itthial hlan ah a thimi vialte thalrau hi ta, khawika dah a um nan ti khawh! Brand new bak in a sermi, Sui le lungvar in a sakmi apartment/ siangpahrang inn ah kan itthial hlan ah a thimi vialte thalrau hna cu, "mithi khua" ah an um. Vulei thar itthial hlan ah a thimi thlarau umnak hi, khawika set ahdah a um timi cu hngalh a si lo. Pathian umnak Vancung khua cu a silo. Zeicatiah, mithi thlarau ahhin miding le misual tiah an um. A dingmi thlarau he, a sualmi thlarau he, hmunhma pakhat sermi ah an um. Asinain, cuka hmun chung ahcun, a dang te veve in an um. Miding le misual thalrau umnak karlak ah tiva hawrkuang thukpi/ ipal khawh lo dingmi nih a dan hna. Mah an umnak hmun, "mithi khua" hin caan aphak tikah an hung tho tthan ve te lai. Cucaah, zumtu hi Vancung khua kan kai lai timi hi a dik rua lo, Vulei hlun in, Vulei thar tu ah kan itthial te lai tinak a si.
-Za Sang
