Minung kan pum hi a thih cangka tein thlarau cu a chuak lai i, Vancung asilo ah Hell ah a kal colh lai tiah tampi nih an zumh. Laimi chung in mithi an um tikah topi an si. Laimi cu Khrifa kan si bantuk in Pastor asilo ah midang hnemtu hna nih mithi ruak cungah an chim bikmi cu, "a nih cu Pathian ttang cungah aa din cang" an ti. "Zungzal kan umnak ding, Vancung khua ah aa din cang" tiah an ti. Mithi chungkhar hna hnemnak cacun, bia dawh le biathlum-al ngai a si. Asinain mah ihnemnak hi Pathian's bia ning asilo caah ka sia a rem lo.
Minung hi kan thih cangka te ah kan thlarau cu "direct in Pathian sin/ vancung ah a phan ahcun, Bible hi aa palhmi a um colh tinak a si. Na thih cangka tein Pathian sin phan ding naa ruah ahcun, "Thianghlimhlawr" (1 Thessalonians 4:17) hi na zumh lo tinak a si. Ni dongnak bik Ni biaceihnak (Matthew 25:31-46) hi na zumh lo tinak a si. Zeicatiah, Pathian sinah a phan cangmi, Pathian ttang cungah aa din cangmi thalrau cu, zeitindah a biaceih a si ti hnga, zeitindah thianghlimhlawr cu a um thiam ti hnga. Cucaah, "thih cangka tein thlarau cu Pathian sinah aa din cang' timi bia hi a hman lomi cawnpiaknak a si. Asi ahcun, khawika dah thlarau cu a kal ne lai?
Van/ Heavens Kong
Jesuh a rak ttum tthan hlan ah a thimi vialte thlarau an kalnak ding "hmun" kong kan langhter hlan ah "Van" cung kong hi kan zoh hmasa lai. Bible chung ah "Van" kong hi tampi a tial. Van/ Heavens hi tampi an um. 1st Heaven, 2nd Heaven, 3rd Heaven tiah a langhter hna. Tulio Pathian a umnak "Van" khua hi, Bible ah "3rd Heaven" tiah a langhtermi hi a si. Paul nih 2 Corinthians 12:2 ah a chim. 3rd a um caah, 2nd le 1st zong a um tinak a si.
Bible ah Van/ Heaven a timi hi phun 3 in an tthen. 1nk cu Vulei in cunglei, minmei a umnak tiang hrawnghang khi "Van/ heaven tiah an auh. Phun dang in chim ahcun, vulei in cunglei paoh kha, "van' tiah auh a si ko. 2nk cu galaxies pawl hi Van/heaven tiah an auh. Exampel ah Arfi, thlapa le planet dang tampi hna khi Van/heaven tiah Bible ah a langhter. 3nk Van/Heaven cu Pathian umnak, "Van cung khua" timi cu a si. Hika zawn ciah hi langhter duhmi a si. Laimi tampi nih mah Pathian umnak, 3rd Heaven lei kai colh ding ahhin kan iruah! No!No! A silo. Aho hmanh hika "3rd Heaven" ahhin an phan lai lo. Pathian nih minung hna umnak ding ah a timhmi/ a remruatmi a si lo. (Ref: 1st Heaven;- Deut. 11:17, Deut. 28:12, Judges 5:4, Acts 14:17. 2nd Heavens;-Psalm 19:4, 6, Jeremiah 8:2,Isaiah 13:10. 3rd Heaven;- 1 Kings 8:30, Psalm 2:4, Matthew 5:16)
Zeitindah 3rd Heaven Kan Phan Lo Ding Kan Hngalh?
Jesuh a rak chuah hlan ahhin minung tampi an rak thi cang. Adam, Noah, Abraham, Jacop, Joseph, David tiah Pathian mi hna tampi an rak thi cang. Enoch le Elijah zong an nung in lak an si tiah kan hngalh. Mah a thi cangmi thlarau vialte hna hi, 3rd heaven/ Pathian umnak Vancung khua cu an phan maw? Phan hlah! Zeitindah kan theih.? Jesuh Khrih nih a chim. "Vancung in a rung ttummi Mi Fapa dah ti lo cu, aho hmanh Vancung i a kaimi an um bal lo/John 3:13" tiah Jesuh nih thate in a fehter ko. Asi ahcun, Abraham siseh, Jacop siseh, Jesuh chuah hlan ah a thi cangmi thlarau vialte kha, Khawika dah an phan dih? Khawika a phan hmasa ding in dah Bible nih a chim? kan zoh tthan lai.
Paradise Le Hell/ Tempolary Rest/Prinson
"Paradise" hi "mithi khua" tiah lai holh in ka leh. "Paradise" hi Pathian umnak "Van cung khua" siloin, mithi thlarau thawhter an si hlan chung umnak, an idinnak hmun a si. Jesuh cu Vailam cungah an tlai lio, a thaw a cat laite ah amah pawngah an thlai vemi, misual pakhat cu, "mah hihi kan chimh; nihin ah Paradise/ Mithikhua ah keimah sinah na um lai/Luke 23:43" tiah a ti. Cucaah, a fiangmi cu misual pa thlarau cu Paradise a phan. Jesuh Thlarau zong a phan ve. 2nk cu mirum pa le lazaruh tuanbia (Luke 16:19–31), Jesuh nih a chimmi ahkhan "Abraham thlarau" umnak a lang. Lazaruh le Abraham umnak hi "Paradise" a si i, mirum pa umnak hi "Hell" a si. An karlak ah hawrkuang thukpi nih a dan hna nain an a lang in an ichawnh khawh caah, aa tlaimi hmun a si timi a fiang. 3nk. Jesuh cu, thlarau in a nunnak cun thong i thlakmi thlarau hna sinah khan a kal i phung a chim/1 Peter 3:19.
Jesuh cu ni 3 le zan 3 thlan chung ah a um lio ah khan thlarau in Paradise ah a kal. Cun, thlarau in hell ah thongtla pawl sinah phung a va chim. Phung a chimnak hmun hi, Hell a sinak cu, 2 Peter 2:4 ah a lang. Cucaah, Mirum pa le Lazaruh tuanbia ning in Paradise le Hell hi hmun khat ah an um i, mithi thlarau vialte hi miding an si ahcun, Abraham sinah an phan i, misual an si ahcun, mirum pa sinah an phan tinak a si. Hi hmun hi zungzal in zungzal umnak hmun a si lo. Biaceihnak ni a phak hlan chung idinnak hmun a si. Misual hna umnak "Hell" hi, "hell" taktak a si rih lo. Thonginn a si.
Satan sinah a ttangmi vancungmi si hna seh, misual thlarau paoh cu, hika hell thong chung ahhin, biaceihnak ni hngak in thong thlak an si ko. Nihin ah Jesuh khamhnak na co ahcun, Abraham sinah na phan lai i, na co lo ahcun, "hell" thong ahhin na phan ve lai tinak a si.
Rapture/ Thianghlimhlawr
Paul nih thianghlimhlawr kong hi fiangte in a tial. Zeicatiah, Jesuh nih nan umnak ding hmun kan "timhtuahpiak" hna lai i, cun ka rak in lak tthan hna lai tiah, rat tthan lai nak kong, John 14:3 ah a chim. Jesuh cu tulio a umnak, van cung khua (3rd Heaven) in a rung ttum lai i, Vulei a phak hlan, minmei cung hrawng a phak ah khin Khri nunnak he a thimi vialte/ Paradise ah a ummi vialte an tho hmasa lai.(Thessalonians 4:17). Cun, cu caan lio ah a nungmi, Khri zumhtu vialte cu pumh an si lai i, mittthep ah an pum cu a rawk kho ti lomi, thlarau pum ah an ithleng dih lai i, van ah Bawi Jesuh cu an hung ton hna lai. (1Corinthians 15:51-53.) Jesuh zumtu vialte hi hi ni thawk in Jesuh he kan itthen ti lai lo. Amah sinah zungzal kan um cang lai. Hika zawnte ah theih awk cu, direct in zungzal kan umnak ding hmun thar ah a kan kalpi rih lai lo. Vuleicung hi kum 1000 a uk hmasa ve lai i, Vuleicung ahhin kum 1000 kan um rih lai tinak a si cu!
Hmasabik ah direct in Van cung khua, Pathian umnak hmun kan phan lo timi ka chimmi kha, hika thianghlimhlawr, mithi an tho hmasa lai i, a nung liomi zong ithelngnak ding event/ bible cacang nih hin a fehter.
Jesuh Cu Mount Olives A rak Tum Lai
Jesuh Khri cu nichuah lei Jerusalem ah a ummi, Olives tlang in Vancung khua, Pa Pathian umnak ah minmei tawm in a kai. Cun, a rak kir tik zong ah amah Olive tlang thiam ahhin a rak ttum te lai. (Acts 1:9-12 le Zechariah 14:4-5). Jesuh Khri a rak ttum hlan deuh te ah ahhin prophet ezekiel nih a chimmi, "armageddon" (World War 3) a um hmasa lai. Hi kong hi a dangte in tial a haumi a si. Bible bia hi an tling pah dih ngawt cang hna i, "mah armageddon" ral hi a tling chawm ding, tulio ah a lar bakmi, a chuak chawm ko lai e, an ti lengmangmi cu a si. Mah armageddone ral he jesuh tumnak hi aa pehmi event an si lai. Hi ral hi, kum 7 chung a um lai. Phun dang in, Judgement of the world or Renovation of the world tiah min an pekmi a si. Ka langhtak rih lai.
New Heavens and New Earth
Van thar le Vulei thar kong hi Isaiah 66, 2 Peter 3:12-13 le Revelation 21 ah aa tial. Hihi Jesuh a rak ttum tthan hnu ah kan umnak ding kong an si. Vulei thar ahhin zungzal in kan um cang lai. Vulei thar ahhin, Pathian n ih Jerusalem thar cu a sak lai. Pathian hrim hrim cu, a umnak 3rd heaven/ Vancung khua in a rung ttum lai i, mi hna sinah a um lai. mah Vulei thar/ Jerusalem thar ah kan umnak ding hi, laimi nih a awlnak in, "Van ram" tiah kan auhmi cu a si. Hika vulei thar ahcun, Kanmah tein kan lut rih lai lo. Jesuh nih a kan luhpi te lai. Jesuh he kan itong tthan hlan belte ahcun, tempolary in, Paradise/ mithi khua ah Jesuh tum lai kan hngak lai.
New Earth Kong Biahalnak A Um Khomi
New Earth kong ah Isaiah a chimmi le Revelation le Peter nih an chimmi hi an i khat hnga maw? timi hi scholars tampi nih an i almi a si. A cheu nih an idang an ti. A cheu nih aa khatmi kong an chim an ti ve. An i alnaka ruang bik cu,
Isaiah nih a tialmi Vulei Thar ahcun, nupi pasal ngeih a um lai. Ngakchia zong an um lai. Tar tlungte in an nung lai. Thihnak zong a um rih lai. Ngakchia le saram zong lente an icelh lai. Mithalo kha kum no deuh in an thi lai tbk minung umtuning ding fiangte in a tial. Tulio kan vulei sining he aa dangnak a um lo. Aa dangnak cu, a dai lai. Buainak a um lai lo. Asinain, Peter le Revelation tu ahcun, zungzal umnak ding vulei thar ti lawng bak an langhter. Hika zawnah ruah dingmi cu, Zungzal in a nung cangmi thlarau pum in nun hnu ahcun, nupi/pasal ngeih a um ti lai maw? Fa ngeih te a um ti lai maw? Jesuh he zungzal in um cang hnu ah, nupi pasal ngei a um ti lai lo ahcun, Isaiah nih a tialmi, vulei thar ah ah a um dingmi hi, zeibantuk minung dah an si lai? hihi hal awk tlak a si. Hi kong hi research tampi ka tuah i, bible chung thiam in, zumh awktlak answer a um. Bible cu, Bible in answer kawl a hau i, pakhat hmanh an ikalhlo.
Biafunnak: Jesuh a rak ttum tthan hlan ah a thimi paoh hi, misual he miding he paradise ah kan kal. Paradise ahhin miding umnak cu a nuam. Abhram tang cungah kan um lai. Misual belte cu, Hell thong ah an um lai. Jesuh a rak ttum tikah zumtu thlarau vialte an tho tthan dih lai. Cu lio caan ah a nungmi paohkha, thi loin an pum an ithleng lai. Asinain, misual hna, hell thong ah thlakmi cu an tho rih lai lo. Kum 1000 uknak a dih hnu ah thawhter an si ve te lai i, an biaceih an si lai. Cu hnu ah Satan le a party vialte cu, Hell taktak ah peih an si lai i, miding vialte cu, Jesuh he vulei thar/ Jerusalem thar ah kal a si te lai.(Revelation 20)
Note: A tawinak in tialmi a si tikah a bultan ngai. Armagadone ral, Kum 1000 uknak le Thutdan Rang biaceihnak vialte ka langhtak dih. Bible a relmi nih cun nan theithiam lai ka zumh. Nan pawm le pawmlo lehlam cu phungdang a si lai.
-Za Sang
