Hi ti kan i thencheunak a ruang cu Baibal kan pomning le kan zumhning aa dang cio i cu tikah bu khat in kan um ti kho lo. Trinity pawl nih Thumhkomh Pathian tiin an pom lioah Oneness nih Pa, Fa, Thiang Thlarau komh cu Jesuh a si tiin an rak pom. Jehovah Wedness nih Johovah le Jesuh tiin a dang tein an rak pom ve. Trinity pomning pakhat chung lawng hmanhah Vancung ah Pathum in kan hmuh lai ti le Pakhat in kan hmuh lai tiin an i thencheu chap rih hoi. Mah ti cun Khrihfa Biaknak Pakhat chungah kan i thencheu dih. Aa thencheu bikmi Biaknak a van si.
Zumh pomning aa dan ruangah Trinity lei nih Bible cang i char in cutin a si tiin Trinity zumh pomning a dik tiin a van tial. Oneness le Johovah Wedness nih van i thawh colh in, a si lo, cutin a si tiin Baibal i char in anmah zumh pom ningtu hi a dik, tiin an rak ti ve. Mah ti cun tlawnpal ah bia fakfakin Pumpak pakhat le pakhat kan i thuat, Dr le Dr, Pastor le Pastor le na lih lawng te, na pial sual cg, Baibal a zum lomi na si, cu e kha e tiin kan i soi, na zumh pomning a dik lo tiin a phuphun in kan i el hna i kan buai hna. Cu caah Khrihfa kan biaknak hi a buai taktak, a buai cemmi biaknak a si lai ka timi hi a si taktak ko rua ka ti.
Aa fiang lomi pakhat nih Trinity Zumhnak a pommi Saya pa kha a hal cun Saya pa nih a zumh pomning in a rak leh lai. Oneness a val hal le cu thiam. Johovah Wedness a va hal zongah cu thiam. Pual kha Baptis nih kanmah zumh ning a pommi a si an ti lioah UPC nih Pual cu kanmah zumhning in a pommi a si a rak ti ve. Johovah Wedness nih cu thiam..
Hi bantuk konglei ah hin a hlan deuh zongah kan rak buai ngai bal cang, nai tein kan van buai pah than. Biafak in Heresy ti hna in kan i phomh. Khrihfa biaknak pakhat hmanhah zumh pomning phun thum li in kan i then cu si kaw Vawlei cung Khrihfa dang le miphun dang hna zong hi kongah an rak buai bal cio lai i bia fakfak in an i ti bal cio hna lai ka zumh. Buai tlak zong cu a si ve hrim cu mu. Nain bia faktuk in kan i ti loding a biapi ngai. Pathian fa cio ah, na pial sual, Baibal na zum lo, Heresy na si ti hna in kan i ti hi cu aa dawhcah lo tuk. Pathian ruangah pakhat le pakhat kan i soi, aa rem komi zong kan i huat ding cu Pathian nih a duh lai ka zum lo. Cucaah kan i ti hna hmanhah midang zumh pomhning hnursuan loin bia ruah phun deuh le nemnak tein kan i ti ding a si. Pathian fa hna cu zei thil paoh a nemnak tein va tuah u tiin pei fial kan si kha. Cu ti si lo cun mah zumh pomning in dai ziar i zuam ah a tha..
Keizong Baibal ka rel hnu, Trinity le Oneness kong hi nai ah ka rak i fiang ve lo. Ka rak buai kho taktak. Ka lung a rak rawk tuk. Aho sin ah thla ka cam zong i fiang lo tiangin ka rak um. Baibal rel zong ka rak ngol chung. Nain ahohmanh ka va hnursuan hna lo. Tlawmpal hnu in ka van i fiang deuh than. Pathian nih a rem lo a ti ruangah a si lai. Ka dai bak! Nai an buai pah kong zongah kai thlak duh ti lo. A ruang cu "Minung nih anmah fimnak in Pathian hngalh khawh lo ding kha Pathian nih a fimnak in a rak tuahmi a si...." 1 korin 1:21. Pathian sining dihlak cu a ser chommi minung thlukin theih-hngalh khawh dih a si lo ti kha a cung Baibal nih a fianter ngaingai. Pathian cu theih-hngalh khawh dih a si lo caah a zumh in zumh ding tu a si. An chim ka theih balmi cu Kan khua Ngaphaipi ah pakhat pa nih Pathian sining theih-hngalh dih a duh i a rak i zuam. A nehhnu ah a hrut beh ti a si.
Ka Ruah Tawnmi
Buddist pakhat cu kum saupi Buddhist biaknak a zummi a si. Nai teah Khrih thawngtha a theih i Jesuh Khrih a van zumh i ka khamhtu le ka Bawipa tiah cohlan. Mah hi Jesuh a cohlan hnu, caan zei maw zat a kal hnuin Pathian sining, Jesuh nih ka Pa a timi, Phundang in Jesuh Le Pa, (Trinity le Oneness) kongah van i fiang loin a van buai pah te theo lai ti hi ka ruah tawn...
Zeiruang ko ah dah "Bawipa pakhat lawng a um, zumhnak pakhat lawng a um, tipilinnak pakhat lawng a um" Efesa 4:5 (Pathian Pakhat, Zumhnak Pakhat, Tipil Innak Pakhat) ti a si komi Khrihfa biaknak pakhat chungah hitluk hin kan i thencheu hnga????? Mah hi a sawhsawh te a si hrim lo. Pathian khuakhan a si tiin ka ruah i ka pom. Cu caah Trinity, Oneness, Johovah Wedness ti kong hna ah buai hi ka hrial cang. Baibal ning le keimah zumh pomh ning tein a um ka thiam cang.. Pathian nih a rem a ti cun Hikong ka zumh pomning tawi tein ka rak tial than te lai... Zei pipa a si lomi ka hmuhning ka tialmi lungsau in a rak ka rel piaktu cungah kaalawm..
-Satu(Bawi Khengmual)
