1. Minung le Pathian kan idannak pakhat cu Pathian cu pakhat a si nain, pum pathum in ai langh, pum pathum in rian a ttuan I, pum pathum in a um mi Pathian a si. Hihi minung ruahnak nih a phan kho lo. Cucu trinity ti a si. Trinity ti mi biafang hi Baibal ah a um lo. Tertulian nih "trinity" ti mi biafang hi hman ah a hman bik, a khen bik a ti caah a hman hmasa bik mi asi. Atu ahcun a tam deuh nih cun “A triune God “ ti ah an hman deuh cang. Asullam cu “Thum-komh mi Pathian pakhat” ti nak a si.
2. Kan biakmi Pathian pakhat ah hin Pathian sinak tlamtling tein a ngei mi pathum an um ti cu Baibal kan zoh ah a fiang. Pa Pathian cu Pathian sinak tlamtling te in angei. Fapa Pathian (Zisuh) cu Pathian sinak tlamtling te in a ngei ve. Thiang Tlarau Pathian zong Pathian sinak tlamtling te in a ngei ve. Eg. Zisuh (Fapa Pathian) cu Johan nih tipil a pek, Thiang Thlarau Pathian cu thuro bantukin a liang cung ah ai fu, Pa Pathian nih van in “hihi ka dawt mi ka Fapa a si” a vun ti fawn (Matthai 3: 11-17). Hi ka zawn ah hin Pa le Fapa le Thiang Thlarau a dang cio in voikhat lo ah an langh hi hmuh khawh a si. Kha Fapa, Thiang Thlarau le Pa Pathian kha Pathian pakhat an si. Cucaah kan biakmi kan Pathian cu thumkomh Pathian pakhat a si ti cu a fiang.
3. (A). Zisuh cu zeicadah Fapa Pathian kan ti? (1) Mary nih a pawi i a hrin mi Fapa a si caah a si. (2) Pa Pathian nih ka Fapa a ti. Cucaah Fapa Pathian a si. (B) Pa Pathian cu zeicadah Pa Pathian kan ti tiahcun (1) Zisuh nih ka pa a ti (2) Pa Pathian nih Ka Fa a ti ve (3) Kanmah nih kan Pa kan ti (4) Amah nih ka fale a Kan ti ve fawn caah Pa Pathian tiah kan auh nak a si. (C) Zeicadah Thiang Thlarau Pathian kan ti ve? (1) Bible nih Thiang Thlarau cu Pathian a si a ti (Lam. 5: 3-4). (2) Thiang Thlarau nih Pathian sinak tling te in a ngeih ve. Cucaah kan biak mi Pathian hi Pa, Fa, Thiang Thlarau pathum in a um mi Pathian pakhat a si. Vawlei minung nih cun nan lungpian a har ngai lai.
4. Cu thumkomh Pathian pakhat cu a min ah Zisuh a si maw? Bible zoh u sih. Kan ruahnak in zum hna hlah usih. "Mary nih fa a hrin i a min ah Zisuh an sak" a ti (Matthai 1: 21, 25). Pum pathum (Three persons) in rian a ttuan mi Pathian ah Thiang Thlarau hmangin Mary nih a pawi i a hrin mi nau te lawng hi Zisuh tiah min an sak mi a si. Thiang Thlarau hi zeitikhmanhah Zisuh ti ah min an sak bal lo. Pa Pathian zong hi Bible ah Zisuh ti in auh asi bal fawn lo.
5. Isai. 9: 6 ah Zisuh (Fapa Pathian) kong Prophet Isaiah nih achim mi ah hin amah cu "zungzal hmun mi pa" (The everlasting Father) ti a si lai ti mi khi Zisuh cu Pa Pathian a si tinak a si lo. Kan caah zungzal in pa le nih fale a kan zohkhenh bantukin a kan zohkhentu, pale bantuk in kan i bochan mi, umpi tu, fimchimtu, khuakhan pitu, bochan awk tlak a si lai ti nak a si. Zisuh hi Pa Pathian a si ko na ti ahcun, Zisuh nih Ka Pa a ti mi (Pa Pathian) khi na pu a si a hau hnga? Pa Pathian tu ngei lo in, Pu Pathian tu a ngeih mi na si ne hnga.
6. Mi tampi nihcun Biakam Hlun ah Pa in ai langh I, Biakam Thar ah fapa in ai langh I, atu ahcun Thiang Thlarau in ai langh. Pathian cu Pakhat lawng in ai langh ko a ti mi, mitlau pawl, an um lengmang. Kan theih ding mi cu Biakam Hlun zongah Pa, Fapa le Thiang Thlarau in ai langh. Sernak (creation) zong ah an pathum in an ser tti, rian an ttuan tti. Cun Biakam Thar cung ah Pa, Fapa le Thiang Thlarau, pathum tthiamtthiam in ai langh I, atu kan caan zong ah hin Pa le Fapa le Thing Thlarau tthiamtthiam in ai langh I rian a ttuan. Zisuh nih a thisen in an tlanh I, Pa Pathian nih an cohlan I, Thiang Thlarau nih an um pi. An pathum te in rian an ttuan peng.
7. Cu Pa le Fapa le Thiang Thlarau ahcun Fapa Pathian hi minung sinak hrawm in vawlei ah a rak rat caah min an sak I cuc Zisuh tiah min an sak. Thiang Tlarau kha zeitikhmanhah Zisuh ti ah min an sak bal lo I, Pa Pathian zong kha Zisuh ti a si bal fawn lo. Fapa Pathian (The second person of trinity) lawng hi Zisuh a si. Pa le Fapa le Thiang Thlarau ai komh ah Pathian pakhat a si mi zong hi Zisuh tiah an auhnak Baibal caang nan hmu kho lai lo.
Aung Thang
Note: Catialtu Saya Aung Thang nih comment an tuahmi ka'hmuh khawh tawn lo caah News Agency in thlah lo ding in a kan nawl. Zamh tlak tuk a si ko caah FB cahmai ah comment hna a hmuh khawhnak caah a min ka tag i ka rak thlahm
