Chan Tiluan ai-thlen bang laimi nih tangka kan kawl ningcang zong duhsah tete in avan i thleng viahmah ve. Cu lak ah Laimi nih tangka kan kawl ningcang ai-thlennak kan hmuhnak bik hmun cu, Pathianbia in an si.
Hlan deuh ahcun Pathianbia chimnak in tangka kawl an rak um ttheo ve (zapi tinak asi lo). Cu zong cu an pawcawmnak ah a tthat ter deuh ko ahcun, sawi leen awk cu an si hnga lo. Evan cheukhat cu tangka kawlnak ah Pathianbia an hman timi hi mikip hmur ah atlai ttheo tawn. Nain Evan cu anmah pumpak hrimhrim nih harnak tuar le caanpek in an rak aupi i, micheu caah hlawknak zong tampi arak chuahpi taktak ko, cun micheu caah buu tthencheunak zong cu arak chuah ter ve tthiamthiam ve. Chim duhmi cu tangka kawlnak ah Pathianbia an hman ko hmanh ah, an nih cu anmah thazang chuah in an tuahmi asi caah hmuh awk ah an i tlak kan ti ko hnga.
Nain tuchan mino tampi nih kan tangka kawlning bal cu lungrawk ngaingai asi ko. Media min kan i bunh riangmang i, heh tiah tangka kan kawl cang, cucu thilttha ngai cu asi ko. Amah bal te, Pathian min hmangin media nih heh tiah tangka kawl cio asi. Media min ai bunhter vemi, puanzar phen in tangka duh ah Pathian min le kan zumhnak a hrawk khotu ca, santleihnak a neibak lomi nan vorh peng komi cu ngeihchia ngaingai cu asi.
Mah tein catlang hmaikhat ttial hmanh zuam loin, facebook timeline sawhsawh ah tarmi ca kha copy hei tuah riangmangin, mab web ah tar a hmangmi Media min ai-bunh termi laimi kan tam ngai cang. Hihi laimi kan zawtnak lak ah ttih a nungcemmi sii-ai nih damh khawh lomi zawtnak phunkhat asi.
Puanzar phen in a aukhuangmi hrat cu, nan duhpoh in cattial khawh cu asi, mipi nih kan in thei kho fawm hna lo cuteh. Nain an hmu zungzaltu Pathian a um tikha na philh lo dingah cah kan duh. Na tangka hmuhminak in na tuhmi thei na zuun te dingkhi cuanh ziathiam law tthathnemnak tampi asi deuh lai.
Ukpi Cz
