Bible ah pa a sam a sau mi hna hi Absolom le Samson an si. Absolom hi a sam a sau caah ai dawh. Asinain a sam a sau mi nih a thah. Samson hi a sam a sau. Zeicatiah Pathian nih a thawnnak kha a sam ah a chiah caah sam meh a senh lo. Zisuh hmanthlak an suai tikah Zisuh hi samsau lawngte in an suai. Hihi asi hnga maw vun ruat ve tuah!
1. Bible Biakam Thar chan ahhin zumtu ttha mi hna cu an sam an i zuah hna lo. An sam a sau lo.
2. Zisuh zultu hmanthla an suai mivial samtawi in an suai dih hna. Zisuh hmanthlak vial samsau in an suai. Bible ah Zisuh a sam a sau ti a um lo. A sam a tawi ti zong cu a um ve hlei lo. asinain:
3. Paul nih, "Thil umtuning ah hin, Pa nih sam sau cu ningzak a si" a ti (IKor. 11: 14). Zisuh kha a sam rak sau selaw Paul nih hitihin ca a ttial hnga maw? English Bible ah cu "Disgrace" ti a hman i a sullam cu "Lost of reputation and respect" tinak a si i Laiholh cun "minthannak le upatnak a thlau" tinak khi a si.
4. Biathlah ah "Khawchia cu nu bantukin an sam a sau" (Biathlam 9: 8) ah ati tthan. Zisuh hmanthlak hi nu bantuk, khawchia bantukin kan suai ko ne lo maw?
5. Zisuh hi samsau in an suai tikah "nu" a lo. Zisuh cu pa a si caah pa a lawh ding asilo maw? Nudawk padawk kan lawhter ding a si lo.
Cucaah Jesus hi a sam a sau ka zum lo
Rev. Aung Myint Thang
