Vailam hi mikip nih kan duh ngai i a lar tuk. Thi, Hnatonh, Kutkhih, Angki ah a phunphun in Vailam tung kan tuah. Biakinn zongah dawh ngaiin kan tar, kan inn chung zongah kan tar, kan ram tlang tampi ah ngan ngai in kan ser i kan phun. Hla zong in Vailam thangthatnak le hlorhnak hla tampi kan phuah. Mah ti cun a phunphun in Vailam kan thangthatnak i kan uarnak le kan sunglawihnak kan langhter.
Cu tikah Vailam hi Jesuh nakin kan hlorh deuhmi le kan thangthat deuhmi a van lo. Vailam hlorh le thangthat hi Jesuh hlorh le thangthat a si maw ti ruah awk zong a van um. Vailam hi Jesuh ah a ruatmi zong kan um pah hna.
Hla pakhat ah 'Zungzal nunnak petu Vailam tah' ti tiangin an phuahmi hna a van um. A phuahtu min cu ka tial lai lo. Bantuk phuahmi hla hi Baibal ning a si hrim lo. Vailam hi kan nunnak a si lo i Vailam nih nunnak zong a kan pe kho hrim lo. Kan damnak zong a si lo fawn caah Vailam hi a herh loah thangthat cawisan tuk ding a si lo. Jesuh tu hi kan nunnak le kan damnak, kan zeizong a si caah Vailam si loin Jesuh tu kan Cawisan i kan thangthat ding a si. Zei maw caan ah Jesuh hlorh loin Vailam tu kan hlorh tuk tawn. Tial Uk Hla phuahmi Vailam hla zong kha Vailam ti khi thuk deuh Jesuh ti duhnak a si an ti cio. Nain Vailam zawn ah Jesuh ti dairek in hmanh colh cun chim awk um lo a si hnga..
Kan i fiannak ding ah-
Vailam hi Jesuh a si lo. Vailam cu Vailam a si ko. Jesuh cu Vailam a si hlei lo. Jesuh cu Jesuh thiam a si ko. Jesuh lo cun Vailam hi zei pipa a si lo i sullam a ngei lo. Baibal ah Pual nih Vailam kaa phorhlaw pi lai a ti lo. "Khrih Vailam" tiin Khrih zong a telh chih.
Vailam hi zeitin dah a chuahning a si. Zei caah ser a rak si tiah cun misual thahnak le hremnak caah ser a rak si. Vailam cungah Jesuh rak thi hlah seh law Vailam hi a lar hnga lo. Vailam hi Kan zeihmanh a si lo. Jesuh thihnak men a si. Jesuh tu kan zeizong a si. Vailam hi kan i lawmpi ding a si lo. Jesuh tu kan i lawmhpi ding a si. Amen.
Jesuh le vailam ti tial aa danning-
Jesuh cu 'jesuh' tiin 'j' a hme hmanin tial awk a tha lo i tial phung zong a si lo. 'j'esuh' tiin kan tial cun a palhmi tial ning a si cang. Nain 'vailam' cu 'v' a hme hman in tial theu a si i tial phung zong a si.
Hi catialmi kongah a lungtling lomi le a ka dohmi hna nan um kho men nain a dikmi ka tial ko tiah ka zumh.
Catialtu: Bawihrin Sang Khengmual
_______________________________
Hi catialmi kong he pehtlai in comment
Thawng Ceubik Khenglawt: *
Vailam = Kalalam
Van Bawi Lian: A hman tuk misual tah nak a rak si tak ko.a hman zia kan thiam deuh cu hau ko kati ve.Lo cu Hrei in kan vah ko na in hrei min in kawh a um hlei lo ZiSuh min tu lang khun ko seh
Pa Lian: ... A dik kho tuk. Taktak ah cun vailam hi Greek original ning in kan leh ah cun vallam ti aum lo cu.. thing, thing pheng, thin kung ti dawh a si cu.. chiatserhnak dawh a si cu.
Deuteronomi 21:22 "“Cun mi pakhatkhat nih thihnak tlak sualnak a tuah i nan thah i thingkung cungah nan thlai ahcun, "
cucu dawh spesial in kan saih i kan i awih.. tlanghna rit le rit loin kan put. Kan tar. Vailam ah athihmi Jesuh tu hi i phorhlawtpi le i uangpi ding lawmhpi ding cu a si.Deuteronomi 21:23 "a ruak cu thingkung cungah cun zan khuadei in a um lai lo, sihmanhsehlaw cu ni lila ah cun nan phum lai, zeitintiah thlaimi cu Pathian chiatserhmi a si; ro caah Bawipa nan Pathian nih an pekmi hna nan ram cu nan thurhhnawmh lai lo.
"Vailam hi cu thil ti khawhnak angeihnak pakhat hmanh aum lo. Thing in tuah mi asi le thing kha asi ko. Thir in sermi a si le thir asi ko. Asaui in suaimi asi le suaimi asi ko. Khairiat in ser mi asi le khairiat kha asi ko. Vailam cungi athi mi Jesuh kha hi a si. Vailam nih zeihmanh atuah khomi aum lo. Cucu ralttha tein ka phuan..
KL Lai Hrin Dawt: A dik ngaingai na vun langhtermi (Mathai 10:38) Ahohmanh a vailam tahnak kha aa put i ka hnu in a ka zul lomi cu ka mi si awk ah aa tlak lo.a ti bang Khrih nih a chim duhnak le a firlhfiah duhnak taktaknak cu vailam thing thluan kha a sawh duhmi silo.A mah Jesuh Khrih chung i theihmi sile zeitik caan paoh ii Khrih zahpi lo cohlan i nunpi tu kha asi.vailam hi cu kanmah sualnak thianhnak dingah aa tah sawh bia tu khi asi/vailam cu a fawinak in kan chimh ahcun misual mi hna kan ca'ah thlainak thing khan menmen asi.i phorhlot pi ding le i zahpi loding le nun pi taktak ding cu vailam kha silo in.#Jesuh Khrih tu kha asi.Kaa lawm.
