Zultu nih Jesuh Interview an tuah lio ah Jesuh nih a lehmi hna pinah bia a cahmi hna hi zumtu nih rel nolh tthan lengmang awk ah a tha taktak. Cucaah, zumtu kan si bantuk in Jesuh nih caan dong kong a chimmi le a biacah in thazaang lak tthan awk ah ka taar. Rel huam loin lanhtak duhnak thinlung na ngei sual ahcun Jesuh zultu na sinak ah adeu maw na si atak mahlemah biahalnak ituah colh ding:!
Jesuh le zultu hna cu Jerusalem i Biakinn chung khan an chuak i an kal pah cun "Biakinn le Biakinn kulh vialte hi nan hmu ko hna lo mei? Hi biakinn hi a rawk te lai. Tuhi nan hmuhmi lung pakhat hmanh hi a umnak kel ah a um te lai lo; an dihlak tein hrawh an si dih lai" tiah a ti hna. Cuticun Olive tlangpar lei ahcun an kal. Olive tlang an phak tikah zultu nih Jesuh cu interview an tuah. Biakinn rawh lainak kong na chimmi hi zeitik ah a si te lai? Cun, na ratnak ding hmelchunhnak le atu chan donghnak ding hmelchunhnak ah zeithil dah a um hna lai? tiah an hal. Jesuh nih a lehmi hna cu:
“iralring ulaw ahohmanh ihlenter hlah u. Zeicahtiah ka min in mi tampi an ra lai i ‘Keimah hi Messiah cu ka si,’ tiah an ti lai i mi tampi kha an hlen hna lai. Lamnai i an ituknak/idohnak thawng le lam hla i an itukna/idohnak thawngpang kha nan theih hna lai; sihmanhsehlaw nan awlokchong hlah u. Cu bantuk thil cu an um hrimhrim awk a si ko. Asinain a donghnak a phan cang tinak a si lo. Ram khat le ram khat an i do lai. Peng khat le peng khat an i tu lai. A kenkip ah mangttam le lihnin a tlung lai. Hi thil vialte hi nauchuah lai nganfah a hmasa bik bantuk an si" tiah a chim.
Jesuh nih a lehmi hna ahhin "Hi thil vialte hi nauchuah lai nganfah a hmasa bik bantuk an si" a timi hi iching chiah awk tlak taktak cu a si. I tuknak, Idonak, mangttam le lihnih tbk hi nau chuah lai pawfah a caan a naih deuhdeuh bantuk khi a si lai tinak a si i caan donghnak a phan dengmang timi cu wawleicung thil umtuning in nan rak hngalh khawh lai tinak a si. cun, a pehmi cu:
“Cun, mi nih an in tlaih hna lai i dantat awkah an in chanh hna lai i an in thah hna lai. Keimah ruangah mi vialte nih an in huat hna lai. Cu caan ahcun mi tampi nih an zumhnak kha an hlawt lai i pakhat le pakhat an i rawi lai i pakhat le pakhat an i hua lai. Cun nal profet tampi an chuak lai i mi tampi an hlen hna lai. TThat lonak kha a karh tuk lai caah mi tampi cu an dawtnak kha a dai lai. Sihmanhsehlaw a dongh tiangin a fekmi cu khamh an si lai. Cun, miphun vialte hna ca i tehte si awkah Vancung Pennak kong Thawng ttha hi khuazakip ah chim a si lai. Cun, cu hnu lawngah cun donghnak cu a si lai!' tiah a ti.
"Cu hnu lawng ah donghnak cu a si te lai" a ti tikah a caan/date hi a chim ti lo. Cutikah zultu hi an biahal pang ngai ve dawh a si. Ziah, a date/nicaan cu na kan chim kho lai lo maw? tiah CNN i Larry King biahal in hal chap hna sehlaw a dawh! Zeicatiah Jesuh nih a nicaan/date kong cu hitihin a leh chap hna:
“ Cu Ni le cu Caan [date] cu zeitik ah dah a si lai ti kha ahohmanh nih an hngal lo. Vancungmi zong nih an hngal lo. Fapa zong nih a hngal hlei lo. Pa lawnglawng nih a hngalh, tiah a ti hna. " Mi Fapa a rat cu Noah chan i thil umtuning bantuk kha a si lai. Tilian a tlun hlan, Noah lawng chung i a luh ni tiang kha, an ei an ding an itthi an ium i tilian a hung tlun taktak i a fenh dih hna hlan tiang kha cu zeihmanh an hngal lo' tiah a ti.
Cun, Jesuh nih a von peh rihmi pakhat cu: Mi fapa a rat tik caan ahcun mi pahnih lo ah rian a ttuanmi hna lakah pakhat cu kalpi a si lai i pakhat cu nganhta a si lai. Nu pahnih sum a sumi hna lakah pakhat cu kalpi a si lai i pakhat cu nganhta a si lai. Cucaah nan Bawipa a rat lai ni nan hngalh lo caah ralringte in um ko u. Hihi philh hlah u: Inn ngeitu nih mifir a rat lai caan kha hngal seh law hngilh lote in a rak um hnga i mifir kha a inn chungah a luhter hnga lo. Cu ruangahcun nannih zong timh ciate in nan um zungzal awk a si. Zeicahtiah Mi Fapa cu nan irin lo caan ah khin a ra ko lai." tiah a leh hna.
CC: Mathai 24: zultu le Jesuh Interview
Zasang Cinzah
