Laimi kan tthanchonak le thil tthit kan thiamnak hna hi a sau rih lo. Upa biachim cun nizan naite ceo in khan a si. Hi hnu hmailei ah thiltthit kan thiam chin lengmang lai i atu hnu kum 30 hrawng ahcun kan Chin thilthuam hi zeimui dek a va ken te hnga i, phun zeizat dek a va chuah te hnga.
Micheu nih cun «Anmah thil a simi cu duh paoh in tuah khawhnak nawl an ngei ko si.» kan ti men ko lai. A dik. An ngei ko. Sihmanhsehlaw miphun nih kan i ngeihmi thilri a simi hi kan upat awk cu a si lo maw? Thildang sawhsawh bantuk in kan hman a si ahcun zeidah «Chin thilthuam» asinak cu a si ne hnga? «Chin thilthuam» tiah min kan pekmi hi sullam a ngei ne hnga maw? A cung i ka bia bang «Chin thilthuam azawng le ttial» tiah min pek ah aa tlak deuh ne lai hi ta. Police nih thilthuam an ngeih, sianginn a kaimi nih thilthuam an ngeih ve, ralkap zong nih an ngeih i miphun zong nih kan ngeih ve. Cucaah kan phaisa in cawkmi si ko hmanh sehlaw thil dang sawhsawh bantuk in mah dawhnak le tangka hmuhnak ca men ah kan hman awk cu a si hrim hrim lo.
Chin thilthuam a phun phun in chuah le a silomi tiang chuah nak in thilthuam dang dang tu aa dawh khawh chung dawh in ser i «Made in Chin» tiah min pek i miphun dang sin zong ah kan zuar ve deuh awk a si. Miphun dang nih an kan hngalh deuhnak zong a si lai. Cu si lo in Chin thilri rumro tongtiral in ral hi hmailei kan thilthuam caah ttih a nung.
A cheu nih: «Kan thilthuam a phun phun in a chuah cu a ttha ko cu ta. Kan dawt caah le kan sunhsak caah pei a si leh cu. Cun chantiluan hoih in kan luang ve tinak a si ko.» kan ti. Kam khat lawngin tuak ahcun a dik ngaimi a lo nain mit khat lawng au loin mit hnih rak au hi a biapi tukmi a si hlei ah atu ca lawng mit au loin hmailei ca zongah kan au chih a herh. Kan au lo a si ahcun hmailei ah kan rawk viar lai. Chin thilthuam zong hi chantiluan hoih in kalpi ve awk a tampi. Tahchunnak ah biar le lupawng he lawng um chan a si ti lo bantuk in angkileng le bawngbi tibantuk kan sermi hi «a ttha tuk» cu asi lo nain a chia lo. Nain «Chantiluan» timi i tlaih riangmang in kan thilthuam pi asimi thil dang sawh sawh bantuk men in chan ti kan luanter ve a si ahcun kan thilthuam caah ral nganpi pakhat kan serpiak a si.
Atu hmanthlak nan vun hmuh bang hin kedan zong cu kan hun ser manh hoi cang i, ka zoh lengmang ah a dawh zong aa dawh lo i uar zong a um lo. A zohtu a chia chin. Norway ram ah ka um i an miphun ni ah an kedanh cu ka hmuh leng luang hna nain an thilthuam azawng le a ttial hrim an hmang lo. An thil he aa tlakmi kedan a nakmi an hman ko. Kanmah Chinmi hna nih Chin thilthuam azawng le a ttial hmang in kedan kan sermi hi cu thil dawh a si bak lo. Cunak cun phundang nawn tein kedan pakhat kan thilthuam he aa tlakmi ser hna usihlaw cucu kan hman hnga i thil ttha deuh tuk a si hnga.
A donghnak ka biacah:
- Chin thilthuam duh paoh in kan tuah le kan ttamh deuh paoh cu a ttha ko cu ta a timi paoh rawl nan ei lai ah nan meh kha cite cuai khat, aihre cuai khat le chumhmuk cuai khat in vun peih te ulaw vun ei te uh. Cuticun «ttamh tuk» a tthat lonak nan vun hngalh te lai.
Catialtu: Ro Land Thang Fambawl
